विधानसभा समाचार-01
छत्तीसगढ़ विधानसभा म बजट सत्र के दूसरइया दिन आज राज्य म बिगड़त कानून बेवस्था ल लेके परमुख विपक्षी दल भाजपा के सदस्य मन ह सदन म सोर-सराबा करीन। शून्यकाल म भाजपा के सदस्य मन ह ए मुद्दा ल उठाईन। सदन म काम रोको प्रस्ताव घलो पेस करे गीस, जेमा चर्चा के बाद विधानसभा अध्यक्ष ह अस्वीकार कर दीन। विधानसभा अध्यक्ष ह सोरसराबा ल देखत सदन के कार्रवाई ल पांच मिनट बर रोक दे गीस। कार्यवाही ल दुबारा सुरू करे गीस, फेर विपक्षी सदस्य मन ह नाराबाजी करत गर्भगृह म चल दीन। एखर बाद भाजपा के बारह झन विधायक मन ह खुद निलंबित होगे।
एखर पहिली, स्थगन प्रस्ताव उपर सदन म चर्चा करत भाजपा सदस्य बृजमोहन अग्रवाल ह किहीन कि छत्तीसगढ़ म पहिली सांति व्यवस्था रिहीन हे, फेर आज छत्तीसगढ़ म अपराध ह बढ़त जात हे। राज्य म हतिया, अपहरण जइसन कतकोन घटना ह बाढ़त जात हे। विधायक अजय चंद्राकर, शिवरतन शर्मा अउ नारायण चंदेल ह किहीन कि अपराधी मन ल राज्य सरकार डहार ले संरक्षण दे जात हे।
उहें, जनता कांग्रेस छत्तीसगढ़ के विधायक धरमजीत सिंह ह किहीन कि अपराधी मन ल कोनों प्रकार के कानून के डर नइ हे। एला रोके खातिर सदन म चर्चा कराय जाना चाही।
विधानसभा समाचार-02
पूर्व मुख्यमंत्री डाॅक्टर रमन सिंह ह किहीन कि प्रदेस म पाछु दू बछर म हतिया, दुष्कर्म अउ लूटपाट जइसन घटना के सत्रह हजार ले जादा मामला ह आगू आय हे। ओमन किहीन कि माओवादी मनके हिम्मत बाढ़ गेहे। दंतेवाड़ा अउ सुकमा जइसन जगह मनके हालत ह ठीक नइ हे। जेमा पर्यावरण मंत्री मोहम्मद अकबर ह झीरम घटना के जिकर करीन। जबाव म पूर्व मुख्यमंत्री डाॅक्टर रमन सिंह ह किहीन कि आज राज्य के ए हाल हे कि अपराधी मनके जिकर ल झीरम के साथ करे जात हे।
ए मामला म मुख्यमंत्री भूपेश बघेल ह किहीन कि झीरम घटना ल लेके राज्य सरकार ह आज घलो गंभीर हे। ए मामला म एसआईटी के एक ठन टीम बनाय गेहे अउ जांच सुरू कर दे गेहे।
गृह मंत्री ताम्रध्वज साहू ह चर्चा के जुवाब म किहीन कि राज्य म कानून व्यवस्था ह बहुत बढ़िया हवय। ओमन किहीन कि विकाससील समाज म कानून-बेवस्था ह बहुते जरूरी हे।
एखर पहिली, सदन म आज दिवंगत पूर्व सदस्य संसदीय सचिव ओमप्रकाश राठिया, अविभाजित मध्यप्रदेश के पूर्व मंत्री भानुप्रताप गुप्ता, पूर्व संसदीय सचिव लक्ष्मण राम अउ पूर्व विधायक रोशनलाल ल श्रद्धांजलि दे गीस।
विधानसभा-अनुपूरक बजट
मुख्यमंत्री भूपेश बघेल ह आज विधानसभा म बछर दू हजार बीस अउ इक्कीस के तृतीय अनुपूरक बजट ल सदन म पेस करीन। ए बजट ह पांच सौ पांच करोड़ रूपिया के हरय। ए बजट उपर काली सदन म चर्चा करे जाही।
प्रधानमंत्री शहरी आवास योजना
केन्द्र सरकार ह प्रधानमंत्री शहरी आवास योजना कोति ले छप्पन हजार ले जादा मकान मन ल मंजूरी देहे। केन्द्रीय आवास अउ सहरी कार्यमंत्री हरदीप सिंह पुरी ह किहीन हे कि बछर दू हजार बाईस तक एक करोड़ बारह लाख घर मनके कुल मांग म अब तक करीबन एक करोड़ ग्यारह लाख मकान मन ल मंजूरी दे गेहे।
माओवादी-गिरफ्तार
बीजापुर जिला म सुरक्षा बल के टीम डहार ले एक झन महिला माओवादी के संगेसंग तीन झिन माओवादी मन ल गिरफ्तार करे गेहे। मिले जानकारी के मुताबिक डिस्ट्रिक्ट रिजर्व गार्ड-डीआरजी अउ केन्द्रीय रिजर्व पुलिस बल-सीआरपीएफ के संयुक्त टीम ह तलासी अभियान म निकले रिहीन। उही समय भोपालपट्टनम, गंगालूर, उसूर अउ तर्रेम क्षेत्र ले ए माओवादी मन ल गिरफ्तार करीन।
प्रधानमंत्री-वेबिनार
