कोरोना समाचार
देस म कोरोना संक्रमण ले स्वस्थ होय के दर संतानवे दशमलव दू पांच प्रतिसत होगे हे। केन्द्रीय स्वास्थ्य मंत्रालय ले मिले जानकारी के मुताबिक एक करोड़ पांच लाख ले जादा लोगन स्वस्थ होगे हे।
इही बीच, देस म अब तक बैसठ लाख उनसठ हजार ले जादा लोगन ल कोरोना के टीका लगाय गेहे।
ऐति, छत्तीसगढ़ म काली तक करीबन एक लाख अस्सी हजार ले जादा झन ल कोरोना के टीका लग गेहे। प्रदेस म पहिली चरण म दू लाख सड़सठ हजार लोगन के टीकाकरण होना हे।
उहें, प्रदेसभर ले काली कोरोना संक्रमित दू सौ पैंसठ झिन नवा मरीज के पहिचान करे गेहे। अभी चार हजार एक सौ नब्बे कोरोना मरीज मनके इलाज आने-आने अस्पताल म होवत हे।
ओति, राजनांदगांव जिला अस्पताल के डाॅक्टर आई.पी. सोनी के कोरोना संक्रमण ले मउत होय के खबर हे। उंखर इलाज एम्स रईपुर म चलत रिहीस हे।
राज्य स्तरीय आॅडिट समिति के सदस्य डाॅक्टर ओ.पी. सुंदरानी ह किहीन कि सर्दी, खांसी, बुखार जइसन लक्षण आय म लोगन ल तुरते कोरोना के जांच कराना चाही अउ मान्यता मिले डाॅक्टर ले सलाह लेना चाही।
इही बीच, रईपुर जिला कलेक्टर एस. भारतीदासन ह कोविड नियम के पालन करत कोचिंग संस्था खोले संबंधी आदेस जारी करीन हे।
राज्यपाल-गृहमंत्री मुलाकात
केन्द्रीय गृहमंत्री अमित शाह ले आज नई दिल्ली म छत्तीसगढ़ के राज्यपाल अनसुईया उइके ह भेंट करीन। भेंट के बेरा म राज्यपाल ह श्री शाह ल छत्तीसगढ़ आय के नेवता दीन अउ प्रदेस के माओवाद समेत आने प्रमुख मुद्दा म गोठबात करीन।
ए मउका म सुश्री उइके ह गृहमंत्री ल कोरोना काल म करे गे काम म आधारित कोरोना काल म ‘‘राज्यपाल के भूमिका किताब‘‘ भेंट करीन।
बोर्ड परीक्षा-बोनस अंक
छत्तीसगढ़ माध्यमिक शिक्षा मंडल के एसो होवइया कक्षा दसवीं अउ बारहवीं बोर्ड परीक्षा के प्रावीण्य सूची म बोनस अंक ल नइ जोड़े जाही। ए फइसला मंडल के साधारण सभा के बइठका म ले गीस हे। अभी तक बोनस अंक ल सामिल करके प्रावीण्य सूची तैयार करे जात रिहीस हे।
खबर के मुताबिक माध्यमिक शिक्षा मंडल कोति ले सैक्षणिक गतिविधि के संगेसंग आने गतिविधि बर दसवीं अउ बारहवीं बोर्ड के छात्र मन ल बोनस अंक दे जाथे। साधारण सभा म ले गे फइसला के मुताबिक एसो प्रावीण्य सूची म अंक नइ जोड़े जाही फेर अंकसूची म बोनस अंक जोड़के सूची जारी करे जाही।
हाईकोर्ट-अरपा
अरपा नंदियां म मापदंड के पालन करे बिना अवैध रेत खनन करे के मामला म छत्तीसगढ़ उच्च न्यायालय ह बिलासपुर नगर निगम ल नोटिस देके हफ्ता भर के भीतरी जुवाब मांगे हे। सुनवाई के बेरा नगर निगम ह अदालत ले हफ्ताभर के बेरा अउ देके मांग करे हे। ए मामला के अवइया सुनवाई तेईस फरवरी के होही।
खबर के मुताबिक अरपा नंदियां के तीर-तखार म अवैध उत्खनन के मामला म हाईकोर्ट अरपण महाअभियान समिति कोति ले जनहित याचिका दायर करे गे रिहीस। एमा नंदियां अउ पर्यावरण ल नकसान पहुंचाय अउ भौगोलिक संतुलन बिगाड़े के आरोप लगाय गे रिहीस हे।
आॅटोमोबाइल सेक्टर-बिक्री
छत्तीसगढ़ के आॅटोमोबाइल सेक्टर म जनवरी दू हजार बीस के मुकाबला एसो जनवरी म चैपइया गाड़ी के जादा बिक्री होय हे। कोरोना संक्रमण के बादो प्रदेस के आॅटोमोबाइल क्षेत्र म बढ़ोतरी दरज करे गेहे। ग्रामीण अर्थव्यवस्था ल मजबूत करे अउ किसान मनके आमदनी म बढ़ोतरी करे के उद्देश्य ले सरकार कोति ले लागू करे गे योजना के सेती ए संभव होय हे।
अइसने, तालाबंदी के बेरा प्रदेस म महात्मा गांधी राष्ट्रीय ग्रामीण रोजगार गारंटी योजना-मनरेगा म छब्बीस लाख लोगन ल रोजगार देवाय के रिकार्ड बने हे।
सीए-प्रवेश परीक्षा उत्तीर्ण
