लोकवाणी
मुख्यमंत्री भूपेश बघेल ह आज प्रसारित मासिक रेडियोवार्ता ‘‘लोकवाणी‘‘ के 16वां कड़ी म किहीन कि महिला मनके अधिकार के रक्षा, उंखर सिक्षा, स्वास्थ्य, स्वालंबन अउ आत्मसम्मान खातिर राज्य सरकार ह ठोस काम करे हे। ओमन किहीन कि नारी शक्ति के भागीदारी ले छत्तीसगढ़ म छोट-छोट योजना, पूंजी अउ कल-कारखाना ल मिला के एक ठिन नवा आर्थिक क्रांति के जन्म होही। ए आर्थिक क्रांति विकास के एक ठिन टिकाऊ माॅडल बनके जम्मों दुनिया म अपन नाम करही। श्री बघेल ह लोकवाणी कारीकरम म माईलोगिन मन खातिर करे जाावत काम उपर गोठबात करत किहीन कि वन आंचल अउ ग्रामीण क्षेत्र मन म स्वावलंबन खातिर सुरू करे गे योजना मन ले माईलोगिन बड़ संख्या म स्वावलंबी बनत हवय। मुख्यमंत्री ह किहीन कि ग्राम सुराजी, गोधन न्याय योजना, लघु वनोपज के समर्थन मूल्य म खरीदी अउ गौठान मन म चलत योजना ल माईलोगिन मनके भागीदारी ले ही सफलता मिलत हवय।
मुख्यमंत्री ह किहीन कि माईलोगिन मनके अधिकार सुरक्षित रहय, एखर सेती भर्ती, पदोन्नति अउ दस्तावेज मनके छानबीन खातिर जउन समिति बनही, ओमा एक झिन माईलोगिन, प्रतिनिधि के रूप म जरूरी रूप से राखे जाय के प्रावधान करे गेहे। संगेसंग माईलोगिन मन खातिर आरक्षण के सुविधा घलो निश्चित करे गे हवय। ओमन किहीन कि प्रदेस म सिक्षक मनके स्थायी भर्ती अउ पुलिस भर्ती के रूके हुए प्रक्रिया सुरू कर दे गे हवय। मुख्यमंत्री ह बतईन कि प्रदेस के आने-आने जिला म कन्या महाविद्यालय अउ कन्या छात्रावास घलो खोले जाही। मुख्यमंत्री ह लोकवाणी कारीकरम म महिला मन ले निवेदन करीन कि कोविड-19 टीकाकरण म टीकाकरण के बाद भी मास्क पहिनना, सुरक्षित दूरी के पालन करना अउ साबुन ले हाथ ल घेरी-बेरी धोना जइसन उपाय के ओमन ल पालन करना चाही।
राज्यपाल-परिचय सम्मेलन
राज्यपाल अनुसुईया उइके ह आदिवासी समाज ले आह्वान करे हे कि ओमन अपन लइका मन ल अच्छा ले अच्छा सिक्षा दिलाय। ओमन किहीन कि विकास के महत्वपूर्ण पूंजी सिक्षा हवय। सिक्षा ले ही जागरूकता आही अउ समाज मजबूत होही।
सुश्री उइके ह आज आदिवासी सेवा मंडल भोपाल डहार ले आयोजित करे गे युवक-युवती परिचय सम्मेलन ल वीडियो कान्फ्रेंसिंग के जरिया ले संबोधित करत ए बात किहीन। ओमन किहीन कि आदिवासी समाज ल बढ़ाय खातिर आदिवासी सेवा मंडल डहार ले बने बूता करे जात हे, जउन ह सराहनीय हे अउ ए प्रयास आदिवासी समाज ल आगू ले जाय म बड़ मददगार साबित होही। उहें, राज्यपाल ह आज नवा रईपुर स्थित श्री सत्य सांई संजीवनी हाॅस्पिटल परिसर म ‘‘मां और बाल देखभाल केन्द्र-ममत्व‘‘ के भूमिपूजन करीन। ए मउका म ओमन किहीन कि बस्तर अउ सरगुजा जइसन क्षेत्र के गर्भवती माता अउ लइका मनके देखरेख तथा उंखर इलाज म ‘‘मां और बाल देखभाल केन्द्र‘‘ के महत्वपूर्ण भूमिका होही।
परीक्षा पे चर्चा
प्रधानमंत्री नरेन्द्र मोदी के साथ संवाद वाला शैक्षिक कारीकरम ‘‘परीक्षा पे चर्चा‘‘ खातिर पंजीकरण के आज आखिरी दिन होही। ए कारीकरम के ए चैथा संस्करण होही अउ एला वर्चुअल माध्यम ले आयोजित करे जाही। आकाशवाणी ले बिसेस गोठबात म केन्द्रीय माध्यमिक शिक्षा बोर्ड के परीक्षा नियंत्रक संयम भारद्वाज ह अपील करीन हे कि जादा ले जादा संख्या म लइका अउ उंखर माता-पिता मन ल ए कारीकरम म भाग लेना चाही।
