वृक्षारोपण प्रोत्साहन योजना
किसान, पंचायत अउ वन समिति मनके आय बढ़ाय खातिर प्रदेस म आज ले ‘‘मुख्यमंत्री वृक्षारोपण प्रोत्साहन योजना‘‘ के सुरूवात करे गीस। मुख्यमंत्री भूपेश बघेल ह ए योजना के सुभारंभ अपन निवास कार्यालय म आयोजित वर्चुअल कारीकरम म करीन। ए मउका म ओमन किहीन कि राज्य सरकार के ए योजना ले गांव अउ जंगल मनके तस्वीर बदलही। संगेसंग किसान मन ल कमाई के एक नया जरिया घलो मिलही, जेखर ले उंखर मनके आर्थिक स्थिति मजबूत होही। ओमन बतईन कि ए योजना म अपन खुद के जमीन म लगाय गे पेड़-पौधा के कटाई खातिर किसान मन ल भविष्य म अनुमति लेके जरूरत नइ होही।
कारीकरम म मुख्यमंत्री ह दुर्ग वनमंडल के तहत फुंडा गांव म 20 एकड़ क्षेत्र म बनाय जावत जैव विविधता उद्यान के भूमिपूजन घलो करीन। मुख्यमंत्री ह बिलासपुर म अरपा नदी के तट म स्थित सेंदरी गांव, बस्तर जिला के कोहकीमारी, डिलमिली, करपावंड, बलरामपुर जिला के भेलई खुर्द, कांकेर जिला के कुलगांव, महासमुंद के मुंगई माता अउ कबीरधाम जिला के लोहजरी गांव म वृक्षारोपण काम के सुभारंभ करीन। ए मउका म ओमन आने-आने वनमंडल मनके वन प्रबंधन समिति के सदस्य अउ किसान मन ले वर्चुअल गोठबात करीन। ओमन कारीकरम म ‘‘बटर फ्लाई ट्रेजर आॅफ छत्तीसगढ़‘‘ पुस्तक के विमोचन घलो करीन।
जानबा के मुताबिक ‘‘मुख्यमंत्री वृक्षारोपण प्रोत्साहन योजना‘‘ के तहत वन विभाग ह ए साल 99 लाख ले जादा पौधा उगाय के तियारी राखे हे। संगेसंग दू करोड़ 27 लाख पौधा मन ल घलो बांटे जाही। ए योजना म जउन किसान मन ह खरीफ बछर 2020 म धान के फसल ले हवय, ओमन कहूं धान के फसल के बदला अपन-अपन खेत म वृक्षारोपण करथे, त ओमन ल अवइया तीन बछर तक हर साल 10 हजार रूपिया प्रति एकड़ के दर ले प्रोत्साहन राशि दे जाही।
वृक्षारोपण-कार्यक्रम
मुख्यमंत्री भूपेश बघेल ह आज अपन निवास परिसर म हर्रा अउ चार के पौधा लगाके पर्यावरण के देख-रेख अउ ओला बढ़ाय खातिर अपन संकल्प ल दोहराईन। श्री बघेल ह ए मउका म प्रदेसवासी मन ले अपन पर्यावरण ल साफ-सुथरा अउ हरा-भरा बनाय खातिर पौधा लगाय अउ उंखर रक्षा करे के संदेस दीन।
ऐति, महिला अउ बाल विकास मंत्री अनिला भेंडिया ह आज अभनपुर के उपरवारा अउ आरंग के खपरी आंगनबाड़ी केन्द्र मन म फलदार पौधा लगाईन। ए मउका म ओमन किहीन कि हमन ल पर्यावरण ल बचाना चाही।
