गणतंत्र दिवस-01
राष्ट्र आज 72वां गणतंत्र दिवस बड़ उछाह के साथ मनावत हे। राष्ट्रीय राजधानी नई दिल्ली के राजपथ म मुख्य समारोह आयोजित करे गीस, जिहां राष्ट्रपति रामनाथ कोविंद ह तिरंगा फहरा के परेड के सलामी लीन।
गणतंत्र दिवस समरोह म देस के सैन्य शक्ति, सांस्कृतिक विविधता, सामाजिक अउ आर्थिक प्रगति के भव्य प्रदर्सन करे गीस। समारोह म 32 ठिन झांकी मनके प्रदर्सन करे गीस, जेमा 17 राज्य अउ केन्द्रसासित प्रदेस मनके, 09 आने-आने मंत्रालय, विभाग अउ अर्धसैनिक बल मनके, 06 ठिन रक्षा मंत्रालय के रिहीन। एमा छत्तीसगढ़ के पारंपरिक वाद्य यंत्र मनके झांकी घलो सामिल करे गे रिहीस। ए झांकी ल लोगन मन बड़ उछाह के संग देखीन अउ एखर अब्बड़ सराहना घलो करीन। ए झांकी ह देसभर के लोगन मनके आकर्षण के केन्द्र बने रिहीस, जउन ह छत्तीसगढ़ जनसंपर्क विभाग डहार ले तैयार करे गे रिहीस। एमा छत्तीसगढ़ के जनजातीय क्षेत्र मन म उपयोग होवइया लोक वाद्य मन ल उंखर सांस्कृतिक वेशभूषा के संग बड़ सुंदर तरीका ले दिखाय गे हवय। झांकी म एखर अलावा अलगोजा, खंजेरी, नगाड़ा, टासक, बांसबाजा, चिकारा, सिंहबाजा अउ तम्बूरा ल घलो सामिल करे गे रिहीस।
गणतंत्र दिवस समारोह के कारीकरम के सुरूआत आज बिहनिया प्रधानमंत्री नरेन्द्र मोदी के राष्ट्रीय समर स्मारक म सहीद मन ल श्रद्धासुमन अर्पित करे के साथ होईस। एखर बाद राष्ट्रपति डहार ले झंडा फहराय गीस अउ राष्ट्रगान के बाद 21 ठिन तोप मनके सलामी दे गीस।
ए साल कोरोना महामारी ले देखत परेड के गुजरने वाला मार्ग ल छोटा करे गे रिहीस। परेड के सुरूवात विजय चैक ले होके लालकिला के बजाय नेशनल स्टेडियम म जाके संपन्न होईस। कोरोना संक्रमण के सेती ए बछर कोनों दूसर देस के गणमान्य व्यक्ति ल मुख्य अतिथि नइ बनाय गे रिहीस। समारोह म कोविड महामारी संबंधित सुरक्षा के जम्मों उपाय के पालन करे गीस।
गणतंत्र दिवस-02
छत्तीसगढ़ म गणतंत्र दिवस के पर्व बड़ उछाह के साथ मनाय गीस। राजधानी रईपुर के पुलिस परेड मैदान म मुख्य समारोह आयोजित करे गीस, जिहां राज्यपाल अनुसुईया उइके ह तिरंगा फहरा के परेड के निरीक्षण करे के बाद सलामी लीन। ए मउका म बी.एस.एफ., सी.आर.पी.एफ., सी.आई.एस.एफ., आई.टी.बी.पी. अउ एस.एस.बी. के संगेसंग छत्तीसगढ़ सशस्त्र बल, जिला पुलिस बल अउ नगर सेना के टुकड़ी मन ह गार्ड आॅफ आॅनर दीन।
गणतंत्र दिवस समारोह ल संबोधित करत सुश्री उइके ह किहीन कि जनता के आसा अउ अधिकार के संरक्षक के रूप म संविधान ह अपन सार्थकता खुदे सिद्ध करे हे। ओमन स्वाधीनता संग्राम म योगदान देवइया महापुरूष मनके स्मरण घलो करीन। सुश्री उइके ह किहीन कि आज हमन एक घांव फेर ए संकल्प लेवन कि अपन संविधान खातिर अटूट आस्था बनाय राखबो अउ एखर रक्षा करे खातिर हमेसा तत्पर रहिबो। ओमन छत्तीसगढ़ म कोरोना के आपदा अउ चुनौती मन ल धीरज अउ समझदारी ले सामना करइया 25 झिन कोरोना वाॅरियर्स मन ल घलो सम्मानित करीन।
