प्रधानमंत्री-जैविक खेती
प्रधानमंत्री नरेन्द्र मोदी ह सामुदायिक आधार ले जैविक अउ प्राकृतिक खेती अपनाय के आह्वान करीन हे। ओमन किहीन कि भारतीय कृषि अनुसंधान परिषद ह जैविक खेती वाले भू-भाग के नक्सा बनाय हे, जेमा अट्ठयासी ठिन जैव नियंत्रण कारक अउ बाईस ठिन जैव कीटनासक के पहिचान करे गेहे।
श्री मोदी ह काली वीडियो कान्फ्रेंस के माध्यम ले देस म कृषि अनुसंधान विस्तार अउ सिक्षा के प्रगति के समीक्षा करीन। ओमन निरदेस दीन कि खेती-बाड़ी अउ एखर ले जुड़े जघा मन म नवाचार अउ टेक्नोलाॅजी ल बउरे खातिर स्टार्टअप अउ कृषि उद्यमी मन ल आगू बढ़ाना चाही। प्रधानमंत्री ह किहीन कि खेती ले जुड़े समस्या के निदान बर हर बछर कार्यसाला या फेर सिविर लगाना चाही। संगे खेती काम म जादा ले जादा माईलोगिन मनके भागीदारी ल धियान राखत ओमन ल कम मेनहत होय तइसन औजार अउ उपकरण बनाना चाही।
प्रधानमंत्री ह किहीन कि कृषि उपकरण के सहुलियत अउ उपज ल खेत ले बाजार तक डोहारे के बने ढंग के सुविधा बनाय जाना चाही। ए बारे म कृषि सहकारिता अउ कृषक कल्याण विभाग ह ‘‘किसान रथ‘‘ ऐप आरंभ करे हे। श्री मोदी ह पानी ल किफायती ढंग ले बउरे बर जागरूकता कारीकरम राखे उपर घलो जोर दीन।
प्रधानमंत्री-आत्मनिर्भर भारत नवाचार
प्रधानमंत्री नरेन्द्र मोदी ह सर्वश्रेष्ठ भारतीय ऐप विकसित करे बर आत्मनिर्भर भारत नवाचार चुनौती के सुभारंभ करीन। प्रधानमंत्री ह किहीन कि भारतीय ऐप म अपन-अपन श्रेणी म विश्वस्तर के बनाय के काबिलियत हे। ओमन लोगन अउ टेक्नोलाॅजी ले जुड़े समुदाय ल ए आत्मनिर्भर भारत नवाचार चुनौती म भाग लेके आग्रह करीन। ए चुनौती ह दू स्तर म होही- मौजूदा ऐप्लीकेसन के संवर्धन अउ नवा ऐप्लीकेशन के विकास।
श्री मोदी ह लिंक्ड-इन के एक ठिन पोस्ट म किहीन हे कि ई-लर्निंग, वर्क फार्म होम, गेमिंग, बिजनेस, मनोरंजन, आफिसियल काम अउ सोसल नेटवर्किंग ल बढ़ावा देके संगे नवा ऐप विकसित करे बर सरकार ह जरूरी सहुलियत देवाही। ओमन किहीन कि भारत अउ विश्व के अब्बड़ अकन मुद्दा के समाधान बर नवा ऐप्लीकेसन विकसित करे के भारी संभावना हे।
मुनगा-पौधरोपण
प्रदेस म काली छह जुलाई के वन विभाग डहार ले मुनगा पेड़ लगाय बर बिसेस अभियान चलाय जाही। एमा प्रदेस के सबो सरकारी स्कूल, आंगनबाड़ी केन्द्र अउ छात्रावास आश्रम म मुनगा के पौधा लगाय जाही।