ओति, दुरूग पुलिस लाईन म कोरोना ले मउत होय पुलिसकर्मी मनके सुरता म बने ‘‘कोरोना वारियर्स पार्क‘‘ के आज सुभारंभ करे गीस। ए दउरान दुरूग रेंज के पुलिस महानिरीक्षक विवेकानंद सिन्हा अउ पुलिस अधीक्षक प्रशांत ठाकुर समेत आने-आने पुलिस अधिकारी मन ह 100 ठिन नीम के पौधा लगाईन।
एम्स-ओपीडी सेवाएं
रईपुर के अखिल भारतीय आयुर्विज्ञान संस्थान-एम्स म ओपीडी सेवा काली सात जून ले फेर सुरू करे जावत हे। ओपीडी सेवा मन खातिर आॅनलाइन रजिस्ट्रेसन करे जा सकत हे। ए दउरान हर दिन बिहनिया नौ बजे ले मंझनिया डेढ़ बजे तक ब्राॅड स्पेशलिटी विभाग म अधिकतम 50 अउ सुपर स्पेशलिटी विभाग म अधिकतम 20 रोगी मनके इलाज करे जाही। ए दउरान रोगी अउ उंखर परिजन मन ल कोरोना महामारी ले बचाव खातिर जारी दिसा-निरदेस के पालन करना होही।
आईएएस-तबादला
राज्य सरकार ह अखिल भारतीय प्रशासनिक सेवा के उनतीस झिन अधिकारी मनके नवा पदस्थापना जारी करे हे। ए आदेस म नौ ठिन जिला मनके कलेक्टर, तीन निगम आयुक्त समेत तीन झिन जिला पंचायत के मुख्य कार्यपालन अधिकारी मन ल बदले गेहे।
रायपुर नगर निगम के आयुक्त सौरभ कुमार रायपुर जिला के नवा कलेक्टर होही। उहें, डाॅक्टर एस. भारतीदासन ल मुख्यमंत्री सचिवालय म विशेष सचिव के संगेसंग जनसंपर्क विभाग के दायित्व सौंपे गेहे। ऐति, जनंसपर्क संचालक तारण प्रकाश सिन्हा ल राजनांदगांव कलेक्टर बनाय गेहे। अइसने, श्याम लाल धावड़े, ल कोरिया जिला के, पदुम सिंह एल्मा ल धमतरी, अजीत बसंत ल मुंगेली, जितेन्द्र शुक्ला ल जांजगीर-चांपा, रानू साहू ल कोरबा, भोसकर विलास संदीपन ल बेमेतरा अउ इंद्रजीत एस. चंद्रवाल ल बलरामपुर जिला के कलेक्टर बनाय गेहे।
एखर अलावा, कृषि सचिव अमृत खलको ल श्रम विभाग म सचिव के पद सौंपे गेहे। संगेसंग ओमन ल राज्यपाल के सचिव के अतिरिक्त प्रभार घलो दे गेहे। उहें, राजनांदगांव कलेक्टर टोपेश्वर वर्मा ल खाद अउ परिवहन विभाग के सचिव बनाय गेहे। डाॅक्टर कमलप्रीत सिंह ल स्कूल शिक्षा विभाग के सचिव नियुक्त करे गेहे। संगेसंग ओमन ल जीएडी के सचिव के अतिरिक्त प्रभार घलो दे गे हवय।
आयकर-पोर्टल
आयकर विभाग आॅनलाइन रिटर्न भरे खातिर अपन नवा पोर्टल डब्ल्यू.डब्ल्यू.डब्ल्यू डाॅट इनकम टैक्स डाॅट जीओवी डाॅट इन काली ले सुरू करत हवय। ए पोर्टल कर देवइया मन ल आधुनिक, सुगम अउ सुविधाजनक माध्यम प्रदान करथे। केन्द्रीय वित्त मंत्रालय ह बतईन कि नवा कर देवइया मनके जरूरत के अनुरूप तियार करे गे ए पोर्टल ले आयकर रिटर्न के तुरते जांच हो जथे अउ करदाता मन ल उंखर भुगतान जल्दी वापिस मिल जथे। वित्त मंत्रालय ह बतईन कि नवा कर भुगतान प्रणाली म अग्रिम भुगतान के किश्त जमा करे के अंतिम तिथि 18 जून के बाद ले सुरू करे जाही, जेखर ले कर देवइया मन ल कोनों असुविधा न होवय।
