कोरोना-मंत्रिमंडल
प्रदेस म कोरोना संक्रमण के बाढ़त मामला ल देखत स्कूल-काॅलेज अउ आंगनबाड़ी केन्द्र मन ल बंद करे जाही। उहें, कक्षा अउ परीक्षा घलो आॅनलाइन होही। होली तिहार के संग ही अंत्येष्टि अउ आने सार्वजनिक आयोजन के संबंध म घलो राज्य सासन डहार ले जरूरी दिसा-निरदेस जारी करे जाही। मुख्यमंत्री भूपेश बघेल के अध्यक्षता म रईपुर स्थित उंखर निवास कार्यालय म आयोजित मंत्रिमंडल के उच्च स्तरीय बइठका म ए निर्णय ले गीस। बइठका म प्रदेस म कोरोना संक्रमण उपर नियंत्रण अउ टीकाकरण के समीक्षा करे गीस। ए दउरान मुख्यमंत्री ह प्रदेस म कोरोना संक्रमण ल रोके बर बचाव के सबो उपाय अउ दिसा-निरदेस के कड़ाई ले पालन सुनिश्चित करे के निरदेस दीन। ओमन किहीन कि सबो जगह मास्क के उपयोग अउ सारीरिक दूरी के नियम के घलो कड़ाई ले पालन करे जाय। मुख्यमंत्री ह होली परब, सादी, अंत्येष्टि अउ आने आयोजन के संबंध म मुख्य सचिव के अध्यक्षता म संबंधित विभाग के अधिकारी मन ले चर्चा करके आवश्यक दिसा-निरदेस जारी करे के घलो निरदेस दीन। ओमन किहीन कि कोरोना संक्रमित मनके पहिचान बर रोजाना जांच के संख्या बढ़ाय जाय। संगेसंग संक्रमित मनके इलाज बर सबो कोविड अस्पताल अउ आइसोलेशन सेंटर म आॅक्सीजन सुविधा वाले बिस्तर के संग आने सबो सेवा के बेवस्था घलो करे जाय। मुख्यमंत्री ह स्वास्थ्यकर्मी, अग्रिम पंक्ति के कार्यकर्ता, साठ बछर ले अधिक उम्र के मनखे अउ पैंतालीस बछर ले अधिक उमर के गंभीर बीमारी ले पीड़ित लोगन के टीकाकरण म घलो तेजी लाने के घलो बात किहीन।
कोरोना समाचार-01
भारत कोविड वैक्सीन के करीबन साढ़े चार करोड़ खुराक देके महत्वपूर्ण उपलब्धि के तीर पहुंच गेहे। केन्द्रीय स्वास्थ्य अउ परिवार कल्याण मंत्रालय ह बतईन कि काली पच्चीस लाख चालीस हजार ले जादा लोगन के टीकाकरण करे गेहे। एमन ल मिलाके अब तक चार करोड़ छियालीस लाख ले जादा टीका लगाय जा चुके हे। ऐति, छत्तीसगढ़ म घलो स्वास्थ्यकर्मी, फ्रंटलाइन वर्कर्स, साठ बछर ले अधिक उमर के नागरिक अउ पैंतालीस बछर ले जादा उमर के गंभीर बीमारी ले पीड़ित लोगन के टीकाकरण नियमित रूप ले जारी हे। काली लगभग पचहत्तर हजार लोगन ल कोरोना के टीका लगाय गीस। इही बीच, प्रदेस म कोरोना संक्रमण के मामला म फेर ले बढ़ोतरी होवत हे। काली बारह सौ तिहत्तर नवा मरीज के पहिचान करे गीस। एला मिलाके प्रदेस म कोरोना संक्रमित लोगन के संख्या बढ़के तीन लाख तेईस हजार ले जादा होगे हे। वर्तमान म सात हजार छह सौ तिरानवे मरीज मनके इलाज आने-आने अस्पताल या होम आइसोलेशन म चलत हे। उहें, राज्य म कोरोना संक्रमण के बाढ़त मामला ल देखत मेडिकल कालेज अस्पताल के पल्मोनेरी विशेषज्ञ डाॅक्टर आर. के पांडा ह कहिन कि सर्दी, खांसी अउ बुखार होय म तुरते कोरोना जांच कराना चाही। ओमन यहू घलो किहीन कि पात्र लोगन ल वैक्सीन जरूर लगवाना चाही। वैक्सीन लगाय के बाद घलो मास्क लगाना, भीड़भाड़ से बचना अउ हाथ के सफाई जरूरी हे।
कोरोना समाचार-02
ओति, राजनांदगांव जिला के ग्राम औंधी म कोरोना टीका लगवाय बर सियान मन म उत्साह देखे जात हे। इहां बड़का संख्या म सियान मन ह स्वास्थ्य केन्द्र पहुंच के कोरोना टीका लगवाईन। उहें, राजनांदगांव मेडिकल काॅलेज म आयोजित कार्यक्रम म भाजपा कार्यकर्ता मन ह कोरोना योद्धा अउ टीका लगवइया लोगन के सम्मान करीन। ए मउका म पूर्व सांसद मधुसूदन यादव ह लोगन ले अपील करीन कि ओमन ह कोरोना टीका जरूर लगवाय। ऐति, जांजगीर-चांपा जिला कलेक्टर ह कोरोना संक्रमण ले बचाव बर बिसेस सावधानी राखे बर होली तिहार के आयोजन के संबंध म दिसा-निरदेस जारी करे हे। एखर तहत होली मिलन समारोह संग सबो प्रकार के सार्वजनिक कार्यक्रम म रोक होही। उहें, बलरामपुर जिला कलेक्टर ह घलो कोरोना संक्रमण ल देखत होली तिहार के दउरान सबो प्रकार के सार्वजनिक कारीकरम ल रोके बर दिसा-निरदेस जारी करे हे। इही बीच, भारत-तिब्बत सीमा पुलिस बल के चवालीसवां वाहिनी डहार ले राजनांदगांव जिला के मोहला क्षेत्र के ग्राम अढ़ाईकट्टा म सिविक एक्सन कारीकरम के तहत गांव वाले मन ल कोरोना संक्रमण ले बचाव बर जागरूक करे गीस। संगेसंग ओमन मास्क अउ सैनिटाईजर घलो बांटे गीस।
