कोरोना समाचार/टीकाकरण
प्रदेस म कोरोना संक्रमण के दर सरलग घटत हे। राज्य म पाॅजिटिविटी दर गिरके दू दशमलव तीन प्रतिसत होगे हे। काली होय करीबन पैंतालीस हजार सैंपल के जांच म एक हजार चैंतीस लोगन संक्रमित पाय गेहे। प्रदेस म अब तक नौ लाख चैव्वन हजार तीन सौ नब्बे मरीज स्वस्थ हो चुके हे। एमा ले करीबन अस्सी प्रतिशत मरीज ह होम आइसोलेशन म इलाज करा के कोरोना ल मात देहे। वर्तमान म सत्रह हजार ले जादा मरीज मनके इलाज आने-आने अस्पताल अउ होम आइसोलेशन म चलत हे।
इही बीच, प्रदेस म लोगन मन म टीकाकरण ल लेके खासा उत्साह देखे जात हे। अब तक प्रदेस म अट्ठारह ले चवालीस बछर के आयु वर्ग के नौ लाख नौ हजार ले जादा लोगन ल कोविड वैक्सीन लगाय जा चुके हे। उहें, काली स्वास्थ्य कर्मी, फ्रंटलाइलन वर्कर्स अउ पैंतालीस बछर ले जादा आयु वर्ग के करीबन छह हजार पात्र लोगन ल टीका लगाय गीस। अब तक प्रदेस म सबो आयु वर्ग के बहत्तर लाख सोलह हजार ले जादा लोगन ल कोरोना के टीका लगाय जा चुके हे।
शासकीय कर्मचारी-उपस्थिति
राज्य सरकार ह कोरोना संक्रमण के स्थिति म सुधार ल देखत अब राज्य के सब्बो सासकीय कार्यालय मन म अवइया चैदह जून ले सब्बो श्रेणी के अधिकारी अउ कर्मचारी के उपस्थिति जरूरी कर देहे। सामान्य प्रसासन विभाग डहार ले ए संबंध म सबो विभाग, कलेक्टर अउ विभागाध्यक्ष के निरदेस जारी कर दे गेहे। निरदेस म केहे गेहे कि सबो सरकारी कार्यालय मन म अधिकारी अउ करमचारी मन ल कोरोना गाइड लाइन के नियम के पालन करना होही। मास्क लगाना, सारीरिक दूरी बनाय रखना अउ सैनिटाईजर के समय-समय म इस्तेमाल करना जरूरी होही।
हाईकोर्ट-टूलकिट मामला
छत्तीसगढ़ उच्च न्यायालय ह टूलकिट मामला म पूर्व मुख्यमंत्री डाॅक्टर रमन सिंह अउ भाजपा के राष्ट्रीय प्रवक्ता संबित पात्रा के याचिका उपर फइसला सुरक्षित राखे हे। अदालत ह ए मामला म राज्य सासन ल तीन सप्ताह के भीतर जवाब पेस करे के निरदेस देहे। खबर के मुताबिक टूलकिट मामला म दस्तावेज साझा करे ल लेके पूर्व मुख्यमंत्री डाॅक्टर रमन सिंह अउ भाजपा के राष्ट्रीय प्रवक्ता संबित पात्रा के खिलाफ राजधानी रईपुर के सिविल लाइन संग आने-आने थाना मन म एफआईआर दर्ज कराय गे रिहीस, जेला रद्द करे के मांग ल लेके बिलासपुर हाईकोर्ट म याचिका लगाय गेहे।
मुख्यमंत्री-भूमिपूजन
मुख्यमंत्री भूपेश बघेल ह आज रईपुर म वर्चुअल माध्यम ले राजनांदगांव अउ धमतरी जिला म आने-आने विकास कारज के लोकार्पण अउ भूमिपूजन करीन। राजनांदगांव जिला म ओमन ह पांच सौ छप्पन करोड़ छियासी लाख रूपिया के लागत के एक सौ बयानवे आने-आने विकास कारज के सिलान्यास अउ लोकार्पण करीन। इही तरह धमतरी जिला म मुख्यमंत्री ह दू सौ इकहत्तर करोड़ इंक्यावन लाख रूपिया के लागत के दू सौ सत्तर विकास कारज के लोकार्पण अउ भूमिपूजन करीन।
उहें, मुख्यमंत्री ह काली मुंगेली अउ बेमेतरा जिला ल चार सौ उनचास करोड़ रूपिया ले जादा के विकास कारज के सौगात दीहीं।
छत्तीसगढ़-नई फिल्म नीति