कोरोना समाचार
प्रदेस म कोरोना संक्रमित मरीज मनके संख्या म लगातार कमी आवत हे। प्रदेस म काली 1 हजार 356 नवा कोरोना मरीज मनके पहिचान होईस। उहें, राज्य म काली 30 लोगन मनके कोरोना ले मउत घलो होईस। बलौदाबाजार जिला ल छोड़के प्रदेस के आने-आने जम्मों जिला म 100 ले कम कोरोना संक्रमित मरीज मिले हवय। उहें, काली लगभग 3000 मरीज मन ल स्वस्थ होय के बाद डिस्चार्ज करे गीस। अभी के स्थिति म 24 हजार ले जादा मरीज मनके इलाज आने-आने अस्पताल अउ होम आइसोलेशन म चलत हवय। ऐति, सरगुजा जिला म कोरोना संक्रमण के दर घट के दू प्रतिशत म आ गे हवय।
कोरोना महामारी के तीसरा लहर के आसंका ल देखत दुरूग जिला म तैयारी सुरू कर दे गे हवय। ए दउरान जिला अस्पताल म 4 हजार बिस्तर के बेवस्था करे गे हवय, जेमा 25 आईसीयू बिस्तर लइका मन बर होही।
इही बीच, प्रदेस म काली 18 ले 44 बछर उमर के 2 हजार 832 लोगन मन ल टीका लगाय गीस। एमा ले अंत्योदय राशनकार्ड के 137, बीपीएल के 1102, एपीएल के 1473 अउ फ्रंटलाइन वर्कर्स मनके 120 लोगन मन ल टीका लगाय गीस। राज्य म काली 5 जून तक 18 ले 44 बछर आयु वर्ग के 7 लाख 99 हजार ले ज्यादा लोगन मन ल टीका लगाय जा चुके हे।
अंतर्राष्ट्रीय योग दिवस
अंतर्राष्ट्रीय योग दिवस 21 जून के मउका म राज्य म ‘‘छत्तीसगढ़ वर्चुअल योग मैराथन‘‘ के आयोजन करे जाही। मैराथन म सामिल होय खातिर 15 जून तक आॅनलाइन पंजीयन कराय जा सकत हे। जम्मों पंजीयनकर्ता मन ल डिजिटल प्रमाण पत्र प्रदान करे जाही। संगेसंग हर जिला के पहली 100 पंजीयन करइया लोगन मन ल टी-शर्ट दे जाही। ए वर्चुअल योग मैराथन प्रतियोगिता म सामिल होय खातिर आवेदक ल योगासन करत अपन फोटो या वीडियो सोशल मीडिया म ‘‘हैशटैग-योग विद् छत्तीसगढ़‘‘ के संग सेयर करे ल पड़ही। एखर अलावा भाग लेवइया अपन फोटो वीडियो ल मेल घलो कर सकत हे।
लोकवाणी
मुख्यमंत्री भूपेश बघेल के मासिक रेडियोवार्ता ‘‘लोकवाणी‘‘ के 18वां कड़ी के प्रसारण रविवार 13 जून के करे जाही। मुख्यमंत्री लोकवाणी म ए दारी ‘‘राजीव गांधी किसान न्याय योजना‘‘ के विस्तार म प्रदेसवासी मन ले गोठबात करही। लोकवाणी के प्रसारण छत्तीसगढ़ स्थित आकाशवाणी के जम्मों केन्द्र, एफ.एम. रेडियो अउ क्षेत्रीय समाचार चैनल मन म बिहनिया साढ़े दस बजे ले ग्यारह बजे तक होही।