कोरोना गृह मंत्रालय निर्देश
केन्द्रीय गृह मंत्रालय डहार ले जम्मों राज्य अउ केन्द्रसासित प्रदेस मन ल कोविड संक्रमण के रोकथाम बर जरूरी उपाय अउ सुरक्षा प्रबंधन जोरदरहा ढंग ले करे के निरदेस दे हे। राज्य के प्रमुख सचिव अउ केन्द्रसासित प्रदेस मनके प्रसासक मन ल गृह सचिव अजय कुमार भल्ला ह चिट्ठी लिखके किहीन कि निगरानी रोकथाम अउ आने-आने दिसा-निरदेस के बने ढंग ले पालन होना चाही।
कोरोना-समाचार
प्रदेश म कोरोना संक्रमण के मामला फेर बाढ़े लागे हे। काली एक हजार संतानवे नवा मरीज मनके पहिचान करे गीस। एमन ल मिलाके प्रदेस म कोरोना संक्रमित लोगन मनके संख्या तीन लाख बाईस हजार पहुंच गेहे। वर्तमान म छह हजार सात सौ ले जादा मरीज के इलाज आने-आने अस्पताल अउ होम आइसोलेशन म चलत हे। उहें, दुरूग जिला म काली तीन सौ बीस नवा मरीज मनके पुष्टि होय हे, जेमा भिलाई इस्पात संयंत्र के चार महाप्रबंधक, एक सहायक महाप्रबंधक समेत पैंतालीस झन कोरोना जांच रिपोर्ट म पाॅजिटिव आईन। इही बीच, राज्य म कोरोना संक्रमण के बाढ़त मामला ल देखत मेडिकल काॅलेज अस्पताल के पल्मोनरी विशेषज्ञ डाॅक्टर आर.के पांडा ह किहीन कि अभी के मौसम ल देखत थोरकिन भी सर्दी, खांसी अउ बुखार ल हल्का म झन लेवय अउ तुरते कोरोना के जांच कराना चाही। संगेसंग जांच कराय के बाद अपन आप ल आइसोलेट करना चाही, ताकि रिपोर्ट पाॅजिटव आय तक परिवार के लोगन मन ल ए संक्रमण ले बचाय जा सकय। उहें, राजनांदगांव-महाराष्ट्र सीमा म प्रसासन ह अपन सख्ती सुरू कर देहे। बागनदी के तीर महाराष्ट्र अउ आने राज्य मन ले अवइया यात्री के कोरोना जांच करे जात हे। काली एक सौ सैंतालीस यात्री के सैंपल ले गीस, जेमा छह यात्री के रिपोर्ट पाॅजिटिव आय हे।
कोरोना टीकाकरण
प्रदेस म स्वास्थ्यकर्मी, फ्रंटलाइन वर्कर्स, साठ साल ले जादा उमर के मनखे अउ पैंतालीस ले उनसठ साल तक के को-माॅर्बिडिटी वाले मनके टीकाकरण नियमित ढंग ले चलत हे। काली सत्तर हजार पांच सौ ले जादा मनखे मन ल कोरोना के टीका लगाय गीस। इही बीच, राज्य टीकाकरण अधिकारी डाॅक्टर अमर सिंह ठाकुर ह बतईन कि प्रदेस ल जल्दीच केन्द्र सरकार ले पांच लाख छब्बीस हजार नवा वैक्सीन मिलइया हे। वैक्सीन के नवा खेप अवइया कुछु दिन म आ जही।उहें, स्वास्थ्य विभाग ह राज्य म कोरोना संक्रमण के बाढ़त मामला ल देखत प्रोटोकाॅल के अनुसार निर्धारित उमर के मनखे मन ल जल्दी ही वैक्सीन लगवाय के सलाह देहे। रईपुर के डाॅक्टर भीमराव अंबेडकर अस्पताल के विशेषज्ञ डाॅक्टर ओ.पी. संुदरानी ह किहीन कि मेकाहारा के आई.सी.यू. म मरीज सरलग बाढ़त हे। एखरे सेती सबो ल सावधानी बरते के जरूरत हे।
वर्चुअल कोर्ट-शुभारंभ
