लाॅकडाउन
कोरोना संक्रमण के बाढ़त मामला ल देखत रईपुर जिला म नौ अप्रैल के संझा छह बजे ले उन्नीस अप्रैल बिहनिया छह बजे तक संपूर्ण लाॅकडाउन रइही। ए घोसना आज कलेक्टर डाॅक्टर एस. भारतीदासन ह करीन। लाॅकडाउन के दउरान जिला के सब्बो सीमा मन सील रइही। जिला म प्रवेस केवल ई-पास के माध्यम ले मिल पाही। पेट्रोल पंप ले सिरिफ सासकीय वाहन, एम्बुलेंस, मीडियाकर्मी अउ एडमिड कार्ड दिखाय म परीक्षार्थी मन ल ही पेट्रोल दे जाही। सरकारी कार्यालय मन म आम लोगन मनके आवाजही प्रतिबंधित होही। लाॅकडाउन अवधि म बैंक, सैक्षणिक गतिविधि मन बंद रइही। जबकि, एटीएम पहिली जइसे चालू रइही। जम्मों प्रकास के सभा, जुलूस, सामाजिक, धार्मिक अउ राजनीतिक आयोजन पूरी-पूरा प्रतिबंधित रइही। जिला मन म संचालित जम्मों सराब दुकान बंद रइही। घर-घर जाके दूध बंटइया विक्रेता अउ न्यूज पेपर हाॅकर बिहनिया छह ले आठ बजे तक अउ संझा पांच ले साढ़े छह बजे के बीच अपन काम कर पाही। ए प्रतिबंध ले पेट्रोल पंप, दवा दुकान अउ रसोई गैस एजेंसी मन ल छूट रइही। कलेक्टर ह लाॅकडाउन के दउरान नागरिक मन ले सहयोग करे के अपील करीन हे। ओति, महासमुंद जिला म कोरोना के बाढ़त संक्रमण ल देखत नगरीय क्षेत्र म अब ले दुकान बिहनिया छह बजे ले संझा छह बजे तक खुलही। कलेक्टर डहार ले जारी आदेस म केहे गेहे कि रेस्टोरेंट, होटल अउ ढाबा बिहनिया छह बजे ले रतिहा आठ बजे तक खुलही। पेट्रोल पंप अउ मेडिकल स्टोर्स पहिली जइसे चालू रइही। उहें, कबीरधाम जिला म कलेक्टर ह हाट बाजार उपर अवइया आदेस तक प्रतिबंध लगा देहे। इही बीच छत्तीसगढ़ ले मध्यप्रदेश अउ मध्यप्रदेश ले छत्तीसगढ़ जवइया यात्री बस मन उपर पन्द्रह अप्रैल तक रोक लगा दे गेहे। ए संबंध म राज्य परिवहन आयुक्त ह आदेस जारी कर दीन हे।
मुख्यमंत्री-समीक्षा बैठक
मुख्यमंत्री भूपेश बघेल ह आज अपन मंत्रिमंडलीय सहयोगी मन संग कोरोना संक्रमण ले उत्पन्न परिस्थिति उपर आने-आने समाज के प्रमुख अउ सामाजिक संगठन मन ले गोठबात करीन। श्री बघेल ह सब्बो संभाग मुख्यालय मन ले वीडियो कान्फ्रेंसिंग ले सामाजिक प्रतिनिध मन ल प्रदेस म कोरोना संक्रमण के स्थिति के जानकारी दीन अउ ओमन ले सुझाव मांगीन। ओमन कोरोना टीकाकरण अउ कोरोना जांच बर लोगन मन ल प्रेरित करे के संगेसंग संक्रमण ले बांचे बर मास्क बउरे बर सारीरिक दूरी बनाय राखे बर अउ हाथ मनके बने साफ-सफाई के बारे म जागरूक करे बर किहीन। मुख्यमंत्री ह कोरोना उपर नियंत्रण बर सब्बो समाज प्रमुख अउ सामाजिक संगठन