केन्द्रीय शिक्षा मंत्री रमेश पोखरियाल निशंक ह किहीन हे कि स्कूल विद्यार्थी, सिक्षक अउ अभिभावक मन संग प्रधानमंत्री के सवांद कारीकरम – ‘‘परीक्षा पे चर्चा‘‘ के चैथा संस्करण के आयोजन अवइया महीना होही। वीडियो संदेस म श्री निशंक ह यहू बतईन कि परीक्षा पे चर्चा कारीकरम बर पंजीकरण के प्रक्रिया चालू होगे हे अउ ए चैदह मार्च तक चलही। ओमन किहीन कि ए दारी ए कारीकरम वर्चुअल माध्यम ले होही। कारीकरम के प्रतिभागी मन ल माय जीओवी प्लेटफाॅर्म म आयोजित होने वाला आॅनलाइन प्रतियोगिता ले चुने जाही। श्री निशंक ह बतईन कि आॅनलाइन रचनात्मक लेखन के प्रतियोगिता बर पोर्टल चैदह मार्च तक खुला रइही।
उहें, प्रधानमंत्री नरेन्द्र मोदी ह आज किहीन कि अब परीक्षा देवइया बहादुर छात्र मन अपन परीक्षा के तैयारी सुरू कर देहे। एखरे बर परीक्षा पे चर्चा कारीकरम घलो वापिस लहुटे हे। ए दारी ए कारीकरम विश्व के जम्मों छात्र मन बर उपलब्ध होही अउ पूरा तरह से आॅनलाइन होही। एक ट्वीट म श्री मोदी ह छात्र मन ले अपील करे हे कि ओमन बिना कोनों तनाव के हांसत मुस्कावत अपन परीक्षा म सामिल होवय। ओमन किहीन कि मांग के बाद परीक्षा पे चर्चा कारीकरम म अभिभावक अउ अध्यापक मन ल घलो सामिल करे जाही। ए एक गंभीर काम न होके रोचक अउ मनोरंजन ले पूरीपूरा चरचा वाला आयोजन होही। प्रधानमंत्री ह छात्र, उंखर अभिभावक अउ सिक्षक मन ले कहिन हे कि ओमन ए कारीकरम म बढ़-चढ़के हिस्सा लेवय।कोरोना समाचार-01
छत्तीसगढ़ म कोरोना संक्रमण के मामला एक घांव फेर बाढ़त हे। पाछु दिन हरेक दिन दू सौ ले भी कम मामला सामने आवत रिहीस हे, लेकिन काली ले प्रदेस म तीन सौ ग्यारह नवा मामला सामने आय हे। राज्य म अब तक मिले कोविड पाॅजिटिव मरीज मनके संख्या तीन लाख दस हजार के करीब पहुंच गेहे। उहें, अब तक लगभग तीन लाख तीन हजार लोगन मन इलाज के बाद ठीक हो चुके हे। वर्तमान म करीबन तीन हजार हजार मनखे मनके कतकोन अस्पताल या होम आइसोलेशन म इलाज चलत हे।
बिसेसज्ञ मन लोगन मन ले कोरोना बर लापरवाही नइ बरते के अपील करे हे। दुरूग जिला के मुख्य चिकित्सा अउ स्वास्थ्य अधिकारी डाॅक्टर गंभीर सिंह ठाकुर ह किहीन हे कि लोगन मन डहार ले लापरवाही बरते के कारण प्रदेस म मामला एक घांव फेर बढ़ना सुरू होगे हे।
इही बीच, आम जनता ल कोरोना महामारी के बचाव बर जागरूक करे के उद्देश्य ले आज केन्द्र सरकार के प्रादेशिक लोकसपंर्क कार्यालय डहार ले कोरोना जागरूकता रथ ल रवाना करे गीस। रईपुर म होय एक कारीकरम म पत्र सूचना कार्यालय के अपर महानिदेशक अभिषेक दयाल ह ए रथ ल हरा झंडा देखाके रवाना करीन। ए मउका म श्री दयाल ह किहीन कि कोरोना महामारी बर मनखे मन ल लगातार सावधानी बरते के जरूरत हे। इही उद्देश्य ले कोरोना जागरूकता रथ जगह-जगह घूमही।
