मुठभेड़ जवान शहीद-01
सुकमा अउ बीजापुर जिला के सीमावर्ती क्षेत्र जगरगुंडा म माओवादी हमला म शहीद जवान मनके संख्या बाढ़के तेईस होगे हे। हमर संवाददाता ह बताइन कि घात लगाके करे गे ये हमला म तीस सुरक्षाकर्मी मन घायल होगे रीहिस।
मिले खबर के मुताबिक केंद्रीय रिजर्व पुलिस बल सीआरपीएफ अउ डिस्ट्रिक्ट रिजर्व गार्ड डीआरजी के शहीद जवान मनके शव आज तलाशी अभियान के बेरा सुकमा जिला के टेकलगुड़ा गांव के तीर ले बरामद करे गेहे। मुठभेड़ के जगा म पहुंचे अतिरिक्त बल कोति ले सुकमा अउ बीजापुर जिला के सीमा के तर्रेम इलाका म आज बीहनिया ले तलाशी अभियान चलाये जावत हे। दू झिन शहीद जवान के शव काली संझा के ही घटनास्थल ले बरामद कर लेगे रीहिस। माओवादी मन ह ए हमला काली मंझनियंा ओ बेरा करे रीहिस, जब सुरक्षाबल मनके एक संयुक्त दल ह अभियान के बाद बीजापुर लहुटत रीहिस। पुलिस अधिकारी मन बताइन कि जवान मन ह पूरा बहादुरी ले माओवादी मनके ए हमला के सामना करीन। मुठभेड़ के जगा ले एक महिला माओवादी के संग दू झिन माओवादी के शव बरामद करे गीस हे।
राष्ट्रपति रामनाथ कोविंद अउ प्रधानमंत्री नरेंद्र मोदी ह माओवादी मुठभेड़ म शहीद होय बहादुर सुरक्षाकर्मी मन ल श्रद्धंाजलि दीन हे। श्री मोदी ह कीहिन कि वीर शहीद मनके बलिदान ल भुलाये नइ जा सकय। ओमन ह घायल मनके जल्दी स्वस्थ होय के कामना करीन हे।
मुठभेड़ जवान शहीद-02
इही बीच केंद्रीय गृह मंत्री अमित शाह ह मुख्यमंत्री भूपेश बघेल ले टेलिफोन म माओवादी घटना के संबंध म विस्तार ले जानकारी लीन। केंद्रीय मंत्री ह मुख्यमंत्री ल कीहिन कि केंद्र अउ राज्य सरकार मिलके ए लड़ाई ल जरूर जीतही। ओमन कीहिन कि केंद्र सरकार कोति ले जरूरी मदद राज्य सरकार ल दे जाही। श्री शाह ह बताइन कि ओमन सीआरपीएफ के महानिदेशक ल घटना के जगा म जायके निर्देश दीन। केंद्रीय गृहमंत्री ह शहीद मन ल श्रद्धंाजलि दीन।
उंहें मुख्यमंत्री ह कीहिन कि सुरक्षा बल मन ल होय ए क्षति ह दुखद हे, फेर सुरक्षा बल मनके हौसला बुलंद हे अउ माओवादी हिंसा के खिलाफ ये लड़ाई हमी मन जीतबो। एखर ले पहिली मुख्यमंत्री ह शहीद जवान मनके शहादत उपर गहरा दुख व्यक्त करीन। ओमन ह शहीद मनके परिवारजन बर संवेदना जतावत कीहिन कि सुरक्षा बल मनके शहादत व्यर्थ नइ जाही। मुख्यमंत्री ह ए घटना म घायल जवान मनके सुघ्घर इलाज के सुविधा देवाय के निर्देश दीन हे।
इही बीच सीआरपीएफ के महानिदेशक कुलदीप सिंह ह आज बीहनिया रायपुर पहुंचीन अउ स्थिति के जायजा लीन। संगेसंग ओमन ह रायपुर के एक निजी अस्पताल म भर्ती घायल जवान ले भेंट घलो करीन।
उंहे नेता प्रतिपक्ष धरमलाल कौशिक ह माओवादी हिंसा म शहीद जवान मन ल श्रद्धंाजलि दीन। ओमन ह आरोप लगाइन कि राज्य के कंाग्रेस सरकार के गलत नीति के कारण प्रदेश म माओवादी मजबूत होवत हे अउ राज्य सरकार माओवादी मनले मोर्चा ले म पूरा तरह ले असफल हे।
कोरोना समाचार 01
प्रदेश म कोरोना संक्रमण के मामला तेजी ले बाढ़त हे। काली प्रदेश म पांच हजार आठ सौ ले जादा नवा कोरोना संक्रमित मरीज मिले हे। प्रदेश म अब तक तीन लाख तिरसठ हजार सात सौ ले जादा कोरोना संक्रमित मरीज मिले हे। काली प्रदेश म कोरोना संक्रमण ले इकतीस लोगन मनके मउत घलो होय हे।
उंहें भिलाई नगर के विधायक देवेंद्र यादव ह ट्वीट म ये जानकारी दीन कि ओमन अउ उंखर परिवार के पांच झिन सदस्य कोरोना संक्रमित होगे हे।
