प्रधानमंत्री-संबोधन
प्रधानमंत्री नरेन्द्र मोदी ह घोषणा करे हे कि अवइया इक्कीस जून ले देस के हर राज्य म अट्ठारह बछर ले उपर के आयु के जम्मों नागरिक मन बर भारत सरकार राज्य मन ल मुफ्त वैक्सीन उपलब्ध कराही।
आज संझा राष्ट्र के नाव अपन संदेस म प्रधानमंत्री ह किहीन कि केन्द्र सरकार ह आज ए फइसला लेहे कि राज्य मन करा टीकाकरण ले जुड़े जउन पच्चीस प्रतिसत काम रिहीस, उंखर जिम्मेदारी घलो भारत सरकार उठाही। ए बेवस्था अवइया दू हफ्ता म लागू हो जही। ओमन किहीन कि वैक्सीन निर्माता मन ले कुल वैक्सीन उत्पादन के पचहत्तर प्रतिसत हिस्सा भारत सरकार खुदे खरीद के राज्य सरकार मन ल मुफ्त दीहीं। देस के कोनों भी राज्य सरकार ल अब कोविड वैक्सीन बर कुछु खरचा नइ करना पड़ही। सब्बो देसवासी मन बर भारत सरकार ह मुफ्त वैक्सीन उपलब्ध कराही।
श्री मोदी ह बतईन कि देस म बनत कुल वैक्सीन म ले पच्चीस प्रतिसत निजी क्षेत्र के अस्पताल मन ल दे जाय के बेवस्था पहिली जइसन जारी रइही। निजी अस्पताल वैक्सीन के निर्धारित कीमत म अधिकतम डेढ़ सौ रूपिया के सर्विस चार्ज ले सकही, जेखर निगरानी करे के काम राज्य सरकार मन करा होही।
एखर अलावा आज केन्द्र सरकार ह ए फइसला घलो लेहे कि प्रधानमंत्री गरीब कल्याण अन्न योजना ल अब दीपावली तक आगू बढ़ाय जाही। श्री मोदी ह बतईन कि अब ए बछर नवंबर तक अस्सी करोड़ ले जादा देसवासी मन ल हर महीना तय मात्रा म मुफ्त अनाज उपलब्ध कराय जाही।
कोरोना समाचार/टीकाकरण
प्रदेस म कोरोना संक्रमण के मामला लगातार कम होवत हे। लंबा समय बाद काली राज्य म पाॅजिटिव मरीज मनके संख्या एक हजार कम दर्ज करे गीस। राज्य म पाॅजिटिविटी दर गिरके अब दू दशमलव छह-छह प्रतिशत म आ गेहे। उहें, प्रदेस म काली कोरोना संक्रमण ले पच्चीस लोगन मनके मउत होईस।
ऐति, राजनांदगांव जिला के आने-आने अस्पताल मन म अब केवल बयासी कोरोना संक्रमित मरीज मनके इलाज चलत हे। उहें, करीबन नौ सौ मरीज मन होम आइसोलेशन म इलाज करवात हवय। मरीज के घटत संख्या ल देखत जिला म संचालित ग्यारह कोविड केयर सेंटर म ले पांच ठिन ल बंद कर दे गेहे।
इही बीच, प्रदेस म कोरोना टीकाकरण के काम लगातार चालू हे। प्रदेस म अब तक अट्ठारह ले चवालीस बछर आयु वर्ग मन बर नौ लाख अड़तीस हजार ले जादा डोज प्राप्त होय हे। एमा ले सात लाख निन्यानवे हजार ले जादा लोगन मन ल टीका लगाय जा चुके हे। उहें, अब तक राज्य म जम्मों आयु वर्ग के इकहत्तर लाख तेरह हजार ले जादा पात्र लोगन मन ल कोरोना के टीका लगाय जा चुके हे।
उहें, राजनांदगांव जिला म अट्ठारह ले चवालीस बछर आयु समूह के लोगन मन म टीकाकरण ल लेके उत्साह देखे जात हे। जिला म ए आयु समूह बर पाछु सनिवार के बारह हजार डोज पहुंचीस, जेखर करीबन एक हफ्ता बाद ले फेर जिला म टीकाकरण के काम सुरू होईस।
ऐति, सरगुजा जिला म घलो वैक्सीन के बारह हजार डोज पहुंचे के बाद अट्ठारह ले चवालीस बछर आयु वर्ग के मनखे मन बर करीबन पन्द्रह दिन बाद एक घांव फेर टीकाकरण सुरू कर दे गेहे। टीका लगवाय बर लोगन मन ल ‘‘सीजी टीका वेबपोर्टल‘‘ म आॅनलाइन पंजीयन कराना अनिवार्य हवय।
कोरोना पाॅजिटिव-स्टोरी
प्रदेश म कोरोना संक्रमण के ए दौर म कतकोन सामाजिक संस्था अउ आम लोगन मन डहार ले जरूरतमंद मन ल आने-आने सुविधा उपलब्ध कराय जात हे। इही कड़ी म रायगढ़ जिला म सांझा चूल्हा संस्था डहार ले कोरोना संक्रमित मरीज अउ उंखर परिजन के घर तक संझा-बिहनिया के भोजन पहुंचाय जात हे। बिसेस रूप ले जउन परिवार म महिला मन संक्रमित होय हे, उहां भोजन के अलावा दवा अउ फल घलो उपलब्ध कराय जात हे। संस्था म करीबन पैंतीस सदस्य हवय, जउन मन सहर के सब्बो इलाका म जाके अपन सेवा देवत हे। ए निःस्वार्थ सेवा कार्य ल देखत स्थानीय प्रशासन घलो संस्था के मदद करे बर आगू आवत हे।
