कोरोना समाचार
केंद्र सरकार ह केहे हे कि देशभर म कोविड टीकाकरण अभियान म बीस लाख उनतीस हजार ले जादा लाभार्थी मन ल टीका लगाय गेहे। सरकार के समय रहत कार्रवाई अउ समाज के जम्मों वर्ग के धियान राखे ले कोरोना के मामला कमती होवत हे।
एति छत्तीसगढ़ म ये बखत कोरोना संक्रमण के करीबन पांच हजार सक्रिय मामला हवय। काली रतिहा तक राज्य म कोरोना संक्रमित तीन सौ इक्कीस नवा मरीज मिले हे।
हर्षवर्धन कोविड टीकाकरण
केंद्रीय स्वास्थ्य परिवार कल्याण मंत्री डॅाक्टर हर्षवर्धन ह कीहिन हे कि कोविड टीकाकरण कार्यक्रम के संबंध म सही सूचना के प्रचार प्रसार अउ अफवाह ल दूरिहा करे बर आने आने पक्ष ल संग लेके चलना जरूरी हे। ओमन कीहिन कि बछर दू हजार बीस कोरोना के टीका के खोज बर जाने जाही अउ दुनिया के आगू ये बछर के चुनौती सबले जादा जरूरतमंद लोगन ल टीका लगाय के होही।
विश्व स्वास्थ्य संगठन के संचालन मंडल के बइठका के अगवई करत डॅाक्टर हर्षवर्धन ह कीहिन कि कोरोना ल महामारी घोषित करे के बाद ले एखर ले निपटे खातिर सामूहिक रूप ले अभियान चलाय गीस। जेखर ले एखर फैलाव अउ मौत के संख्या ल कमती करे म मदद मीलिस।
एति छत्तीसगढ़ के स्वास्थ्य मंत्री टी.एस. सिंहदेव ह कीहिन हे कि राज्य सरकार ह कोरोना संक्रमण के पहिली मामला मिले के बाद ले लेके आज तक आंकड़ा बताय म साफगोई अपनाय हे। श्री सिंहदेव ह कीहिन कि स्वास्थ्य विभाग ह महीना भर के भीतरी अइसन छै हजार मरीज ल ढूंढ निकाले हे, जउन मन कोरोना संक्रमित रीहिन हे फेर ओखर नाव सरकारी अंाकड़ा म सामिल नइ हो सके रीहिस हे। अइसन मरीज मनके नाव अब कोरोना संक्रमित मरीज के सूची म जोड़े जाही। स्वास्थ्य मंत्री ह कीहिन कि प्रदेशवासी मन ल कोरोना संक्रमण के संबंध म जानकारी लेके पूरा अधिकार हवय।
मुख्यमंत्री प्रवास
मुख्यमंत्री भूपेश बघेल ह कीहिन हे कि आत्मनिर्भरता कोति आगू बढ़त राज्य के माइलोगन सशक्तिकरण के नवा अध्याय लिखत हे। ये बात श्री बघेल ह अपन कोंडागांव दौरा के बेरा आज बड़े राजपुर विकासखंड के कोंगेरा गांव म आदर्श गौठान के जांच करत कीहिन। श्री बघेल ह गौठान ल आजीविका केंद्र के रूप म तियार करे जात हे। जेखर ले रोजगार के मउका बाढ़ही ।
ये बेरा म मुख्यमंत्री ह गौठान परिसर म आने आने महिला स्व सहायता समूह कोति ले चलाय जात काम के संबंध म जानकारी लीन । संगेसंग महिला स्व सहायता समूह ले गोठबात करत उंखर आमदनी के संबंध म पूछीन। मुख्यमंत्री ह मशरूम उत्पादन यूनिट ल देखीन । ये मउका म आदर्श गौठान परिसर म बीहान समूह के माइलोगन मन मुख्यमंत्री के स्वागत करत बस्तर के आदिवासी लोक नृत्य प्रस्तुत करीन।
उंहें बस्तर दौरा के बेरा मुख्यमंत्री ह काली शिल्पनगरी के लोकार्पण करीन। अउ कीहिन कि शिल्पनगरी बनाय के उद्देश्य शिल्पकार मन ल सही मेहनताना अउ बाजार देवाना हे। ओमन बताइन कि कोंडागांव के बेलमेटल शिल्प समेत आने कलाकृति के शिल्पकार मनके पंजीयन करे जात हे। संगेसंग मुख्यमंत्री ह राष्ट्रीय पुरस्कार मिले शिल्पकार मनके सम्मान करीन। कोंडागांव म करीबन तीन एकड़ क्षेत्र म शिल्पनगरी के स्थापना करे गेहे। एखर संगेसंग श्री बघेल ह कोंडागांव के जामकोटपारा म स्वामी आत्मानंद अंग्रेजी माध्यम उत्कृष्ट विद्यालय के लोकार्पण करीन। ओमन स्कूल पढ़ईया लईका मन संग गोठबात करत पढ़ई के संबंध म जानकारी लीन।
मुख्यमंत्री काली दुर्ग जिला के पाटन म राखे गे गुरू घासीदास जयंती समारोह अउ लोकार्पण कार्यक्रम म सामिल होही।
मन की बात
