प्रधानमंत्री-मुख्यमंत्री बैठकप्रधानमंत्री ह कोरोना संक्रमण के स्थिति उपर गोठबात करे खातिर आज सबो राज्य के मुख्यमंत्री मनके संग बइठका करहीं। ए बइठका ह कोरोना संक्रमण के तेजी ले बाढ़त मामला ल देखत बुलाये गेहे। प्रधामंत्री ह ए वर्चुअल बइठका म टीकाकरण अभियान उपर घलो गोठबात करहीं।
लाॅकडाउन 01
कोरोना संक्रमण के बाढ़त मामला ल देखत रायपुर अउ राजनांदगांव जिला म संपूर्ण लाॅकडाउन लगाय जाही। रायपुर जिला म काली नौ अप्रैल संझा छै बजे ले उन्नीस अप्रैल तक अउ राजनंादगांव जिला म दस अप्रैल ले उन्नीस अप्रैल तक लाॅकडाउन लगइया हे। रायपुर कलेक्टर एस.भारतीदासन ह काली एक ठिन पत्रकार वार्ता म बताइन कि लाॅकडाउन के बेरा सबो सीमा सील रीही, सबो सागभाजी अउ किराना दुकान बंद रीही। उंहें ए प्रतिबंध ले पेट्रोल पंप, दवई दुकान अउ रसोई गैस एजेंसी ल छूट रीही। घर-घर जाके दूध बांटे वाले, समाचार पत्र हाॅकर बीहनिया छै बजे ले आठ बजे तक अउ संझा पांच ले साढ़े छै बजे के बीच अपन काम कर पाही। कलेक्टर ह बताइन कि जिला म प्रवेश केवल ई-पास के जरिया ले मिल पाही। पेट्रोल पंप म सिरिफ शासकीय वाहन, एंबुलेंस, मीडियाकर्मी अउ एडमिट कार्ड दिखाय म परीक्षार्थी मन ल ही पेट्रोल दे जाही। सरकारी कार्यालय म आम मनखे मनके आवाजाही उपर रोक रीही। लाॅकडाउन के बेरा बैंक, शैक्षणिक गतिविधि बंद रीही। जबकि एटीएम पहिली के जइसे संचालित रही। कलेक्टर ह बताइन कि जिला म सबो प्रकार के सभा, जुलूस, सामाजिक, धार्मिक अउ राजनीतिक आयोजन पूरा तरीका ले प्रतिबंधित रीही अउ सबो शराब दुकान घलो बंद रीही। एखर अलावा पर्यटन स्थल, शासकीय अउ निजी कार्यालय बंद रीही। ए बेरा म शासन ले अनुमति प्राप्त परीक्षा ल छोड़के आने परीक्षा म रोक लगाय गेहे। फेर कोविड ले जुड़े सबो काम चलत रीही। उंहें लाॅकडाउन के उल्लंघन करइया मनके खिलाफ नियमानुसार कार्रवाई करे जाही।
लाॅकडाउन 02
उंहें लाॅकडाउन के पहिली लोगन मन ल जरूरी सामान दिलाय खातिर रायपुर कलेक्टर ह नौ टीम के गठन करे हे। ए दल ह रायपुर नगर निगम, बीरगंाव अउ सबो तहसील मन म लोगन मन ल खुदरा मूल्य म जरूरी जीनिस के आपूर्ति करे के निगरानी करही। कलेक्टर ह व्यापारी मनले अनुरोध करीन हे कि ओवर रेटिंग जइसे काम ले बचें। ओमन कीहिन कि सबो नौ टीम आकस्मिक निरीक्षण करही अउ मामला म कार्रवाई करे जाही। एति राजनंादगंाव जिला म लाॅकडाउन के बेरा म इमरजेंसी सेवा ल छोड़के सबो सेवा बंद रीही। उंहें कोरोना संक्रमण ल देखत दंतेवाड़ा जिला के नकुलनार म शनिवार के लगइया साप्ताहिक बाजार म रोक लगा दे गेहे। ओति गरियाबंद जिला के फिंगेश्वर म व्यापारी मन ह नौ अप्रैल ले तीन दिन बर दुकान ल बंद करे के फैसला लेहे। ए निर्णय के जानकारी ओमन ह प्रशासनिक अधिकारी मन ल दीन। इही बीच बिलासपुर जिला म नेता प्रतिपक्ष धरमलाल कौशिक के नेतृत्व म भाजपा के प्रतिनिधि मंडल ह कलेक्टर ले भेंट करीन अउ कोरोना संक्रमण रोके खातिर पार्टी डहार ले सहयोग के बात करीन। एम्स कोरोना बेड
छत्तीसगढ़ म बाढ़त कोरोना संक्रमण ल देखत एम्स रायपुर म कोरोना मरीज मन बर आइसीयू म बिस्तर बढ़ाय के निर्णय लीन हे। एखरे संग आॅक्सीजन वाले बिस्तर के संख्या ल घलो चरणबद्ध तरीका ले बढ़ाके गंभीर रोगी मन ल चिकित्सा सुविधा उपलब्ध कराय जाही।
कोरोना समाचार प्रदेश म कोरोना संक्रमण के मामला सरलग बाढ़त जात हे। काली प्रदेश म दस हजार तीन सौ ले जादा नवा कोरोना संक्रमित मरीज मिले हे अउ कोरोना संक्रमण ले तिरपन झिन मनखे मनके मउत होगे। रायपुर म काली तीन हजार तीन सौ दू अउ दुर्ग म एक हजार छै सौ चैसठ नवा कोरोना संक्रमित मरीज मिले हे। इही बीच रायपुर रेल मंडल ले अवइया जवइया गाड़ी जउन के राजस्थान अउ उत्तराखंड बर जाथे ओमा यात्री मन ल यात्रा शुरू करे के बहत्तर घंटा के अंदर आरटीपीसीआर निगेटिव जांच रिपोर्ट देना जरूरी होही।
