प्रधानमंत्री-दीनदयाल उपाध्याय पुण्यतिथि
प्रधानमंत्री नरेन्द्र मोदी ह कहिन हे कि आत्मनिर्भर भारत अभियान गरीब, किसनहा, मजूर अउ मध्यम वर्ग के भविष्य निर्माण के माध्यम बनत जात हे। पंडित दीनदयाल उपाध्याय के पुण्यतिथि म भाजपा सांसद मन ल संबोधित करत हुए ओमन ह ए बात किहीन। प्रधानमंत्री ह कहिन कि बुनियादी ढांचा के क्षेत्र म होवत बदलाव मनखे मनके जिनगी ल आसान बनाही। दुनियाभर म भारत के कद तेजी ले बढ़त हे अउ हर भारतीय मन ल एखर उपर गर्व होना चाही। ओमन ह कहिन कि हमर राजनीति म देस बर नीति बनाना सबले उपर हो।
दीनदयाल उपाध्याय के आदर्स अभू घलो प्रासंगिक हवय अउ ओ ह हम सबो मन बर प्रेरणास्त्रोत हवय। प्रधानमंत्री ह कहिन कि पंडित दीनदयाल उपाध्याय के विचार ल जब हमन पढ़थन त हर समय एक नवा दृष्टिकोन मिलथे। श्री मोदी कहिन कि भारतीय जनता पार्टी के विचारधारा म राष्ट्र ह सबले उपर हे। प्रधानमंत्री ह आने-आने राजनीतिक दल के आह्वान करीन कि ओमन ह भारत के स्वाधीनता के पचहत्तर बछर पूरा होय के उपलक्ष्य म समाज बर पचहत्तर ठिन अच्छा काम करय। ए अवसर म भाजपा अध्यक्ष जे.पी. नड्डा ह किहीन कि ‘सबका साथ-सबका विकास-सबका विश्वास‘ पंडित दीनदयाल उपाध्याय के अंत्योदय दृष्टिकोन ले प्रेरित हवय।
ऐति, छत्तीसगढ़ म घलो बीजेपी कार्यालय एकात्म परिसर म पंडित दीनदयाल उपध्याय के पुण्यतिथि म ओमन ल श्रद्धांजलि दे गीस।
प्रधानमंत्री-कृषि
प्रधानमंत्री नरेन्द्र मोदी ह कृषि क्षेत्र ल मजबूत बनाय बर निवेस अउ नवा प्रौद्योगिकी लाय के आह्वान करीन हे। राष्ट्रपति के अभिभाषण म काली लोकसभा म धन्यवाद प्रस्ताव उपर चर्चा के जवाब देवत हुए श्री मोदी ह कहिन कि कृषि क्षेत्र ल मजबूत करे बर हमन ल जादा निवेस अउ प्रौद्योगिकी जरूरत हवय।
प्रधानमंत्री ह कोनों भी समस्या बर किसान मन ले गोठबात बर आगू आय के अपील करीन हे। ओमन ह किसनहा मन ल न्यूनतम समर्थन मूल्य अउ मंडी व्यवस्था जारी राखे के फेर ले भरोसा देवईन। प्रधामनंत्री ह कहिन कि संसद म कृषि ले संबंधित कानून पारित करे जाय के बाद घलो कोन्हों भी मंडी नइ होईस अउ न्यूनतम समर्थन मूल्य म आने-आने फसल के खरीदी घलो जारी हे।
मुख्यमंत्री-बोधघाट परियोजना
मुख्यमंत्री भूपेश बघेल ह कहिन हे कि बस्तर के इंदिरावती नदी म सुरू होवइया बोधघाट बहुउद्देश्यीय सिंचाई परियोजना ले बस्तरवासी मन ल लाभ मिलही। अभू तक जिहां बस्तरवासी मन इंदिरावती नदी के सिरिफ ग्यारह टी.एम.सी. जल के उपयोग कृषि बर कर पात रिहीन। उहें, ए परियोजना के निर्माण के बाद करीबन तीन सौ टी.एम.सी. पानी ल बउरे जा सकही। बोधघाट सिंचाई परियोजना के निर्माण ले बस्तरवासी मन ल सिंचाई बर करीबन तीस गुना जादा पानी मिल सकही। श्री बघेल ह कहिन कि ए परियोजना बस्तर के विकास के इतिहास म अभू तक के एक मात्र अइसे परियोजना हवय, जेखर पूरा लाभ बस्तरवासी मन ल मिलही।
एनसीसी कैडेट-सम्मान
नई दिल्ली के गणतंत्र दिवस परेड म सामिल होय अउ आने-आने गतिविधि मन म अच्छा प्रदर्सन करइया छत्तीसगढ़ के कैडेट मनके काली मुख्यमंत्री भूपेश बघेल ह सम्मान करीन। रईपुर म आयोजित ‘एट होम विथ सीएम‘ कारीकरम ल संबोधित करत हुए मुख्यमंत्री ह कहिन कि मेहनत, अनुसासन अउ समर्पण जीवन म सफलता हासिल करे के मूलमंत्र हवय, जेखर ले कोनों भी लक्ष्य ल पाय जा सकथे। ओमन ह नई दिल्ली म आयोजित गणतंत्र दिवस परेड म हिस्सा लेवइया कैडेट मन ल बधाई देवत हुए कहिन कि ए उपलब्धि ल हासिल करना हर एनसीसी कैडेट के सपना होथे। ए अवसर पर कैडेट मन सांस्कृतिक प्रस्तुति घलो दीन।
कोरोना टीकाकरण
