प्रधानमंत्री-मुख्यमंत्री चर्चा
प्रधानमंत्री नरेन्द्र मोदी ह कोरोना वायरस के दूसर लहर के प्रभाव ल रोके बर सबो जरूरी कदम उठाय बर जोर देहे। ओमन किहीन कि स्थिति ल नियंत्रण म राखे बर जल्दी अउ ठोस कदम उठाना जरूरी हे। श्री मोदी ह किहीन कि पाछु एक सप्ताह म देस के 70 जिला मन म कोविड के मामला म डेढ़ सौ प्रतिशत के बढ़ोतरी के खबर हे।
आज राज्य अउ केन्द्रसासित प्रदेस के मुख्यमंत्री मनके बैठक ल संबोधित करत प्रधानमंत्री ह किहीस कि कोरोना ले लड़ाई म आज हम जहां तक पहुंचे हन अउ जो विश्वास ओखर ले आय हे ओला लापरवाही म नइ बदलना चाही।
प्रधानमंत्री ह मुख्यमंत्री मन ले अपील करे हे कि वायरस के प्रसार ल रोके बर ओमन छोटे कंटेनमेंट जोन बनाय उपर ध्यान देवय।
छत्तीसगढ़ के मुख्यमंत्री भूपेश बघेल असम प्रवास म होय के सेती ए समीक्षा बैठक म भाग नइ ले सकीन। उंखर जगह म छत्तीसगढ़ ले गृहमंत्री ताम्रध्वज साहू ए वीडियो कान्फ्रेंसिंग म सामिल होईन।
कोरोना-टीकाकरण
छत्तीसगढ़ म कोविड टीकाकरण के काम जोर-सोर ले चलत हे। राज्य म अब तक करीब 09 लाख 81 हजार ले ज्यादा लोगन मन ल कोविड टीका लगाय जा चुके हे, जेमा दूसरा डोज वाले मन घलो सामिल हे। काली 61 हजार 700 ले ज्यादा लोगन मन कोरोना टीका लगवईन।
उहें, स्वास्थ्य विशेषज्ञ मन ह लोगन मन ल बार-बार ए बात बर सजग करत हे कि कोरोना वैक्सीन के दोनों डोज लगवाय के बाद घलो एखर ले बचाव बर नियम के पालन करना जरूरी हे।
इही बीच, प्रदेश म कोरोना संक्रमण के मामला अउ बाढ़त हे। काली 856 नवा मरीज मनके पहिचान करे गीस। एमन ल मिलाके प्रदेस म कोरोना संक्रमित मरीज मनके संख्या करीब 03 लाख 18 हजार होगे हे, जेमा ले 03 लाख 10 हजार मरीज मन स्वस्थ होगे हे। अभी के बेरा म 4661 मरीज मनके इलाज आने-आने अस्पताल अउ होम आइसोलेशन म चलत हे।
शिक्षा के अधिकार
शिक्षा के अधिकार अधिनियम के अंतर्गत प्रदेश के निजी स्कूल मन म प्रवेश बर आवेदन के तारीख एक सप्ताह बढ़ा दे गेहे। पहिली 15 मार्च ले आवेदन के प्रक्रिया सुरू होना रिहीस, लेकिन अब 22 मार्च ले आवेदन ले जाही।
लोक शिक्षण संचालनालय के अनुसार 22 मार्च ले 22 अप्रैल तक अभिभावक निजी स्कूल मन म भर्ती कराय बर आवेदन दे सकही। उहें, आवंटन के बाद घलो अगर निजी स्कूल म सीट बांचे रिही त अवइया 17 जून ले 26 जून के बीच दूसर चरण म भर्ती प्रक्रिया आयोजित करे जाही।
प्रवेश परीक्षा-निःशुल्क कोचिंग
भारत सरकार के अल्पसंख्यक कार्य मंत्रालय डहार ले भिलाई अउ रायपुर के अल्पसंख्यक वर्ग के विद्यार्थी मन ल चिकित्सा अउ इंजीनियरिंग प्रवेस परीक्षा मनके तैयारी बर निःशुल्क कोचिंग दे जाही। संगेसंग चयनित विद्यार्थी मन ल हर महीना ढाई हजार रूपिया छात्रवृत्ति दे जाही। इच्छुक विद्यार्थी मन ले 30 अप्रैल तक आवेदन आमंत्रित करे गेहे। निःशुल्क कोचिंग बर नई दिल्ली के सचदेव कालेज लिमिटेड के संग अनुबंध करे गेहे।
साय-आरोप
भारतीय जनता पार्टी के प्रदेश अध्यक्ष विष्णुदेव साय ह राज्य के सबो नदियां ले अवैध रूप ले रेत उत्खनन करे के आरोप लगाय हे। रायपुर म एक बयान जारी करके ओमन किहीन कि सबो नदियां मन म रेत तस्कर मनके कब्जा होगे हे अउ अवैध उत्खनन के सेती राजस्व के नुकसान होय हे। श्री साय ह आरोप लगाय हे कि सरकार के अनदेखी के सेती आम उपभोक्ता ज्यादा दर म रेती खरीदे बर मजबूर हे। ओमन ह सरकार ले अवैध रूप ले होवत रेती के तस्करी ल रोके बर अउ आम उपभोक्ता मन ल कम कीमत म रेती उपलब्ध कराय बर ठोस पहल करे के मांग करीन।