वन मंत्री मोहम्मद अकबर ह बतईन कि ए अभियान ह कुपोषण मुक्त छत्तीसगढ़ के कल्पना ल साकार करे म अपन सुघ्घर काम करही। एला लगाय ले इफरात मुनगा मिले के संगे हरियर रूख-राई ले पर्यावरण संरक्षण ल घलो बढ़ावा मिलही। प्रधान मुख्य वन संरक्षक राकेश चतुर्वेदी ह बतईन कि मुनगा म अब्बड़ अकन विटामिन अउ खनिज लवण होथे, जउन ह सेहत बर बहुते फायदा के चीज़ हे।
मनरेगा-पौधरोपण
दुरूग जिला के जवान लइका मन अपन संघरा प्रयास ले एक ठिन भाटहा भूईंया ल हरियर बगीचा म बदल देहे। महात्मा गांधी राष्ट्रीय ग्रामीण रोजगार गारंटी योजना-मनरेगा के माध्यम ले जिला के मरमरा गांव म जवान लइका मन ‘‘पौधा लगाओ-जीवन बचाओ‘‘ के नारा देके रीता जमीन म नान-नान पेड़ लगाके ओला सुंदर गार्डन बना देहे।
मिले जानकारी मुताबिक गांव के जवान लइका मनके ए परयास ल ग्राम पंचईत ल घलो सहयोग मिलीस। फेर बाद म मनरेगा मद ले करीबन साढ़े चार लाख रूपिया मंजूरी दे गीस। जुलाई दू हजार सत्रह म ए भाटहा भूईंया म सीताफल, जाम, करौंदा, नीम, अउ गुलमोहर समेत आने-आने तीन सौ ले जादा नान्हें पेड़ लगाय गे रिहीस।
तेंदूपत्ता-संग्रहण
प्रदेस म तेंदूपत्ता सकेले के काम सरलग चलत हे। चालू सीजन म नौ लाख बहत्तर हजार मानक बोरा ले जादा तेंदूपत्ता सकेले गेहे। एखर ले सकलइया यानि संग्राहक मन ल तीन सौ नवासी करोड़ रूपिया के इनकम होय हे।
इहां ए बतादन कि कोरोना संक्रमण के सेती तेंदूपत्ता सकेले ले लेके स्टोर करे तक के काम स्थानीय समिति ले कराय गेहे।
सरकार-टिड्डी दल
केन्द्र सरकार ह आज केहे हे कि बीते ग्यारह अप्रैल ले नौ ठिन राज्य के ढाई हेक्टेयर जघा म टिड्डी नियंत्रण अभियान चलाय गीस। ए नौ ठिन राज्य म छत्तीसगढ़ समेत राजस्थान, मध्यप्रदेश, पंजाब, गुजरात, उत्तरप्रदेश, महाराष्ट्र, हरियाणा अउ बिहार सामिल हे। कृषि मंत्रालय ह बतईन कि टिड्डी दल के प्रकोप ले ए राज्य मन म फसल के जादा नकसान होय के खबर नइ हे।
इहां ए बतादन कि भारत पहला देस हरय, जिहां टिड्डी दल के नियंत्रण बर ड्रोन के इस्तेमाल करे जात हे।
अंग्रेजी-माध्यम स्कूल
राज्य सरकार ह प्रदेस के नवा सिक्षा सत्र ले चालू होवत अंग्रेजी मीडियम स्कूल बर नवा सेटअप के मंजूरी दे देहे, जेमा प्रींसिपल के पद ल प्रतिनियुक्ति बर रिजर्व राखे गेहे। उहें, लेक्चरल से लेके प्यून तक वाले पद पर संविदा या फेर डेपुटेसन के आधार ले नियुक्ति करे जाही। संविदा के पद बर सासन डहार ले मानदेय तय कर दे गेहे। उहें, प्रतिनियुक्ति वाले करमचारी अउ सिक्षक मन ल उही वेतन अउ भत्ता प्राप्त होही, जउन उंखर मूल विभाग ले मिलथे।
