आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री-कृषि कानून
प्रधानमंत्री नरेन्द्र मोदी ह किहीन हे कि नवा कृषि कानून ह देस म छोटे अउ मंझौला किसान मन बर बिकास के नवा दरवाजा खोलही। राष्ट्रपति के अभिभाषण म धन्यवाद प्रस्ताव उपर गोठबात के आज राज्यसभा म जवाब देवत ओमन किहीन कि कृषि कानून के लक्ष्य बारह करोड़ ले जादा किसान मनके उम्मीद ल पूरा करना हे। केन्द्र सरकार डहार ले लागू करे गे कतकोन सुधार अउ योजना के जिकर करत प्रधानमंत्री ह किहीन कि एनडीए सरकार ह गरीब अउ किसान मन ल मजबूत बनाय के संकलप लेहे। ओमन किहीन कि केन्द्र सरकार ह बछर दू हजार चैदह म फसल बीमा योजना के दायरा ल बढ़ाईन, जेखर ले अब छोटे किसान मन ल नब्ब हजार करोड़ रूपिया दे गेहे। ओमन यहू किहीन कि करीबन एक लाख पन्द्रह हजार करोड़ रूपिया देस म किसान मनके खाता म सोझे        प्रधानमंत्री किसान योजना के तहत दे गीस। प्रधानमंत्री ह किहीन कि किसान मन ल जादा फायदा वाले बाजार तक पहुंचे, एखर बर मदद करे बर सरकार डहार ले किसान रेल अउ किसान उड़ान योजना सुरू करे गेहे।
प्रधानमंत्री ह किहीन कि न्यूनतम समर्थन मूल्य जारी रइही अउ नवा कृषि कानून ह कोनों प्रकार ले कृषि उपज विपणन समिति ल कमजोर नइ करय। ओमन किहीन कि गरीब मन बर सस्ता रासन योजना घलो चलत रइही।
कृषि मंत्री डहार ले प्रदर्सन करत किसान मनके संग करे गे कतकोन दउर के बातचीत के जिकर करत प्रधानमंत्री ह किहीन कि हड़ताल ल खतम करे बर सरकार ह अभी अउ गोठबात करही।
प्रधानमंत्री ह राष्ट्रपति ल उंखर संबोधन बर धन्यवाद घलो दीन अउ किहीन कि राष्ट्रपति के अभिभाषण ह आत्मनिर्भर भारत के रद्दा देखइया हरय।वित्त मंत्री-श्रमिक
केन्द्रीय वित्त मंत्री निर्मला सीतारमन ह प्रस्ताव देहे कि न्यूनतम मजदूरी ल जम्मों श्रेणी के मजूर मन बर लागू करे जाही अउ ओमन ल कर्मचारी राज्य बीमा निगम के तहत लाय जाही। पाछु सोमवार के संसद म अपन बजट भासन म ओमन किहीन कि सरकार ह एक ठिन पोर्टल के माध्यम ले गैर संगठित क्षेत्र के मजूर, बिसेस रूप ले प्रवासी श्रमिक मनके बारे म बने जानबा सकेलही। ओमन किहीन कि ए डाटा के मदद ले मजूर मनके स्वास्थ्य, घर, कौसल, जीवन बीमा अउ खाद्यन्न ले जुड़े योजना बनाय जा सकही।
वित्त मंत्री ह किहीन कि प्रवासी श्रमिक मनके परिवार मन ल एक राष्ट्र-एक रासन के तहत रासन देके घलो अनुमति होही।बजट-फसल बीमा योजना
केन्द्र सरकार ह किसान मनके फसल के सुरक्षा ल अउ मजबूती दे बर बछर दू हजार इक्कीस-बाईस के बजट म प्रधानमंत्री फसल बीमा योजना बर सोलह हजार करोड़ रूपिया बांटे हे। मंत्रालय ह बतईन कि एखर ले फसल बीमा के जादा ले जादा लाभ किसान मन तक पहुंचही। मंत्रालय ह किहीन कि पाछु वित्तीय बछर के तुलना म एसो के बजट म करीबन तीन सौ पांच करोड़ रूपिया जादा मिले हे। योजना के सीमा ल पूरा फसल चक्र तक बढ़ा दे गेहे।

राज्यपाल-राष्ट्रपति मुलाकात
राष्ट्रपति रामनाथ कोविंद ले आज नई दिल्ली म छत्तीसगढ़ के राज्यपाल अनुसुईया उइके ह मिलीन। ओमन राष्ट्रपति के आगू कोरोना संकट काल के दउरान उंखर मन डहार ले करे गे कामकाज के जानबा दीन। ओमन किहीन कि प्रदेस के अधिकारी, सामाजिक संगठन अउ रेडक्राॅस सोसयटी जइसन संस्था मन ह घलो कोरोना संकट ले निपटे म अपन बड़का भूमिका निभाईन।

पंचायती राज-एमओयू
पंचायत अउ ग्रामीण विकास विभाग आई.सी.आई.सी.आई. बैंक के मदद ले प्रदेस के हरेक पंचायत ले जुड़े जानबा अउ आंकड़ा ल सकेले बर ओखर डिजिटाइजेशन करही। पंचायत मंत्री टी.एस. सिंहदेव के अगुवई म आज रईपुर म पंचायत विभाग के संचालक मोहम्मद कैसर अब्दुल हक अउ आई.सी.आई.सी.आई. बैंक के पूर्वी जोन के प्रमुख प्रवीण त्रिवेदी ह ए बारे म एमओयू उपर दस्तखत करीन।
ए मउका म पंचायत मंत्री ह किहीन कि डिजिटाइजेशन ले योजना मनके काजकाज के फीडबैक अउ गांव के लोगन मनके जरूरत के बारे म जल्दी जानबा मिल सकही। ओमन किहीन कि हरेक ग्राम पंचायत म साल म कम ले कम सत्तर लाख रूपिया ले एक करोड़ रूपिया तक के काम कराना सरकार के लक्ष्य हे।