मन ल सरकार के खुल के मदद करे के अपील करीन। ओमन किहीन कि पाछु बछर जइसे समाज के जम्मों वर्ग के सहयोग ले कोरोना संक्रमण ल रोके म कामयाबी मिले रिहीस, वइसने सक्रिय सहयोग के अभो जरूरत हे। श्री बघेल ह अस्पताल अउ कोविड सेंटर मन म आॅक्सीजन सुविधा वाला बिस्तर के संख्या बढ़ाय बर अउ लाॅकडाउन वाला इलाका मन म जरूरतमंद मन ल भोजन अउ दूसर सुविधा उपलब्ध कराय बर आर्थिक अउ भौतिक सहयोग प्रदान करे के घलो अपील करीन। इही बीच, मुख्यमंत्री ह स्वास्थ्य विभाग के वरिष्ठ अधिकारी मन ल निरदेस दीन हे कि ओमन कोरोना संक्रमण के गंभीरता के हिसाब ले मरीज मन ल अस्पताल म बिस्तर कराय के प्रक्रिया निर्धारित करय।
रमन सिंह-आरोप
पूर्व मुख्यमंत्री डाॅक्टर रमन सिंह ह आरोप लगाईन कि राज्य सरकार कोरोना संकट ले निपटे म असफल साबित होवत हे। ओमन किहीन कि भारतीय जनता पार्टी ए मुद्दा ल लेके राज्यपाल ल ज्ञापन सौंपही अउ कोरोना महामारी के वास्तविकता ल बताही।एखर पहिली, डाॅक्टर सिंह ह आज राजनांदगांव म बाढ़त कोरोना संक्रमण ल देखत स्वयंसेवी संस्था के सदस्य मन ले मुलाकात करके ओमन से मदद के अपील करीन।
कोरोना समाचार
प्रदेस म कोरोना संक्रमण के मामला सरलग बाढ़त हे। काली एके दिन म करीबन दस हजार नवा मामला के पुष्टि होईस। उहें, काली कोरोना संक्रमण ले एके दिन म तिरपन लोगन मनके मउत होगे। प्रदेस म वर्तमान म करीबन तिरपन हजार लोगन मनके इलाज अस्पताल या होम आइसोलेशन म चलत हे। राज्य म अब तक कुल मिलाके तीन लाख छियासी हजार ले जादा कोविड पाॅजिटिव मरीज मिल चुके हे।
इही बीच, राज्य म कोविड टीकाकरण अभियान घलो जोर-सोर ले चलत हे। काली प्रदेस म एके दिन म एक लाख तिहत्तर हजार ले जादा पात्र मन ल कोविड वैक्सीन लगाय गीस। इही बीच, देस के प्रसिद्ध संगीतकार अउ गायक कल्याण सेन के आज कोरोना ले निधन होगे। ऐति, रईपुर पंजीयन कार्यालय म सात करमचारी मनके कोरोना जांच रिपोर्ट पाॅजिटव आय के बाद कार्यालय ल अड़तालीस घंटा बर बंद कर दे गेहे।
स्वास्थ्य मंत्री-कोविड समीक्षा
केन्द्रीय स्वास्थ्य मंत्री डाॅक्टर हर्षवर्धन ह राज्य मन ल आश्वासन दीन हे कि केन्द्र सरकार ओमन ल वैक्सीन के आपूर्ति करत रइही। ओमन राज्य मन ले आग्रह करीन कि प्राथमिकता वाला समूह मन ल मिशन मोड म टीका लगाय जाय। डाॅक्टर हर्षवर्धन ह किहीन कि कोनो राज्य सरकार ए सिकायत नइ कर सकय कि टीका के कमी के कारण टीकाकरण नइ हो पात हे। डाॅक्टर हर्षवर्धन ह काली छत्तीसगढ़ समेत दूसर-दूसर राज्य मनके स्वास्थ्य मंत्री, अपर मुख्य सचिव अउ स्वास्थ्य क्षेत्र के प्रधान सचिव मनके संग उच्च स्तरीय समीक्षा बैठक के अध्यक्षता के दउरान ए बात किहीन। बइठका म छत्तीसगढ़ के स्वास्थ्य मंत्री टी.