कोरोना समाचार
देश म अब तक 66 लाख 11 हजार लोगन मन ल कोविड के टीका लगाये जा चुके हे। केंद्रीय स्वास्थ्य मंत्रालय ह कीहिस कि पाछू चैबीस घंटा म तीन लाख बावन हजार लोगन मन ल टीका लगाये गेहे।
एति छत्तीसगढ़ म कोरोना संक्रमित मरीज मनके संख्या तीन लाख सात हजार ले जादा होगे हे। एमा ले एक लाख आठ सौ ले जादा मरीज स्वस्थ हो चुके हे। अभी के बेरा म लगभग चार हजार मरीज मनके इलाज जारी हे। प्रदेश म कोरोना ले अब तक तीन हजार सात सौ छंयालिस लोगन मनके मउत हो चुके हे।
उंहें प्रदेश म स्वास्थ्यकर्मी अउ फ्रंटलाइन वर्कर मन ल कोरोना टीका लगाये जात हे। काली सात हजार नौ सौ छब्बीस स्वास्थ्यकर्मी अउ पांच हजार नौ सौ आठ फं्रटलाइन वर्कर मन ल टीका लगाये गीस।
बजट रेलवे
केंद्र सरकार ह केंद्रीय बजट म दू हजार इक्कीस-बाईस म भारतीय रेलवे बर एक लाख दस हजार करोड़ रूपिया के रिकार्ड आबंटन के प्रस्ताव करे हे। रेलवे बर सकल बजटीय आबंटन सैंतीस हजार करोड़ रूपिया ले जादा करे गेहे। जउन अभी के बजट अनुमान के तुलना म तिरपन प्रतिशत जादा हे।
केंद्रीय वित्त मंत्री निर्मला सीतारमन ह कीहिन कि माल ढुलाई बर समर्पित पश्चिम बंगाल गलियारा अउ पूर्वी गलियारा जून, दू हजार बाईस ले शुरू होय के संभावना हे। वित्त मंत्री ये घोषणा घलो करीन कि दिसंबर दू हजार तेईस तक सबो ब्रॅाडगेज रद्दा मन म शत प्रतिशत विद्युतीकरण के काम पूरा कर ले जाही।
किसान के्रडिट कार्ड
देशभर म पाछू एक साल म किसान मन ल एक लाख तिहत्तर हजार करोड़ रूपिया के सीमा वाले 01 करोड़ 87 लाख ले जादा किसान के्रडिट कार्ड ल मंजूरी दे गेहे। किसान मन बर किसान के्रडिट कार्ड के विशेष अभियान फरवरी 2020 ले चलत हे। केंद्रीय वित्त अउ कार्पोरेट मामला के राज्य मंत्री अनुराग ठाकुर ह राज्यसभा म लिखित उत्तर म ये जानकारी दीन।
किसान मन ल आसानी ले अउ समय म खेती ले संबंधित कामकाज बर कर्जा उपलब्ध हो सके, ये सुनिश्चित करे के उद्देश्य ले केंद्र सरकार ह किसान के्रडिट कार्ड योजना शुरू करे हे। जेखर ले ओमन ह बीजा, खातु अउ कीटनाशक जइसे खेती म उपयोग होवइया सामान ल खरीद सकय।
अरपा महोत्सव
मुख्यमंत्री भूपेश बघेल ह कीहिन कि अरपा महोत्सव ले गौरेला-पेण्ड्रा-मरवाही के नवा पहिचान बनही। श्री बघेल ह अरपा महोत्सव ल संबोधित करत कीहिन कि डॅाक्टर भंवरसिंह पोर्ते के सुरता म स्थापित महाविद्यालय अउ स्कूल म मूर्ति लगाये के घोषणा करीन। ए अवसर म ओमन ह जिला म बीस करोड़ रूपिया ले जादा के विकास के काम के लोकार्पण अउ शिलान्यास करीन।
कार्यक्रम ल संबोधित करत मुख्यमंत्री ह कहिन कि प्रदेश म ए बछर समर्थन मूल्य म धान खरीदी के कीर्तिमान बने हे। राजीव गांधी किसान न्याय योजना के अंतर्गत चैथा किश्त इक्कीस मार्च के पहिली किसान मनके खाता म जमा कर दे जाही।
केंद्रीय पर्यटन मंत्री दौरा
केंद्रीय पर्यटन मंत्री प्रहलाद पटेल अवइया 21 फरवरी के दिन राजनांदगंाव जिला के डोंगरगढ़ म विश्व स्तरीय पर्यटन सुविधा विकसित करे बर प्रसाद योजना के अंतर्गत आने आने काम मनके भूमिपूजन करहीं। ए आयोजन के अंतर्गत केंद्र सरकार ह 43 करोड़ रूपिया के प्रोजेक्ट स्वीकृत करे हे।
प्रसाद योजना के अंतर्गत स्वीकृत राशि ले डांेगरगढ़ म तीन हिस्सा म काम प्रस्तावित हे। पहिली हिस्सा म श्रीयंत्र के डिजाइन म विश्व स्तरीय पर्यटन सुविधा विकसित करे जाही। जबकि दूसर हिस्सा म प्रज्ञागिरी पहाड़ी म सुविधा विकसित करे जाही। एखर अलावा मंा बम्लेश्वरी मंदिर जवइया रद्दा के विकास घलो करे के योजना हे।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी के पंद्रहवंा कड़ी के प्रसारण चैदह फरवरी रविवार के दिन होही। मुख्यमंत्री लोकवाणी म ए दरी ‘उपयोगी निर्माण, जनहितैषी अधोसरंचना, आपकी अपेक्षाएं‘ विषय उपर प्रदेशवासी मनले गोठबात करही। लोकवाणी के प्रसारण छत्तीसगढ़ स्थित आकाशवाणी के सबो केंद्र, एफ.एम. रेडियो अउ क्षेत्रीय समाचार चैनल मन म बीहनिया साढ़े दस बजे ले ग्यारा बजे तक होही।
