प्रसाद योजना-शुभारंभ
राजनांदगांव जिला के डोंगरगढ़ म मां बम्लेश्वरी देवी मंदिर के विकास ले जुड़े परियोजना बर आज आधारसिला राखे गीस। ए परियोजना केन्द्र सरकार के पर्यटन मंत्रालय डहार ले संचालित ‘‘प्रसाद योजना‘‘ के तहत स्वीकृत करे गेहे। ए कार्यक्रम म केन्द्रीय पर्यटन अउ संस्कृति मंत्री प्रहलाद सिंह पटेल अउ मुख्यमंत्री भूपेश बघेल वर्चुअल रूप ले सामिल होईन।
समारोह ल संबोधित करत केन्द्रीय मंत्री श्री पटेल ह बतईन कि ए परियोजना बर पर्यटन मंत्रालय ह 43 करोड़ 33 लाख रूपिया स्वीकृत करे हे। ए परियोजना के अंतर्गत मंदिर परिसर म पहाड़ी के बायां डहार करीब साढ़े नौ एकड़ खेत म श्रीयंत्र डिजाईन के निर्माण करे जाही। एमा पर्यटक मन ल होटल, रेस्तरा, उद्यान, खेल मैदान अउ आॅडिटोरियम जइसन जरूरी सुविधा मिलही। संगेसंग मंदिर तक पहुंचे बर एपरोच रोड बनाय जाही अउ मंदिर जवइया सीढ़ी के सौंदर्यीकरण घलो करे जाही।
कोविड टीका-हर्षवर्धन
केन्द्रीय स्वास्थ्य मंत्री डाॅक्टर हर्षवर्धन ह किहीन कि कोविड के दोनों वैक्सीन कोविशील्ड अउ कोवैक्सीन प्रतिरक्षा के दृष्टि ले सुरक्षित हे। ओमन किहीन कि प्रधानमंत्री ह कोवैक्सीन के खुराक लेके स्पष्ट संदेस देहे कि ए वैक्सीन म कोई त्रुटि नइ हे अउ अब एखर बारे म कोन्हों प्रकार के अफवाह नइ होना चाही। ओमन किहीन कि वैक्सीन के दुष्पप्रभाव घलो नहीं के बराबर हे अउ एक्का-दुक्का मामला म ही अस्पताल म भर्ती होय के जरूरत पड़थे।
कोरोना टीकाकरण
देश म कोविड टीका लगवइया मनके संख्या आज 01 करोड़ 48 लाख 54 हजार ले जादा होगे हे। राष्ट्रव्यापी कोविड टीकाकरण के दूसर चरण के पहिली दिन काली लगभग 05 लाख 92 हजार लोगन मन ल टीका लगाय गीस।
ऐति, छत्तीसगढ़ म घलो अब तक 02 लाख 25 हजार ले जादा लोगन मन ल कोविड के टीका लगाय गेहे। काली ले सुरू होय टीकाकरण के दूसर चरण म वरिष्ठ नागरिक अउ 45 साल के बीमार लोगन मन ह टीका लगवाईन। प्रदेश म ए समूह के करीब 03 लाख लोगन मन ल टीका लगवाय के लक्ष्य राखे गेहे।
इही बीच, राज्य म पाछु सप्ताह 1710 लोगन मन कोरोना पाॅजिटिव पाय गीस। जेमा 51 ले 58 बछर के आयु के 33 प्रतिशत लोगन मन सामिल हे। राज्य स्तरीय डेथ आॅडिट समिति डहार ले करे गे विश्लेषण के अनुसार लक्षण के बावजूद कोरोना जांच नइ करइया लोगन मन म कोरोना संक्रमण पाय गीस। समिति के सदस्य अउ यूनिसेफ के स्वास्थ्य विशेषज्ञ डाॅक्टर श्रीधर ह किहीन कि हल्का लक्षण आय म सियान मन ल तुरते कोरोना जांच कराना चाही।
किसान-विद्युत कनेक्शन
प्रदेस म किसान मनके स्थाई विद्युत कनेक्शन बर लंबित 35 हजार ले ज्यादा कृषि पंप मनके उर्जाकरण करे जाही। ए घोसना मुख्यमंत्री भूपेश बघेल ह आज विधानसभा म करीन। एखरे संग विद्युत कनेक्शन बर लंबित सबो कृषि पंप मन ल अवइया वित्तीय वर्ष म स्थाई विद्युत कनेक्शन देके प्रक्रिया पूरा करे जाही।
जानकारी के अनुसार ए बछर प्रदेस म 10 हजार 504 पंप मन ल विद्युत कनेक्शन दे गेहे। विद्युत कनेक्शन दे ले प्रदेस के किसान मन ल दू फसल ले बर सिंचाई के सुविधा मिल सकही।
भिलाई-वार्ड आरक्षण
भिलाई नगर पालिक निगम के 70 वार्ड मन म आरक्षण के प्रक्रिया पूरा कर ले गेहे। जेमा सामान्य वर्ग के 27, सामान्य महिला वर्ग के 13, अन्य पिछड़ा वर्ग के 12, अन्य पिछड़ा वर्ग महिला के 06, अनुसूचित जनजाति वर्ग के 02, अनुसूचित जनजाति महिला वर्ग के 01 अउ अनुसूचित जाति वर्ग के 06, अनुसूचित जनजाति महिला वर्ग के 03 पद मनके आरक्षण करे गेहे। आरक्षण के प्रक्रिया दुर्ग जिला कलेक्ट्रेट म करे गीस। ए बेरा आने-आने पार्टी मनके कार्यकर्ता अउ गणमान्य नागरिक मन उपस्थित रिहीन।
