स्कूल/काॅलेज
प्रदेस म पाछु ग्यारह महीना ले बंद स्कूल अउ काॅलेज मन काली पन्द्रह फरवरी ले खुलइया हे। ए संबंध म उच्च सिक्षा अउ स्कूल सिक्षा विभाग ह निरदेस जारी कर देहे। प्रदेस म नौवीं ले बारहवीं तक के स्कूल मन ल दू चरण म खोले जाही। ए दउरान स्कूल अउ महाविद्यालय के कक्षा म कोरोना संक्रमण ले बांचे बर जारी निरदेस के पालन करना जरूरी होही, जउन विद्यार्थी म कोरोना के लक्षण दिखाई दीहीं, ओला कक्षा म बइठे नइ दे जाही। उहें, काॅलेज के प्रवेस द्वार म विद्यार्थी मनके थर्मल स्क्रीनिंग घलो करे जाही। संगेसंग कक्षा म सैनिटाईजर के व्यवस्था घलो रइही। ए दउरान छात्र मनके अलावा सिक्षक अउ दूसर स्टाफ ल मास्क लगाना जरूरी होही।
स्वास्थ्य मंत्रालय-एसओपी
केन्द्र सरकार ह कार्यालय म कोविड महामारी ल फैले ले रोके बर नवा मानक संचालन प्रक्रिया-एसओपी जारी करे हे। केन्द्रीय स्वास्थ्य मंत्रालय ह केहे हे कि प्रतिबंधित क्षेत्र म चिकित्सा अउ जरूरी सेवा ल छोड़के सबो कार्यालय बंद रइही। फेर प्रतिबंधित क्षेत्र के बाहिर के कार्यालय ल खोले के मंजूरी होही। कोरोना संक्रमण के जोखिम ल कम करे बर साधारण उपाय के संगेसंग सार्वजनिक स्वास्थ्य उपाय के घलो पालन करना जरूरी हे। सबो करमचारी अउ अवइया मन ल ए उपाय के पालन करना चाही। जइसे, छह फीट के दूरी, मास्क के उपयोग अउ हाथ के सफई।
कोरोना समाचार
देस म कोरोना संक्रमण ले बने होय के दर संतानवे दशमलव तीन एक प्रतिशत होगे हवय। अभी तक ए संक्रमण ले एक करोड़ छह लाख ग्यारह हजार ले जादा मरीज मन ठीक होगे हवय। ए समय देसभर म बीमार मनके संख्या एक लाख सैंतीस हजार ले जादा हे। केन्द्रीय स्वास्थ्य मंत्रालय ह बतईन कि देस म कोरोना संक्रमण ले मृत्यु दर एक दशमलव चार-तीन प्रतिसत हे, जउन ह विश्व के सबले कम दर म सामिल हे। उहें, मंत्रालय ह यहू घलो बतईन कि अभी तक देस म बयासी लाख ले जादा लोगन ल कोविड टीका लगाय गे हवय।
ऐति, छत्तीसगढ़ म कोरोना टीकाकरण के दूसर डोज लगना घलो सुरू होगे हवय, जउन मन ल कोरोना के पहिली डोज दे गे हवय ओमन ल दूसर डोज दे जावत हे। इही कड़ी म प्रदेस म काली तक आठ सौ तैंतीस लोगन ल कोरोना टीका के दूसर डोज दे गीस। उहें, प्रदेस म अभी तक कोरोना टीकाकरण के पहिली डोज लगवइया मनके संख्या दू लाख दस हजार ल पार कर लेहे।
उहें, प्रदेस़ म काली कोरोना संक्रमण के दू सौ उनतीस नवा मामला आगू आईस। एमा सबले जादा रईपुर जिला म तिरपन मरीज मिले हे। प्रदेस म अभी तक तीन लाख आठ हजार ले जादा कोरोना संक्रमित पाय गीन हे। एमा ले तीन लाख एक हजार ले जादा मरीज मन ठीक होगे हवय। उहें, वर्तमान म तीन हजार ले जादा कोरोना संक्रमित मरीज मनके इलाज आने-आने अस्पताल म चलत हे।
