प्रधानमंत्री-आयुर्वेद
प्रधानमंत्री नरेन्द्र मोदी ह आयुर्वेद जगत ल पूरा समर्थन दे जाय के आश्वासन दीन हे। वैश्विक आयुर्वेद समारोह म बोलत श्री मोदी ह किहीन कि लोगन ल आयुर्वेद के फायदा अउ रोग-प्रतिरोधक क्षमता के महत्व समझ म आवत हे। ओमन किहीन कि मौजूद हालत म आयुर्वेद अउ परंपरागत औषिध ल विश्व स्तर म पहिचान देवाय के ए सही मउका म हे।
कोरोना-मुख्यमंत्री
मुख्यमंत्री भूपेश बघेल ह कोरोना संक्रमण के बाढ़त मामला ल देखत लोगन ले कोरोना ले बांचे के उपाय अउ नियम के कड़ाई ले पालन करे के अपील करीन हे। मुख्यमंत्री ह आज रईपुर म पत्रकार मन ले गोठबात करत किहीन कि लाॅकडाउन ले नुकसान होथे। कोरोना के मामला बढ़े हे, तेखर सेती लोगन ल कोरोना ले जुड़े निरदेस के सख्ती ले पालन करना चाही। ओमन किहीन कि मास्क लगाय ले कोरोना ले बांचे जा सकत हे। ओमन लोगन ले अपील करीन कि ओमन ह मास्क लगावय, हाथ ल धोवत राहय अउ सोसल डिस्टेसिंग के पालन करही, त कोरोना ले बचाव संभव हे। मुख्यमंत्री ह यहू घलो किहीन कि लाॅकडाउन ले गरीब अउ व्यापारी मन ल नुकसान होथे अउ आम लोगन मन ल घलो आर्थिक परेसानी झेले बर पड़थे।
कोरोना टीकाकरण
देस म अभी तक दू करोड़ बयासी लाख ले जादा लोगन के कोविड टीकाकरण होगे हवय। उहें, देस म कोरोना संक्रमण ले बने होय के दर छियानवे दशमलव आठ दू प्रतिशत होगे हवय।
ऐति, छत्तीसगढ़ म घलो कोरोना टीकाकरण के काम जोर-सोर ले चलत हे। राज्य म स्वास्थ्य कार्यकर्ता, फ्रंटलाइन वर्कर्स अउ आम लोगन ल अभी तक करीबन छह लाख पन्द्रह हजार कोविड टीका लगाय गे हवय। काली अड़तालीस हजार छह सौ उनतालीस लोगन ल कोरोना के टीका लगाय गीस।
उहें, राज्यसभा सांसद सरोज पांडेय ह दुरूग जिला के सासकीय अस्पताल म चलत टीकाकरण कार्य के अवलोकन करीन। ए दउरान ओमन ह टीकाकरण काम म लगे डाॅक्टर अउ स्वास्थ्य कार्यकर्ता मन ले गोठबात करके टीकाकरण के बारे म जानकारी लीन। सुश्री पांडेय ह टीकाकरण ल अउ बेहतर तरीका ले करे बर निरदेस दीन।
इही बीच, प्रदेस म अभी तक तीन लाख सोलह हजार ले जादा कोरोना संक्रमित मरीज मनके पहिचान करे गे हवय। एमा ले तीन लाख आठ हजार ले जादा लोगन स्वस्थ होगे हवय। वर्तमान म तीन हजार पांच सौ ले जादा मरीज मनके इलाज आने-आने अस्पताल या घर म चलत हे।
अमृत महोत्सव-जावड़ेकर
केन्द्रीय सूचना अउ प्रसारण मंत्री प्रकाश जावड़ेकर ह आजादी के पचहत्तरवां वर्षगांठ ले जुड़े आजादी के अमृत महोत्सव म प्रदर्सनी के देस के छह जगह म आज वर्चुअल ढंग ले उद्घाटन करीन।
नई दिल्ली म प्रदर्सनी के उद्घाटन के बाद श्री जावड़ेकर ह किहीन कि स्वतंत्रता सेनानी मनके बलिदान के बाद देस ल आजादी मिले रिहीस। ए प्रदर्सनी के माध्यम ले लोगन आजादी के लड़ाई के बारे म जान सकही।
मनरेगा-रोजगार
महात्मा गांधी राष्ट्रीय ग्रामीण रोजगार गारंटी योजना मनरेगा म लक्ष्य के विरूद्ध रोजगार दे जाय के मामला म छत्तीसगढ़ देस म पहिली स्थान म हवय। चालू वित्तीय बछर म केन्द्र सरकार डहार ले स्वीकृत पन्द्रह करोड़ मानव दिवस रोजगार सृजन के लक्ष्य के विरूद्ध अभी तक सोलह करोड़ छह लाख चैरासी हजार ले जादा मानव दिवस सृजन करे गेहे।
परीक्षा पे चर्चा
प्रधानमंत्री नरेन्द्र मोदी के शैक्षिक कारीकरम ‘‘परीक्षा पे चर्चा‘‘ के पंजीकरण के काली आखिरी तारीख हरय। ए बछर परीक्षा पे चर्चा के चैथा संस्करण होही अउ एला आॅनलाइन आयोजित करे जाही। परीक्षा पे चर्चा प्रधानमंत्री के अगुवई म एग्जाम वाॅरियर अभियान के एक हिस्सा हरय, जउन छात्र मन बर तनावमुक्त वातावरण पैदा करना हे। छात्र ए कारीकरम म हिस्सा ले बर सरकारी वेबसाइट ‘‘इनोवेट इंडिया डाॅट माई जीओवी डाॅट इन‘ म पंजीकरण करा सकत हे।