हमर ग्राम सभा
प्रदेस के पंचायत अउ ग्रामीण विकास मंत्री टी.एस. सिंहदेव ह आज रतिहा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म राज्य सासन के नीति, योजना अउ कारीकरम के बारे म जानकारी दीहीं। ए कारीकरम ल मीडियम वेव 981 किलोहर्ट्ज म सुने जा सकत हे। ए कारीकरम ल प्रदेस के आकाशवाणी के जम्मों केन्द्र मन एके संघरा रिले करही।
सिरपुर महोत्सव-मुख्यमंत्री
मुख्यमंत्री भूपेश बघेल ह किहीन हे कि सिरपुर ल विश्व धरोहर के रूप म विकसित करे अउ पहिचान दिलाय खातिर राज्य सरकार जम्मों प्रयास करत हवय। श्री बघेल ह महासमुंद जिला के सिरपुर म आयोजित तीन दिन के अंतर्राष्ट्रीय सिरपुर महोत्सव अउ शोध संगोष्ठी कारीकरम ल संबोधित करत किहीन कि सिरपुर के पूरा वैभव अब्बड़ बड़ा हवय, जउन ह लगभग दस वर्ग किलोमीटर के क्षेत्र म फइले हे। एखर जइसन बड़का अउ फइले हुए बौद्ध केन्द्र अन्य कोनों जघा म नइ हवय। मुख्यमंत्री ह बतईन कि सिरपुर के संगेसंग डोंगरगढ़ अउ मैनपाट ल टूरिज्म सर्किट ले जोड़े के तियारी हवय, जेखर ले घूमे खातिर बाहिर ले अवइया सैलानी मनके रूचि बाढ़ही अउ जल्द ही सिरपुर विश्व के मानचित्र म अंकित हो जही। कारीकरम म मुख्यमंत्री ह सिरपुर के विकास खातिर लगभग 111 करोड़ रूपिया के कार्य मनके घोसना करीन। ए मउका म ओमन भदंत नागार्जुन सुरई ससई अउ आचार्य श्री विचार साहेब ल सम्मानित करीन। जानबा के मुताबिक बीते 12 मार्च ले सुरू होय तीन दिन के सिरपुर महोत्सव अउ शोध संगोष्ठी कारीकरम के आज समाप्ति होवत हे।
भाजपा-बैठक
भारतीय जनता पार्टी के प्रदेस कार्यसमिति के बइठका आज रईपुर के कुशाभाऊ ठाकरे परिसर के पार्टी कार्यालय म आयोजित करे गीस। बइठका म प्रदेस म कानून बेवस्था के स्थिति के संबंध म राजनीतिक प्रस्ताव लाय गीस। संगेसंग संगठन के अवइया तीन महीना के कार्ययोजना, रणनीति अउ अन्य बिसय मन उपर बिचार-विमर्श करे गीस। बइठका ल संबोधित करत भाजपा के प्रदेश प्रभारी डी. पुरंदेश्वरी ह किहीन कि हालात जइसने भी हो, पार्टी कार्यकर्ता मन विजय पाय के उद्देश्य ले बूता करीन हे अउ अवइया समय म घलो ओमन अइसनेच कार्य करत रइही। ओमन किहीन कि कोरोना काल म घलो भाजपा कार्यकर्ता मन ह बड़ मजबूती अउ मेहनत ले बूता करे हे। भाजपा के प्रदेश अध्यक्ष विष्णुदेव साय ह उदघाटन सत्र म किहीन कि हमन के एकेच ठिन लक्ष्य हवय, मिशन 2023। ओमन कार्यकर्ता मन ले किहीन कि प्रदेस सरकार के जन विरोधी नीति अउ असफलता मन ल लेके हमन ल जनता के बीच जाय ल पड़ही।
अबूझमाड़-रैम्प वाॅक
नारायणपुर के मावली मेला म अंतर्राष्ट्रीय महिला सप्ताह के मउका म अबूझमाड़ के संस्कृति अउ पहिनावा के बारे म लोगन मन ल परिचित कराय के उद्देश्य ले अबूझमाड़ रैम्प वाॅक के आयोजन करे गीस, जउन म अबूझमाड़ के लइका अउ माईलोगिन मन बड़ संख्या म भागीदारी करीन। नारायणपुर पुलिस, नवसंचार अउ करूणा फाउंडेशन के सहयोग ले आयोजित ए कारीकरम म आने-आने वर्ग म विजेता प्रतिभागी मन ल पुरस्कार अउ स्मृति चिन्ह दे गीस।