केन्द्र-कोविड संक्रमण
केन्द्र सरकार ह कहिन कि छत्तीसगढ़ संग महाराष्ट्र, पंजाब, कर्नाटक अउ गुजरात म कोविड संक्रमण के दैनिक मामला म बढ़ोतरी होवत हे। केन्द्रीय स्वास्थ्य मंत्रालय ह बतईन कि केन्द्र सरकार बिसेस रूप ले ओ सब्बो राज्य अउ केन्द्रसासित प्रदेस के संग संपर्क म हे, जिहां कोरोना संक्रमण के रोजाना मामला म बढ़ोतरी होवत हे। मंत्रालय के कहना हे कि केन्द्र सरकार उंखर संग कोविड नियंत्रण अउ जन स्वास्थ्य उपाय के सरलग समीक्षा करत हे। मंत्रालय ह कहिन कि राज्य अउ केन्द्रसासित प्रदेस मन ल ओ सब्बो जिला म कोविड जांच बढ़ाय के सलाह दे गेहे, जिहां जांच कम कर दे गे रिहीस। संक्रमित मनखे के संपर्क म आय ले कम से कम बीस मनखे मन ल बहत्तर घंटा के अंदर पता लगाके अउ गंभीर मामला म अलग आवास अउ सुरूवाती उपचार के व्यवस्था करे के घलो सलाह दे गीस। चिन्हित जिला अउ ओ इलाका मनके निगरानी बढ़ाय के संगेसंग कोविड संबंधी नियम के सख्ती ले पालन करे बर केहे गेहे।
खबर के मुताबिक छत्तीसगढ़ म काली एक्के दिन म कोरोना संक्रमण के एक हजार छैसठ नवा मामला सामने आय हे, जेमा सबले जादा रईपुर जिला ले तीन सौ दस अउ दुरूग जिला म दू सौ इक्यासी मरीज मिले हे। प्रदेस म काली चालीस हजार दू सौ तिरासी कोरोना टेस्ट करे गीस।
हर्षवर्धन-कोविड टीका
केन्द्र सरकार ह कहिन कि कोविड-नाइंटीन के टीका पूरा तरह ले सुरक्षित हे अउ एखर क्षमता उपर संदेह नइ करना चाही। आज लोकसभा म एक ठिन पूरक प्रश्न के उत्तर देवत केन्द्रीय स्वास्थ्य परिवार कल्याण मंत्री डाॅक्टर हर्षवर्धन ह कहिन कि कोनों भी टीका कड़ा वैज्ञानिक परीक्षण अउ राष्ट्रीय अउ अंतर्राष्ट्रीय स्तर म बिसेसज्ञ मनके जांच के बाद ही लगाय जाथे। ओमन किहीन कि देस म कोविड नाइंटीन टीका मामूली दुष्प्रभाव के खबर हे। डाॅक्टर हर्षवर्धन ह लोगन ले कोविड टीका लगवाय के अपील करीन।
इही बीच, देस म अब तक तीन करोड़ तिरानवे लाख ले जादा लोगन ल कोविड के टीका लगाय जा चुके हे। ऐति, छत्तीसगढ़ म घलो कोरोना टीकाकरण के कारज जोर-सोर ले चलत हे। काली अठहत्तर हजार छह सौ चालीस लोगन ल कोरोना के टीका लगाय गीस। राज्य टीकाकरण अधिकारी डाॅक्टर अमर सिंह ठाकुर ह बतईन कि अभी राज्य म पर्याप्त वैक्सीन उपलब्ध हे अउ टीकाकरण के प्रक्रिया म कोन्हों बाधा नइ आवय। ओमन बतईन कि राज्य ल तुरते ही सवा पांच लाख ले जादा के डोज के कोरोना वैक्सीन मिलही।
कोरोना-विशेषज्ञ सलाह
इही बीच, स्वास्थ्य विभाग ह राज्य म कोरोना संक्रमण के बाढ़त मामला ल देखत साठ बछर ले जादा उमर के अउ पैंतालीस बछर ले उनसठ आयु समूह के पात्र लोगन ल तुरते वैक्सीन लगाय के सलाह देहे। रईपुर के डाॅक्टर भीमराव अंबेडकर अस्पताल के बिसेसज्ञ डाॅक्टर ओ.पी. संुदरानी ह कहिन कि कोरोना के बाढ़त संक्रमण के सेती मेकाहारा के आई.सी.यू. म मरीज मनके संख्या म लगातार बढ़ोतरी होवत हे। एखर सेती सब्बो झन ल जादा सावधानी रखे के जरूरत हे। डाॅक्टर सुंदरानी ह कहिन कि सर्दी, बुखार, कफ जइसन लक्षण दिखे म तुरते कोरोना जांच कराना चाही।
केन्द्रीय राज्यमंत्री-एम्स रायपुर
केन्द्रीय स्वास्थ्य अउ परिवार कल्याण राज्यमंत्री अश्वनी कुमार चैबे काली बीस मार्च के अखिल भारतीय आयुर्विज्ञान संस्थान-एम्स रईपुर के दस माॅड्यूलर आॅपरेसन थियेटर अउ पेट-सीटी मसीन के लोकार्पण करही। केन्द्रीय मंत्री काली संझा रईपुर एयरपोर्ट ले एम्स पहुंचही। एखर बाद ओमन ओटी अउ पेट-सीटी मसीन के लोकार्पण करे के बाद एम्स के दौरा करही। एखर बाद काली संझा ही श्री चैबे ह बिलासपुर रवाना हो जही।
आकाशवाणी फर्जी आॅफिस-छापा