सिरपुर/पाली महोत्सव
महासमुंद जिला के सिरपुर म ‘‘पुरखा के सुरता‘‘ के तहत अंतर्राष्ट्रीय सिरपुर बौद्ध महोत्सव अउ सोध संगोष्ठी के आयोजन करे जावत हे। महोत्सव म आज मुख्यमंत्री भूपेश बघेल सामिल होईन। चैदह मार्च तक चलइया ए महोत्सव म बौद्ध धर्म ले जुड़े कतकोन विद्वान अउ सोध करइया मन सामिल होवत हे।
ओति, कोरबा जिला म राखे गे दू दिन के पाली महोत्सव काली सिरा गीस। समापन समारोह म मुख्यमंत्री भूपेश बघेल भिलाई ले वीडियो कान्फ्रेंसिंग के माध्यम ले सामिल होईन। ए मउका म मुख्यमंत्री ह किहीन कि राज्य म पुरातात्विक महत्व के जगह अउ पर्यटन स्थल मन म सुविधा बढ़ाय ले रोजगार के अवसर बढ़ही अउ पर्यटन ल घलो बढ़ावा मिलही। ओमन किहीन कि पाली महोत्सव ह कोरबा जिला के संग छत्तीसगढ़ के घलो पहचान बन गे हवय।
मुख्यमंत्री-गावस्कर मुलाकात
मुख्यमंत्री भूपेश बघेल ह प्रसिद्ध अंतर्राष्ट्रीय क्रिकेट खिलाड़ी सुनील गावस्कर ल अंतर्राष्ट्रीय क्रिकेट म पचास बछर पूरा होय म प्रतीक चिन्ह भेंट करके ओमन सम्मानित करीन। ए मउका म मुख्यमंत्री ह किहीन कि प्रदेस म खेल अउ खिलाड़ी मन ल आगू बढ़ाय बर हर प्रकार के प्रयास करे जावत हे। मुख्यमंत्री ह किहीन कि रईपुर म देस-बिदेस के खिलाड़ी मनके आय बर विमान सुविधा के संगेसंग ओमन ल ठहराय बर घलो अंतर्राष्ट्रीय स्तर के सुविधा हवय।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी के सोलहवां कड़ी के प्रसारण काली चैदह मार्च इतवार के होही। मुख्यमंत्री लोकवाणी म ए बखत प्रदेस के नारी शक्ति ले गोठबात करही। लोकवाणी के प्रसारण छत्तीसगढ़ स्थित आकाशवाणी के जम्मों केन्द्र, एफ.एम. रेडियो अउ क्षेत्रीय समाचार चैनल ले बिहनिया साढ़े दस बजे ले ग्यारह बजे तक होही।
हमर ग्राम सभा
प्रदेस के पंचायत अउ ग्रामीण विकास मंत्री टी.एस. सिंहदेव काली रतिहा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म राज्य सासन के नीति, योजना अउ कारीकरम के बारे म जानकारी दीहीं। ए कारीकरम ल मीडियम वेव नौ सौ इक्यासी किलोहर्ट्ज म सुने जा सकत हे। ए कारीकरम ल प्रदेस के आकाशवाणी के सब्बो केन्द्र मन ह एके संघरा रिले करही।
भाजपा-बैठक
भारतीय जनता पार्टी के प्रदेस प्रभारी डी. पुरंदेश्वरी अउ सह प्रभारी नितिन नबीन काली चैदह मार्च के रईपुर के दउरा म आही। ओमन ह रईपुर के प्रदेस भाजपा कार्यालय म राखे गे प्रदेस कार्यसमिति के बइठका म सामिल होही। ए बइठका म पार्टी के अवइया रणनीति अउ कार्यक्रम के संबंध म चर्चा करे जाही।
एखर पहिली, आज रईपुर के कुशाभाऊ ठाकरे परिसर के भाजपा कार्यालय म पार्टी के प्रदेश पदाधिकारी मनके बइठका होईस। एमा काली होवइया बइठका के तैयारी के बारे म गोठबात करे गीस। आज होय बइठका म भाजपा के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह, प्रदेश अध्यक्ष विष्णुदेव साय अउ नेता प्रतिपक्ष धरमलाल कौशिक मौजूद रिहीन।
संक्षिप्त समाचार
अउ अब थोरकुन समाचार सार म-
– राष्ट्रीय पात्रता अउ प्रवेस परीक्षा-नीट ए बछर एक अगस्त के होही। नीट-यूजी दू हजार इक्कीस ग्यारह ठन भाखा म होही। राष्ट्रीय परीक्षा एजेंसी ह बताय हे कि नीट ले जुड़े सब्बो जानकारी जल्दी ले जल्दी दे जाही।
– कोरबा जिला म बरबसपुर-पेण्ड्रा तीर दू ठिन गाड़ी म होय टक्कर ले एक झिन मनखे के मउत होगे अउ दस झिन घायल होगीन, जेमा ले दू झिन के हालत गंभीर हवय।
अउ
– कोंडागांव म एक ठिन मोटर के चपेट म आय ले एक झिन मनखे के मउत होगे। उहें, जिला के बनिया गांव के तीर ट्रक के टक्कर ले एके परिवार के पांच झिन मनखे घायल होगीन।