राष्ट्र आज राष्ट्रपिता महात्मा गांधी ल उंखर तिहत्तरवां पुण्यतिथि म श्रद्धांजलि देवत हे। आजे के दिन बछर उन्नीस सौ अड़तालीस म महात्मा गांधी के गोली मारके हत्या कर दे गे रिहीस। ए दिन ल सहीद दिवस के रूप म घलो मनाय जाथे।
राष्ट्रपति रामनाथ कोविंद, उप राष्ट्रपति एम. वेंकैया नायडू अउ प्रधानमंत्री नरेन्द्र मोदी ह राष्ट्रपिता महात्मा गांधी ल उंखर बलिदान दिवस म श्रद्धांजलि दीन। ए मउका म राजघाट म सर्वधर्म प्रार्थना सभा के आयोजन करे गीस अउ आज ग्यारह बजे पूरा देस म दू मिनट के मौन राखे गीस।
प्रधानमंत्री ह एक ठिन ट्वीट संदेस म किहीन हे कि बापू के आदर्श आज घलो करोड़ों लोगन ल प्रेरणा देथे। ओमन किहीन कि उंखर बलिदान दिवस म हमन ह ओ सबो सहीद मनके बलिदान ल सुरता करथन, जउन मन ह अपन जीवन ल भारत के आजादी बर समर्पित करीन हे।
ऐति, छत्तीसगढ़ म घलो महात्मा गांधी के पुण्यतिथि म आने-आने कारीकरम करके ओमन ल श्रद्धांजलि दे जावत हे। मुख्यमंत्री भूपेश बघेल ह आज रईपुर के जैतूसाव मठ म गांधीजी के कांस्य प्रतिमा के अनावरण करीन।
उहें, छत्तीसगढ़ विधानसभा सचिवालय के अधिकारी-करमचारी मन डहार ले विधानसभा परिसर के महात्मा गांधी के प्रतिमा के आगू दू मिनट के मौन राखे गीस।
अइसने, कांग्रेस के प्रदेस मुख्यालय संघरा सबो जिला अउ ब्लाॅक कार्यालय म श्रद्धांजलि सभा के आयोजन करे गीस।पल्स पोलियो अभियान
प्रदेस म राष्ट्रीय सघन पल्स पोलियो अभियान काली इकतीस जनवरी ले सुरू होही। अभियान म सून्य ले पांच बछर तक के लइका मन ल पोलियो के दवई पिलाय जाही। अभियान के पहिली दिन पोलियो बूथ म दूसर अउ तीसर दिन स्वास्थ्य कार्यकर्ता मन ह घर-घर जाके लइका मन ल पोलियो के दवई पिलाही।
राज्य नोडल अधिकारी डाॅक्टर अमरसिंह ठाकुर ह बतईन कि ए अभियान बर स्वास्थ्य विभाग कोति ले तैयारी होगे हवय। ए बखत राज्य के करीबन पैंतीस लाख लइका मन ल आंगनबाड़ी केन्द्र, प्राथमिक साला, उप स्वास्थ्य केन्द्र अउ प्राथमिक सामुदायिक अउ जिला अस्पताल म पोलियो के दवा पिलाय के लक्ष्य हवय। एखर बर करीबन चैदह हजार पोलियो बूथ बनाय गे हवय।
प्रदेस के स्वास्थ्य मंत्री टी.एस. सिंहदेव ह लोगन ले अपील करीन हे कि ओमन ह अपन घर के अउ तीर-तखार के पांच बछर ले कमती उमर के लइका मन ल पोलियो बूथ ले जा के पल्स पोलियो के दवई जरूर देवाय।
स्वास्थ्य मंत्रालय-कोरोना टीका
केन्द्रीय स्वास्थ्य मंत्रालय ल राज्य मन ले केहे हे कि ओमन ह फरवरी के पहिली हफ्ता ले कोरोना के खिलाफ लड़ाई म सामिल कार्यकर्ता मन ल टीका लगाना सुरू करय। स्वास्थ्य कर्मी मन ल टीका लगाय बर सोलह जनवरी ले सुरू होय अभियान घलो संगेसंग चलही।
स्वास्थ्य मंत्रालय के अपर सचिव मनोहर अगनानी ह राज्य मन ल लिखे चिट्ठी म किहीन हे कि संबंधित मंत्रालय मनके सहयोग ले राज्य के कार्यकर्ता मनके डेटा बेस ल अपटेड करे जावत हे। अभी तक ए डेटा बेस म इकसठ लाख कार्यकर्ता मनके नाव मिले हे, जउन ह को-विन पोर्टल म मौजूद हे।
