बोर्ड परीक्षा-असाइनमेंट
छत्तीसगढ़ माध्यमिक शिक्षा मंडल ह कक्षा दसवीं अउ बारहवीं बोर्ड परीक्षा म सामिल होय बर कम से कम चार असाइनमेंट जमा करे के बाध्यता ल खतम कर देहे। अब बोर्ड परीक्षा म सामिल होय बर पढ़ईया लइका मन ल तीन असाइनमेंट जमा करना जरूरी हे। एमा चूक करइया लइका मन ल बोर्ड के मुख्य परीक्षा दो हजार बीस-इक्कीस बर अपात्र माने जाही।
खबर के मुताबिक असाइनमेंट जमा करे के संख्या म बोर्ड डहार ले अभी के परिस्थित ल ध्यान म राखत परीक्षार्थी मनके हित ल देखत ए फइसला ले गेहे।
उहें, कोरोना संक्रमण ल देखत मंडल ह परीक्षा केन्द्र मनके संख्या बढ़ा देहे। ए बखत परीक्षार्थी मन अपने स्कूल म परीक्षा देवाही। उहें, कक्षा नौवीं अउ ग्यारहवीं के परीक्षा घलो स्थानीय स्तर म होही। संबंधित स्कूल डहार ले प्रश्न पत्र अउ समय-सारिणी तैयार करे जाही अउ उत्तर पुस्तिका के जांच करके रिजल्ट घोसित करे जाही।
कोरोना समाचार
देस म कोरोना ले स्वस्थ होय के दर संतानवे दशमलव एक-नौ प्रतिशत होगे हे। अब तक एक करोड़ पांच लाख ले जादा मरीज ठीक होगे हे।
इही बीच, देस म अब तक चैव्वन लाख सोलह हजार ले जादा स्वास्थ्यकर्मी मन ल कोरोना के टीका लगाय गेहे। केन्द्रीय स्वास्थ्य अउ परिवार कल्याण मंत्रालय ह बतईन कि पाछु चैबीस घंटा के दउरान कुल चार लाख संतावन हजार ले जादा लोगन मनके टीकाकरण करे गीस।
ऐति, छत्तीसगढ़ म घलो स्वास्थ्यकर्मी मन ल कोरोना टीका लगाय के काम सरलग चालू हे। प्रदेस म अब तक करीबन डेढ़ लाख स्वास्थ्यकर्मी मन ल कोरोना के टीका लगाय गेहे। उहें, राजस्व, पंचायत अउ आने-आने विभाग के कमरचारी मन ल घलो टीका लगाय के काम आज ले चालू कर दे गेहे।
राजनांदगांव म तिरपन टीकाकरण केन्द्र म टीका लगाय जावत हे। उहें, दुरूग जिला म फ्रंटलाइन वर्कर मन ल आज ले टीका लगाय के काम सुरू कर दे गेहे। जिला म बीस हजार पांच सौ बीस फ्रंटलाइन वर्कर मन ल टीका लगाय जाही। जशपुर जिला म कलेक्टर महादेव कावरे अउ पुलिस अधीक्षक बालाजी राव ह जिला अस्पताल के तीर नर्सिंग प्रशिक्षण केन्द्र म कोरोना टीका लगवाईन। अइसने, कोरिया जिला कलेक्टर एस.एन. राठौर ल जिला अस्पताल बैकुंठपुर म कोरोना के टीका लगाय गीस।
अइसने, गरियाबंद जिला म घलो राजस्व, पंचायत अउ आने-आने विभाग के करमचारी मन ल टीका लगाय के काम चालू होगे हे। जिला कलेक्टर, पुलिस अधीक्षक अउ जिला पंचायत के सीईओ ह कोरोना के टीका लगवाईन।
किसान आंदोलन
अखिल भारतीय कांग्रेस कमेटी किसान संगठन समेत कई ठिन संगठन के आह्वान म किसान आंदोलन के समर्थन म आज छत्तीसगढ़ समेत देस के कतकोन जगह म प्रदर्सन करे गीस। छत्तीसगढ़ म संयुक्त राष्ट्रीय किसान मोर्चा के आह्वान म छत्तीसगढ़ किसान मजदूर महासंघ के बैनर तले किसान मन ह आने-आने जगह म चक्काजाम घलो करीन।
धमतरी जिला म अर्जुनी मोड़ के तीर अउ कुरूद म राष्ट्रीय राजमार्ग म किसान मन ह प्रदर्सन करीन। अइसने, महासमुंद अउ मुंगेली समेत आने-आने जिला मन म घलो किसान मन ह प्रदर्सन करके चक्काजाम करीन।
स्कूल-सूखा राशन
प्रदेस के जम्मों स्कूली लइका मन ल कोरोना संक्रमण काल म घलो मध्यान्ह भोजन के तहत सूखा रासन बांटे जात हे। स्कूल सिक्षा मंत्री डाॅक्टर प्रेमसाय सिंह टेकाम ह बतईन कि कोरोना संक्रमण के चलत स्कूल के बंद रेहे के बेरा म एक जनवरी ले अट्ठाईस फरवरी तक कुल छियालीस दिन के मध्यान्ह भोजन के सूखा रासन स्कूली लइका मन ल खाद्य भत्ता के रूप म बांटे जाही। सूखा रासन के बांटे के काम स्कूल मन म या फेर घर-घर म जाके देके निरदेस दे गेहे।
