निःशुल्क चावल
प्रदेस के गरीब परिवार मन ल जुलाई ले नवंबर महीना तक मुफत म चाउर दे जाही। मुख्यमंत्री भूपेश बघेल ह कोरोना महामारी ल ध्यान म राखत ए घोसना करीन। एखरे संगेसंग मुख्यमंत्री ह राज्य खाद्य सुरक्षा अधिनियम के तहत जारी जम्मों रासन कार्ड मन ल प्रधानमंत्री गरीब कल्याण अन्न योजना के समाने उपरहा चाउर देके घलो घोसना करे हे। राज्य सरकार के ए फइसला ले प्रदेस के अंत्योदय राशन कार्ड, प्राथमिकता वाले रासन कार्ड, अन्नपूर्णा राशनकार्ड, निराश्रित अउ निःशक्तजन के दू करोड़ इंक्यावन लाख ले जादा रासन कार्डधारी सदस्य मन ल फायदा होही।
खबर के मुताबिक राज्य सरकार डहार ले राज्य के गरीब अउ जरूरतमंद परिवार मन ल राहत प्रदान करे बर सार्वजनिक वितरण प्रणाली के तहत मई अउ जून महीना के चाउर घलो मुफत दे गेहे।
कोरोना समाचार
प्रदेस म कोरोना संक्रमण के स्थिति म अब कमी आवत हे। राज्य म संक्रमित मनके दर घटके दू दशमलव सात प्रतिसत होगे हे। पाछु महीना सोलह मई के ए आंकड़ा नौ प्रतिशत दर्ज करे गे रिहीस। उहें, अप्रैल महिना म संक्रमण के दर तीस प्रतिशत तक पहुंच गे रिहीस। मई महिना म हरेक दिन औसतन इकसठ हजार ले जादा सैंपल के जांच करे गीस। उहें, कोरोना संक्रमण ल रोके बर एखर लक्षण वाले बीस लाख चालीस हजार संदिग्ध मरीज मन ल निःशुल्क दवा किट बांटे गीस।
मुख्यमंत्री भूपेश बघेल ह किहीन हे कि अपन ठोस रणनीति ले छत्तीसगढ़ ह न सिरिफ कोरोना के दूसर लहर म जल्दीच काबू पा लेहे, फेर तीसर लहर के आसंका ल सिराय बर बड़का स्तर म तैयारी करे जावत हे। ओमन किहीन कि कहूं तीसर लहर आही त ओखर ले अउ जादा बने ढंग ले निपटे जा सकही।
कोरोना टीकाकरण
प्रदेस म कोरोना संक्रमण के दर म सरलग कमी आवत हे। राज्य म जोरसोर ले टीकाकरण के काम घलो चलत हे। अब तक प्रदेस म अट्ठारह ले चवालीस बछर के आयु समूह के आठ लाख तिरसठ हजार ले जादा लोगन मन ल कोविड टीका लगाय गेहे। उहें, काली ए आयु वर्ग के बत्तीस हजार दू सौ सत्ताईस लोगन मनके टीकाकरण करे गीस।
प्रदेस म पैंतालीस बछर ले जादा आयु के ससत्तर (77) प्रतिसत लोगन मनके टीकाकरण होगे हे। राज्य के तीन ठिन जिला – महासमुंद, रायगढ़ अउ धमतरी म पैंतालीस बछर ले जादा आयु के सत-प्रतिसत लोगन मन ल पहिली डोज लगाय गेहे। उहें, नब्बे प्रतिसत स्वास्थ्यकर्मी मन ल कोविड वैक्सीन लगा दे गेहे। प्रदेस म अब तक जम्मों आयु वर्ग अउ श्रेणी के मनखे मन ल पहिली अउ दूसर डोज मिलाके इकहत्तर लाख ले जादा टीका लगाय गेहे।
वैक्सीन-प्रतिक्रिया
भारतीय जनता पार्टी के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह ह प्रधानमंत्री नरेन्द्र मोदी डहार ले अट्ठारह बछर ले जादा के आयु वर्ग के नागरिक बर करे गे फ्री वैक्सीनेशन के घोसना के स्वागत करीन हे। ओमन नवंबर महिना तक देस के अस्सी करोड़ लोगन मन ल प्रधानमंत्री गरीब कल्याण अन्न योजना के तहत मुफत म अनाज देके फइसला ल घलो सराहनीय बतईन। डाॅक्टर सिंह ह यहू किहीन कि अवइया बेरा म प्रदेस के नवयुवक मनके टीकाकरण के जवाबदारी पूरा केन्द्र सरकार के होही।
उहें, कवर्धा के सांसद संतोष पांडेय ह घलो प्रधानमंत्री के ए फइसला के स्वागत करत आभार व्यक्त करीन।
दूसर कोति, मुख्यमंत्री भूपेश बघेल ह किहीन हे कि प्रधानमंत्री डहार ले फ्री वैक्सीनेशन के घोसना करे के फइसला देरी ले ले गेहे। ओमन किहीन कि वैक्सीन के सरलग आपूर्ति केन्द्र सरकार कइसन ढंग ले करही, ए सबले बड़े चुनौती आय।
उहें, राज्यसभा सांसद छाया वर्मा ह निःशुल्क वैक्सीनेशन ल अच्छा पहल बतईन। संगेसंग ओमन यहू घलो किहीन कि केन्द्र सरकार ह विपक्षी राजनीतिक दल मनके दबाव म आके ए कदम उठाय हे। श्रीमती वर्मा ह किहीन कि वैक्सीनेशन ल लेके राजनीति नइ करना चाही।
अंतर्राष्ट्रीय यात्रा-दिशा-निर्देश