भारत म पाछु छब्बीस दिन के भीतर सत्तर लाख ले जादा मनखे मन ल कोरोना के टीका लगाय गेहे, जउन कि विश्वभर सबले जादा हे। अमेरिका म ए काम सत्ताईस दिन म अउ ब्रिटेन म अड़तालीस दिन म संपन्न होय रिहीस। केन्द्रीय स्वास्थ्य मंत्रालय ह बतईन कि देस म सत्तर लाख सत्रह हजार ले जादा लोगन मन ल कोविड के टीका लगाय जा चुके हे।
ऐति, छत्तीसगढ़ म स्वास्थ्य कर्मी, पुलिस, राजस्व, पंचायत अउ नग निगम के करमचारी मन ल कोरोना के टीका लगाय जात हे। राज्य म कोरोना टीकाकरण केन्द्र के संख्या छह सौ बहत्तर होगे हे। ए तरीका ले प्रदेस के रिकवरी दर बाढ़के 97.46 प्रतिशत होगे हे। पाछु चैबीस घंटा म स्वस्थ होय के बाद तीन सौ बारह झिन मनखे ल डिस्चार्ज करे गेहे। उहें, काली राज्य म कोरोना संक्रमण ले सात झिन के मउत होईस। ए तरीका ले प्रदेस म कोरोना के सेती होय वाले मउत के संख्या बाढ़के तीन हजार सात सौ पचपन होगे हे। प्रदेस म अभू करीबन चार हजार कोरोना संक्रमित लोगन मनके आने-आने अस्पताल या फेर होम आइसोलेशन म इलाज चलत हे।
रेलवे पैसेंजर-ट्रेन
यात्री मनके सुविधा ल धियान म राखत हुए रेलवे ह काली ले बारह ठिन लोकल पैसेंजर ट्रेन ल चलाय के फइसला करे हे। कोरोना संक्रमण ल देखत हुए लंबा बेरा ल रेलगाड़ी के परिचालन बंद रिहीस। यात्री मन ल होवत परेसानी के सेती रेलवे ह ए ट्रेन के परिचालन एक घांव फेर ले सुरू करे बर जात हे। एमा ले कुछु ट्रेन रईपुर ले डोंगरगढ़ के बीच चलही। त उहें, कुछु ट्रेन ह बिलासपुर ले रईपुर तक चलही। एखर अलावा कुछु पैसेंजर गाड़ी के परिचालन रईपुर अउ दुरूग के बीच करे जाही। ए गाड़ी मनके परिचालन अवइया आदेस तक जारी रइही। रेल प्रसासन ह यात्री मन ल ट्रेन म सफर करत हुए रेलवे अउ राज्य सरकार डहार ले कोरोना ले बचाव संबंधित सबो दिसा-निरदेस के गंभीरता ले पालन करे के निरदेस दीन हे।
मैनपाट महोत्सव
सरगुजा जिला के मैनपाट म काली ले तीन दिन के ‘‘मैनपाट महोत्सव‘‘ सुरू होही। मुख्यमंत्री भूपेश बघेल ए महोत्सव के सुभारंभ करही। उहें, महोत्सव म देस के जाने-माने बड़का कलाकार मनके अलावा जिला के स्थानीय कलाकार मन डहार ले घलो आने-आने कारीकरम प्रस्तुत करे जाही। संस्कृति मंत्री अमरजीत भगत ह बतईन कि मैनपाट ल पर्यटन के रूप म विकसित करे खातिर एला बौद्ध सर्किट ले जोड़े जाही। राज्य सरकार ह एखर बर केन्द्र सरकार ल पहिली ही प्रस्ताव भेज देहे। एखर ले मैनपाट ल अंतर्राष्ट्रीय स्तर म पहिचान मिलही अउ स्थानीय लोगन मन ल घलो एखर फायदा मिलही।
इंग्लिश मीडियम स्कूल
प्रदेस म संचालित स्वामी आत्मानंद इंग्लिश मीडियम स्कूल बेहतर संचालन बर कार्ययोजना तैयार करे गेहे। स्कूल सिक्षा विभाग के प्रमुख सचिव डाॅक्टर आलोक शुक्ला ह वर्तमान म संचालित ए स्कूल मनके सरलग निगरानी बर जिला सिक्षा अधिकारी अउ अंग्रेजी माध्यम स्कूल के प्राचार्य मन ल निरदेस दीन हे।
संक्षिप्त समाचार
अउ अब थोरकुन समाचार सार म-
– राज्यपाल अनुसुईया उइके ह कहिन कि भूमकाल के सहीद मनके सुरता म जगदलपुर के गोलबाजार म एक ठिन भव्य स्मारक बनाय जाही।
– छत्तीसगढ़ लोक सेवा आयोग के राज्य सेवा प्रारंभिक परीक्षा अवइया चैदह फरवरी के दू पाली म आयोजित करे जाही। एखर बर रईपुर म उनहत्तर परीक्षा केन्द्र बनाय गेहे।
– कर्मचारी चयन आयोग डहार ले आयोजित संयुक्त हायर सेकेंडरी स्तरीय परीक्षा चैदह फरवरी के दू पाली म होही।
– छत्तीसगढ़ राज्य ओपन स्कूल डहार ले आयोजित हाईस्कूल अउ हायर सेकेंडरी के मुख्य परीक्षा म सामिल होय बर विलंब सुल्क सहित आवेदन के आािरी तारीख तेरह फरवरी हे।
अउ
– मुख्यमंत्री युवा स्वरोजगार योजना बर आवेदन के अंतिम तिथि बीस फरवरी तक बढ़ा दे गेहे।