टोल प्लाजा-फास्टैग
राष्ट्रीय राजमार्ग उपर टोल प्लाजा के जम्मों लेन आज अधरतिहा ले फास्टैग लेन घोसित हो जही। केन्द्रीय सड़क परिवहन अउ राजमार्ग मंत्रालय ह किहीन हे कि पइसा के भुगतान डिजिटल मोड म करे जाय। एला बढ़ावा दे बर अउ बेरा घलो कम लगय एखर बर ए कदम उठाय गेहे। टोल प्लाजा के फास्टैग लेन म फास्टैग नइ होय के स्थिति म गाड़ी वाले मन ल सुल्क के दुगुना जुर्माना दे बर पड़ही।
मंत्रालय ह एसो एक जनवरी ले एम अउ एन श्रेणी के मोटर गाड़ी मन म फास्टैग लगाना जरूरी कर दे रिहीस।
कोरोना टीकाकरण
देस म अब तक बयासी लाख पच्यासी हजार ले जादा लोगन मन ल कोरोना के टीका लगाय गेहे। केन्द्रीय स्वास्थ्य मंत्रालय ह बतईन कि पाछु चैबीस घंटा म इक्कीस हजार ले जादा लोगन मन ल कोविड के टीका लगाय गेहे।
ऐति, छत्तीसगढ़ म टीकाकरण के दूसर डोज लगाय के काम सुरू होगे हे। अब तक दू लाख दस हजार ले जादा लोगन मन ल पहिली डोज के टीका लगाय जा चुके हे। मुंगेली जिला म करीबन सत्तर प्रतिसत स्वास्थ्य कर्मी मन ल पहिली डोज के टीका लगा दे गेहे।
इही बीच, प्रदेस म काली कोरोना संक्रमण के एक सौ उनहत्तर नवा मामला आगू आय हे, जेमा सबले जादा रईपुर जिला म अड़तालीस अउ दुरूग म इकचालीस नवा मरीज मिले हे। ए बेरा तीन हजार दू सौ अंठावन मरीज मनके इलाज आने-आने अस्पताल या फेर होम आइसोलेशन म चलत हे।
उहें, दुरूग जिला ल होम आइसोलेशन माॅडल के रूप म स्वास्थ्य विभाग डहार ले कराय गे सर्वें म पहिली स्थान मिले हे।
कोरोना-स्वास्थ्यकर्मी योगदान
राजस्व अउ आपदा प्रबंधन मंत्री जयसिंह अग्रवाल ह किहीन हे कि कोरोना महामारी ल रोके म अउ बने ढंग ले इलाज करे बर स्वास्थ्यकर्मी मनके बढ़िया भूमिका रिहीस। श्री अग्रवाल ह काली कोरबा म कोरोना वारियर्स के सम्मान समारोह ल संबोधित करत रिहीन। ए मउका म राजस्व मंत्री ह कोरोना काल म सुघ्घर काम करइया स्वास्थ्यकर्मी अउ अधिकारी मन ल प्रसस्ति पत्र के संगेसग स्मृति चिन्ह देके सम्मानित करीन।
कोरोना काल-खाद्यान्न
राज्य सरकार ह कोरोना संक्रमण के दउरान प्रदेस म जम्मों खाद्यान्न सुरक्षा उपलब्ध कराय म सफलता हासिल करीन हे। ए दउरान राज्य के लोगन मन ल खाद्य सुरक्षा के संगेसंग प्रवासी मजूर, निराश्रित अउ जरूरतमंद लोगन मन ल भोजन के संगेसग सूखा रासन देवाय के उपाय करे गीस। लाॅकडाउन के बेरा म छूटे पात्र परिवार मनके नवा रासन कार्ड जारी करे गीस। राज्य म पाछु साल बाईस मार्च ले एसो जनवरी तक एक लाख बयानवे हजार ले जादा नवा रासन कार्ड बनाय गीस अउ अभी घलो ए काम चलत हे।
