विधानसभा सत्र
छत्तीसगढ़ विधानसभा के बजट सत्र आज ले सुरू होगे हे। सत्र के सुभारंभ राज्यपाल अनुसुईया उइके के अभिभाषण ले होईस। अपन अभिभाषण म सुश्री उइके ह किहीन कि पाछु बछर कतकोन चुनौती ले भरे रिहीस। कोरोना काल म घलो राज्य सरकार ह कतकोन क्षेत्र म नवा उपलब्धि पाय हे। ओमन किहीन कि छत्तीसगढ़ पंचानवे प्रतिशत ले जादा किसान मनके समर्थन मूल्य म धान बिसइया देस के पहिली राज्य बन गेहे। कोरोना काल के बेरा म स्कूल के लइका मनके पढ़ई प्रभावित झन होवय एखर बर सरकार ह सिक्षा के क्षेत्र म नवाचार म बल दीन। राज्यपाल ह किहीन कि पढ़ई तुहंर दुआर, मोहल्ला कक्षा अउ लाउड स्पीकर स्कूल जइसन तरीका ले पच्चीस लाख ले जादा पढ़ईया लइका मन फायदा पहुंचाय हे।
राज्यपाल ह बतईन कि विमानन सेवा ले कनेक्टिीविटी ल बढ़ाय जात हे। सुश्री उइके ह ए उम्मीद जताईन कि बस्तर के बाद बिलासपुर म घलो अंतर्राज्यीय विमानन सेवा सुरू होय ले प्रदेस ल फायदा मिलही।
राज्यपाल के अभिभाषण के कृतज्ञता ज्ञापन प्रस्ताव म चर्चा सदन म पच्चीस अउ छब्बीस फरवरी के होही।
काली विधानसभा म पूर्व संसदीय सचिव ओमप्रकाश राठिया, अविभाजित मध्यप्रदेश के पूर्व मंत्री डाॅक्टर भानुप्रताप गुप्ता, पूर्व संसदीय सचिव लक्ष्मण राम अउ राज्य विधानसभा के पूर्व सदस्य रोशन लाल के निधन ल बतावत श्रद्धांजलि दे जाही।
राज्य विधानसभा के ए बजट सत्र छब्बीस मार्च तक चलही। ए बेरा म कुल चैबीस बइठका होही। मुख्यमंत्री भूपेश बघेल जिखर तीर वित्त विभाग के घलो प्रभार हवय, ओमन अवइया एक मार्च के विधानसभा म बजट प्रस्तुत करही।
कोरोना समाचार
देसभर म करीबन एक करोड़ ग्यारह लाख ले जादा लोगन ल कोरोना के टीका लगाय गेहे। इही बीच, पाछु चैबीस घंटा म नौ हजार ले जादा मरीज मनके स्वस्थ्य होय ले देस म ए संक्रमण ले ठीक होवइया मनके दर संतानवे दशमलव दू-दू प्रतिसत होगे हे। केन्द्रीय स्वास्थ्य मंत्रालय ह केहे हे कि कोरोना ले अब तक एक करोड़ छह लाख रोगी स्वस्थ होय हे।
ऐति, छत्तीसगढ़ म कोरोना संक्रमित मनके आंकड़ा तीन लाख दस हजार ले पार कर गेहे। एमा ले करीबन तीन लाख चार हजार मरीज ठीक होय हे। अभी प्रदेस म तीन हजार एक सौ बारह मामला सक्रिय हवय। काली प्रदेस म एक सौ तिरपन नवा मरीज मिले हे। उहें, काली पांच झिन के कोरोना संक्रमण ले मउत होय हे।
सरगुजा जिला प्रसासन ह कोरोना वायरस के नवा दउर ले बांचे बर ऐहतियाती कदम उठाय हे। एखर बर सीमावर्ती राज्य महाराष्ट्र समेत कोरोना संक्रमण ले बिसेस प्रभावित राज्य ले अवइया-जवइया यात्री मन बर आने बेवस्था लागू करे हे। एखर मुताबिक ए राज्य ले अवइया लोगन ल सरगुजा म प्रवेस से पहिली कोरोना टेस्ट कराय बर पड़ही। रिपोर्ट आय के बादे जिला म प्रवेस के मंजूरी दे जाही।