छत्तीसगढ़ उच्च न्यायालय के मुख्य न्यायाधीश पी.आर. रामचंद्र मेनन ह आज रईपुर म राज्य के पहिली वर्चुअल कोर्ट अउ नवा न्यायालय भवन के अट्ठारह कोर्ट रूम के आॅनलाइन उद्घाटन करीन। ए मउका म न्यायमूर्ति मेनन ह किहीन कि वर्चुअल कोर्ट के माध्यम ले आॅनलाईन कार्रवाई करे जाय से न्यायाधीश मन करा आने न्यायलयीन काम मन बर समय के बचत होही। एखर ले आम पक्षकार मन ल घलो सुविधा मिलही। कारीकरम के अध्यक्षता करत न्यायमूर्ति प्रशांत कुमार मिश्रा ह वर्चुअल कोर्ट के आवश्यकता अउ महत्व के बारे म जानकारी दीन। उहें, न्यायमूर्ति मनिन्द्र मोहन श्रीवास्तव ह किहीन कि वर्चुअल कोर्ट के संबंध म आम लोगन मन ल जानकारी देना चाही।
माओवादी-मुठभेड़
दंतेवाड़ा जिला म आज सुरक्षा बल के संग होय मुठभेड़ म दू इनामी माओवादी मारे गीस। दूनों माओवादी के सव बरामद कर ले गेहे। जिला के पुलिस अधीक्षक अभिषेक पल्लव ह घटना के पुष्टि करत बतईन कि कुआंकोंडा थाना क्षेत्र म डीआरजी के जवान तलासी अभियान म निकले रिहीन। इही दउरान कवासीपारा अउ बड़ेगुडरा के जंगल म ताक म बइठे माओवादी मन सुरक्षा बल उपर फायरिंग सुरू कर दीन। जवान मन डहार ले जवाबी कार्रवाई म दू माओवादी मारे गीस। इंखर पहिचान माड़वी हड़मा अउ अयाता एतेपल के रूप म होय हे। ए दूनों माओवादी मन उपर चार लाख रूपिया के इनाम घोषित रिहीस। घटनास्थल के तलासी के दउरान सुरक्षा बल मन मउका ले पांच किलो के आईईडी के अलावा नौ एम.एम. के पिस्टल, एक देसी कट्टा अउ दू हथियार बरामद करे हे।
राजीव गांधी किसान/गोधन न्याय योजना
मुख्यमंत्री भूपेश बघेल ह काली इक्कीस मार्च के राजीव गांधी किसान न्याय योजना के चैथा किश्त के भुगतान करही। एमा अट्ठारह लाख ले जादा किसान मनके खाता म ग्यारह सौ चार करोड़ सत्ताईस लाख रूपिया के रासि भुगतान करे जाही।
उहें, मुख्यमंत्री ह काली गोधन न्याय योजना के पन्द्रह अउ सोलहवां किश्त के सात करोड़ पचपन लाख रूपिया के भगुतान पशुपालक मनके खाता म करही।
छत्तीसगढ़ी साहित्य महोत्सव
राजधानी रईपुर म आयोजित दो दिवसीय छत्तीसगढ़ी साहित्य महोत्सव के आज आखिरी दिन हरय। स्कूल शिक्षा मंत्री डाॅक्टर प्रेमसाय सिंह टेकाम ह काली ए महोत्सव के उद्घाटन करीन। ए मउका म प्रदेस के इंक्यावन वरिष्ठ महिला अउ युवा साहित्यकार मनके सम्मान करे गीस। कारीकरम ल संबोधित करत डाॅक्टर टेकाम ह किहीन कि छत्तीसगढ़ के ए महोत्सव भासा अउ विकास बर बहुत महत्वपूर्ण आय। महोत्सव के संयोजक विधायक सत्यनारायण शर्मा ह किहीन कि राज्य सरकार छत्तीसगढ़ी के नवाचार बर जोरलगहा काम करत हे। ए महोत्सव ह छत्तीसगढ़ के साहित्यकार मन ल मंच दिलाय के काम करत हे। उहें, पंडित रविशंकर शुक्ल विश्वविद्यालय के कुलपति डाॅक्टर केशरी लाल वर्मा ह किहीन कि छत्तीसगढ़ी म वैज्ञानिक अउ शैक्षिक भासा के गुण हे। जम्मों क्षेत्र म छत्तीसगढ़ी भाखा के उपयोग करना चाही, तभे हमर राज्य भासा के विकास हो सकथे।