संस्कृति मंत्री अमरजीत भगत ह कहिन कि छत्तीसगढ़ म नवा फिल्म नीति के मसौदा तैयार करे जात हे। प्रदेस के नवा फिल्म नीति देस म अलगे होही। ए नीति ल आने-आने राज्य के फिल्म नीति मनके अध्ययन करके तैयार करे जाही। एखर ले प्रदेस के फिल्म निर्माता-निर्देशक, कलाकार, तकनीशियन अउ फिल्म जगत ले जुड़े सबो लोगन मन ल राष्ट्रीय अउ अंतर्राष्ट्रीय स्तर म एखर लाभ मिलही। श्री भगत ह कहिन कि छत्तीसगढ़ी फिलिम के माध्यम ले इहां के कला, संस्कृति अउ पंरपरा ल संजोय के काम होही। उहें, प्रदेस के कलाकार मन ल एक ठिन बड़का मंच अउ अवसर मिल सकही।
संस्कृति मंत्री ह काली प्रदेस के छत्तीसगढ़ी फिलिम निर्माता निरदेसक अउ कलाकार के संग छत्तीसगढ़ म नवा फिल्म नीति तैयार करे बर वर्चुअल माध्यम ले विचार-विमर्श करीन। ए मउका म निर्माता-निर्देशक अउ कलाकार मन ह अपन-अपन सुझाव दीन।
धरना-प्रदर्शन
पेट्रोल-डीजल अउ एलपीजी गैस के कीमत म बढ़ोतरी के विरोध म प्रदेस कांग्रेस ह आज राजधानी रईपुर के संग प्रदेस के सब्बो विकाखंड मुख्यालय म धरना-प्रदर्शन करीन। ए दउरान पार्टी पदाधिकारी अउ कार्यकर्ता मन ह पेट्रोल पंप के तीर सांकेतिक रूप ले विरोध प्रदर्सन करीन।
राजधानी रईपुर म प्रदेस कांग्रेस अध्यक्ष मोहन मरकाम ह शास्त्री चैक स्थित पेट्रोल पंप के सामने धरना-प्रदर्शन करीन। उहें, पार्टी के राष्ट्रीय सचिव विकास उपाध्याय ह घलो धरना प्रदर्शन म भाग लीन। इही तरह, विधानसभा चैक स्थित पेट्रोल पंप के तीर धरसीवां के विधायक अनिता शर्मा के नेतृत्व म पार्टी कार्यकर्ता मन ह धरना दीन।
प्रदेस के कतकोन जिला अउ ब्लाॅक मुख्यालय मन म घलो कांग्रेस पदाधिकारी अउ कार्यकर्ता मन डहार ले पेट्रोल पंप के सामने धरना-प्रदर्शन करे जाय के खबर हे।
लोकवाणी
मुख्यमंत्री भूपेश बघेल के मासिक रेडियो वार्ता ‘‘लोकवाणी‘‘ के अट्ठारहवां कड़ी के प्रसारण परन दिन तेरह जून के करे जाही। मुख्यमंत्री लोकवाणी म ए बखत ‘‘राजीव गांधी किसान न्याय योजना‘‘ के विस्तार उपर प्रदेसवासी मन ले गोठबात करही। लोकवाणी के प्रसारण छत्तीसगढ़ स्थित आकाशवाणी के सब्बो केन्द्र, एफ.एम. रेडियो अउ क्षेत्रीय समाचार चैनल ले बिहनिया साढ़े दस बजे ले ग्यारह बजे तक होही।
स्वास्थ्य समीक्षा
स्वास्थ्य मंत्री टी.एस. सिंहदेव ह काली विभागीय अधिकारी मनके संग स्वास्थ्य अउ परिवार कल्याण, राष्ट्रीय स्वास्थ्य मिशन अउ छत्तीसगढ़ मेडिकल सर्विसेस कार्पोरेशन के कारज के समीक्षा करीन। बइठका म श्री सिंहदेव ह प्रदेस म कोरोना संक्रमण के स्थिति ल नियंत्रण म देखत अस्पताल मन म पूरा सतर्कता राखत नान कोविड सेवा म घलो तेजी लाने के निरदेस दीन। ओमन ह सरकारी अस्पताल म ब्लड बैंक के संख्या बढ़ाय बर किहीन।
बइठका म स्वास्थ्य मंत्री ह राज्य के अइसन सबो अस्पताल, जिहां शिशु रोग विशेषज्ञ पदस्थ हे, उहां एस.एन.सी.यू. स्थापित करे के निरदेस दीन। ओमन प्रदेसभर म कुष्ठ रोग उन्मूलन बर करे जात कारज म तेजी लाने बर कहिन। संगेसंग बरसात के दिन म पीलिया अउ डेंगू के खतरा ल देखत एखर ले बचाव बर स्वास्थ्य यांत्रिकी विभाग, नगर निगम, नगर पालिका के संग मिलजुल के कार्ययोजना तैयार करे के निरदेस दीन।