अवैध खनन/रेललाइन परियोजना
राजनांदगांव के सांसद संतोष पांडेय ह काली लोकसभा म चर्चा के दउरान अपन संसदीय क्षेत्र मोहला-मानपुर अउ अंबागढ़ चैकी म होवत अवैध खनिज उत्खनन अउ सागौन तस्करी के मुद्दा उठाईन। श्री पांडेय ह किहीन कि उंखर संसदीय क्षेत्र म सरलग अवैध खनिज उत्खनन ले पर्यावरण संतुलन बिगड़त हे। उहें, विकासखंड मानपुर म तोलूम अउ नवागांव म नदी के दिसा बदल गे हवय। राॅयल्टी पर्ची के अवैध उत्खनन अउ परिवहन ले सरकार ल आर्थिक नुकसान घलो होवत हे। ओमन ह अइसन करइया लोगन के खिलाफ कार्रवाई के मांग करीन।
उहें, बिलासपुर सांसद अरूण साव ह लोकसभा म सून्यकाल के दउरान कटघोरा-मुंगेली-डोंगरगढ़ रेलवे लाइन के मुद्दा उठाईन।
लोकवाणी
मुख्यमंत्री भूपेश बघेल ह आज प्रसारित मासिक रेडियो वार्ता ‘‘लोकवाणी‘‘ के पन्द्रहवां कड़ी म किहीन कि छत्तीसगढ़ ल उत्पादक बनना हे अउ उपभोक्ता घलो बनना हे। ओमन किहीन कि राज्य के कीमती जिनीस के उपयोग करके छत्तीसगढ़ के लोगन सुखी होवय। ओमन किहीन कि गांव-गांव म अइसन अधोसंरचना तैयार करे जावत हे, जेखर फायदा लोगन ल बने मिलत हे। मुख्यमंत्री ह किहीन कि नरवा, गरूवा, घुरवा अउ बाड़ी राज्य सरकार के ड्रीम प्रोजेक्ट हे। ओमन बतईन कि करीबन तीस हजार नरवा चिन्हांकित करे गेहे अउ करीबन पांच हजार नरवा विकास के काम आगू बढ़ गे हवय। श्री बघेल ह किहीन कि अवइया पांच बछर म राज्य के सिंचाई क्षमता दुगुना करे के लक्ष्य राखे गे हवय अउ राज्य के नवा जल संसाधन विकास नीति तैयार करे के काम पूरा होगे हवय।
मुख्यमंत्री ह लोकवाणी म किहीन कि कृषि प्रधान राज्य म युवा मन ल कृषि ले जुड़े रोजगार के नवा अवसर के जानकारी दे बर प्रदेस म एग्रीकल्चर के संग उद्यानिकी-वानिकी, डेयरी टेक्नोलाॅजी, फूड प्रोसेसिंग अउ मछली पालन जइसन बिसय बर विश्वविद्यालय, महाविद्यालय अउ पाॅलीटेक्निक खोले जाय बर प्रयास करे जावत हे।
ओमन ह यहू किहीन कि कोरोना संकट के दउरान सरकार ह देखीस कि प्रदेस म अउ जादा मेडिकल काॅलेज के जरूरत हे, जेला देखत कांकेर, महासमुंद अउ कोरबा म राज्य सरकार नवा मेडिकल काॅलेज खोले के तैयारी करत हे।
मुख्यमंत्री ह किहीन कि छत्तीसगढ़ म पर्यटन विकास के संभावना ल घलो बढ़ाय जावत हे। एला देखत जशपुर, बिलासपुर, कोंडागांव अउ सरगुजा म विकास काम चलत हे। संगेसंग सिरपुर ल ऐतिहासिक बौद्ध पर्यटनस्थल के रूप म जगह देवाय के प्रयास करे जावत हे। श्री बघेल ह किहीन कि प्रदेस म मुख्यमंत्री सुगम सड़क योजना लाय गेहे, जेमा करीबन बाईस सौ अइसन सड़क बनाय जावत हे, जउन ह सरकारी कार्यालय मन ल जोड़ही।