माओवादी आत्मसमर्पण
दंतेवाड़ा जिला म आज तेरह माओवादी मन ह पुलिस के आगू आत्मसमर्पण करीन। ए माओवादी मन उपर कतको हिंसक वारदात मन म सामिल होय के आरोप हे। पुलिस ले मिले जानकारी के अनुसार लोन वर्राटू अभियान के तहत अब तक तीन सौ दस माओवादी आत्मसमर्पण कर चुके हे। एमा सतहत्तर इनामी माओवादी घलो सामिल हे।
सिरपुर महोत्सव
महासमुंद जिला के सिरपुर महोत्सव म ए दरी संास्कृतिक अउ शासकीय कार्यक्रम नइ होय। कोरोना काल के चलत परंपरागत रूप ले सिरपुर मेला के आयोजन सत्ताईस अउ अठाईस फरवरी के करे जाही। सिरपुर मेला म जिला प्रशासन डहार ले लोगन मनके सुरक्षा, यातायात, सड़क, बिजली, पानी, साफ-सफाई, के संग आने बेवस्था करे जाही। प्रशासन ह मेला म अवइया लोगन मनले कोरोना ले बचाव संबंधी निर्देश के पालन करे के आग्रह करे हे।
पटवारी निलंबित
रायपुर के एसडीएम ह भ्रष्टाचार के मामला म दू झिन पटवारी मन ल निलंबित कर दीस। ए मन म हल्का नंबर 58 ग्राम डंगनियंा के पटवारी विजय कुमार साहू अउ हल्का नंबर 60 ग्राम भाठागांव के पटवारी भाईलाल अनंत सामिल हे। शासकीय कामकाज के एवज म अवैध रूप के राशि के लेनदेन अउ भ्रष्टाचार के बात रिकार्ड करे के स्टिंग वीडियो आगू आय के बाद ए कार्रवाई करे गीस। वीडियो म अवैध तरीका ले राशि के लेनदेन के मामला सही पाय गेहे।
बैडमिंटन प्रतियोगिता
महासमुंद म आयोजित बीसवंा छत्तीसगढ़ सब जूनियर राज्य स्तरीय बाल बैडमिंटन प्रतियोगिता म भिलाई ईस्पात संयंत्र के बालक वर्ग टीम ह प्रथम स्थान पाइस। फाइनल मुकाबला म बालक वर्ग म बीएसपी के टीम ह कबीरधाम के टीम ल 35-15, 35-22 ले हराइस। उंहें बालिका वर्ग म कबीरधाम के टीम ह बीएसपी ल 35-27, 35-27 ले हराइस। ए प्रतियोगिता म कुल आठ टीम मन ह भाग लीन।
अउ अब थोरकुन समाचार सार म-
– बेमेतरा म विशेष न्यायाधीश पंकज सिन्हा ह गांजा तस्करी के मामला म चार आरोपी मन ल दस-दस साल के कठोर कारावास अउ एक-एक लाख रूपिया के जुर्माना के सजा सुनाय हे।
– राजनंादगंाव जिला के सबो निजी अउ शासकीय स्कूल मन म आज ले प्रायोगिक परीक्षा शुरू होगे हे। कोरोना संकट के चलत ए दरी बोर्ड के परीक्षार्थी बिना पे्रक्टिकल के ही प्रायोगिक परीक्षा देवाही।
– दुर्ग के नेहरू नगर स्थित गुरूद्वारा चैक म दू जगा मन म कलवर्ट बनाय जाय के सेती वाॅय शेप ब्रिज ले गुरूद्वारा चैक तक के रद्दा ल बीस मार्च तक बंद करे गेहे। ए बेरा इंहा ले जवइया मन परिवर्तित रद्दा के उपयोग करहीं।
– राजनंादगंाव म सड़क सुरक्षा अभियान के अंतर्गत लोगन मन ल यातायात नियम बर जागरूक करे बर मोटर सायकिल रैली निकाले गीस। वाहन चालक मन हेल्मेट लगाके रैली म सामिल होइन।
– रेलवे म नौकरी देवाय के नाव म बीएसपी के कर्मचारी ले तीन लाख रूपिया के ठगी करे के मामला म दुर्ग जिला के नेवई पुलिस ह आरोपी के खिलाफ मामला दर्ज करे हे।
– राजनंादगंाव जिला के छुईखदान क्षेत्र म ग्राम खुटेरी-खुर्द के महिला किसान के जमीन के फर्जी दस्तावेज लगाके लोन लेके मामला म पटवारी सहित दू आरोपी मन ल पुलिस ह गिरप्तार कर लेहे।
अउ
– कोरिया जिला म ग्राम पंचायत भवन म घुसके शासकीय कार्य म बाधा पहुंचाय अउ सचिव के संग मारपीट करे के मामला म मनेन्द्रगढ़ पुलिस ह केल्हारी भाजपा मंडल के अध्यक्ष ल गिरप्तार करे हे।