राष्ट्रीय जनजातीय उत्सव
उपराष्ट्रपति एम. वेंकैया नायडू ह एक ठिन अइसन विकास के माॅडल के आह्वान करीन हे, जउन ह आदिवासी मनके बिसेस पहिचान ल संरक्षित करय। ओमन किहीन कि जनजातीय लोगन मनके संस्कृति उंखर चिन्हारी हरय।
नई दिल्ली स्थित दिल्ली हाट म काली राष्ट्रीय जनजातीय उत्सव महोत्सव के उद्घाटन के बाद एक ठिन फेसबुक पोस्ट म उपराष्ट्रपति ह किहीन कि आदिवासी संस्कृति के कोनों प्रकार के नुकसान संपूर्ण मानवता बर एक अपूरणीय क्षति होही। ओमन किहीन कि सरकार ह सदा दिन ले आदिवासी मनके समस्या बर चिंता करथे। उपराष्ट्रपति ह जनजाति मनके संग व्यवहार करत बेरा विनम्रता के आचारण के आह्वान करीन।
राज्यपाल
छत्तीसगढ़ निजी विश्वविद्यालय विनियामक आयोग के आज सोलहवां स्थापना दिवस आय। ए मउका म राजभवन म राखे गे समारोह म राज्यपाल अनुसुईया उइके घलो सामिल होईन। कारीकरम म राज्यपाल ह निजी विश्वविद्यालय मनके प्रबंधक मन ल अभिनंदन पत्र देके सम्मानित करीन।
अपन संबोधन म सुश्री उइके ह उच्च सिक्षा के क्षेत्र म गुणवत्ता बनाय राखे के अपील करीन। ए मउका म राज्यपाल ल गोल्डन बुक आॅफ वल्र्ड रिकाॅर्ड संस्था डहार ले प्रमाण पत्र घलो दे गीस। ए सम्मान ओमन पाछु बछर जुलाई महीना ले ए बछर छह जनवरी तक राज्यपाल के रूप म दस हजार ले जादा लोगन मन ले भेंट करके उंखर समस्या ल सुने के सेती दे गीस।
मुख्यमंत्री-दुर्ग
मुख्यमंत्री भूपेश बघेल ह दुरूग जिला म चलत चंदूलाल चंद्राकर मोमोरियल निजी मेडिकल कालेज के अधिग्रहण के घोसना करे हे।
श्री बघेल आज कचांदूर गांव म स्वर्गीय चंदूलाल चंद्राकर के मूर्ति अनावरण कारीकरम म सामिल होईन। ए मउका ओमन किहीन कि ए निजी मेडिकल काॅलेज के सरकारी अधिग्रहण की प्रक्रिया जल्दीच सुरू होही। एखर बर राज्य मंत्रिमंडल के बइठका म प्रस्ताव लाय जाही। श्री बघेल ह किहीन कि स्वर्गीय चंदूलाल चंद्राकर दुरूग जिला म स्वास्थ्य सिक्षा ल सुघ्घर बनाय के पक्षधर रिहीन। एखर बादे ए क्षेत्र म निजी मेडिकल कालेज खोले गे रिहीस। मुख्यमंत्री ह बतईन कि अभी ए मेडिकल काॅलेज के संचालन म कुछ परेसानी आवत हे, जेखर सेती काॅलेज प्रबंधन ह उंखर ले सासकीय रूप ले अधिग्रहित करे के आग्रह करे रिहीस। ओमन बतईन कि राज्य सरकार ह मेडिकल सिक्षा ल बढ़ावा दे के उद्देश्य ले एखर अधिग्रहण के फइसला लेहे।
बजट-प्रतिक्रिया