केन्द्र सरकार ह शैक्षणिक उद्देश्य ले अंतर्राष्ट्रीय यात्रा करइया मनके टीकाकरण बर दिसा-निरदेस जारी करे हे। रोजगार बर विदेश जवइया लोगन या तोक्यो ओलिम्पिक खेल के भारतीय दल बर घलो दिसा-निरदेस जारी करे गेहे। केन्द्रीय स्वास्थ्य मंत्रालय ह बतईन कि अइसन यात्री मनके पासपोर्ट के संग कोविन प्रमाण पत्र ल जोड़े जाही। मंत्रालय ह राज्य अउ केन्द्रसासित प्रदेस मन ल घलो ए दिसा-निरदेस भेज देहे।
सिलगेर घटना-जांच रिपोर्ट
बीजापुर अउ सुकमा जिला के सीमा म स्थित सिलगेर गांव म पाछु दिन होय गोलीबारी के घटना के जांच रिपोर्ट जनसंगठन के प्रतिनिधिमंडल मन ह आज मुख्यमंत्री भूपेश बघेल ल सौंप देहे। भेंट के दउरान प्रतिनिधिमंडल ह मुख्यमंत्री ले ए घटना ले जुड़े आने-आने बिसय उपर चर्चा घलो करीन। मुख्यमंत्री ह बतईन कि सिलगेर घटना के दंडाधिकारी जांच करे जावत हे।
उहें, बस्तर सांसद दीपक बैज के पगरइति म काली नौ सदस्यीय कमेटी ह घलो मुख्यमंत्री ले भेंट करके ए घटना के जांच रिपोर्ट सौंपे रिहीस।
खबर के मुताबिक पाछु महीना के सत्रह तारीख के सिलगेर म सीआरपीएफ कैम्प खोले जाय के विरोध उहां के रहवइया गांव वाले मन करत रिहीस। इही दउरान गोलीबारी के घटना म तीन झिन गांव वाले मनके मउत होगे रिहीस।
मौसम
मौसम विभाग ह अवइया चैबीस घंटा के दउरान प्रदेस के एक-दू स्थान म हल्का ले मध्यम बरसा होय के संभावना जताय हे। उहें, एक-दू स्थान म आंधी-तूफान के संग गरज-चमक अउ गाज गिरे के चेतावनी घलो दे गेहे। राजधानी रईपुर म आज मंझनिया बाद मौसम म बदलाव देखे गीस अउ गरज-चमक के संग बदली छाय रिहीस।
अंतर्राष्ट्रीय योग दिवस
अंतर्राष्ट्रीय योग दिवस के मउका म इक्कीस जून के राज्य म छत्तीसगढ़ वर्चुअल योग मैराथन के आयोजन करे जाही। एला लेके प्रदेसवासी मन म बड़ खुसी देखे जात हे। मैराथन म सामिल होय बर पाछु दू दिन म सोलह हजार ले जादा लोगन मन ह आॅनलाइन पंजीयन कराय हे। ए मैराथन म भाग लेवइया मन पन्द्रह जून तक आॅनलाइन पंजीयन करा सकथे। जम्मों पंजीयनकर्ता मन ल डिजिटल प्रमाण पत्र दे जाही। संगेसंग हरेक जिला के पहिली सौ पंजीयन करइया मन ल टी-सर्ट दे जाही। ए वर्चुअल योग मैराथन प्रतियोगिता म भाग लेवइया आवेदक मन ल योगासन करत अपन फोटू या वीडियो सोसल मीडिया म ‘‘हैशटैग योग विद् छत्तीसगढ़‘‘ के संग सेयर करना होही या फेर प्रतिभागी मन अपन फोटू-वीडियो ल मेल घलो कर सकत हे।
अउ अब थोरकुन समाचार सार म-
– विश्व खाद्य सुरक्षा दिवस के मउका म काली ‘‘स्वस्थ भविष्य के लिए सुरक्षित भोजन‘‘ बिसय म वर्चुअल राष्ट्रीय कारीकरम के आयोजन करे गीस। ए कारीकरम म केन्द्रीय कृषि मंत्री नरेन्द्र सिंह तोमर घलो सामिल होईन।
– छत्तीसगढ़ प्रदेस संयुक्त शिक्षक संघ के प्रतिनिधिमंडल ह मुख्यमंत्री भूपेश बघेल ले उंखर निवास कार्यालय म भेंट करीन। ए दउरान प्रतिनिधिमंडल ह अनुकंपा नियुक्ति के मामला म दस प्रतिशत के सीमा बंधन ल सिथिल करके सिक्षक के आश्रित मन ल नियुक्ति दे म मुख्यमंत्री के आभार व्यक्त करीन।
– बेमौसम बारिश ले कोंडागांव जिला के उर्दाबेड़ा, अमरावती अउ चिपावंड गंाव के खरीदी केन्द्र मन म रखरखाव के अभाव म धान खराब होय ले कलेक्टर ह तीन समिति के अधिकारी मन ल कारण बताओ नोटिस जारी करे हे।
– सुकमा जिला के कोयाबेकुर इलाका ले सुरक्षा बल ह आज एक झिन माओवादी ल गिरफ्तार करे हे।
– बिलासपुर जिला म पाछु रतिहा होय एक ठिन सड़क दुर्घटना म दू झिन छात्र मनके मउत होगे। उहें, पांच झिन आने छात्र मन घायल होगे हे।
– अनुसूचित जाति, अनुसूचित जनजाति अउ अन्य पिछड़ा वर्ग के वंचित रहइया विद्यार्थी अॅानलाइन पोस्ट मैट्रिक छात्रवृत्ति बर फेर आवेदन चैबीस जून तक जमा कर सकही।
अउ
– महासमुंद जिला के पिथौरा पुलिस ह फटफटी ले गांजा के तस्करी करत दू झिन मनखे ल गिरफ्तार करे हे।