राजधानी रईपुर म भारत सरकार के पत्र सूचना कार्यालय आउटरीच ब्यूरो अउ प्रसार भारती के नाव ले फर्जी आॅफिस चलाय अउ फर्जी नियुक्ति पत्र देवइया एक रैकेट के पर्दाफास होय हे। पुलिस ह ए मामला अभिजीत शर्मा नाम के एक झिन मनखे ल गिरफ्तार करे हे। एखर तीर ले प्रसार भारती, गृह मंत्रालय अउ आने विभाग के फर्जी लेटर पैड म जारी कतकोन नियुक्ति पत्र अउ भारत सरकार के मुहर संग आने सामाग्री बरामद करे गेहे। पुलिस ल आकाशवाणी केन्द्र रईपुर के अधिकारी मन डहार ले ए जानकारी दे गे रिहीस कि राजीव नगर इलाका म कोन्हों मनखे भारत सरकार के विभाग मनके नाम ले बोर्ड लगाके संदिग्ध तरीका ले आॅफिस चलात हे। संगेसंग आरोपी ह आकाशवाणी केन्द्र रईपुर के आने-आने वरिष्ठ अधिकारी मनके नाम पट्टिका के बोर्ड घलो अपन कार्यालय म लगा रखे रिहीस। सीएसपी नसर सिद्दीकी ह बतईन कि ए पूरा मामला म विस्तार ले जांच करे जाही।
राजीव गांधी किसान/गोधन न्याय योजना
मुख्यमंत्री भूपेश बघेल ह इक्कीस मार्च के राजीव गांधी किसान न्याय योजना के चैथा किश्त के भुगतान करही। एखर तहत अट्ठारह लाख ले जादा किसान मनके खाता म ग्यारह सौ चार करोड़ सत्ताईस लाख रूपिया के रासि के भुगतान करे जाही। योजना के तहत अब तक किसान मन ल तीन किश्त म साढ़े चार हजार करोड़ रूपिया के भुगतान करे जा चुके हे। उहें, मुख्यमंत्री इक्कीस मार्च के ही गोधन न्याय योजना के पन्द्रहवां अउ सोलहवां किश्त के रूप म पशुपालक मनके खाता म सात करोड़ पचपन लाख रूपिया के भुगतान करही।
सीआरपीएफ-स्थापना दिवस
केन्द्रीय रिजर्व पुलिस बल-सी.आर.पी.एफ. आज अपन स्थापना दिवस मनावत हे। ए अवसर म केन्द्रीय गृह राज्यमंत्री नित्यानंद राय ह कहिन कि सीआरपीएफ माओवाद प्रभावित इलाका मन म सरकारी नीति मन ल अमल म लाय बर बढ़िया ढंग ले काम करत हे। श्री राय ह कहिन कि बल ह झारखंड अउ छत्तीसगढ़ म माओवाद के आसंका वाले इलाका म सांति अउ विकास बर काम करत हे। ओमन ह दृढ़तापूर्वक देस के सुरक्षा म तैनात रेहे बर केन्द्रीय रिजर्व पुलिस बल के सराहना करीन।
मौसम
अउ अब पेस हे मौसम के हाल…
प्रदेश म ए बेरा मौसम के मिजाज के बदल गेहे अउ कुछेक जिला म बरसा होय के समाचार मिले हे। मौसम विभाग ह अवइया चैबीस घंटा के दउरान प्रदेस म एक-दू स्थान म हल्का बरसा अउ गरज-चमक के संग छीटा पड़े के संभावना बताय हे।
मौसम विभाग के अनुसार एक ठन चक्रीय चक्रवाती घेरा विदर्भ के उपर बने हुए हे। एखर असर ले प्रदेस म दक्षिण अउ उत्तर पश्चिम ले नमी के संग गरम हवा आवत हे, जेखर प्रभाव ले आज राजधानी रईपुर संग प्रदेस के मध्य अउ उत्तर भाग म बादल छाय हे। उहें, राजनांदगांव म तेज हवा के संग हल्का बरसा होईस, जेखर ले तापमान म गिरावट दर्ज करे गेहे।
संक्षिप्त समाचार
मुख्यमंत्री भूपेश बघेल काली बीस मार्च के बाबा गुरू घासीदास के जन्मभूमि अउ तपोभूमि गिरौदपुरीधाम म आयोजित गुरू दर्शन मेला म सामिल होही। उहें, मुख्यमंत्री काली राजनांदगांव अउ बिलासपुर जिला म आयोजित आने-आने कारीकरम म घलो संघरही।
अउ अब थोरकुन समाचार सार म-
भारतीय जनता युवा मोर्चा ह छत्तीसगढ़ लोक सेवा आयोग म कथित घोटाला संग अपन दस सूत्रीय मांग ल लेके धमतरी के कन्या महाविद्यालय म आज हस्ताक्षर अभियान चलाईन।
दुरूग जिला चिकित्सालय म जीवनदीप समिति के तहत डाटा आॅपरेटर के तीन पद म भर्ती बर मेरिट सूची जारी कर दे गेहे। उम्मीदवार मनके कौशल परीक्षा इक्कीस मार्च के जिला चिकित्सालय म ले जाही।
रईपुर पुलिस अउ साइबर सेल ह दुर्लभ प्रजाति के सांप के तस्करी करे के आरोप म चार झिन आरोपी मन ल गिरफ्तार करे गेहे। ए दुर्लभ प्रजाति के सांप के अनुमानित कीमत करोड़ो रूपिया आंके गेहे।
अउ
जशपुर जिला के तपकरा पुलिस ह गांजा तस्करी के आरोप म तीन लोगन ल गिरफ्तार करके उंखर तीर ले चार क्विंटल बाईस किलो गांजा जब्त करे हे।