एस. सिंहदेव ह बतईन कि राज्य म कोरोना संक्रमण के प्रभावी नियंत्रण बर केन्द्र सरकार डहार ले जारी गाइडलाइन के सख्ती ले पालन करे जात हे। संगेसंग कोरोना टेस्टिंग के संख्या म बढ़ोतरी के अलावा तेजी ले टीकाकरण करे जात हे। ओमन बतईन कि राज्य म रोजे-रोज तीन ले चार लाख लोगन मन ल टीका लगाय जाय के संग छत्तीस ले चालीस हजार मनखे मनके कोरोना जांच करे जात हे।
बोर्ड परीक्षा
छत्तीसगढ़ माध्यमिक सिक्षा मंडल ह दसवीं अउ बारहवीं बोर्ड के परीक्षा आॅफलाइन मोड म निर्धारित समय-सारिणी अनुसार ही राखे के निर्णय लीस हे। दसवीं के परीक्षा पन्द्रह अप्रैल ले एक मई तक अउ बारहवीं के परीक्षा तीन मई ले चैबीस मई तक राखे जाही। मंडल के सचिव ह बतईन कि परीक्षा के दउरान जम्मों छात्र सिक्षक अउ स्कूल के दूसर अधिकारी अउ करमचारी मन ल मास्क पहिरना अनिवार्य होही। कोरोना पीड़ित छात्र ल कोनों भी परिस्थिति म परीक्षा म बइठे के अनुमति नइ होही।
परीक्षा पे चर्चा
प्रधानमंत्री नरेन्द्र मोदी ह आज संझा सात बजे ‘‘परीक्षा पे चर्चा‘‘ कारीकरम के दउरान विद्यार्थी, सिक्षक अउ अभिभावक मन संग गोठबात करही। कोविड महामारी ल देखत ए कारीकरम के ये संस्करण के आयोजन वर्चुअल रूप म करे जात हे। ए कारीकरम के दउरान प्रधानमंत्री ह विद्यार्थी मन ल तनाव मुक्त होके परीक्षा के तैयारी करे बर ओमा हिस्सा लेके के बारे म अपन विचार अउ सुझाव साझा करही। एक ट्वीट म श्री मोदी ह किहीन कि परीक्षा योद्धा, माता-पिता अउ सिक्षक मनके संग नया फाॅरमेट म यादगार परिचर्चा होय के आसा हे। ओमन आसा व्यक्त करीन कि ए दउरान कई ठन दिलचस्प सवाल सामने आही।
परीक्षा पे चर्चा कारीकरम टीवी चैनल, डिजिटल मीडिया प्लेटफार्म मन म देखे जा सकथे। ए कारीकरम ईडीयू मिन आॅड इंडिया, नरेन्द्र मोदी, पीएमओ इंडिया, डीडी न्यूज, राज्यसभा टीवी, स्वयं प्रभा जइसे फेसबुक अउ यू-ट्यूब चैनल मन म आज संझा सात बजे ले देखे जा सकही।
विश्व स्वास्थ्य दिवस
आज विश्व स्वास्थ्य दिवस हरय। विश्व स्थास्थ्य संगठन के स्थापना सात अप्रैल उन्नीस सौ अड़तालीस म होय रिहीस अउ उन्नीस सौ पचास ले ए दिवस मनाय के सुरूआत होईस। एखर उद्देश्य स्वास्थ्य बर लोगन मन ल जागरूक करना हवय। ए बछर ए दिवस के बिसय हे – ‘‘सभी के लिए निष्पक्ष और स्वस्थ्य विश्व का निर्माण।‘‘