विस-सत्र समापन-01
छत्तीसगढ़ विधानसभा के बजट सत्र आज समाप्त होगे हे। जम्मों सरकारी काम संपादित होय के कारण विधानसभा अध्यक्ष डाॅक्टर चरणदास महंत ह समय ले पहिली समाप्त घोसित कर दीन। ए दउरान के विनियोग विधेयक घलो पारित होगे।
विनियोग विधेयक म चर्चा के जवाब देवत मुख्यमंत्री भूपेश बघेल ह अपन भासन म जम्मों सदस्य मन ल धन्यवाद देवत किहीन कि बजट सत्र के दउरान जनहित के कतकोन मुद्दा उपर चर्चा होईस अउ संगेसंग प्रदेस के जनता के कल्याण ले जुड़े बिसय मन उपर सदन म महत्वपूर्ण निर्णय ले गीस। उहें, विधानसभा अध्यक्ष ह अपन संबोधन म सब्बो सदस्य मन ले आग्रह करीन कि ओमन सदन म चर्चा के दउरान आरोप-प्रत्यारोप, गतिरोध जइसन समय ल भूल के सदन ल ए परिस्थिति ले बचाय के प्रयास करय। ओमन किहीन कि प्रदेस के जनता केहित अउ ओखर कल्याण हमर पहिली अउ आखिरी लक्ष्य होना चाही।
विस-सत्र समापन-02
एखर पहिली, विधानसभा म आज कांग्रेस के जनघोषणा पत्र म करे गे वादा ल पूरा नइ करे के मामला बर विपक्षी सदस्य मन सदन म जमकर हंगामा करीन। प्रश्नकाल म नेता प्रतिपक्ष धरमलाल कौशिक ह सवाल करीन कि बछर दू हजार अट्ठारह के जन-घोषणा पत्र के कुल कतका घोसना पूरा करे गेहे अउ कतका अब तक पूरा नइ होय हे अउ ओ ह कब तक पूरा होही।
जबाव म मुख्यमंत्री भूपेश बघेल ह सदन ल बतईन कि घोषणा पत्र म करे गे छत्तीस निर्धारित लक्ष्य मन ले चैदह घोषणा पूरा हो चुके हे। उहें, बाईस घोषण मन ल पूरा करे के प्रयास करे जात हे। एखर बाद नेता प्रतिपक्ष ह पूरा हो चुके चैदह घोषणा के ब्यौरा मांगीन। मुख्यमंत्री एखर जानकारी देवत रिहीन इही दउरान श्री कौशिक ह आपत्ति करत किहीन कि मुख्यमंत्री ह जतका घोसना गिनाए हे, ओमा ले सात घोषणा घलो पूरा नइ करे गेहे। इही मुद्दा म भाजपा सदस्य शिवरतन शर्मा ह किहीन कि मुख्यमंत्री सदन ल गलत जानकारी देके कोसिस करत हे। एखर बाद सदन म सोर-सराबा सुरू होगे, जेखर सत्तापक्ष ह खड़ा होके प्रतिरोध करीस। इही बीच, नेता प्रतिपक्ष ह सरकार डहार ले अपेक्षित जवाब नइ मिले म विपक्षी सदस्य मनके संग सदन ले बहिर्गमन कर दीन। उहें, आज सदन म भाजपा विधायक अजय चंद्राकर ह दुरूग जिला के बठेना गांव म पाछु दिन होय एके परिवार के पांच झिन लोगन के मउत के मामला उठाईन। ओमन किहीन कि ए बेहद गंभीर घटना हवय। एखर बाद भाजपा विधायक दल के सदस्य मन स्थगन प्रस्ताव पेस करीन, जेला विधानसभा अध्यक्ष ह अस्वीकार कर दीन। बाद म भाजपा सदस्य गर्भगृह म पहुंच के नारेबाजी करे लगीन, जेखर ले ओमन खुदे निलंबित होगीन। फेर, आजे सत्र समाप्त होय के कारण ए सब्बो सदस्य मनके निलंबन घलो समाप्त होगे।
केन्द्रीय कर्मचारी-महंगाई भत्ता
केन्द्र सरकार ह केहे हे कि केन्द्रीय कर्मचारी अउ पेंशनधारक मन बर महंगाई भत्ता के बकाया तीन किश्त ए बछर पहला जुलाई ले देय के किश्त म जोड़ के दे जाही। राज्यसभा म आज एक ठिन लिखित प्रश्न के उत्तर म केन्द्रीय वित्त राज्यमंत्री अनुराग ठाकुर ह बतईन कि पहला जुलाई ले देय महंगाई भत्ता के भुगतान के फैसला जब भी ले जाही, ओमा जनवरी दू हजार बीस ले जनवरी दू हजार इक्कीस तक देय किस्त घलो आगू बर सामिल करे जाही। ओमन किहीन कि महंगाई भत्ता के संसोधित संचित दर मन म बकाया दर सामिल कर दे जाही। श्री ठाकुर ह किहीन कि किस्त मनके भुगतान रोके ले सैंतीस हजार करोड़ रूपिया के बचत होईस, जेखर ले कोविड ले निपटे म सहायता मिलीस।