कोरोना-टीकाकरण
छत्तीसगढ़ म कोरोना संक्रमण के सक्रिय मामला म कमी आय हे। प्रदेस म पाछु चैबीस घंटा म कोरोना संक्रमण के सिरिफ एक सौ छियासी नवा मामला आगू आय हे। प्रदेस म ए बेरा कोरोना संक्रमित करीबन चार हजार तीन सौ लोगन मनके आने-आने अस्पताल या होम आइसोलेशन म इलाज चलत हे।
ऐति, राज्य म अब तक करीबन एक लाख अड़सठ हजार स्वाथ्यकर्मी अउ फ्रंटलाइन वर्कर्स मन ल कोविड वैक्सीन लगाय जा चुके हे। राज्य म पाछु दू दिन ले राजस्व विभाग के अधिकारी अउ महिला बाल विकास विभाग के कार्यकर्ता मन ल घलो कोरोना टीका लगावत हे।
त उहें, राजनांदगांव जिला के खैरागढ़ ब्लाॅक म बयानवे प्रतिशत फ्रंटलाइन वारियर्स मन ल टीका लगाय जा चुके हे।
दुरूग कलेक्टर डाॅक्टर सर्वेश्वर नरेन्द्र भूरे अउ पुलिस अधीक्षक प्रशांत ठाकुर ह आज कोरोना टीका लगवाईन। संगेसंग जिला प्रसासन के प्रमुख अधिकारी अउ अपर कलेक्टर मन ह घलो टीका लगवाईन।
ऐति, धमतरी जिला म घलो दूसर चरण के टीकाकरण सुरू हो चुके हे। राजस्व विभाग के अधिकारी अउ करमचारी मन ल टीका लगाय जात हे।
ओति, बलरामपुर जिला म आज जिला कलेक्टर ह कोरोना के टीका लगवाईन अउ लोगन मन ले अपील करीन कि ओमन अपन बारी आय के बाद बिना डर्राय हिम्मत के संग टीका लगवाय।
उहें, महासमुंद कलेक्टर ह कोरोना संक्रमण ल रोके बर लोगन मन ल जागरूक करे अउ टेस्ट के दायरा ल बढ़ाय बर केहे हे।

मुख्यमंत्री असम-प्रवास
मुख्यमंत्री भूपेश बघेल ह आज असम प्रवास के दूसर दिन जोरहाट म असम के उद्योगपति मनके प्रतिनिधिमंडल मन ले मिलीन। ए दउरान श्री बघेल ह उद्योगपति मन ल छत्तीसगढ़ म चाय के खेती, बांस अउ लघु वनोपज आधारित उद्योग मनके संभावना के बारे म जानबा दीन। मुख्यमंत्री ह बतईन कि प्रदेस म उद्योग मन ल नवा सहुलियत दे बर नवा उद्योग नीति बनाय गेहे।

जवान शहीद/स्पाइक बरामद
बीजापुर जिला म काली आईईडी विस्फोट म घायल छत्तीसगढ़ सशस्त्र बल-सीएएफ के जवान सहीद होगे हे। जिला के पुलिस अधीक्षक कमलोचन कश्यप ह बतईन कि तर्रेम थाना क्षेत्र ले एरिया डोमिनेशन के दउरान सीएएफ के जवान मोहन नाग प्रेसर आईईडी के चपेट म आगे रिहीस। घायल जवान ल जिला अस्पताल म भर्ती कराय गे रिहीस, जिहां इलाज के दउरान उंखर मउत होगे।
ओति, सुकमा जिला म सुरक्षा बल मन ह माओवादी मन डहार ले लगाय गे बारह सौ स्पाइक बरामद करे हे। हमर संवाददाता ले मिले जानबा के मुताबिक केन्द्रीय रिजर्व पुलिस बल-सीआरपीएफ के जवान मन ह तलासी अभियान म निकले रिहीन, इही दउरान किस्टाराम के पोटकपल्ली जगह म पांच सौ तीन नग स्पाइक के संगेसंग आने-आने जगह ले बारह सौ स्पाइक बरामद करीन हे।

संक्षिप्त समाचार
अउ अब थोरकुन समाचार सार म-
– केन्द्रीय सड़क परिवहन मंत्री नितिन गडकरी ह जम्मों लोगन मन ले विनती करे हे कि वायु प्रदूषण ल रोके बर इलेक्ट्रिक गाड़ी, एथेनाॅल अउ मेथनाॅल जइसन ईंधन ले चलइया गाड़ी के प्रयोग सुरू करय।

– छत्तीसगढ़ लोक सेवा आयोग डहार ले सहायक संचालक कृषि के पच्चीस पद बर चयन सूची जारी कर दे गेहे।

– दुरूग म वन विभाग के टीम ह कोसानाला भिलाई म एक झिन तोता तस्कर ल गिरफ्तार करके उंखर तीर ले चार ठिन मिट्ठू बरामद करे हे।

अउ

– झारखंड ले संगम बर प्रयागराज जावत एक ठिन गाड़ी के दुर्घटना होय ले प्रदेस के एक झिन मनखे के मउत होगे।