जल जीवन मिशन
केन्द्र सरकार ह केन्द्रीय बजट दू हजार इक्कीस-बाईस म जल जीवन मिशन ग्रामीण जइसन सहरी क्षेत्र बर घलो जल जीवन मिशन के घोसना करीन हे। केन्द्रीय वित्त मंत्री निर्मला सीतारमण ह बजट भासन म केहे रिहीन कि ए मिसन बर पांच बछर ले जादा समय तक दू लाख सत्यासी हजार करोड़ रूपिया खरचा करे जाही। सरकार ह पीये के पानी बर पचास हजार करोड़ रूपिया अउ स्वच्छता बर दस हजार करोड़ रूपिया अलगेच राखे हवय। गांव, गरीब अउ किसान मनके घर म पाईप के माध्यम ले पानी देवाय बर बजट के आवंटन म बढ़ोतरी करे गेहे।
खेल समाचार
राजनांदगांव के कमलादेवी राठी महिला महाविद्यालय म काली पन्द्रह फरवरी ले राज्य स्तरीय तीरंदाजी प्रतियोगिता के आयोजन करे जाही। ए स्पर्धा म प्रदेसभर ले करीबन डेढ़ सौ खिलाड़ी हिस्सा लीहीं।
ऐति, जांजगीर-चांपा जिला म बैंडमिंटन प्रतियोगिता म आज सेमिफाइनल अउ फाइनल के मुकाबला खेले जाही। खबर के मुताबिक ए प्रतियोगिता म बत्तीस जूनियर अउ अड़तालीस सीनियर टीम ह हिस्सा ले हवय।
ओति, दुरूग जिला म बीसवां छत्तीसगढ़ सीनियर राज्य स्तरीय प्रतियोगिता के आज सुरूवात होईस। एमा पुरूष अउ महिला दूनों वर्ग के खिलाड़ी भाग लेवत हे।
संक्षिप्त समाचार
अउ अब थोरकुन समाचार सार म-
– पुलिस महानिदेशक डी.एम. अवस्थी ह रायगढ़ म अवैध सराब बिक्री के मामला म एक झिन पुलिस उपनिरीक्षक अउ एक झिन सहायक उप निरीक्षक ल निलंबित कर देहे। उहें, एएसपी अउ सीएसपी ल कारण बताओ नोटिस जारी करे गेहे।
– दुरूग पुलिस ह राजस्थान के बासवाड़ा ले अंतर्राज्यीय चोर गिरोह के दू झिन सदस्य मन ल गिरफ्तार करे हे। पुलिस ह इंखर मन तीर ले डेढ़ लाख रूपिया नगद अउ चार लाख रूपिया कीमत के सोना के गहना बरामद करीन हे।
– बिलासपुर म इकत्तीसवां बिलासा महोत्सव अवइया बीस फरवरी ले आयोजित करे जाही।
– महासमुंद जिला के सरायपाली परिक्षेत्र के वन विभाग ह करीबन छह लाख रूपिया कीमत के बारह घनमीटर खैर प्रजाति के अवैध लट्ठा जब्त करे हे।
– कोंडागांव जिला के फरसगांव थाना म अवइया बेलगांव के तीर चापहिया गाड़ी के टक्कर ले फटफटी म बइठे युवक के मउकाच म मउत होगे।
अउ
– मुंबई पुलिस ह राजधानी रईपुर के एक ठिन सराफा कारोबारी ल अमानत म खमानत के आरोप म गिरफ्तार करे हे। उहें, ए मामला म दूसर आरोपी ल फरार बताय जावत हे।