भाजपा-राज्यपाल ज्ञापन
प्रदेस म भाजपा विधायक मन दुरूग जिला के बठेना गांव म एके परिवार के पांच सदस्य के मउत के मामला ल लेके आज राज्यपाल अनुसुईया उइके ले मिलके ओमन ल ज्ञापन सौंपीन। ज्ञापन म विधायक मन घटना के परिस्थिति ल देखत एखर निष्पक्ष जांच कराय के मांग करीन।
राज्यपाल-वेबीनार
राज्यपाल अनुसुईया उइके ह किहीन हे कि कुशल नेतृत्व ले कोनों देस या संस्था ल दिसा मिलथे। राज्यपाल आज एसोचैम डहार ले राखे गे वेबीनार म सामिल होईन। ओमन अवार्डस आॅफ लीडरशिप एक्सीलेंस के आयोजन बर एसोचैम ल बधाई दीन। राज्यपाल किहीन कि प्रधानमंत्री नरेन्द्र मोदी के अगुवई म हमर देस तेजी ले आगू बाढ़त हे अउ ओमन अइसे क्रांतिकारी निर्णय लीन हे, जेखर ले पूरा देस के दिसा बदलीस हे।
रेलवे-हेल्पलाइन नंबर
रेलवे ह अपन जम्मों हेल्पलाइन मन ल एके ठन हेल्पलाइन नंबर एक-तीन-नौ म बदल देहे, जेन ह यात्रा के दउरान त्वरित शिकायत निवारण अउ पूछताछ बर रेल मदद हेल्पलाइन होही। रेल मंत्रालय ह एक बयान म किहीन कि पाछु बछर कतकोन रेलवे सिकायत हेल्पलाइन ल बंद कर दे गे रिहीस अउ अब हेल्पलाइन नंबर एक आठ दू ल घलो पहिली अप्रैल ले बंद करके एला एक-तीन नौ म विलय कर दे जाही। हेल्पलाइन एक-तीन-नौ यात्री मन बर बारह भासा मन म उपलब्ध होही।
प्रेशर बम-बरामद
कोंडागांव जिल म सुरक्षा बल मन पांच किलो वजनी प्रेसर बम बरामद करे हे। मिले जानकारी अनुसार मर्दापाल थाना क्षेत्र ले आईटीबीपी अउ जिला पुलिस बल के संयुक्त टीम सर्चिंग म निकले रिहीस। इही दउरान मटवाल-पुंगारपाल के बीच मुंडीपदर रद्दा ले जवान मन ल पांच किलो के प्रेसर बम मिलीस। बाद म बम निरोधक दस्ता के टीम ह बम ल निष्क्रिय कर दीस।
अंतर्राष्ट्रीय महिला दिवस
अंतर्राष्ट्रीय महिला दिवस के मउका म बीजापुर जिला के बेचापाल गांव म काली महिला जागरूकता कारीकरम ‘‘अभिव्यक्ति‘‘ के सुभारंभ करे गीस। कारीकरम म जिला के पुलिस अधीक्षक कमलोचन कश्यप ह अच्छा काम करने वाला क्षेत्र के महिला जनप्रतिनिधि अउ कार्यकर्ता मन ल सम्मानित करे गीस। ए मउका म महिला मन ल पाॅम्पलेट-फ्लैक्स अउ स्थानीय बोली-भासा के माध्यम ले कानूनी अधिकार के संबंध म जानकारी दे गीस। उहें, कबीरधाम जिला म घलो महिला सम्मान समारोह के आयोजन करे गे रिहीस। ए दउरान पुलिस विभाग म काम करइया महिला अधिकारी अउ करमचारी मन ल सम्मानित करे गीस। अइसने, कोरिया जिला म घलो अंतर्राष्ट्रीय महिला दिवस म राखे गे कारीकरम म महिला अउ नोनी मन बढ़-चढ़के हिस्सा लीन। कारीकरम म सोटोकन कराटे चैंपियनशिप म जीते बालिका म सम्मानित घलो करे गीस। ऐति, जगदलपुर म घलो महिला दिवस म कतकोन कारीकरम राखे गीस। ए मउका म छात्रा मन बर रंगोली, निबंध अउ भासन प्रतियोगिता के घलो आयोजन करे गीस। उहें, जगदलपुर म एक ठिन दूसर कारीकरम म महिला मन बर ‘‘मोर जमीन-मोर मकान‘‘ के तहत कार्य पूर्णता प्रमाण पत्र बांटे गीस।