स्कूल/काॅलेज
प्रदेस म कोरोना संक्रमण के सेती पाछु ग्यारह महीना ले बंद स्कूल अउ काॅलेज आज ले खुल गे। ए बारे म उच्च सिक्षा अउ स्कूल सिक्षा विभाग डहार ले कोरोना ले बचाव बर जारी दिसा-निरदेस के पालन कराय जात हे। प्रदेस के जम्मों स्कूल मन म कक्षा नौवीं ले बारहवीं तक के कक्षा ल दू पाली म खोले गेहे।
उहें, कालेज अउ विश्वविद्यालय मनके सुरू के गेट म ही पहिली दिन छात्र मनके थर्मल स्क्रीनिंग करे गीस। संगेसंग कक्षा मनके सैनिटाईज घलो करे गीस।
जानबा के मुताबिक छत्तीसगढ़ माध्यमिक सिक्षा मंडल ह पहिलीच ले दसवीं अउ बारहवीं कक्षा के बोर्ड परीक्षा के तारीख के घोसना कर देहे, जेखर मुताबिक कक्षा दसवीं के परीक्षा पन्द्रह अप्रैल ले अउ कक्षा बारहवीं बोर्ड के परीक्षा तीन मई ले सुरू होही।
मन की बात
प्रधानमंत्री नरेन्द्र मोदी ह अट्ठाईस फरवरी के आकाशवाणी ले ‘‘मन की बात‘‘ कारीकरम के चैहत्तरवीं कड़ी म देस-विदेस के लोगन मन संग अपर विचार साझा करही। लोगन मन नमो ऐप या माई जीओवी ओपन फोरम म अपन विचार साझा कर सकथे।
नई शिक्षा नीति
केन्द्र सरकार ह लइका मन म सुलझे विचार अउ बढ़िया व्यवहार ल बढ़ावा देके उद्देश्य ले खिलौना अउ खेल मनके परयोग उपर जोर देवत हे। नवा राष्ट्रीय सिक्षा नीति म ए जरूरी पहलु उपर बिसेस धियान राखे गेहे। प्रोफेसर पवन सुधीर ह आकाशवाणी ले बिसेस गोठबात म किहीन कि खिलौना अउ खेल ह लइका मन म सीखे के क्षमता ल बढ़ाय के संगेसंग समस्या ल सुलझाय म बड़का भूमिका निभाथे।
नवा रायपुर-स्कूल
राज्य सरकार ह छात्र मन ल उच्च स्तरीय सुविधा देवाय बर नवा रईपुर म राष्ट्रीय स्तर के स्कूल स्थापित करे के घोसना करे हे। एखर बर दस एकड़ जमीन मुफत म दे जाही। मुख्यमंत्री भूपेश बघेल ह मुख्य सचिव ल सिक्षा अउ एखर ले जुड़े विभाग ले सलाह लेके बाद प्रस्ताव ल मंत्रिमंडल म पेस करे बर केहे हे।
मुख्यमंत्री ह किहीन कि राष्ट्रीय स्तर के स्कूल सुरू होय ले प्रदेस के छात्र मन ल अउ बढ़िया सिक्षा मिलही। उहें, सिक्षा के क्षेत्र म छत्तीसगढ़ ल राष्ट्रीय स्तर म घलो प्रसिद्धि मिलही।
बिलासपुर-चकरभाटा उड़ान
बिलासपुर के चकरभाटा हवाई अड्डा म काली पहिली परीक्षण उड़ान पहुंचही। ए जानबा आज बिलासपुर उच्च न्यायालय म दायर एक ठिन याचिका के सुनवाई के दौरान याचिकाकर्ता के वकील ह दीन। ओमन बतईन कि एलाइंस एयर के दस सदस्य के टीम ह घलो काली बिलासा-चकरभाटा एयरपोर्ट के जांच बर आही।
मैनपाट महोत्सव-समापन
