विमान सेवा
बिलासपुर सहर ले अवइया एक मार्च ले जबलपुर, प्रयागराज अउ दिल्ली बर हवाई यात्री सेवा सुरू हो जही। खबर के मुताबिक बिलासपुर ले दिल्ली बर एटीआर-बहत्तर विमान सेवा के दू उड़ान सोमवार, बुधवार, शुक्रवार अउ सनिवार के संचालित करे जाही। पहिली उड़ान दिल्ली ले रवाना होके जबलपुर ले होवत मंझनिया तीन बजके बीस मिनट म बिलासपुर पहुंचही अउ तीन बजके पैंतालीस मिनट म बिलासपुर ले उड़ान भरके प्रयागराज होवत दिल्ली वापिस लहुटही। उहें, दूसर उड़ान दिल्ली ले प्रयागराज होवत संझा चार बजे बिलासपुर पहुंचही अउ संझा साढ़े चार बजे बिलासपुर ले जबलपुर होवत दिल्ली वापिस जाही। ए यात्री विमान सेवा बर एयर इंडिया के सहायक कंपनी एलायंस एयर ह अपन सहमति दे देहे। ए संबंध म एयरपोर्ट अथाॅरिटी आॅफ इंडिया डहार ले तुरते कार्रवाई करके अनुमति जारी करे जाही।
मुख्यमंत्री भूपेश बघेल ह केन्द्रीय मंत्री हरदीप सिंह पुरी ल बिलासपुर ले दिल्ली बर विमान सेवा सुरू करे के अनुमति दे बर धन्यवाद दीन। ओमन कहिन कि दिल्ली बर विमान सेवा सुरू होय ले बिलासपुर अउ आसपास के अंचल के आर्थिक प्रगति अउ औद्योगिक विकास म सहायता मिलही। उहें, लोगन ल कम लागत वाले हवाई यात्रा के सुविधा घलो मिल सकही।
खबर के मुताबिक राज्य सरकार ह बिलासपुर एयरपोर्ट के विकास बर पैंतालीस करोड़ रूपिया के स्वीकृति दीन हे।
कोरोना समाचार
केन्द्र सरकार ह कहिन हे कि अब तक देस म लगभग नब्बे लाख लोगन ल कोरोना टीका लगाय जा चुके हे। एमा चैंसठ लाख ले जादा स्वास्थ्यकर्मी अउ पच्चीस लाख ले जादा अग्रिम पंक्ति के कर्मचारी सामिल हे।
ऐति, छत्तीसगढ़ म घलो कोरोना टीकाकरण के काम जारी हे। टीकाकरण सुरू होय एक महीना होगे हे। फेर राज्य म अब तक निर्धारित लक्ष्य के सिरिफ चैंतीस प्रतिसत लोगन ल ही कोविड वैक्सीन लगाय गेहे। काली सोलह फरवरी के प्रदेस म पन्द्रह हजार छह सौ ले जादा लोगन ल ए टीका लगाय गीस। एमा ले एक हजार चार सौ जादा लोगन ल कोविड वैक्सीन के दूसरा डोज लगाय गीस।
प्रधानमंत्री-लीडरशिप फोरम
प्रधानमंत्री नरेन्द्र मोदी ह भारत म दुनिया बर विश्व स्तरीय उत्पाद बनाय के जरूरत उपर जोर दीन। वीडियो कांफ्रेंसिंग के माध्यम ले नैसकाॅम टेक्नोलाॅजी अउ लीडरशिप फोरम ल आज संबोधित करत श्री मोदी ह स्टार्टअप अउ नवाचार ल अपनइया ले उत्कृष्टता के वैश्विक मानदंड स्थापित करइया उत्पाद मन ल बनाय के अनुरोध करीन। ओमन कहिन कि टेक्नोलाॅजी ले लोगन के ससक्तिकरण होय हे अउ सरकार के संग उंखर संपर्क स्थापित होय हे।
प्रधानमंत्री ह कहिन कि पहिली भारत ह टीका बर दूसर देस उपर निर्भर रिहीस, फेर आज स्वयं दूसर देस ल कोरोना के वैक्सीन उपलब्ध करावत हे।
मुख्यमंत्री-पत्र
मुख्यमंत्री भूपेश बघेल ह केन्द्रीय वित्त मंत्री निर्मला सीतारमण ल चिट्ठी लिखे हे। ए चिट्ठी म मुख्यमंत्री ह केन्द्रीय मंत्री ले छत्तीसगढ़ ल एक्साइज ड्यूटी के रूप म मिलइया रासि ल पहिली जइसन देके अनुरोध करे हे। मुख्यमंत्री ह चिट्ठी म लिखे हे कि कोरोना महामारी के सेती बछर दू हजार बीस-इक्कीस वित्तीय दृष्टि ले कठिन रेहे हे। संगेसंग आर्थिक गतिविधि उपर विपरीत प्रभाव पड़े के सेती स्वयं के वित्तीय स्त्रोत मन म करीबन तीस प्रतिसत के कमी आना संभावित हे। ओमन कहिन कि बछर दू हजार इक्कीस-बाईस के केन्द्रीय बजट म एक्साइज ड्यूटी म कमी करके कृषि अधोसंरचना विकास सेस लगाय के घोसना करे गेहे, जेखर ले प्रदेस ल अवइया वित्तीय बछर म नौ सौ ले एक हजार करोड़ रूपिया के उपरहा क्षति होना संभावित हे।
मौसम
प्रदेस म कतकोन जगह म काली ले मौसम के हाल बदल गेहे। एखर सेती प्रदेस के कुछेक स्थान म हल्का ले मध्यम बरसा होय अउ कुछेक जगह म ओलावृष्टि होय के खबर हे।