ए मउका म गीत अउ नाटक प्रभाग के पंजीकृत लोक कलकार मन आकर्षक सांस्कृतिक कारीकरम घलो प्रस्तुत करीन। ए जागरूकता रथ ग्यारह मार्च तक रईपुर सहर के कतकोन इलाका मन म घुम-घुम के लोगन मन ल जागरूक बनाही। एखर अलावा कांकेर, जगदलपुर, दुर्ग, बिलासपुर अउ अंबिकापुर म घलो ई-रिक्सा म बैनर-पोस्टर लगा के मनखे मन ल कोरोना संक्रमण ले बचाय बर जागरूकता अभियान चलाय जाही।
कोरोना समाचार-02
इही बीच, राज्य म कोरोना टीकाकरण घलो चालू हे। अब तक करीबन दू लाख अट्ठारह हजार स्वास्थ्य कार्यकर्ता मन ल कोविड वैक्सीन के पहिली डोज दे गेहे। उहें, काली तक करीबन नौ हजार छह सौ स्वास्थ्य कार्यकर्ता मन ल कोविड वैक्सीन के दूसरा खुराक दे गीस। एखर अलावा काली तक नवासी हजार ले जादा फ्रंटलाइन वर्कर्स मन ल कोविड वैक्सीन दे जा चुके हे।
इही बीच, राज्य टीकाकरण अधिकारी डाॅक्टर अमर सिंह ह ठाकुर ह किहीन कि हाल-फिलहाल छत्तीसगढ़ म कोविड वैक्सीन के रूप म कोविशील्ड के ही दूनों टीका लगाय जाही। ओमन किहीन कि जउन मनखे मन ल जनवरी महीना म कोविशील्ड वैक्सीन लगाय गे रिहीस, ओमन मन ल ही कोविशील्ड के दूसरा टीका लगाय जाही। डाॅक्टर ठाकुर ह किहीन कि जउन स्वास्थ्य कार्यकर्ता मन ल कोविड वैक्सीन लग चुके हे, ओमन ल अट्ठाईस दिन बाद दूसरा डोज लगवाना हे, तभे ए वैक्सीन जादा प्रभावी होही।
मुख्यमंत्री-निर्देश
मुख्यमंत्री भूपेश बघेल ह प्रदेस के कतकोन जगह मन म पाछु एक-दू ले होवत बेमौसम बरसा ले उपार्जन केन्द्र म राखे धान ल गिल्ला होय ले बचाय बर व्यवस्था सुनिश्चित करे के सबो जिला कलेक्टर मन ल निरदेस दीन हे। मुख्यमंत्री ह कलेक्टर मन ले किहीन कि बेमौसम बरसा के सेती यदि धान ल नुकसान होथे त क्षति के आंकलन करके प्रभावित मन ल आर्थिक सहायता पहुंचाय जाय। ओमन किहीन कि उपार्जन केन्द्र मन म धान ल व्यवस्थित तरीका ले तालपत्री ले ढांक के रखय अउ पानी निकासी के समुचित व्यवस्था करे जाय। मुख्यमंत्री ह अधिकारी मन ल धान के कस्टम मीलिंग म तेजी लाय के घलो निरदेस दीन।
आकांक्षी जिला-यूथ कार्यक्रम
केन्द्र सरकार के इलेक्ट्राॅनिक्स अउ सूचना प्रौद्योगिकी मंत्रालय डहार ले एक निजी साॅफ्टेवयर कंपनी के साथ मिलके देस के सरकारी स्कूल मन म कक्षा छठवीं ले बारहवीं म पढ़ईया छात्र मन बर रिस्पाॅन्सिबल आर्टिफिशियल इंटेलिजेंस फाॅर यूथ कारीकरम सुरू करे गेहे। एमा देस के अकांक्षी जिला मन ले चयनित कुल चैदह म ले सात झिन छात्र महासमुंद जिला के हवय। बागबाहरा विकासखंड के सासकीय कुलदीप निगम उच्चतर माध्यमिक विद्यालय नर्रा के ए छात्र मन ल एक-एक ठिन लैपटाॅप केन्द्रीय मंत्रालय डहार ले दे गेहे। एखर संग छात्र मन ल रिचार्ज कूपन घलो दे गेहे।