प्रदेस म चलाय जात प्रयास आवासीय विद्यालय के चार झिन छात्र मन ह राष्ट्रीय स्तर के चार्टर्ड एकाउंटेंट-सीए के प्रवेस परीक्षा पास करे हे। एमा सरगुजा जिला के गोधनपुरी निवासी अनुराग बखला, जशपुर जिला के गांव दुलदुला के दयानंद भगत, केशकाल के लोचन प्रसाद अउ धमतरी के पारितोष सोनकर सामिल हे।
मुख्यमंत्री भूपेश बघेल ह ए जम्मों पढ़ईया लइका मन ल उंखर सफलता बर बधाई अउ सुभकामना दीन हे।
थल सेना भर्ती रैली
दुरूग जिला म अवइया तीन मार्च ले बारह तारीख तक भारतीय थल सेना भर्ती रैली राखे जाही। ए भर्ती रैली रविशंकर स्टेडियम म होही, जेमा प्रदेसभर के युवा सामिल होही। एला देखत जिला प्रसासन ह तियारी सुरू कर देहे। जिला कलेक्टर डाॅक्टर सर्वेश्वर नरेन्द्र भूरे ह एक बइठका लेके प्रतिभागी मनके रूके, खाय-पीये अउ आय-जाय बर सुभीता देवाय के निरदेस दीन।
अबूझमाड़-पीस मैराथन
नारायणपुर जिला के अबूझमाड़ म अवइया सत्ताईस फरवरी के तीसर ‘‘अबूझमाड़ पीस हाॅफ मैराथन‘‘ आयोजित करे जाही। अब तक एला साढ़े तीन हजार ले जादा लोगन मन अपन पंजीयन कराय हे। मैराथन दउड़ म महिला अउ पुरूष वरग बर आने-आने इनाम दे जाही। मैराथन दउड़ म सामिल होय बर प्रतिभागी पच्चीस फरवरी तक अपन पंजीयन कराय सकत हे।
बहुमूल्य रत्न-आरोपी गिरफ्तार
महासमुंद जिला के साइबर पुलिस ह कीमती रत्न के तस्करी करइया एक मनखे ल बसना ले गिरफ्तार करे हे।
खबर के मुताबिक ए आरोपी उत्तरप्रदेश के रहवइया हरय, जउन बैसठ किसम के करीबन दू हजार छह सौ नग कीमती रत्न ल आने-आने जगह ले तस्करी करके बेचत रिहीस हे। ए रत्न के कीमत करीबन एक करोड़ रूपिया बताय जात हे।
महासमुंद-पथराव
महासमुंद जिला के गांव नर्रा म सराब अउ गांजा तस्करी के आरोपी मन ल पकड़े बर गे पुलिस वाले मन उपर गांव के लोगन मन हमला कर दीन। ए हमला म कुछेक जवान मन ल चोट आय हे। पुलिस ह ए मामला तेरह झिन के खिलाफ बलवा के जुर्म दरज करे हे।
बताय जात हे कि पाछु बछर सितंबर म नर्रा म सराब अउ गांजा तस्करी म सामिल आरोपी मन ल पकड़े बर गे पुलिस मन उपर गांव के लोगन मन हमला करे रिहीन, ओ बखत आरोपी मन पुलिस के गिरफ्त म नइ आय रिहीन हे। करीबन चार महीना बाद पुलिस फेर ले ए आरोपी मन ल पकड़े बर पहुंचीस त गांव के लोगन मन कोमाखान थाना के घेराव के कोसिस करीन अउ पुलिस उपर हमला कर दीन।
संक्षिप्त समाचार
अउ अब थोरकुन समाचार सार म-
– छत्तीसगढ़ राज्य अनुसूचित जनजाति आयोग के उपाध्यक्ष राजकुमारी दीवान ह आज बिलासपुर जिला के रतनपुर म पांच ठिन प्रकरण के सुनवाई करीन।
– समाज कल्याण विभाग कोति ले काली दस फरवरी के राजधानी रईपुर म राज्य स्तरीय ट्रांसजेंडर कानून बिसय म एक दिवसीय कार्यसाला राखे जाही।
– राज्य सरकार ह बिलासपुर वनमंडल के अधिकारी सी.आर. नेताम ल निलंबित कर देहे। ओखर उपर कथित रूप ले दू झिन पत्रकार ल एक करोड़ चालीस लाख रूपिया देके आरोप हवय।
– आयकर विभाग के टीम ह आज रईपुर के तेलघानी नाका के एक निजी स्टील कंपनी के संचालक के घर अउ दफ्तर म छापामार कार्रवाई करीन।
– रईपुर के जिला अदालत ह सहर के एक महिला चिकित्सक ल बछर दू हजार सात म गर्भवती माईलोगिन के इलाज म कोताही बरते के मामला म एक साल के सजा सुनाय हे।
– आंध्रप्रदेस के एक प्राईवेट विश्वविद्यालय कोति ले दुरूग के एक छात्र ल एमबीएसएस के डिग्री देवाय के नाव म करीबन चैदह लाख रूपिया के धोखाधड़ी के मामला म दुरूग पुलिस ह जुर्म दरज करे जांच सुरू करे हे।
अउ
– महासमुंद जिला के बागबाहरा पुलिस ह बीस किलो गांजा संग तीन झिन गिरफ्तार करे हे। संगेसंग उंखर तीर ले करीबन छह लाख रूपिया के आने जिनीस घलो बरामद करे गेहे।