प्रधानमंत्री नरेन्द्र मोदी ह आज स्वास्थ्य के क्षेत्र म राखे गे एक ठन कारीकरम ल संबोधित करीन। ए दउरान ओमन किहीन कि सरकार ह देस म कोविड के दउरान बहुत कम समय म स्वास्थ्य उपर काम करीन। ओमन किहीन कि सरकारी अउ निजी क्षेत्र के मिलेजुले परयास ले कोरोना जांच बर प्रयोगसाला मनके बहुत बड़े नेटवर्क तैयार करे गीस।
मुख्यमंत्री-कोरोना अपील
मुख्यमंत्री भूपेश बघेल ह महाराष्ट्र म कोरोना के बाढ़त मामला ल देखत राजधानी रईपुर के हवाई अड्डा अउ महाराष्ट्र के सीमा म कोरोना के थर्मल स्क्रीनिंग करे के निरदेस अधिकारी मन ल देहे। ओमन कोरोना बीमारी ले बचे खातिर जरूरी दिसा-निरदेस के पालन करे के अपील घलो करीन।
राज्य म अभी कोरोना बीमारी के मरीज मनके संख्या ह तीन लाख ग्यारह हजार ले जादा होगे हे। जेमा ले करीबन तीन लाख चार हजार ले जादा मरीज मन ह ठीक घलो होगे हे। काली राज्य म दू सौ चैहत्तर झन नवा मरीज पाय गीस। राज्य म अब तक कोरोना ले तीन हजार आठ सौ ले जादा लोगन मनके मउत होगे हे।
ओति, राजनांदगांव के एक ठिन प्राईवेट स्कूल के पंाच झिन सिक्षक अउ कमरचारी मन म कोरोना पाॅजिटिव पाय गीस।
ऐति, कोरिया जिला के मनेन्द्रगढ़ म एक ठिन प्राईवेट स्कूल के सिक्षिका अउ कुछ विद्यार्थी मन म कोरोना पाॅजिटिव पाय गेहे, जेखर सेती स्कूल ल पन्द्रह दिन बर बंद कर दे गेहे।
राष्ट्रीय खिलौना मेला
केन्द्र सरकार डहार ले देस म पहिली घंाव राष्ट्रीय खिलौना मेला सत्ताईस फरवरी ले दू मार्च तक कराय जाही। ए मेला वर्चुअल माध्यम ले करे जाही। मेला के उद्देश्य खिलौना उद्योग मन ल बढ़ावा देना अउ दुनिया के आगू म भारत के खिलौना उत्पाद ल देखाना हे।
केन्द्रीय बजट-संगोष्ठी
राजनांदगांव म भारतीय जनता पार्टी डहार ले केन्द्रीय बजट उपर एक ठिन संगोष्ठी के कारीकरम करे गीस। ए संगोष्ठी म बोलत सांसद संतोष पांडेय ह किहीन कि ए बजट ह छह ठिन स्तंभ के बजट हरय। ओमन बतईन कि भारतमाला योजना के तहत छत्तीसगढ़ के तीन ठिन रद्दा ल ए बजट म सामिल करे गेहे।
उहें, पूर्व सांसद मधुसूदन यादव ह किहीन कि ए केन्द्रीय बजट ह बहुत बढ़िया बजट हरय।
शिक्षक-भर्ती
राज्य म सिक्षक मनके सीधी भर्ती के प्रक्रिया ल सुरू कर दे गेहे। स्कूल सिक्षा विभाग डहार ले काली गणित बिसय के पांच सौ दस व्याख्याता मनके नियुक्ति आदेस जारी कर दे गेहे। एखर संगेसंग करीबन छब्बीस साल ले सिक्षक मनके सीधी भर्ती प्रक्रिया बंद रिहीस हे, जउन ल अब राज्य सरकार डहार ले सुरू करे गेहे।
स्कूल शिक्षा मंत्री डाॅक्टर प्रेमसाय सिंह टेकाम ह बतईन हे कि एक हफ्ता के भीतर जम्मों बिसय मनके सिक्षक मनके नियुक्ति आदेस जारी कर दे जाही।
मुख्यमंत्री-गौठान निरीक्षण
मुख्यमंत्री भूपेश बघेल अउ कृषि मंत्री रविन्द्र चैबे ह काली धरसीवां विकासखंड के पथरी गांव म गौठान के निरीक्षण करीन अउ महिला स्व-सहायता समूह मन डहार ले चलाय जात कारीकरम के जांच-पड़ताल करीन। ए मउका म श्री बघेल ह महिला समूह के कार्यकर्ता मनके बड़ई घलो करीन।
संक्षिप्त समाचार
अउ अब थोरकुन समाचार सार म-
– राष्ट्रीय विधिक सेवा प्राधिकरण डहार ले एसो अप्रैल, जुलाई, सितंबर अउ दिसंबर महीना के दूसरइया सनिचर के राष्ट्रीय लोक अदालत के आयोजन करे जाही।
– छत्तीसगढ़ माध्यमिक शिक्षा मंडल डहार ले डीएलएड प्रथम वर्ष मुख्य परीक्षा बछर दू हजार बीस के पुनर्गणना अउ पुनर्मूल्यांकन के परिणाम ल घोषित कर दे गेहे।
– पेट्रोल के बाढ़त कीमत के विरोध म आज राजनांदगांव म महिला कांग्रेस के कार्यकर्ता मन ह धरना-प्रदर्शन करीन।
अउ
– महासमुंद जिला म बिसेस पिछड़ा जनजाति आदिवासी परिवार के तीन ले छह बछर तक के लइका अउ एक साल ले उनचास बछर तक के नोनी के संगेसंग माईलोगिन मन ल एक मार्च ले हफ्ता म तीन दिन अंडा दे जाही।