पीएससी-परीक्षा
छत्तीसगढ़ लोक सेवा आयोग डहार ले पीएससी के लिखित परीक्षा-दो हजार बीस अवइया चैदह फरवरी के दू पारी म होही। ए परीक्षा प्रदेस के सत्रह जिला म बनाय गे परीक्षा केन्द्र मन म राखे जाही। आयोग ले मिले खबर के मुताबिक अभ्यर्थी मन परीक्षा म केलक्यूलेटर के उपयोग नइ कर सकही। अइसन अभ्यर्थी जउन देख नइ सकय या फेर जेखर दूनों हाथ नइ हे या जउन अपन डेरी-जेवनी दूनों हाथ के उपयोग नइ कर सकय, ओमन ल मेडिकल बोर्ड या सिविल सर्जन के चिकित्सा प्रमाण पत्र देखाय म सह-लेखक के सुविधा दे जाही।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह काली रतिहा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म राज्य सासन के नीति, योजना अउ कारीकरम के बारे म जानकारी दीही। ए कारीकरम ल मीडियम वेव नौ सौ इक्यासी किलोहर्ट्ज म सुने जा सकथे। ए कारीकरम ल प्रदेस स्थित आकाशवाणी के जम्मों केन्द्र एके संघरा रिले करही।
माओवादी-मुठभेड़
दंतेवाड़ा जिला म सुरक्षा बल अउ माओवादी मनके बीच होय मुठभेड़ म एक झिन माओवादी मारे गीस। पुलिस अधीक्षक अभिषेक पल्लव ह घटना के पुष्टि करत बतईन कि जिला के सूरनार इलाका म ए मुठभेड़ होईस, जेमा एक इनामी माओवादी मारे गीस। ए माओवादी उपर एक लाख रूपिया के इनाम घोसित रिहीस। घटना जगह ले एक हथियार घलो बरामद करे गेहे।
बीएसएफ एडीजी-बयान
सीमा सुरक्षा बल-बीएसएफ के एडीजी एस.एल. थाउसेन ह छत्तीसगढ़ म राज्य सरकार के पुनर्वास नीति के बड़ई करे हे।
श्री थाउसेन ह रईपुर म किहीन कि पुनर्वास नीति ले प्रभावित होके कतकोन माओवादी मन ह आत्मसमर्पण करे हे। अवइया बेरा म माओवादी विचारधारा ले जुड़े लोगन मनके संख्या म कमी आही। एडीजी ह किहीन कि दक्षिण बस्तर म बिसेसकर सुकमा, दंतेवाड़ा अउ बीजापुर म माओवादी विचारधारा म सहानुभूति रखइया मनके संख्या जादा हवय। राज्य सासन ह ए नीति अपनाय हे कि कोन्हों भी माओवादी आत्मसमर्पण करत हे त ओला समाज के मुख्यधारा म जोड़े जाय।
लिपिक-प्रदर्शन
छत्तीसगढ़ प्रदेश लिपिक वर्गीय सरकारी कर्मचारी संघ के आह्वान म लिपिक मन ह जिला मुख्यालय मन म प्रदर्सन करके मुख्यमंत्री अउ मुख्य सचिव के नाव ज्ञापन सौंपीन। बलरामपुर जिला म घलो लिपिक मन ह कलेक्ट्रेट के आगू प्रदर्सन करीन अउ बाद म अपर कलेक्टर ल अपन मांग ल लेके ज्ञापन सौंपीन। लिपिक मनके कहना हे कि सत्रह फरवरी दू हजार उन्नीस के बिलासपुर म लिपिक मनके प्रांतीय अधिवेशन के दउरान मुख्यमंत्री ह लिपिक मनके वेतन विसंगति ल निपटाय के घोसना करे रिहीन, फेर एमा अमल नइ हो पाय हे।
मौसम
प्रदेस म हवा के दिसा म बदलाव आय के सेती उत्तर ले सुष्क अउ ठंडा हवा आय ले अवइया अड़तालीस घंटा के दउरान न्यूनतम तापमान म गिरावट होय के संभावना हे।
मौसम विभाग ले मिले खबर के मुताबिक प्रदेस के अधिकतम तापमान म घलो एक ले दू डिग्री सेल्सियस तक गिरावट संभावित हे। उत्तर छत्तीसगढ़ के उपर एक ठिन चक्रीय चक्रवाती घेरा स्थित हे। एखर प्रभाव ले उत्तरी इलाका म एक-दू जघा म हल्का ले मध्यम बरसा होय के संग गरज-चमक के संग छींटा पड़े के घलो संभावना हे।