प्रधानमंत्री नरेंद्र मोदी इकतीस जनवरी के दिन आकाशवाणी ले मन की बात कार्यक्रम म देश विदेश के लोगन संग अपन विचार साझा करही। ये मासिक रेडियो कार्यक्रम के तिहत्तरवंा कड़ी होही। एक ट्वीट म श्री मोदी ह लोगन ले कार्यक्रम बर पे्ररक कहानी साझा करे के आग्रह करीन। लोगन नमो एप या जीओव्ही ओपन फोरम म अपन विचार साझा कर सकत हे। या फेर टोल फ्री नंबर एक आठ शून्य शून्य एक एक सात आठ शून्य शून्य म घलो डायल कर सकत हे अउ प्रधानमंत्री बर अपन संदेश हिंदी या अंग्रेजी म रिकार्ड कर सकत हे।
राष्ट्रीय बालिका दिवस
राष्ट्रीय बालिका दिवस के साप्ताहिक समापन कार्यक्रम के मउका म राज्य के जम्मों सखी सेंटर म पौधा रोपण करे गीस। ए बेरा म इक्कीस ले छब्बीस जनवरी तक आने आने कार्यक्रम ले आंगनबाड़ी केंद्र ले लेके राज्य स्तर तक कतकोन कार्यक्रम होइस।
महिला अउ बाल विकास विभाग कोति ले सबो जिला के सखी वन स्टाप सेंटर म झंडा फहराके फलदार पौधा लगाय गीस। राजधानी रायपुर म महिलाअउ बाल विकास विभाग के संचालक दिव्या उमेश मिश्रा ह लइका अउ विभागीय अधिकारी मन संग पौधा रोपण करीन। एखर पहिली बालिका दिवस के मउका म रायपुर जिला के धरसींवा विकासखंड म नगरीय प्रशासन मंत्री ह साप्ताहिक कार्यक्रम के शुभारंभ करीन। ये बेरा म बेटी बचाओ बेटी पढ़ाओ संदेश म कतकोन प्रतियोगिता राखे गीस।
वनांचल डिजीटल पढ़ाई
राजनंादगंाव जिला के वनांचल क्षेत्र के सरकारी स्कूल म अब प्रायवेट स्कूल असन डिजीटल पढ़ाई कराय जाही। एखर बर शिक्षा मंत्री डॅाक्टर प्रेमसाय सिंह टेकाम ह छुरिया ब्लाॅक के बावन ठन स्कूल म स्मार्ट कक्षा के लोकार्पण करीन। शिकारीमहका ग्राम पंचायत म राखे गे संकुल स्तर के स्मार्ट शाला के लोकार्पण समारोह म बोलत शिक्षामंत्री ह कीहिन कि एखर ले लईका मन के बने पढ़ई होही।
छेरछेरा पर्व
नवा फसल के उछाह म काली राज्य म लोकपर्व छेरछेरा मनाय जाही। आज अपन संदेश म मुख्यमंत्री भूपेश बघेल ह प्रदेशवासी मन ल अपन शुभकामना दीन हे। ओमन कीहिन कि ये तिहार संपन्नता दान अउ परंपरा के प्रतीक हवय। खबर के मुताबिक छेरछेरा पुन्नी तिहार म गांव गंवई म लईका अउ माइलोगन मन- छेरीक छेरा छेरछेरा माइकोठी के धान ल हेरहेरा – बोलत भेंट के रूप म धान अउ पइसा लेथे। एला रामकोठी म राखके बछर बर गांव के विकास काम म उपयोग म लाय के परंपरा हावय।
मौसम
अउ अब पेस हे मौसम के हाल –
मौसम विभाग ह अवइया दू दिन के भीतरी प्रदेश के उत्तरी अउ मध्य भाग म एक दू जगा छुटपुट बरसा होय के संभावना जताय हे। मौसम विज्ञान केंद्र के मुताबिक अभी दक्षिण भाग ले राज्य म नमी वाले गरम हवा आत हे। उंहें उत्तर पश्चिम ले ठंडा अउ शुष्क हवा आवत हे।
ए दूनो हवा के सेती प्रदेश के मौसम म फेरबदल आ सकत हे। मौसम म होवत बदलाव ल देखत कृषि वैज्ञानिक मन ह राज्य के किसान मन ल खेती किसानी के संबंध म जरूरी सलाह देहे। ओमन बरसा के संभावना ल देखत गेहूं के फसल के दूसर सिंचई-बोवई के करीब चालीस ले पचास दिन के बाद करे बर केहे हे।
समाचार सार म-
– राम जन्मभूमि मंदिर निर्माण अभियान म गणतंत्र दिवस के मउका म काली राजनंादगंाव शहर के इंकावन ठिन वार्ड म भगवान राम के महाआरती कार्यक्रम होइस। जेमा सांसद संतोष पांडे अउ पूर्व सांसद अभिषेक ंिसंह मौजूद रीहिन।
– भिलाई के तीन झिन व्यापारी संघ पश्चिम बंगाल म होटव बेवसाय शुरू करे के नाव म एक करोड़ रूपिया ले जादा के ठगी के मामला आगू आय हे। जामुन पुलिस ह तीन झन के खिलाफ मामला दर्ज करे हे।
– बीजापुर जिला के जांगला थाना क्षेत्र म अज्ञात हमलावर मन ह एक झिन बर्खास्त सहायक आरक्षक के धारदार ले हत्या कर दीन।
– राजनंादगंाव शहर म बंद पड़े गोबर खरीदी केंद्र ल शुरू करे के मांग ल लेके भाजपा कार्यकर्ता मन ह नगर निगम कार्यालय के बाहिर प्रदर्शन करीन।
अउ
– राष्ट्रीय सड़क सुरक्षा माह म गृहमंत्री ताम्रध्वज साहू ह महासमुंद म यातायात जागरूकता बर अंजोर रथ ल हरिहर झंडी दिखाके रवाना करीन।