विश्व जल दिवस-प्रधानमंत्री
प्रधानमंत्री नरेन्द्र मोदी ह विश्व जल दिवस के मउका म वर्षा जल संचय के जलशक्ति अभियान ‘‘कैच द रेन‘‘ के वर्चुअल माध्यम ले सुभारंभ करीन। ए मउका म प्रधानमंत्री ह किहीन कि जल संरक्षण अउ जल प्रबंधन अवइया पीढ़ी बर महत्वपूर्ण हरय। ए अभियान के नारा हे – ‘‘वर्षा जल की बूंदे, जहां गिरे, जब भी गिरे, एकत्र करें‘‘।
विश्व जल दिवस के मउका म उप राष्ट्रपति एम. वेंकैया नायडू अउ केन्द्रीय पर्यावरण मंत्री प्रकाश जावड़ेकर ह लोगन ले आग्रह करीन हे कि जल स्त्रोत ल संरक्षित राखय के प्रयास करय।
कोरोना-स्कूल/काॅलेज
कोरोना संक्रमण के बाढ़त मामला ल धियान म राखत राज्य सरकार ह स्कूल-काॅलेज अउ आंगनबाड़ी केन्द्र ल तुरते बंद करे के निरदेस देहे। उहें, दसवीं अउ बारहवीं के बोर्ड परीक्षा पहिली तय कारीकरम के मुताबिक आॅफलाइन ले जाही। ए परीक्षा बर कोरोना संक्रमण ले बचाव संबंधी जम्मों उपाय केन्द्र अउ राज्य सरकार कोति ले बेरा-बेरा म जारी निरदेस के मुताबिक करे जाही। फेर, दसवीं अउ बारहवीं ल छोड़के आने जम्मों कक्षा के लइका मनके परीक्षा नइ ले जाही। ओमन ल जनरल प्रमोशन मिलही। ए संबंध म स्कूल सिक्षा विभाग ह निरदेस जारी कर देहे।
एखर संगेसंग राज्य सरकार ह कौशल विकास, तकनीकी शिक्षा अउ रोजगार विभाग म अवइया जम्मों सरकारी अउ प्राईवेट इंजीनियरिंग महाविद्यालय, पाॅलीटेक्निक, आई.टी.आई. अउ कौशल विकास प्रशिक्षण संस्थान ल अवइया आदेस तक बंद राखे के फइसला लेहे।
इही बीच, दुर्ग जिला प्रशासन ह हाॅटस्पाॅट वाले क्षेत्र म कंटेनमेंट जोन बनाय के फइसला लेहे। उहें, आने-आने कारीकरम के आयोजन बर पहिली जारी करे गे जम्मों अनुमति पत्र निरस्त कर दे गेहे। ए संबंध म दुरूग कलेक्टर डाॅक्टर सर्वेश्वर नरेन्द्र भूरे अउ पुलिस अधीक्षक प्रशांत ठाकुर ह आज आने-आने विभाग के बड़का अधिकारी मनके बइठका लीन। पुलिस अउ निगम कमरचारी मनके एक मोबाइल यूनिट बिना मास्क लगाय निकलइया मनके खिलाफ चलानी कार्रवाई करही।
श्रमिक-न्यूनतम वेतन
प्रदेश म पैंतालीस अनुसूचित नियोजन, कृषि नियोजन अउ अगरबत्ती नियोजन म काम करत श्रमिक मन बर न्यूनतम वेतन के दर तय करे गेहे। पाछु एक अप्रैल ले अवइया सितंबर तक अकुशल, अर्द्धकुशल, कुशल अउ उच्च कुशल श्रमिक मन ल सरकार कोति ले तय करे गे आने-आने श्रेणी म न्यूनतम मूल वेतन अउ महंगाई भत्ता दे जाही। तय दर के मुताबिक अकुशल श्रमिक मन ल हरेक महीना नौ हजार सात सौ बीस रूपिया, अर्द्धकुशल श्रमिक मन ल दस हजार तीन सौ सत्तर रूपिया, कुशल श्रमिक मन ल ग्यारह हजार एक सौ पचास रूपिया अउ उच्च कुशल श्रमिक ल ग्यारह हजार नौ सौ तीस रूपिया न्यूनतम वेतन दे जाही।
पदस्थापना
राज्य सरकार ह भारतीय प्रशासनिक सेवा के पांच झिन अधिकारी मन ल नवा पदस्थापना देहे। एखर मुताबिक मंत्रालय म पदस्थ विशेष सचिव जनक प्रसाद पाठक ल राजस्व अउ आपदा प्रबंधन विभाग के विशेष सचिव नियुक्त करे गेहे। उहें, रायगढ़ जिला पंचायत के मुख्य कार्यपालन अधिकारी ऋचा प्रकाश चैधरी दुरूग जिला के अपर कलेक्टर होही। नारायणपुर जिला पंचायत के मुख्य कार्यपालन अधिकारी राहुल देव ल सूरजपुर जिला पंचायत, महासमुंद जिला पंचायत के सीईओ रवि मित्तल ल रायगढ़ जिला पंचायत अउ सूरजपुर जिला पंचायत के सीईओ आकाश छिकारा ल महासमुंद जिला पंचायत के प्रभाव सौंपे गेहे। एखर संगेसंग भारतीय दूरसंचार सेवा के अधिकारी पोषण लाल चंद्राकर ल नारायणपुर जिला के मुख्य कार्यपालन अधिकारी बनाय गेहे।
राष्ट्रीय फिल्म पुरस्कार