छत्तीसगढ़ म केन्द्रीय बजट ल लेके आने-आने प्रतिक्रिया मिलत हे। छत्तीसगढ़ के मुख्यमंत्री भूपेश बघेल ह आम बजट ल निरासाजनक अउ लोगन मनके भविष्य ल अउ जादा असुरक्षित बनाने वाला बतईन हे। ओमन केन्द्र सरकार डहार ले रेलवे, एयरपोर्ट अउ सार्वजनिक क्षेत्र के कंपनी ल निजी हाथ म सौंपे के तैयारी करे के आरोप लगाईन हे। श्री बघेल ह किहीन कि ए बजट म छत्तीसगढ़ ल कुछु नइ मिले हे अउ एमा सिरिफ उद्योगपति मनके हित ल धियान म राखे गेहे।
उहें, स्वास्थ्य मंत्री टी.एस. सिंहदेव ह किहीन कि ए बजट म गरीब अउ मध्यम वर्ग ल कोनों असन राहत नइ दे गेहे। ओमन केन्द्र सरकार डहार ले स्वास्थ्य के क्षेत्र म करीबन दू लाख करोड़ रूपिया ले जादा के रासि के प्रावधान करे जाय ल अच्छा कदम बतईन।
ऐति, राज्य के वरिष्ठ अर्थशास्त्री डाॅक्टर आर.के. ब्रम्हे ह किहीन कि ए बजट म पूंजीतगत व्यय बढ़ाय उपर जोर दे गेहे, जेखर ले अर्थव्यवस्था म सकारात्मक प्रभाव पड़े के उम्मीद हे।
अइसने, लघु उद्योग भारती के दुरूग जिला इकाई के अध्यक्ष संजय चैबे ह किहीन कि ए बजट ले देस के आर्थिक स्थिति मजबूत होही अउ लघु, सूक्ष्म इकाई म घलो एखर सकारात्मक प्रभाव पड़ही।
हर्बल उत्पाद-मोबाइल वैन
राजधानी रईपुर के प्रमुख जगह मन म सौ प्रकार के हर्बल उत्पाद के बिक्री मोबाइल वैन के माध्यम ले करे जाही। वन मंत्री मोहम्मद अकबर ह काली अपन रईपुर स्थित निवास कार्यालय ले छत्तीसगढ़ हर्बल ब्रांड नाव के उत्पाद के प्रचार-प्रसार के बिक्री बर मोबाइल वैन मन ल हरियर झंडा देखाके रवाना करनी। एमा राज्य लघु वनोपज संघ डहार ले तैयार करे गे मदरस, सैनिटाईजर, त्रिफला अउ गिलोय जइसन उत्पाद बेचे जाही।
कोरोना समाचार
प्रदेस म काली कोरोना संक्रमित तीन सौ बाईस नवा मरीज मनके पहिचान करे गीस। प्रदेस म अभी चार हजार एक सौ चैबीस मामला सक्रिय हे। राज्य के स्वास्थ्य विभाग के मुताबिक प्रदेस म कोरोना के संक्रमण अभी कम होय हे, फेर एखर ले होवइया मउत के संख्या जादा हवय। डाॅक्टर मन ह चेताय हे कि लक्षण आय म घलो लोगन मन कोरोना के जांच नइ करावत हे। बिसेसज्ञ मनके कहना हे कि कहूं सर्दी, खांसी, बुखार जइसन कोनो लक्षण दिखथे त तुरते डाॅक्टर ल दिखाके कोरोना के जांच कराना चाही।
कोरिया-जमीन दरारें
कोरिया जिला के चिरमिरी म कई ठिन जगह मन म आज जमीन म दरार देखे गीस। ए घटना हल्दीबाड़ी इलाका म होय हे। जमीन म दरार आय के बाद स्टेट बैंक कार्यालय के भवन संगेसंग घर के दीवाल म घलो दरार देखे गीस। खबर मिलतेच साउथ ईस्टर्न कोल फील्ड्स लिमिटेड-एस.ई.सी.एल. के बचाव दल मउका म पहुंचीन। दरके सड़क ल भरे बर एमा माटी डारे गीस। उहें, सुरक्षा ल देखत जउन मकान मन म दरार आय हे, उहां ले लोगन मन ल अस्थायी सिविर म रखे गेहे। घटनास्थल के तीर यातायात बंद कर दे गेहे। जिला प्रसासन के अधिकारी अउ जनप्रतिनिधि मन घलो घटनास्थल म पहुंचीन। बताय जात हे कि ए क्षेत्र म पहिली कुरासिया अंडर ग्राउंड माईंस रिहीस। करीबन सोलह साल पहिली घलो एक इलाका म जमीन म दरार आय के घटना होय रिहीस।