कोरोना-जागरूकता रथ
रईपुर अउ दुरूग जिला के लोगन ल कोरोना महामारी ल रोके अउ टीकाकरण अभियान के संबंध म जागरूक करे खातिर ई-रिक्शा जागरूकता रथ चलाय जावत हे। ए कोरोना जागरूकता रथ ल पत्र सूचना कार्यालय रईपुर के निदेशक कृपाशंकर यादव अउ प्रादेशिक लोकसंपर्क कार्यालय रईपुर के कार्यालय प्रमुख शैलेष फाये ह हरियर झंडी देखाके रवाना करीन।
भाजपा-स्कूल परिचालन
भारतीय जनता पार्टी ह राज्य सरकार उपर कोरोना संक्रमण के खतरा के बादों दबाव डालके स्कूल खोले के आरोप लगाईन हे। पार्टी के प्रदेस प्रवक्ता संजय श्रीवास्तव ह किहीन कि राज्य सरकार जिला सिक्षा अधिकारी कोति ले स्कूल चलाय बर सिक्षक मन ल मजबूर करत हे। ओमन यहू आरोप लगाईन कि बिना लिखित आदेस के स्कूल खोले जात हे, अइसन म कहूं कोरोना संक्रमण फैलही त एखर जिम्मेदारी कौन लीहीं। ओमन किहीन कि हड़बड़ी म स्कूल खोले के सेती पाछु दिन दू ठिन स्कूल म लइका मन कोरोना संक्रमित होय हे। सरकार स्कूल खोले बर दबाव बनावत हे कहूं कोनों भी पढ़ईया लइका या फेर सिक्षक संक्रमित होही, त भाजपा ए गंभीर बिसय म चुप नइ रइही।
राष्ट्रीय अवार्ड-किसान सम्मान निधि
प्रधानमंत्री किसान सम्मान निधि योजना ल चलाय म बिलासपुर जिला ह देस म सर्वोच्च स्थान पाय हे। ए उपलब्धि बर भारत सरकार के कृषि मंत्रालय कोति ले चैबीस फरवरी के नई दिल्ली म बिलासपुर जिला ल इनाम दे जाही। मुख्यमंत्री भूपेश बघेल अउ कृषि मंत्री रविन्द्र चैबे ह एखर बर किसान मन ल सुभकामना देवत मुख्यमंत्री ह किहीन कि राष्ट्रीय स्तर म सम्मानित होना ए बात के प्रतीक हवय कि छत्तीसगढ़ राज्य किसान मनके कल्याण खातिर देस के रोल माॅडल बने म आगू आवत हे।
खबर के मुताबिक केन्द्रीय कृषि मंत्रालय कोति ले प्रधानमंत्री किसान सम्मान निधि योजना के दू बछर पूरा होय म एला बने ढंग ले चलाय खातिर राज्य अउ जिला मन ल इनाम बर चुने गेहे। बिलासपुर जिला किसान मन के आधार प्रमाणीकरण अउ सम्मान निधि के लाभ सुनिश्चित करे के मामला म देस म अव्वल स्थान म हवय।
मुख्यमंत्री-मोबाइल ऐप
राज्य म बड़े औद्योगिक इकाई के स्थापना ल सरल बनाय अउ एखर निगरानी बर एक मोबाइल ऐप सुरू करे गेहे। मुख्यमंत्री भूपेश बघेल ह आज विधानसभा परिसर म अपन कार्यालय कक्ष ले ए मोबाइल ऐप ल सुरू करीन। एखर ले उद्योगपति अपन इकाई के स्थापना बर आने-आने चरण म कतकोन विभाग अउ संस्था ले मंजूरी अउ पंजीयन समेत आने लंबित आवेदन के जानकारी सोझे उद्योग विभाग संग साझा कर सकही।