टीकाकरण के पहिली चरण म देसभर के स्वास्थ्य कर्मी अउ कार्यकर्ता मन ल कोरोना टीका लगाय जाही। राज्य मन ल उंखर जरूरत के अनुसार कोविशील्ड अउ को-वैक्सीन के खुराक दे दे गे हवय।
मुख्यमंत्री-वनोपज निर्देश
मुख्यमंत्री भूपेश बघेल ह प्रदेस म वनोपज, उद्यानिकी अउ कृषि फसल के प्रसंस्करण ले तैयार करे जावत उत्पाद के ब्रांडिंग अउ उंखर राष्ट्रीय स्तर म मार्केटिंग के बेवस्था सुनिश्चित करे के निरदेस सबो कलेक्टर अउ वन विभाग के अधिकारी मन ल दीन हे। मुख्यमंत्री ह जारी निरदेस म किहीन हे कि ग्रामीण मन ल जादा ले जादा फायदा देवाय बर आने-आने जिला म उपजे उत्पाद के ब्रांडिंग अउ वितरण के काम संजीवनी दुकान मनके माध्यम ले करे जाना जरूरी हे।
मन की बात
प्रधानमंत्री नरेन्द्र मोदी ह काली बिहनिया ग्यारह बजे आकाशवाणी म ‘‘मन की बात‘‘ कारीकरम म लोगन ले अपन विचार साझा करही। ए ह कारीकरम के तिहत्तरवां कड़ी होही। जेला आकाशवाणी अउ दूरदर्शन के जम्मों नेटवर्क म अउ एआईआर न्यूज के वेबसाइट अउ मोबाइल ऐप म घलो प्रसारित करे जाही। कारीकरम ल आकाशवाणी, दूरदर्शन समाचार, प्रधानमंत्री कार्यालय अउ सूचना अउ प्रसारण मंत्रालय के यू-ट्यूब चैनल मन म घलो लाइव स्ट्रीम करे जाही।
मुख्यमंत्री-सूरजपुर
मुख्यमंत्री भूपेश बघेल ह किहीन हे कि सूरजपुर जिला के बिहारपुर-चांदनी क्षेत्र म पहाड़ी म बसे गांव म रहइया बिसेस पिछड़ा जनजाति पंडो के व्यवस्थापन के व्यवस्था करे जाही।
संसदीय सचिव पारसनाथ राजवाड़े ह मुख्यमंत्री ले भेंट करके पंडो जनजाति परिवार मनके समस्या के बारे म ओमन ल बतईन। मुख्यमंत्री ह श्री राजवाड़े ल पहाड़ी ग्राम बैजनपाठ, तेलाईपाठ, लुल्हाभुंडा अउ दुधनिया म रहइया पंडो जनजाति के परिवार ले चर्चा करके उंखर सहमति के आधार म ए गांव मनके तीर-तखार के जगह के चिन्हांकन के जिम्मेदारी सौंपीन हे।
खबर के मुताबिक ए गांव म पंडो जनजाति के करीबन सवा सौ परिवार कतकोन बछर ले राहत हे। पहाड़ी म होय के सेती उहां बिजली, पानी अउ सड़क जइसन सुविधा के आभाव हे।
निकाय चुनाव-मतदाता सूची
प्रदेस म बिरगांव अउ रिसाली नगर पालिक निगम संघरा एक दर्जन नगरीय निकाय म आम चुनाव अउ दूसर निकाय के पन्द्रह ठिन वार्ड म पार्षद पद बर उपचुनाव के तैयारी सुरू होगे हवय।
छत्तीसगढ़ राज्य निर्वाचन आयोग के निरदेस म संबंधित निकाय मन म मतदाता सूची तैयार करे के काम करे जावत हे, जेखर प्रारंभिक प्रकासन एक मार्च के प्रत्येक वार्ड म करे जाही। निर्वाचक नामावली के प्रकासन के संग नौ मार्च तक दावा आपत्ति ले जाही। एक मार्च के बाद कहूं कोनों मतदाता नगर पालिका ले जुड़े विधानसभा के निर्वाचक नामावली म अपन नाव दर्ज करवा लेथे त ओला नगर पालिका के निर्वाचक नामावली म नाम दर्ज कराय बर प्रारूप-क-एक म जरूरी दस्तावेज के संग रजिस्ट्रीकरण अधिकारी – नगर पालिका ल आवेदन करना होही। दावा आपत्ति के निपटारा के बाद निर्वाचक नामावली के अंतिम प्रकासन छब्बीस मार्च के करे जाही।