बतादन कि रिस्पाॅन्सिबल एआई फाॅर यूथ कारीकरम के अंतर्गत सासकीय उच्चतर माध्यमिक विद्यालय नर्रा के विज्ञान सिक्षक अउ सैंतीस छात्र मन पहिली चरण म आर्टिफिशियल इंटेलिजेंस के कोर्स पूरा करीन। ए छात्र मन अपन आइडिया आर्टिफिशियल इंटेलिजेंस के उपयोग ले समाज के समस्या के समाधान करे के उद्देश्य बर केन्द्रीय इलेक्ट्रानिक्स अउ सूचना प्रौद्योगिकी मंत्रालय ल भेजे रिहीन। देसभर ले मिले आइडिया म ले सौ आइडिया के चयन पाछु बारह जनवरी के दूसरा चरण बर करे गे रिहीस।
डोंगरगढ़-प्रसाद योजना
केन्द्रीय पर्यटन मंत्री प्रहलाद पटेल अवइया दू मार्च के राजनांदगांव जिला के डोंगरगढ़ म केन्द्र सरकार के प्रसाद योजना के सुरूवात करही। राजनांदगांव सांसद संतोष पांडेय ह बतईन कि डोंगरगढ़ म मां बम्लेश्वरी मंदिर अउ आसपास के क्षेत्र मन म विश्व स्तरीय पर्यटन सुविधा उपलब्ध कराय बर केन्द्र सरकार ह तिरालीस करोड़ रूपिया के स्वीकृति दू महीना पहिली देहे। ए काम के सुरू होय ले डोंगरगढ़ ल पर्यटन क्षेत्र के रूप म विकसित करे जा सकही। इहां पर्यटक मन बर ध्यान केन्द्र, ओपन थियेटर, लाइब्रेरी, प्रसाद काउंटर, कैफिटेरिया जइसे सब्बो सुविधा उपलब्ध रइही। उहें, पूरा इलाका म रोसनी बर सोलर पावर प्लांट बनाय जाही।
प्रधान महानिदेशक-पदभार
भारतीय सूचना सेवा के वरिष्ठ अधिकारी एन. वेणुधर रेड्डी ह आज आकाशवाणी समाचार के प्रधान महानिदेशक के पदभार ग्रहण करीन। ओमन जयदीप भटनागर के स्थान लीन हे, जउन ह अब पत्र सूचना कार्यालय-पीआईबी म बिसेस कार्याधिकारी बनाय गेहे।
अबूझमाड़ पीस हाफ मैराथन
नारायणपुर जिला के अबूझमाड़ म अवइया सत्ताईस फरवरी के तीसरा अबूझमाड़ पीस हाफ मैराथन राखे जाही। एखर बर पच्चीस फरवरी तक आॅनलाइन पंजीयन करे जाही। अब तक सात हजार ले जादा धावक मन अपन पंजीयन कराय हे। एमा केन्या के धावक घलो सामिल हवय। मैराथन ल लेके लोगन मन म अब्बड़ उमंग हे। मैराथन दउड़ म महिला अउ पुरूष वर्ग बर अलग-अलग पुरस्कार दे जाही। मैराथन म प्रथम पुरस्कार एक लाख इक्कीस हजार रूपिया, दूसरा पुरस्कार इकसठ हजार अउ तीसरा पुरस्कार इकतीस हजार रूपिया राखे गेहे। अइसने, नारायणपुर जिला के दस-दस झिन महिला अउ पुरूष धावक मन ल पांच-पांच हजार रूपिया के रासि, प्रसस्ति पत्र अउ मेडल दे जाही।
|
ReplyForward
|