माओवादी-वारदात
कांकेर जिला के आमाबेड़ा थाना क्षेत्र ले बीएसएफ के जवान मन ह तीन ठिन जिंदा बम अउ रेडियो सेट बरामद करे म सफलता पाय हे। माओवादी मन ह सुरक्षा बल ल निसाना बनाय बर ए क्षेत्र म विस्फोटक लगाय रिहीन। फेर जवान मन ह ए बम ल निष्क्रिय कर दीन।
ऐति, सीमावर्ती राज्य महाराष्ट्र के सालेकसा थाना क्षेत्र म सुरक्षा बल अउ माओवादी मनके बीच मुठभेड़ होय के खबर हवय। ए बेरा म दूनों कोति ले फायरिंग करे गीस। फेर ए मुठभेड़ म कोनों हताहत नइ होय हे। पुलिस के मुताबिक सालेकसा क्षेत्र के हाजराफाल, कोपालगढ़, मरामजोब अउ महामाया पहाड़ी टावर क्षेत्र म माओवादी मनके इकट्ठा होय के सूचना मिले हे। एला देखत सुरक्षा बल कोति ले ए क्षेत्र म सर्च अभियान चलाय जात हे। आज बिहनिया घलो करीबन बीस झिन माओवादी ए क्षेत्र देखे गीस। एखर बादे सुरक्षा बल अउ माओवादी मनके बीच मुठभेड़ होईस।
खेल-मड़ई
राज्य स्तरीय छत्तीसगढ़ी खेल मड़ई के समापन कार्यक्रम म विजेता खिलाड़ी मन ल इनाम दे गीस। ए खेल मड़ई खेल अउ युवा कल्याण विभाग अउ छत्तीसगढ़ ओलम्पिक संघ कोति ले दुरूग जिला के पाटन म करे गे रिहीस।
समापन कारीकरम म छत्तीसगढ़ ओलम्पिक महासंघ के सचिव गुरूचरण सिंह होरा अउ उपाध्यक्ष जी.एस. बांबरा ह जीतइया मन ल इनाम दीन। ए खेल मड़ई म राज्य के पारंपरिक खेल संखली, गेड़ी, भौंरा, गिल्ली डंडा अउ पिट्ठूल के प्रतियोगिता होईस।
पक्षी महोत्सव
बिलासपुर जिला के कोपरा जलाशय म राखे गे पक्षी महोत्सव के काली समापन होईस। ‘‘हमर चिरई-हमर चिन्हारी‘‘ कारीकरम म ए पक्षी महोत्सव के आयोजन वन विभाग कोति ले करे गीस। वन मंत्री मोहम्मद अकबर के अगुवई म राखे गे ए महोत्सव म पर्यावरण संरक्षण के संदेस म आधारित फोटोग्राफी, चित्रकला अउ रंगोली प्रतियोगिता राखे गीस अउ जीते लोगन ल इनाम दे गीस।
समापन कारीकरम म विधायक रश्मी सिंह ह किहीन कि ए महोत्सव ले लोगन ल चिरई-चिरगुन के बने ढंग ले धियान राखे बर जागरूक करे गीस। महोत्सव स्थल चिरई मन ल देखे बर बिसेस रूप ले मचान बनाय गे रिहीस हे। संगेसंग महोत्सव सिराय के बाद कोपरा जलाशय के तीर-तखार म सफई करे गीस।
संक्षिप्त समाचार
अउ अब थोरकुन समाचार सार म-
– जबलपुर के प्रोफेसर अरूण दिवाकर नाथ वाजपेयी ल बिलासपुर स्थित अटल बिहारी वाजपेयी विश्वविद्यालय के कुलपति नियुक्त करे गेहे। राज्यपाल अउ कुलाधिपति अनुसुईया उइके ह ए नियुक्ति करीन हे।
अउ
– छत्तीसगढ़ राज्य ओपन स्कूल डहार ले राखे गे हाईस्कूल अउ हायर सेकेंडरी के मुख्य अवसर परीक्षा म सामिल होय बर प्रवेस के आखिरी तारीख अवइया चार मार्च तक बढ़ा दे गेहे।