सरगुजा जिला म मैनपाट के रोपाखार म राखे गे तीन दिन के मैनपाट महोत्सव काली सिरा गे। ए मउका म पर्यटन मंत्री ताम्रध्वज साहू ह मैनपाट म चिन्हारी करे गे चैदह ठिन नवा पर्यटन प्वाॅइंट म आय-जाय के संगेसंग आने विकास काम के प्रस्ताव ल मंजूरी देके घोसना करीन। ओमन किहीन कि मैनपाट सरगुजिहा, भोजपुरी अउ तिब्बती संस्कृति मनके त्रिवेणी संगम हवय। इहां लोककला के सुघ्घर इतिहास घलो हवय।
संस्कृति मंत्री अमरजीत भगत ह किहीन कि मैनपाट महोत्सव के उद्देश्य इहां के लोगन मनके जिनगी अउ लोककला ल आगू बढ़ाय के संगेसंग ओमन ल रोजगार घलो देवाना हे।
आगजनी
दुरूग जिला म नंदिनी थाना के गांव गोढ़ी-मुरमंुदा म पाछु रतिहा एक ठिन घर म आगी लग गे। ए घटना म एक झिन माईलोगिन के मउत होगे। त उहें, घर म आगी लगे ले इक्कीस ठिन छेरी के घलो मउत होगे हे।
बसंत पंचमी
प्रदेस म काली ज्ञान, कला अउ संगीत के देवी मां सरस्वती के आराधना के परब बसंत पंचमी मनाय जाही। ए दिन स्कूल मनके संगेसंग घर म घलो मां सरस्वती के बिसेस ढंग ले पूजापाठ करे जाथे। मुख्यमंत्री ह प्रदेस के लोगन मन ल बसंत पंचमी के बधाई दे हवय।
खेल समाचार
बीसवां छत्तीसगढ़ सीनियर राज्य स्तरीय बाॅल बैडमिंटन प्रतियोगिता म दुरूग जिला के टीम ह महिला अउ पुरूष दूनों वर्ग म जीत हासिल करके खिताब उपर कब्जा जमा लेहे। उतई के पुलिस ग्राउंड म खेले गे फाइनल मुकाबला म दुरूग के पुरूष टीम ह भिलाई ल अउ माईलोगिन टीम ह महासमुंद के टीम ल हराईन हे।
संरक्षण क्षमता महोत्सव
परिवहन मंत्री मोहम्मद अकबर ह आज पेट्रोलियम संरक्षण हरित अउ स्वच्छ ऊर्जा ल बढ़ावा देके उद्देश्य ले राखे गे संरक्षण क्षमता महोत्सव के समापन समारोह म आॅनलाइन सामिल होईन। ए महोत्सव के उद्देश्य आम लोगन मन म पेट्रोल ल बचाय अउ एखर ले जुड़े आने-आने संदेस के प्रचार-प्रसार करना हे। ए मउका म परिवहन मंत्री ह किहीन कि पेट्रोल बचाय बर लोगन मन ल बैटरी वाले गाड़ी, सीएनजी के संगेसंग आने-आने उत्पाद के परयोग करना चाही।
क्रिकेट-प्रतिबंधित क्षेत्र
रईपुर कलेक्टर ह नवा रईपुर के मेफेयर होटल अउ लेक रिसाॅर्ट ल बाहिर ले आय मनखे मन बर बाईस फरवरी ले बाईस मार्च तक बायो बबल जोन माने प्रतिबंधित क्षेत्र घोसित कर देहे। ए फइसला सड़क सुरक्षा के महत्व के बिसय म जागरूकता बढ़ाय बर सहीद वीरनारायण सिंह अंतर्राष्ट्रीय क्रिकेट स्टेडियम म दू मार्च ले होवइया रोड शेफ्टी वल्र्ड सीरीज क्रिकेट प्रतियोगिता के आयोजन ल देखत ले गेहे। ए स्पर्धा म अंतर्राष्ट्रीय क्रिकेट खिलाड़ी सचिन तेंदुलकर, वीरेन्द्र सहवाग, जाॅन्टी रोड्स अउ ब्रायन लारा जइसन खिलाड़ी मन खेलही।