थल सेना भर्ती रैली
भारतीय थल सेना डहार ले काली ले दुर्ग के पंडित रविशंकर शुक्ल स्टेडियम म थल सेना भर्ती रैली के आयोजन करे जाही। ए भर्ती रैली 12 मार्च तक चलही। ए भर्ती रैली म छत्तीसगढ़ के 28 जिला मनके करीब 40 हजार उम्मीदवार सामिल होही। भर्ती रैली म सैनिक सामान्य ड्यूटी, लिपिक, तकनीकी, नर्सिंग अउ ट्रेडमैन के पद म भर्ती करे जाही। रायपुर जिला के आवेदक मन बर 06, 07 अउ 10 मार्च के तारीख तय करे गेहे।
आयोजक मन ह कोरोना संक्रमण ले बचाव बर भर्ती म सामिल होवइया उम्मीदवार मन ले चिकित्सा अधिकारी डहार ले जारी प्रमाण पत्र लाय बर केहे हे। उम्मीदवार मन बर आवास अउ भोजन के व्यवस्था दुर्ग जिला प्रशासन डहार ले करे जाही। भर्ती रैली के संबंध म जादा जानकारी बर कंट्रोल रूम, जिला रोजगार कार्यालय मालवीय नगर दुर्ग म स्थापित करे गेहे।
धान/ई-नीलामी
प्रदेस म खरीफ विपणन बछर 2020-21 म उपार्जित सरप्लस धान के नीलामी आॅनलाइन प्लेटफाॅर्म के माध्यम ले काली 03 मार्च ले सुरू होही। नीलामी बर अब तक 30 बिडर्स के पंजीयन करे जा चुके हे। पहिली सप्ताह के नीलामी म धमतरी, बिलासपुर, गौरेला-पेण्ड्रा-मरवाही, जांजगीर-चांपा, मुंगेली, रायगढ़, बालोद, बेमेतरा, दुर्ग, कवर्धा, राजनांदगांव, बलौदाबाजार, गरियाबंद अउ महासमुंद जिला के 144 समिति मन ले 3 लाख 89 हजार मीटरिक टन अतिशेष धान के नीलामी करे जाही। नीलामी के समय-सारिणी अउ सूचना के प्रकाशन मार्कफेड ह करही।
बतादन कि प्रदेस म चालू खरीफ विपणन वर्ष समर्थन मूल्य म करीब 92 लाख मीटरिक टन धान के खरीदी करे गेहे। एमा ले लगभग 20 लाख मीटरिक टन धान सरप्लस होना संभावित हे।
रेलवे यात्री-सहायता
रेलवे प्रशासन डहार ले यात्री मनके सुरक्षा अउ सुविधा बर हेल्पलाइन नंबर जारी करे गेहे। कोई भी यात्री हेल्पलाइन नंबर – 1 3 9 अउ रेल मदद वेबसाइट ऐप के माध्यम ले अपन सिकायत दर्ज करा सकथे। ओखर निवारण तुरते रेलवे डहार ले करे जाही।
माओवादी-हमला
सुकमा जिला म माओवादी मन ह एक मालवाहक गाड़ी उपर तीन ठिन बम ले हमला कर दीस। ए हमला म वाहन के हेल्पर गंभीर रूप ले घायल होगे।
मिले जानकारी के अनुसार एक मालवाहक गाड़ी दोरनापाल नगर ले लगे जंगल डहार जात रिहीस। तभे माओवादी मन ह वाहन म तीर बम ले हमला कर दीस। घटना के बाद सीआरपीएफ अउ पुलिस के जवान मन ह घायल हेल्पर ल दोरनापाल के अस्पताल म भर्ती कराईस।
भिलाई पावर प्लांट-हादसा
दुर्ग जिला के भिलाई स्थित एन.एस.पी.सी.एल. के पावर प्लांट म बीते रतिहा चिल्ड वाटर प्लांट के स्लैब टूटे ले एक इंजीनियर के मउत होगे। बताय जात हे कि असिस्टेंट मैनेजर के पद म कार्यरत् ए इंजीनियर कुलिंग वाटर के निरीक्षण करे बर पहुंचे रिहीस। ए बेरा स्लैब टूटे ले इंजीनियर पानी के टंकी म गिर गे जेखर सव बिहनिया बरामद करे गीस। मृतक आंध्रप्रदेस के रहवइया रिहीस।
मउत के कारण के जांच बर एन.एस.पी.सी.एल. डहार ले 05 सदस्यीय टीम के गठन करे गेहे।
संक्षिप्त समाचार
अउ अब थोरकुन समाचार सार म-
– मुख्यमंत्री भूपेश बघेल ह काली छत्तीसगढ़ राज्य महिला आयोग के शास्त्री चैक स्थित नवा कार्यालय भवन के उद्घाटन करीन। ए मउका म राज्य महिला आयोग के अध्यक्ष डाॅक्टर किरणमयी नायक ह बतईन कि आयोग डहार ले करे गे 51 जनसुनवाई म 1100 प्रकरण मनके निराकरण करे गेहे।
अउ
– मुख्यमंत्री भूपेश बघेल ह आज विधानसभा स्थित अपन कार्यालय कक्ष ले कोरबा मेडिकल काॅलेज के वीडियो कान्फ्रेंसिंग के माध्यम ले शुरूवात अउ मेडिकल काॅलेज के नवा भवन के भूमिपूजन करीन।