बस्तर-गर्भवती महिलाएं
केन्द्र सरकार के प्रधानमंत्री मातृत्व सुरक्षित अभियान योजना ले फायदा होवइया मामला म बस्तर जइसे आदिवासी बाहुल्य इलाका के गर्भवती माईलोगिन घलो पाछु नइ हे। कोरोना महामारी के बाद अब एक घांव फेर ले बस्तर के स्वास्थ्य केन्द्र मन म योजना के तहत जांच बर पहुंचे गर्भवती माईलोगिन मनके संख्या म बढ़ोत्तरी होय हे। पाछु दू महीना के भीतर साढ़े छह सौ ले जादा गर्भवती माईलोगिन मन ह स्वास्थ्य केन्द्र मन म अपन जांच कराय हे। पाछु साल करीबन साढ़े तीन हजार गर्भवती माईलोगिन मनके स्क्रीनिंग करे गीस। एमा ले तीन सौ बयालीस माईलोगिन मनके बिसेसज्ञ के देखरेख म सुरक्षित जचकी कराय गेहे।
मदरसा बोर्ड-परिणाम
छत्तीसगढ़ मदरसा बोर्ड डहार ले राखे गे हाईस्कूल अउ हायर सेकेंडरी पत्राचार पाठ्यक्रम के संग उर्दू परीक्षा के आज आॅनलाइन रिजल्ट घोषित करे गीस। स्कूल शिक्षा अउ अल्पसंख्यक कल्याण मंत्री डाॅक्टर प्रेमसाय सिंह टेकाम ह ए रिजल्ट जारी करीन अउ ओमन पास होय लइका मन ल अपन सुभकामना दीन। परीक्षार्थी मन अपन रिजल्ट बोर्ड के वेबसाइट म देख सकत हे।
नारी शक्ति पुरस्कार-तिथि
केन्द्र सरकार ह प्रतिष्ठित नारी शक्ति पुरस्कार दू हजार बीस बर नाम दाखिल करे आखिरी तारीख छह फरवरी तक बढ़ा देहे। केन्द्रीय महिला अउ बाल विकास मंत्रालय डहार ले महिला सशक्तिकरण म सुघ्घर योगदान बर हरेक बछर आठ मार्च के अंतर्राष्ट्रीय महिला दिवस के मउका म ए पुरस्कार दे जाथे।
आईक्यू टेस्ट-परीक्षा
राज्य म पहिली घांव अइसन मामला आगू आय हे, जेमा बारह बछर ले कमती उमर के लइका ल दसवीं के परीक्षा म बइठे के मउका दे जावत हे।
छत्तीसगढ़ माध्यमिक शिक्षा मंडल के सचिव प्रोफेसर वी.के. गोयल ह बतईन कि दुरूग के एक पांचवीं कक्षा के छात्र लिवजोत सिंह आरोरा ह दसवीं के परीक्षा म बइठे के मंजूरी मांगे रिहीस हे। एखर बाद दुरूग के जिला अस्पताल म ए लइका आईक्यू टेस्ट कराय गीस। रिपोर्ट के मुताबिक ए छात्र के आईक्यू सोलह बछर के किशोर के उमर के बराबर हे। मंडल के परीक्षाफल समिति के सदस्य मन ह एला बिसेस प्रकरण मानके ए लइका ल ए बछर होवइया दसवीं के बोर्ड परीक्षा म सामिल होय के मंजूरी देहे।