रोड सेफ्टी क्रिकेट टूनामेंट
राजधानी रईपुर के शहीद वीरनारायण सिंह अंतर्राष्ट्रीय क्रिकेट स्टेडियम म रोड सेफ्टी वल्र्ड सीरीज टी-ट्वेंटी क्रिकेट प्रतियोगिता के तहत फाइनल मैच काली इंडिया लीजेंड्स अउ श्रीलंका लीजेंड्स के बीच खेले जाही।
एखर पहिली, काली रतिहा खेले गे दूसरा सेमीफाइनल मुकाबला म श्रीलंका लीजेंड्स ह साउथ अफ्रीका लीजेंड्स ल आठ विकेट ले हरा दीस।
ओ डहार, जगदलपुर म जिला प्रसासन, समाज कल्याण विभाग अउ खेल युवा कल्याण विभाग डहार ले आयोजित दू दिवसीय दृष्टिबाधित दिव्यांग क्रिकेट प्रतियोगिता के खिताब बस्तर के टीम ह जीतीस। काली खेले गे फाइनल मुकाबला म बस्तर ह राजनांदगांव के टीम ल हराईस।
ऐति, गुजरात के अहमदाबाद के मणिनगर म काली ले सुरू होवइया राष्ट्रीय साॅफ्ट टेनिस प्रतियोगिता बर राजनांदगांव के गायत्री विद्यापीठ के छात्र श्रीनन मेनन मेश्राम के चयन होय हे।
हमर ग्राम सभा
प्रदेश के ग्रामीण अउ पंचायत मंत्री टी.एस. सिंहदेव ह काली संझा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म राज्य सासन के नीति, योजना अउ कारीकरम मनके बारे म जानकारी दीही। ए कारीकरम ल मीडियम वेव नौ सौ इक्यासी किलोहर्ट्ज म सुने जा सकथे। ए कारीकरम ल प्रदेस स्थित आकाशवाणी के जम्मों केन्द्र एक साथ रिले करही।
आरिफ शेख-सम्मानित
वरिष्ठ आईपीएस आरिफ शेख ल ‘‘हर हेड हेलमेट‘‘ बर स्मार्ट पुलिसिंग अवाॅर्ड ले सम्मानित करे गीस। फिक्की डहार ले कम्युनिटी पुलिसिंग के माध्यम ले जनता के विश्वास कायम राखे म अउ नवा काम के आने-आने श्रेणी म सम्मान समारोह के आयोजन करे गे रिहीस। ए अवाॅर्ड रोड सेफ्टी अउ ट्रैफिक मैनेजमेंट म उत्कृट कार्य बर दे गीस।
विश्व गौरेया दिवस
आज विश्व गौरेया दिवस हरय। साल दो हजार दस ले ए दिवस के आयोजन गौरेया के संख्या म कम होय के कारण लोगन मन ल जागरूक बनाय के उद्देश्य ले मनाय जाथे। पक्षी प्रेमी मोहम्मद दिलावर डहार ले स्थापित नेचर फाॅर एवर सोसायटी ह गौरेया संरक्षण के दिसा म सुघ्घर काम करे हे।
संक्षिप्त समाचार
अउ अब थोरकुन समाचार सार म-
भाजपा के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह, प्रदेश अध्यक्ष विष्णुदेव साय संगे नेता प्रतिपक्ष धरमलाल कौशिक ह गिरौदपुरी प्रवास के दउरान कसडोल, हथबंध अउ देवरी धान खरीदी केन्द्र के निरीक्षण करीन।
अउ
छत्तीसगढ़ व्यापमं ह छत्तीसगढ़ मण्डी समिति म एक सौ अड़सठ मण्डी निरीक्षक अउ उप निरीक्षक पद बर भर्ती बर आवेदन पत्र आमंत्रित करे हे। एखर बर आवेदन के प्रक्रिया सुरू होगे हे, जउन चार अप्रैल तक चलही।