कोरोना समीक्षा बैठक
मुख्यमंत्री भूपेश बघेल के अध्यक्षता म काली रायपुर म राखे गे बइठका म मंत्री मन ह कोरोना इलाज के संबंध म अपन महत्वपूर्ण सुझाव दीन। स्वास्थ्य मंत्री ह कीहिन कि इंजेक्शन रेमडेसिवियर आने राज्य म उपलब्ध हवय। ओला छत्तीसगढ़ म मंगाय बर पहल करे जाही। उंहे समाज प्रमुख मनके संग होय बइठका म मुख्यमंत्री ह सबो समाज प्रमुख मनले कोरोना सेंटर बर समाज के भवन, राशि, जरूरी उपकरण अउ राशन उपलब्ध कराय के अपील करीन। जेखर उपर समाज प्रमुख ह हरसंभव मदद के गोठबात करीन। श्री बघेल ह कोरोना संक्रमण के रोकथाम खातिर टीकाकरण कराय उपर घलो जोर दीन।
पीआईबी-वेबिनार
सूचना अउ प्रसारण मंत्रालय भारत सरकार के पत्र सूचना कार्यालय अउ प्रादेशिक लोक संपर्क कार्यालय डहार ले आज रायपुर म कोरोना संक्रमण अउ टीकाकरण विसय के जागरूकता उपर एक ठिन वेबिनार के आयोजन करे गीस। एमा विभाग के फिल्ड अधिकारी मनके अलावा नेहरू युवा केंद्र अउ राष्ट्रीय सेवा योजना के स्वयंसेवक, लोक कलाकार अउ पढ़ईया लईका मन सामिल होइन। वेबिनार ल संबोधित करत मेडिकल काॅलेज अस्पताल रायपुर के विशेषज्ञ चिकित्सक डॅाक्टर ओ.पी. सुंदरानी ह कीहिन कि कोरोना महामारी के दूसरा लहर बड़ घातक हवय। ओमन ह कीहिन कि मनखे मन ल लापरवाही ले बचना चाही। डॅाक्टर सुंदरानी ह कीहिन कि कोरोना के लक्षण दिखे म लोगन मन ल तुरते जांच कराना चाही। ओमन ह टीकाकरण कराय उपर घलो जोर दीन। वेबिनार म जनसंपर्क विभाग के संयुक्त संचालक अउ कोविड मीडिया समन्वयक हर्षा पौराणिक ह कीहिन कि टीकाकरण के बाद घलो कोरोना नियम के पालन करना जरूरी होही। वेबिनार म पीआईबी के सहायक निदेशक सुनील तिवारी अ लोक संपर्क कार्यालय के प्रमुख शैलेष फाये घलो शामिल होइन।
परीक्षा पे चर्चा
प्रधानमंत्री नरेन्द्र मोदी ह काली परीक्षा पे चर्चा – के पहिली वर्चुअल संवाद म पढ़ईया लईका, अभिभावक अउ शिक्षक मनले गोठबात करीन। ओमन ह लईका मनले कीहिन कि परीक्षा ले डरना नइ चाही बल्कि एला उत्सव के जइसे लेना चाही। श्री मोदी ह तनाव अउ चिंता ले मुक्ति के मंत्र घलो साझा करीन। ओमन ह अभिभावक मनले कीहिन कि लईका मन उपर दबाव झन बनाये। ओमन कीहिन कि हमन थोरकिन म जादा सोचे बर लग जथन। ये ह कोनो आखरी मुकाम नो हरय। ये जिनगी बहुत लंबा हे, जेमा बड़ पड़ाव आथे। ये ह छोटे पड़ाव हे अउ हमन ल दबाव नइ बनाना चाही। प्रधानमंत्री शिक्षक मनले कीहिन कि समय के प्रबंध के बारे म ओमन ह लईका मनके मार्गदर्शन करय। ओमन ह सुझाव दीन कि लईका मन ल हरएक विसय के अनुसार ओमा धियान देना चाही अउ अपन उर्जा के उपयोग करना चाही। संगेसंग कहिन कि अगर अभिभावक मन लइका मनके संग जादा ले जादा बेरा बिताही त लईका मनके रूचि, प्रकृति अउ प्रवृत्ति ल समझे बर आसानी होही।
माओवादी समाचार
बीजापुर विधायक अउ बस्तर विकास प्राधिकरण के उपाध्यक्ष विक्रम सिंह मंडावी ह सीआरपीएफ के जवान ल जल्दी रिहा करे के अपील करीन हे। बीजापुर म पाछू दिन सुरक्षा बल मनके संग होय मुठभेड़ म माओवादी मन ह सीआरपीएफ के एक ठिन जवान के अपहरण कर ले रीहिन, जेला अब तक छुड़ाये नइ जा सके हे। एति दंतेवाड़ा जिला के बचेली थाना क्षेत्र म माओवादी मन ह रेलवे यार्ड म खड़े एक ठिन पोकलेन अउ दू ठिन मोटर सायकिल म आग लगा दीन। दंतेवाड़ा के पुलिस अधीक्षक ह बताइन कि नरेली म रेल लाईन के दोहरीकरण के काम प्रस्तावित हे। इंहा लंबा बेरा ले एक ठिन पोकलेन खड़े रीहिस, जेला माओवादी मन ह जला डरीन।