उहें, इही जिला के लैलूंगा म घलो कोरोना ले पीड़ित लोगन मनके भोजन के समस्या ल देखत इहां के नव जवान मन अन्नपूर्णा सेवा के नाव ले कोरोना संक्रमित मनखे मनके घर तक निःशुल्क भोजन पहुंचाय के बिड़ा उठाईन हे।
मन की बात
प्रधानमंत्री नरेन्द्र मोदी सत्ताईस जून के आकाशवाणी म ‘‘मन की बात‘‘ कारीकरम म अपन विचार साझा करही। ए मासिक रेडियो कारीकरम के अटहत्तरवां कड़ी होही। प्रधानमंत्री ए कारीकरम के अवइया श्रृंखला म लोगन मन ले ओमन के विचार आमंत्रित करीन हे। लोगन मन नमो ऐप या माई जीओवी ओपन फोरम म अपन विचार साझा कर सकत हे। ओमन टोल फ्री नंबर – एक आठ शून्य-शून्य एक-एक सात आठ शून्य-शून्य म घलो डायल करके प्रधानमंत्री बर अपन संदेस हिन्दी या अंग्रेजी म रिकार्ड करवा सकत हे। लोगन मन एक नौ दू-दू म मिस्ड काॅल घलो दे सकत हे अउ एस.एम.एस. म प्राप्त लिंक के अनुसरण करके सीधा प्रधानमंत्री ल अपन सुझाव भेज सकत हे।
टेकाम-स्कूल फैसला
प्रदेस के स्कूल सिक्षा मंत्री डाॅक्टर प्रेमसाय सिंह टेकाम ह किहीन हे कि अवइया सोलह जून के बाद स्कूल मन ल खोले उपर राज्य सरकार विचार करही। डाॅक्टर टेकाम ह किहीन कि प्रदेस म कोरोना संक्रमण के मामला कम होवत जात हे। एखरे सेती राज्य मंत्रिमंडल के होवइया बइठका स्कूल खोले उपर फइसला ले जा सकता हे। ओमन किहीन कि प्रदेस म सिक्षा व्यवस्था के स्तर सुधरे हे अउ पढ़ई तुहंर दुआर के पूरा देस म बड़ई होवत हे। सिक्षक मनके भर्ती अउ अंग्रेजी माध्यम के स्कूल खोले ले ही सिक्षा के स्तर बेहतर होही।
ब्लैक फंगस
प्रदेस म कोरोना संक्रमण के मामला काफी कम होवत जात हे। लेकिन एखर ले ठीक होवइया लोगन मन म ब्लैक फंगस के संक्रमण बाढ़त जात हे। प्रदेस म अब तक ए संक्रमण के दू सौ उनसठ मामला सामने आय हे, जेमा सबले जादा दुरूग जिला ले सड़सठ मरीज मिले हे। उहें, रईपुर म अड़तालीस, बिलासपुर म तैंतीस, रायगढ़ म इक्कीस, राजनांदगांव म सोलह अउ जांजगीर-चांपा जिला म चैदह मरीज मनके पुष्टि करे गेहे। प्रदेस म ब्लैक फंगस ले अब तक सोलह मनखे मनके मउत हो चुके हे।
माओवादी-समाचार
सुकमा जिला म सुरक्षा बल ह दस अउ सात किलो के दू ठिन पाईप बम बरामद करे हे। मिलइया जानकारी अनुसार जिला म सड़क निर्माण के काम चलत हे, जेखर सुरक्षा म सीआरपीएफ के एक सौ पचासवां बटालियन ल तैनात करे गेहे। इही दउरान सुरक्षा बल ह चिंतागुफा-भेज्जी रद्दा ले दू ठिन पाईप बम बरामद करीन, जेला मउकाच म निष्क्रिय कर दे गीस। ए बम माओवादी मन जवान मन ल नुकसान पहुंचाय के उद्देश्य ले लगाय रिहीस।
उहें, दंतेवाड़ा जिला के अरनपुर थाना क्षेत्र म माओवादी मन अरनपुर-पोटली सड़क ल काट दीन। एखर कारण ए रद्दा म अवई-जवई बाधित होय हे। मााओवादी मन इलाका बैनर-पोस्टर लगाके सिलगेर घटना के विरोध म पुलिस कैम्प ल हटाय के मांग करीन हे।
मौसम
अइवया चैबीस घंटा के दउरान प्रदेस के एक-दू स्थान म हल्का बरसा होय के संभावना हे। उहें, एक-दू स्थान मन म गरज-चमक के साथ अंधड़ चले के अउ बिजली गिरे के चेतावनी दे गेहे।
मौसम विभाग के अनुसार छत्तीसगढ़ के कुछ क्षेत्र मन म बिसेस रूप ले सरगुजा अउ बस्तर संभाग म हल्का बरसा हो सकत हे। उहें, प्रदेस के अधिकतम तापमान म कोनों खास परिवर्तन नइ होय के संभावना नइ हे।