खबर के मुताबिक बेमेतरा जिला म हवा के संग झमाझम बरसा होय हे। उहें, बिलासपुर म आज हल्का बरसा होय ले तापमान म कमी आय हे। संगेसंग जाड़ घलो बाढ़ गेहे। ऐति, मुंगेली म बरसा के संग ओला घलो गिरे हे। धमतरी जिला संग प्रदेस के कतकोन आने हिस्सा म घलो बरसा होय के समाचार मिले हे। राजधानी रईपुर अउ तीर-तखार के क्षेत्र म ठंडा हवा के संग बिहनिया ले बदली छाय रिहीस। ए दउरान तापमान म गिरावट दर्ज करे गीस।
मौसम विभाग के मुताबिक पश्चिमी विक्षोभ के सक्रिय होय के सेती मौसम म बदलाव आय हे, जेखर ले प्रदेस के कतकोन हिस्सा म बरसा होवत हे।
इही बीच, प्रदेस बे-मौसम बरसा होय के सेती किसान मन चिंता म बूढ़े हे। मिले खबर के मुताबिक मौसम म आय बदलाव के सेती दलहन अउ साग-भाजी के फसल के खराब होय आशंका हे। इंदिरा गांधी कृषि विश्वविद्यालय म मौसम विज्ञान विभाग के प्रमुख डाॅक्टर जी.के. दास ह बतईन कि कहूं अवइया दू-तीन दिन म घलो बरसा होवत रइही त साग-भाजी अउ कुछेक आने फसल ल नुकसान हो सकत हे। फेर, ए बरसा ले गेहूं के फसल ल फायदा घलो हो सकत हे। ओमन ह बतईन कि साग-भाजी अउ आने फसल म नमी आ जही त उचित मात्रा म दवा के छिड़काव करे जा सकथे। बेमेतरा जिले के साजा क्षेत्र म टमाटर अउ पपीता के फसल प्रभावित होय हे। उहें, चना अउ मसूर के फसल ल घलो नुकसान पहुंचे हे। एखर अलावा कतकोन जिला के धान खरीदी केन्द्र मन म बेमौसम बरसा ले धान भीगे के समाचार मिले हे।
भाजपा/कांग्रेस
भारतीय जनता पार्टी महिला मोर्चा डहार ले राज्य सरकार के खिलाफ अवइया बीस फरवरी के ‘‘हल्ला बोल‘‘ आंदोलन करे जाही। ए संबंध म आज रईपुर म पार्टी के वेबिनार बइठका होईस। बइठका म धरना-प्रदर्शन के संगेसंग विधानसभा सत्र के दउरान विधानसभा घेराव करे के निर्णय ले गीस।
धरना-प्रदर्शन के बाद भाजपा महिला मोर्चा डहार ले राज्यपाल अनुसुईया उइके ल ज्ञापन सौंपे जाय के निर्णय ले गेहे। इही दिन सबो जिला मुख्यालय मन म धरना-प्रदर्शन करे जाही अउ बाद म राज्यपाल के नाम कलेक्टर ल ज्ञापन सौंपे जाही। ए सिलसिला म पार्टी के नेता राजधानी संग सबो जिला मुख्यालय मन म पत्रकारवार्ता लेके माईलोगिन मन संग होवत अपराध के मुद्दा उपर जन-जागरण अभियान घलो चलाही। महिला मोर्चा ह ए ‘हल्ला बोल आंदोलन‘ म पार्टी संग सबो मोर्चा-प्रकोष्ठ मनके भागीदारी रइही।
दूसर कोति, प्रदेस कांग्रेस कमेटी डहार ले किसान मनके समर्थन म राजनांदगांव जिला के खैरागढ़ म बीस फरवरी ‘जन अधिकार पदयात्रा‘ करे जाही। प्रदेश कांग्रेस अध्यक्ष मोहन मरकाम के नेतृत्व म निकलइया ए पदयात्रा म किसान मनके संग प्रदेस कांग्रेस संगठन के वरिष्ठ पदाधिकारी, जिला कांग्रेस के विधायक, जिला कांग्रेस कमेटी के पदाधिकारी, ब्लाॅक अउ सहर कांग्रेस अध्यक्ष के अलावा महिला अउ किसान कांग्रेस अउ पिछड़ा वर्ग प्रकोष्ठ के सबो पदाधिकारी सामिल होही। खैरागढ़ के ढीमरीकुआं ले सुरू होवइया ए पदयात्रा सहर भ्रमण करत एसडीएम कार्यालय पहुंचही, जिहां राष्ट्रपति के नाव एसडीएम ल ज्ञापन सौंपे जाही।
सिंहदेव-चिकित्सा महाविद्यालय
राजधानी रईपुर के सासकीय दंत चिकित्सा महाविद्यालय म आज इम्प्लांट ट्री इंटीग्रेशन कार्यसाला के आयोजन करे गीस। ए मउका म स्वास्थ्य मंत्री टी.एस. सिंहदेव ह छात्र मन ल संबोधित करत कहिन कि ए कार्यसाला म आय बिसेसज्ञ चिकित्सक मनके मार्गदर्शन म छात्र मन ल नवा जानकारी उपलब्ध होही। ओमन कहिन कि ए कार्यसाला के माध्यम ले छात्र मन ल जादा ले जादा ज्ञान प्राप्त करना चाही।
कारीकरम के बाद स्वास्थ्य मंत्री ह दंत चिकित्सा महाविद्यालय के अवलोकन करीन। संगेसंग स्वच्छताकर्मी अउ आने कमरचारी मन ले भेंट घलो करीन।