माओवादी-आत्मसमर्पण
सुकमा जिला म आज एक झिन इनामी समेत आठ माओवादी मन ह आत्मसमर्पण कर दीन। एमा एक झिन दंपत्ति घलो सामिल हे।
खबर के मुताबिक ए माओवादी मन ह कलेक्टर, पुलिस अधीक्षक अउ सी.आर.पी.एफ. के डी.आई.जी. के सामने आत्मसमर्पण करीन। ए दउरान ओमन ल प्रोत्साहन राशि के रूप म दस-दस हजार रूपिया दे गीस।
विद्याचरण शुक्ल-पुण्यतिथि
पूर्व केन्द्रीय मंत्री स्वर्गीय विद्याचरण शुक्ल के आज पुण्यतिथि हरय। ए मउका म राजधानी रईपुर संग प्रदेसभर म आने-आने कारीकरम आयोजित करके स्वर्गीय शुक्ल ल श्रद्धांजलि दे जात हे। मुख्यमंत्री भूपेश बघेल ह अपन निवास कार्यालय म स्वर्गीय शुक्ल के फोटू उपर फूल चढ़ाके ओमन ल नमन करीन। ए मउका म मुख्यमंत्री ह कहिन कि छत्तीसगढ़ बर स्वर्गीय विद्याचरण शुक्ल के योगदान ल कभू नइ भुलाय जा सकय।
ओति, राजधानी रईपुर म महापौर एजाज ढेबर ह निगम मुख्यालय के सामने स्थित उद्यान परिसर म स्वर्गीय शुक्ल के प्रतिमा उपर फूल चढ़ाईन।
दुर्घटना
राजनांदगांव जिला म काली होय एक ठिन सड़क दुर्घटना म चार झिन माईलोगिन मजदूर मनके मउत होगे। उहें, ग्यारह आने मजदूर घायल होगे हे।
खबर के मुताबिक डोंगरगांव थाना क्षेत्र के अंतर्गत अर्जुनी अउ रातापायली गांव के बीच काली संझा एक ठिन चारपहिया वाहन अनियंत्रित होके सड़क किनारे पेड़ ले जाके टकरा गे। ए हादसा म वाहन म सवार चार झिन माईलोगिन मजदूर मनके मउका म ही मउत होगे। उहें, हादसा म घायल मजदूर मन ल अस्पताल म भर्ती कराय गेहे।
अंतर्राष्ट्रीय योग दिवस
अंतर्राष्ट्रीय योग दिवस के मउका म इक्कीस जून के राज्य म छत्तीसगढ़ वर्चुअल योग मैराथन के आयोजन करे जाही। एला लेके प्रदेसवासी मन म बहुत जादा उछाह देखे जात हे। मैराथन म सामिल होय बर अब तक चालीस हजार ले जादा लोगन मन ह आॅनलाइन पंजीयन कराय हे। मैराथन म हिस्सा ले बर प्रतिभागी पन्द्रह जून तक आॅनलाइन पंजीयन करा सकत हे।
मौसम
अउ अब पेस हे मौसम के हाल..
दक्षिण-पश्चिम मानसून के छत्तीसगढ़ म आय के संग राज्य के कई जगह म बारिस के दौर सुरू होगे हे। आज राजधानी रईपुर संग कई ठिन इलाका म बरसा होय के खबर हे। मौसम विभाग ह अवइया चैबीस घंटा के दउरान प्रदेस के कुछेक स्थान म मध्यम ले भारी अउ एक दू स्थान म भारी ले अतिभारी बरसा होय के चेतावनी देहे। भारी वर्षा के क्षेत्र मुख्य रूप ले मध्य छत्तीसगढ़ म रेहे के संभावना हे। संगेसंग प्रदेस के कुछेक स्थान म आकाशीय बिजली गिरे के घलो आसार हे।
मौसम विज्ञानी एच.पी. चन्द्रा ह बतईन कि एक ठिन निम्न दाब के क्षेत्र उत्तर पश्चिम बंगाल के खाड़ी अउ ओखर ले लगे ओड़िसा, पश्चित बंगाल तट के उपर स्थित हे। उहें, चक्रीय चक्रवाती घेरा घलो बने हे। संगेसंग अरब सागर ले प्रदेस म नमीयुक्त हवा घलो आवत हे। एखर असर ले बदली-बरसा के स्थिति बने हुए हे।