आज सड़सठवां राष्ट्रीय फिल्म पुरस्कार के घोसना करे गीस। एमा छत्तीसगढ़ी भासा म सर्वश्रेष्ठ फिल्म के अवाॅर्ड ‘‘भूलन द मेज‘‘ ल चुने गेहे। संजीव बख्शी के उपन्यास भूलन कांदा म आधारित ए फिलिम मनोज वर्मा ह बनाय हे। पाछु बछर कोरोना महामारी के सेती ए फिल्म पुरस्कार के घोसना नइ करे जा सके रिहीस। उहें, ए पुरस्कार म फिल्म छिछोरे ल सर्वश्रेष्ठ हिन्दी फिलिम के अवाॅर्ड बर चुने गेहे।
लोकवाणी
मुख्यमंत्री भूपेश बघेल ए बखत लोकवाणी म ‘‘नया बजट-नये लक्ष्य‘‘ बिसय म गोठबात करही। ए संबंध म आकाशवाणी रईपुर के फोन नंबर शून्य सात-सात एक – दो चार तीन शून्य पांच शून्य एक, पांच शून्य दो अउ पांच शून्य तीन म चैबीस, पच्चीस अउ छब्बीस मार्च के मंझनिया तीन ले चार बजे के बीच फोन करके अपन सवाल रिकार्ड करा सकत हे। मुख्यमंत्री के मासिक रेडियोवार्ता लोकवाणी के सत्रहवीं कड़ी के प्रसारण अवइया ग्यारह अप्रैल के होही। एखर प्रसारण छत्तीसगढ़ स्थित आकाशवाणी के जम्मों केन्द्र, एफ.एम. रेडियो अउ क्षेत्रीय समाचार चैनल म बिहनिया साढ़े दस बजे ले ग्यारह बजे के बीच होही।
पुलिस-स्पष्टीकरण
छत्तीसगढ़ पुलिस मुख्यालय ह आरक्षक भर्ती के परिणाम पांच अप्रैल के जारी करे के संबंधी सोशल मीडिया म जारी एक चिट्ठी ल फर्जी बताय हे। पुलिस मुख्यालय ह ए स्पष्ट करे हे कि अइसन कोनों भी चिट्ठी अधिकारिक रूप ले जारी नइ करे गेहे। रईपुर के वरिष्ठ पुलिस अधीक्षक फर्जी पत्र जारी करे संबंधी मामला के जांच करही अउ दोसी मनके खिलाफ कानूनी कार्रवाई करे जाही। खबर के मुताबिक सोशल मीडिया म पुलिस मुख्यालय के नाव ले एक चिट्ठी जारी करके आरक्षक भर्ती के परिणाम अवइया पांच अप्रैल तक वेबसाइट म अपलोड करे के खबर फैलाय जात हे।
माओवादी गिरफ्तार
बीजापुर जिला के कुटरू-मिरतुर थाना क्षेत्र ले सुरक्षा बल ह एक महिला सहित पांच झिन माओवादी ल गिरफ्तार करे हे। एसटीएफ अउ जिला पुलिस बल के टीम ह कार्रवाई के बेरा माओवादी मन कोति ले खुर्रेपाल-चेरली म बनाय गे दू ठिन स्मारक ल गिरा दीन। संगेसंग घटना के जगह ले विस्फोटक बरामद करे गेहे। गिरफ्तार माओवादी मन उपर सहायक आरक्षक के हत्या समेत कई ठन आने घटना म सामिल रेहे के आरोप हे।
बीजापुर जिला के ही गंगालूर थाना क्षेत्र ले सुरक्षा बल ह एक माओवादी ल गिरफ्तार करे हे। इंखर तीर ले टिफिन बम समेत आने विस्फोटक जिनीस बरामद होय हे।
उहें, इही जिला के फरसेगढ़ रद्दा म पाईप लाइन बिछाय के काम म लगे दू ठिन गाड़ी म माओवादी मन ह आगी लगा दीन।
ऐति, राजनांदगांव जिला के मानपुर ब्लाॅक के छत्तीसगढ़ सीमा ल लगे महाराष्ट्र के सावर गांव ले एक फरार वारंटी माओवादी ल गिरफ्तार करे गेहे।
चैंबर चुनाव-परिणाम
जय व्यापार पैनल के उम्मीदवार अमर परवानी छत्तीसगढ़ चेम्बर के नवा अध्यक्ष होही। छत्तीसगढ़ चैम्बर के चुनाव म श्री परवानी ह एकता पैनल के उम्मीदवार योगेश अग्रवाल ल बाईस सौ ले जादा वोट ले हराईस हे। जय व्यापार पैनल ह एसो चेम्बर चुनाव के जम्मों प्रमुख पद म जीत हासिल करे हे। जय व्यापार पैनल के उम्मीदवार अजय भसीन ह प्रदेस महामंत्री अउ उत्तम गोलछा ह प्रदेश कोषाध्यक्ष के चुनाव जीते हे।
रोड सेफ्टी-क्रिकेट प्रतियोगिता
राजधानी रईपुर के शहीद वीरनारायण सिंह अंतर्राष्ट्रीय क्रिकेट स्टेडियम म खेले गे रोड सेफ्टी वल्र्ड सीरीज टी-ट्वेंटी क्रिकेट प्रतियोगिता के खिताब इंडिया लीजेंड्स ह जीत लेहे। पाछु रतिहा खेले गे फाइनल मुकाबला रोमांचक रिहीस, जेमा इंडिया लीजेंड्स ह श्रीलंका लीजेंड्स ल चैदह रन ले हराईस। समापन कारीकरम म मुख्यमंत्री भूपेश बघेल ह इंडियालीजेंड्स के कप्तान सचिन तेंदुलकर ल ट्राॅफी दीन। खबर के मुताबिक सड़क सुरक्षा कोति जागरूकता ल लेके ए सीरीज के आयोजन करे गे रिहीस।