इहां ए बतादन कि नवा अंग्रेजी मीडियम स्कूल ल चलाना अउ मैनेज करना कलेक्टर के पगरइति वाले समिति के जिम्मा होही। ए समिति के सचिव जिला सिक्षा अधिकारी-डीईओ ह होही। हरेक स्कूल बर अलग समिति बनही। ए स्कूल मन म कक्षा पहली ले बारहवीं तक पढ़ई अंग्रेजी मीडियम म होही।
परिवहन जांच-चैकी
प्रदेस सरकार ह राज्य के सीमा मन म बने सोलह ठिन परिवहन जांच चैकी ल फेर ले सुरू करे के आदेस जारी करे हे। ए आदेस के संगे परिवहन उड़न दस्ता के संचालन घलो चालू होगे हे। ए परिवहन जांच चैकी म पाटेकोहरा, छोटा मानपुर, चिल्फी, खम्हारपाली, बागबाहरा, केंवची, धनवार अउ रामानुजगंज के संगे घुटरीटोला, चांटी, रेगारपाली, शंख, लावाकेरा के संग कोन्टा अउ धनपूंजी सामिल हे।
ए जम्मों जांच चैकी ल चार जुलाई दू हजार सत्रह के अधरतिहा ले बंद कर दे गे रिहीस।
खाद्य सुरक्षा साॅफ्टवेयर
खाद्य कारोबारी मन ल लाइसेंस अउ पंजीयन के संगे वार्षिक रिटर्न दाखिल करे बर अब आॅनलाईन सहुलियत मिलही। मिले जानकारी मुताबिक खाद्य सुरक्षा अउ मानक प्राधिकरण ह एखर बर एफ.ओ.एस., सी.ओ.एस. नाम के एक ठिन नवा साॅफ्टवेयर तैयार करे हे। ए हर सिंगल विंडो सिस्टम असन काम करही। पहिली चरण म एला नौ ठिन राज्य म लागू करे जाही। फेर एखर सफल होय बाद बांचे राज्य मन म ए ह लागू होही।
होटल/बार
राज्य सरकार ह होटल-रेस्टोरेंट म चलत बार अउ मदिरा स्टाक जघा ल अब अवइया बारह जुलाई तक बंद राखे के निरदेस देहे। एखर पहिली सरकार ह आज पांच जुलाई तक ए सब ल बंद राखे के आदेस जारी करे रिहीस।
मौसम
अब सुनव मौसम के हाल..
प्रदेस म अवइया चोबीस घंटा के दउरान गरजई-चमकई के संगे सिटिर-साटर पानी गिर सकत हे। उहें, उत्तरी अउ मध्य भाग म एक-दू जघा म बड़-भारी बरसा होय के संगेसंग गाज गिरे के चेतावनी दे गेहे।
मौसम विभाग ले मिले जानकारी मुताबिक पश्चिम मध्य बंगाल के खाड़ी उपर एक ठिन निम्न दाब के क्षेत्र बने के सेती आज प्रदेस के दक्षिणी अउ ओखर ले लगे मध्य भाग म जोरदरहा पानी गिर सकत हे।
संक्षिप्त समाचार
अउ अब थोरकुन समाचार सार म-
– राज्य सरकार ह राजनांदगांव जिला म झिटिया एनीकट परियोजना बर दू करोड़ पच्यासी लाख रूपिया मंजूर करे हे।
– जांजगीर-चांपा जिला म कीटनाशक दवा बेचे म उन्नीस करोड़ रूपिया के गड़बड़ी के मामला म कंपनी के जोनल मैनेजर, रीजनल मैनेजर समेत सोलह झिन मनके खिलाफ एफआईआर दर्ज करे हे।
– कोरबा जिला म निर्माण काम के दउरान होय हादसा म एक झिन माईलोगिन बनिहारिन के मउत होगे।
अउ
– रायगढ़ जिला के कापू क्षेत्र म चैदह ठिन हाथी के दल ह बीते रतिहा तीन ठिन घर म तोड़फोड़ करे हे। उहें, खेत के फसल ल घलो नकसान पहुंचाय हे।