इही बीच कोरोना संक्रमण के बाढ़त मामला ल देखत आने आने जिला म प्रशासन कोति ले सख्ती करे जात हे। राजधानी रायपुर समेत जिला के जम्मों नगरीय निकाय क्षेत्र म आजले जिला प्रशासन डहार ले जारी करे गे नवा नियम लागू होगे हे। आज दुकान मन ह बीहनिया छै बजे ले संझा छै बजे तक ही खुले रीहीस। उंहें रेस्टारेंट, होटल, बार अउ ढाबा ह रतिहा आठ बजे तक खुला रीही। शहरी क्षेत्र के सबो साप्ताहिक बाजार अउ जिम, स्वीमिंग पुल घलो अवइया आदेश तक बंद रीही। सिनेमा हाल, मल्टीप्लेक्स के आखरी शो रतिहा आठ बजे तक बंद करना जरूरी होही। बेरा के प्रतिबंध ह पेट्रोल पंप अउ मेडिकल स्टोर उपर लागू नइ होही।
ओति कोंडागांव जिला म प्रशासन ह कोरोना संक्रमण ले बचाव बर जम्मों खाद्य कारोबारी अउ दवा व्यापारी बर दिशा निर्देश जारी करे हे। एमा खाद्य अउ दवा व्यापारी मन ल तीर के कोरोना जांच केंद्र म अपन अउ स्टाॅफ के कोरोना टेस्ट कराए के संग जउन पैंतालिस बछर ले जादा उमर के हे वोमन कोरोना के टीका जरूर लगवावयं ।
कोरोना समाचार 02
इही बीच स्वास्थ्य मंत्री टी.एस. सिंहदेव ह काली दुर्ग जिला म कोरोना संक्रमण के स्थिति अउ रोकथाम के रणनीति बर समीक्षा करीन। ओमन अस्पताल म आॅक्सीजन सिलेंडर के उपलब्धता अउ संगेसंग बिस्तर के संख्या बढ़ाय उपर जोर दीन।
उंहे स्वाथ्य विभाग ह बताइन कि प्रदेश म अभी कोरोना जांच बर टेस्टिंग किट पर्याप्त मात्रा म हवय। अउ विभाग तीर अभी दू लाख अठाईस हजार आरटीपीसीआर टेस्ट किट राखे हे। फेर टेस्ट बर कोनो प्रकार के संकट नइ हे।
इही बीच पूर्व मुख्यमंत्री डॅाक्टर रमन सिंह ह कोरोना के बाढ़त संक्रमण उपर चिंता जतात कीहिन कि आबादी के आधार म प्रदेश ह देश म कोरोना संक्रमण के मामला म पहिली नंबर म हे।
कोविड टीकाकरण पंजीयन
छत्तीसगढ़ म टीकाकरण अभियान ह जोरदरहा ले चलत हे। काली दू लाख बयानबे हजार ले जादा लोगन मन ल कोरोना के टीका लगाये गीस। अब तक प्रदेश म करीबन अठाईस लाख मनखे मन ल कोविड वैक्सिन के डोज दे जा चुके हे। केंद्र सरकार कोति ले टीकाकरण बर पात्र करे के बाद पैंतालिस बछर ले जादा उमर के लोगन मनके टीका लगवाये के संख्या तेजी ले बाढ़त हे। सरकारी केंद्र मन म टीकाकरण के सुविधा के मामला म छत्तीसगढ़ ह पूरा देश म चैथा स्थान म हे।
इही बीच रायगढ़ जिला के दू गांव – बिंझकोट अउ एकताल ल शत-प्रतिशत कोरोना टीकाकृत गांव बने हे। कलेक्टर भीमसिंह ह ए उपलब्धि बर गांव के सरपंच, स्वास्थ्य अउ आंगनबाड़ी कार्यकर्ता मन ल प्रशस्ति पत्र देके सम्मानित घलो करीन।
इही बीच केंद्र सरकार ह कीहिस हे कि स्वास्थ्यकर्मी अउ अग्रिम पंक्ति के कार्यकर्ता मनके कोविड टीकाकरण बर अब कोनो नवा पंजीयन नइ होही। केंद्रीय स्वास्थ्य सचिव राजेश भूषण ह राज्य अउ केंद्रशासित प्रदेश ल लिखे चिट्ठी म कीहिन हे कि कोनो कोनो अपात्र लाभार्थी मन ह टीकाकरण बर ए श्रेणी के अंतर्गत अपन नाम पंजीकृत करावत हे। जेन ह नियम विरूद्ध हे। ओमन ह राज्य अउ केंद्रशासित प्रदेश ले ए श्रेणी म पहिली ले पंजीकृत कर्मी मनके टीकाकरण बर जल्दी पूरा करे बर कीहिन हे। श्री भूषण ह बताइन कि पैंतालिस बछर अउ ओखर ले जादा उमर के मनखे मनके पंजीकरण ह कोविन पोर्टल म जारी रीही।
हमर ग्रामसभा
प्रदेश के पंचायत अउ ग्रामीण विकास मंत्री टी.एस. सिंहदेव ह आज रतिहा साढ़े सात बजे आकाशवाणी रायपुर ले प्रसारित विशेष कार्यक्रम हमर ग्रामसभा म राज्य शासन के नीति, योजना अउ कार्यक्रम मनके बारे म जानकारी दीही। ए कार्यक्रम ल मीडियम वेव 981 किलोहटर््ज म सुने जा सकथे। ए कार्यक्रम ल प्रदेश स्थित आकाशवाणी के सबो केंद्र ह एके संग रिले करही।
ईस्टर
ईस्टर के तिहार ह आज दुनियाभर म मनाये जावत हे। गुड फ्राइडे के दिन ईसा मसीह ल सलीब उपर चढ़ाये जाये के बाद ईस्टर संडे के तिहार उंखर पुनर्जीवित होय के खुशी म मनाये जाथे। राष्ट्रपति रामनाथ कोविंद, उपराष्ट्रपति एम. वेंकैया नायडू अउ प्रधानमंत्री नरेंद्र मोदी ह देशवासी मन ल ईस्टर के शुभकामना दीन हे।