राजीव गांधी/गोधन न्याय योजना
मुख्यमंत्री भूपेश बघेल ह आज राजीव गांधी किसान न्याय योजना के तहत प्रदेश के उन्नीस लाख किसान मनके खाता म एक सौ चार करोड़ रूपिया के रासि आॅनलाइन जमा करीन। ए रासि किसान मन ल चैथा किश्त के रूप म दे गेहे। एला मिलाके किसान मन ल एक साल म कुल पांच हजार छह सौ अट्ठाईस करोड़ रूपिया के रासि आदान सहायता के रूप म दे गेहे।
उहें, मुख्यमंत्री ह गोधन न्याय योजना के अंतर्गत एक लाख बैसठ हजार ले जादा पशुपालक अउ ग्रामीण मन ले खरीदे गे गोबर एवज म ओमन ल सात करोड़ पचपन लाख रूपिया के रासि घलो सीधा उंखर खाता म जमा करीन। ए योजना के तहत गोबर विक्रेता मन ल अब तक अट्ठायसी करोड़ रूपिया के भुगतान करे जा चुके हे।
मुख्यमंत्री के रईपुर स्थित निवास कार्यालय म आयोजित ए कारीकरम म सांसद राहुल गांधी घलो वर्चुअल रूप ले सामिल होईन। कारीकरम ल संबोधित करत श्री गांधी ह किहीन कि छत्तीसगढ़ सरकार एक के बाद एक अच्छा कदम उठावत हे। जनता ले करे गे वादा ल पूरा करत हे। ए अवसर म मुख्यमंत्री श्री बघेल ह कहिन कि हमर सरकार ह किसान मन ले करे गे वादा ल पूरा करे हे। राजीव गांधी किसान न्याय योजना के तहत किसान मन ल प्रति एकड़ दस हजार रूपिया के आदान सहायता दे बर नवा बजट म घलो पांच हजार सात सौ तीन करोड़ रूपिया के प्रावधान रखे गेहे। ए योजना के क्रियान्वयन बर मुख्यमंत्री ह मंत्रिमंडलीय उप समिति गठित करे के घलो घोसना करीन।
एरियर्स भुगतान
राज्य सरकार ह सासकीय अधिकारी-करमचारी मन ल सातवां वेतनमान के तहत एक जुलाई दो हजार सोलह ले तीस सितंबर दो हजार सोलह तक बर बकाया एरियर्स के तीसरा किश्त के भुगतान करे के निर्णय लेहे। एमा लगभग तीन सौ साठ करोड़ रूपिया के वित्तीय भार आही। एखर ले राज्य के एक लाख इक्यासी हजार ले जादा सासकीय सेवक ल लाभ मिलही। खबर के मुताबिक राज्य के सासकीय सेवक मन ल छत्तीसगढ़ पुनरीक्षण नियम-दू हजार सत्रह (सातवां वेतनमान) के लाभ एक जनवरी दू हजार सोलह ले लागू करत नगद भुगतान एक जुलाई दू हजार सत्रह ले करे गीस। उहें, एक जनवरी दू हजार सोलह ले तीस जून दू हजार सत्रह तक के अट्ठारह माह के बकाया एरियर्स रासि ल छह किश्त म भुगतान करे जाय के निर्णय ले गे रिहीस। पहला अउ दूसरा किश्त के रूप म प्रदेस के सासकीय कर्मचारी मन ल सात सौ करोड़ रूपिया के भुगतान करे जा चुके हे। कोरोना संक्रमण के सेती एरियर्स के तीसरा किश्त के भुगतान पाछु साल नइ करे गे रिहीस।
संक्षिप्त समाचार
अउ अब थोरकुन समाचार सार म-
- मुख्यमंत्री भूपेश बघेल ह आज छत्तीसगढ़ राज्य ल स्वच्छता ऐंथम ‘‘स्वच्छ बने हे छत्तीसगढ़ हा, छत्तीसगढ़िया सबले बढ़िया‘‘ जारी करीन। प्रसिद्ध बाॅलीवुड गायक अउ संगीतकार शंकर महादेवन ह ए ऐंथम म अपन आवाज देहे।
- गृह मंत्री ताम्रध्वज साहू ह राजनांदगांव के पद्मश्री गोविंदराम निर्मलकर आॅडिटोरियम म सक्ति फाउंडेशन डहार ले आयोजित कारीकरम म सुघ्घर काम करइया महिला मन ल सम्मानित करीन।
- दुरूग जिला के ग्राम बठेना म एके परिवार के पांच लोगन के मउत के मामला म निष्पक्ष जांच के मांग ल लेके भाजपा कार्यकर्ता मन ह आज लोहिया चैक म धरना प्रदर्शन करीन।
अउ
राजधानी रईपुर के पंडरी पुलिस ह मेडिकल काॅलेज म प्रवेस दिलाय के नाव म लाखों रूपिया के ठगी करइया गिरोह के एक ठिन सदस्य ल गिरफ्तार करे हे।