त्रिवेदी-आरोप
राज्य पाठ्य पुस्तक निगम के अध्यक्ष अउ प्रदेश कांग्रेस प्रवक्ता शैलेष नितिन त्रिवेदी ह आरोप लगाय हे कि निगम के वरिष्ठ अधिकारी मन ह बछर 2019 ले बछर 2020 के दौरान चेक भुगतान के मामला म नियम मनके पालन नइ करे हे। श्री त्रिवेदी ह रायपुर म एक प्रेसवार्ता लेके छत्तीसगढ़ राज्य संपरीक्षा आॅडिट के हवाला ले ये खुलासा करे हे। आरोप लगाय हे कि बछर 2019-20 के बीच वरिष्ठ प्रबंधक वित्त के जगह सिर्फ महाप्रबंधक के हस्ताक्षर ले जारी चेक के माध्यम ले रासि निकाले गीस, जबकि निगम के नियम के अनुसार एक लाख रूपिया ले ज्यादा के चेक उपर वरिष्ठ प्रबंधक वित्त अउ महाप्रबंधक दोनों के हस्ताक्षर होना जरूरी होथे।
हीरा तस्कर-गिरफ्तार
जगदलपुर पुलिस ह हीरा अउ कोरंडम तस्करी के दो अलग-अलग मामला म तीन आरोपी मन ल गिरफ्तार करे हे। पहिली घटना बोधघाट थाना क्षेत्र के हरय। मिले सूचना के अनुसार पुलिस ह टीम बनाके बस स्टैंड म छापा मार कार्रवाई करीस अउ दू संदिग्ध मन ल गिरफ्तार कर लीस। इंखर करा ले 535 नग हीरा अउ 5 नग कोरंडम बरामद करे गीस। ए आरोपी मन बिहार अउ ओड़िसा के रहवइया हरय।
उहें, सहर के चांदनी चैक ले घलो पुलिस ह एक झिन हीरा तस्कर ल गिरफ्तार करे हे, जेखर करा ले करीब साढ़े पांच लाख रूपिया के 189 नग हीरा बरामद होय हे।
दूसर डहार, जशपुर नगर म 45 किलो गांजा बरामद करे हे। ए गांजा ओड़िसा ले लाय जात रिहीस। पुलिस ह ए मामला म तपकरा थाना क्षेत्र ले दू झिन आरोपी मन ल गिरफ्तार करे हे। जब्त करे गे गांजा के कीमत 3 लाख रूपिया बताय जात हे।
रोड सेफ्टी क्रिकेट टूर्नामेंट
राजधानी रईपुर के शहीद वीरनारायण सिंह अंतर्राष्ट्रीय क्रिकेट स्टेडियम म रोड सेफ्टी वल्र्ड सीरीज टी-20 क्रिकेट प्रतियोगिता के अंतर्गत खेले जात मैच के बेरा अब दर्सक मनके संख्या स्टेडियम के क्षमता ले पचास प्रतिशत ले ज्यादा नइ होही। ए निर्देश मुख्यमंत्री भूपेश बघेल ह देहे। ओमन ह अधिकारी मन ले केहे हे कि मैच के बेरा स्टेडियम के भीतर अउ बाहिरी परिसर म कोविड प्रोटोकाॅल के कड़ाई ले पालन करे जाय। संगेसंग मैच देखइया दर्सक मन जरूरी रूप ले मास्क लगाय। ओमन ह अधिकारी मन ल निरदेस देहे कि अगर दर्सक मास्क नइ लगाही त अर्थदंड वसूले के संग उंखर उपर कड़ा कार्रवाई करे जाय।
उहें, ए प्रतियोगिता के अंतर्गत आज पहिली सेमीफाइनल मुकाबला म भारत लीजेंड्स के मुकाबला वेस्टइंटीज लीजेंड्स ले होही।
मौसम
मौसम विभाग ह अवइया 3 दिन तक प्रदेस के एक-दू जगह मन म हल्का बरसात होय के या गरज-चमक के संग छींटा पड़े के संभावना जताय हे। ए बेरा आकाशीय बिजली गिरे के चेतावनी घलो दे हे।
रायपुर स्थित मौसम विज्ञान केन्द्र ले मिले जानकारी के अनुसार 19 मार्च के प्रदेस के एक-दू जगह मन म ओलावृष्टि होय के संग तेज हवा चल सकथे। ए बेरा राज्य के मध्य अउ उत्तरी क्षेत्र म ओलावृष्टि के अनुमान लगाय गेहे।
माओवादी-वारदात
बीजापुर जिला के बेदरे थाना क्षेत्र म स्थित तर्रेम-पटेलपारा क्षेत्र ले सुरक्षा बल मन ह 4 माओवादी मन गिरफ्तार करे हे। इंखर करा ले आई.ई.डी. घलो बरामद करे गेहे। गिरफ्तार माओवादी मन उपर केरकेली अउ बंदेपारा के बीच 40 जगह मन म सड़क ल काट के आवागमन बाधित करे अउ सासकीय संपत्ति ल नुकसान पहुंचाय के आरोप हे।
उहें, लोन वर्राटू अभियान के अंतर्गत दंतेवाड़ा जिला के बचेली थाना म 2 लाख रूपिया के एक इनामी माओवादी ह आत्मसमर्पण करीस।