जवान हत्या/माओवादी-गिरफ्तार
कांकेर जिला म माओवादी मन ह धारदार हथियार ले हमला करके एक झिन जवान के हत्या कर दीन। जिला के पुलिस अधीक्षक एम.आर. आहिरे ह घटना के पुष्टि करत बतईन कि परतापुर थाना क्षेत्र के बुधनदंड-सिंधटोला मुर्गा बाजार म ए जवान गे रिहीस। इही दउरान माओवादी मन ह उंखर उपर गोली चलाईन अउ फेर धारदार हथियार उंखर हत्या कर दीन। ए हमला म एक झिन दूसर मनखे घलो घायल होय हे, जेला इलाज बर पंखाजूर अस्पताल म भर्ती कराय गेहे।
उहें, नारायणपुर जिला के धनोरा थाना क्षेत्र के टेकानार बाजार म माओवादी मन ह एक झिन मनखे के धारदार हथियार ले हत्या कर दीन।
ओति, सुकमा जिला के चिंतलनार इलाका म सुरक्षा बल ह सर्चिंग के दउरान दू झिन माओवादी मन ल गिरफ्तार करे हे।
धान खरीदी
प्रदेस म समर्थन मूल्य म धान खरीदी के काम पूरा कर ले गेहे। चालू खरीफ विपणन वर्ष म अभी तक बयानवे लाख मीटरिक टन ले जादा धान के खरीदी होगे हवय। ए दउरान प्रदेस के करीबन बीस लाख तिरपन हजार पंजीकृत किसान मन ह धान बेचीन हे। ए बछर इक्कीस लाख बावन हजार चार सौ पचहत्तर किसान मन ह धान बेचे बर पंजीयन कराय रिहीन।
प्रदेस म समर्थन मूल्य म धान खरीदी एक दिसंबर ले सुरू होय रिहीस। धान खरीदी इकतीस जनवरी तक करना रिहीस। फेर, तीस अउ इकतीस जनवरी के सनिवार, रविवार होय के सेती धान खरीदी के काम उनतीस जनवरी के ही सिरा गे। खाद्य विभाग के अनुसार धान खरीदी के समय अवधि बढ़ाय के बारे म अभी कोनों फइसला नइ करे गे हवय।
पक्षी महोत्सव
बेमेतरा जिला के गिधवा-परसदा म काली इकतीस जनवरी ले दू फरवरी तक पक्षी महोत्सव के आयोजन करे जाही। ए ह प्रदेस के पहिली पक्षी महोत्सव होही। जैव विविधता अउ पर्यावरण संरक्षण म पक्षी मनके बड़ भूमिका होथे। गिधवा म करीबन डेढ़ सौ प्रजाति के पक्षी मनके अजब संसार हे, जेमा जल अउ थल दूनों प्रकार के पक्षी सामिल हे।
इको टूरिज्म के विकास अउ स्थानीय रोजगार के दृष्टि ले गिधवा-परसदा म ग्रामीण मनके सहयोग ले वन विभाग अउ क्रो-फाउंडेशन नोवानेचर वाइल्ड लाइफ वेल्फेयर जशपुर डहार ले ए पक्षी महोत्सव कराय जावत हे। गिधवा नांदघाट ले आठ किलोमीटर दूरिहा मुंगेली रोड म हवय। इहां सौ एकड़ म फइले जुन्ना तरिया के संग परसदा म घलो एक सौ पच्चीस एकड़ के जलभराव वाले जलाशय हे।
दुर्ग डीएफओ धम्मशील गणवीर ह बतईन कि महोत्सव म रूचि रखने वाला मन ल आॅनलाईन पंजीयन कराना होही। महोत्सव के दउरान पक्षी प्रेमी मन ह आने-आने प्रजाति के पक्षी मन ल तीर ले देख सकही।