उहें, मुख्यमंत्री भूपेश बघेल ह जगदलपुर के लालबाग परेड मैदान म आयोजित गणतंत्र दिवस समारोह म ध्वजारोहण कर परेड के सलामी लीन। ए मउका म ओमन किहीन कि हमर संविधान किसान, ग्रामीण अउ आम जनता के सबले बड़े संरक्षक हवय। ओमन किहीन कि संविधान प्रदत्त नागरिक अधिकार मनके सुरक्षा हम सबके जिम्मेदारी हरय। मुख्यमंत्री ह कोरोना वैक्सीन के खोज करइया वैज्ञानिक मन ल सुरता अउ नमन करीन अउ प्रदेस म टीकाकरण अभियान सफल बनाय खातिर सहयोग मांगीन। श्री बघेल ह किहीन कि दूरसंचार टावर अउ हवाई सेवा मन खातिर बस्तर म एक नवा युग के सुरूवात होही। कारीकरम म मुख्यमंत्री ह बस्तर के 237 कोरोना वाॅरियर्स अधिकारी अउ करमचारी मन ल सम्मानित घलो करीन।
गणतंत्र दिवस-03
अइसने, विधानसभा अध्यक्ष डाॅक्टर चरणदास महंत जांजगीर-चांपा म अउ गृह मंत्री ताम्रध्वज साहू ह महासमुंद म तिरंगा झंडा फहरा के परेड के सलामी लीन। ए मउका म ओमन सहीद मनके परिवार वाले मन ल सम्मानित घलो करीन। समारोह के बाद श्री साहू ह राष्ट्रीय सड़क सुरक्षा माह के तहत लोगन मन ल यातायात नियम बर जागरूक करे खातिर रथ ल हरा झंडी दिखाके के रवाना करीन। उहें, पंचायत अउ ग्रामीण विकास मंत्री टी.एस. सिंहदेव बलौदाबाजार-भाटपारा म, कृषि मंत्री रविन्द्र चैबे दुरूग म, वन मंत्री मोहम्मद अकबर राजनांदगांव म, महिला अउ बाल विकास मंत्री अनिला भेंडिया रायगढ़ म उद्योग मंत्री कवासी लखमा कांकेर म ध्वजारोहण कर परेड के सलामी लीन। अन्य जिला मुख्यालय मन म मंत्री अउ संसदीय सचिव मन ह घलो ध्वजारोहण करीन।
पद्म-पुरस्कार
देस के सबले बड़ नागरिक सम्मान मन म काली संझा पद्म पुरस्कार के घोसना करे गीस। छत्तीसगढ़ के पंथी नर्तक डाॅक्टर राधेश्याम बारले ल कला के क्षेत्र म पद्मश्री सम्मान खातिर चुने गे हवय। डाॅक्टर बारले ह पंथी नृत्य के माध्यम ले बाबा गुरू घासीदास के संदेस मन ल देस अउ दुनिया म प्रचारित-प्रसारित करे म अपन योगदान दे हवय। डाॅक्टर बारले के जन्म दुर्ग जिला के पाटन तहसील के ग्राम खोला म 09 अक्टूबर, 1966 म होय रिहीस। एमन एम.बी.बी.एस. के संगेसंग इंदिरा कला संगीत विश्वविद्यालय ले लोक संगीत म डिप्लोमा घलो करे हे। डाॅक्टर बारले देस अउ विदेस म अपन कला के प्रदर्सन करे हे। ओमन प्रदेस म जनकल्याणकारी कारीकरम मन म करीबन बारह सौ मंच मन म अपन प्रस्तुति के माध्यम ले लोगन मन ल जागरूक करे के काम करे हे।
राज्यपाल अनुसुईया उइके अउ मुख्यमंत्री भूपेश बघेल ह डाॅक्टर बारले ल पद्मश्री सम्मान खातिर चुने जाय के घोसना होय म बधाई अउ सुभकामना दीन हे।
लाख खेती-कृषि दर्जा
छत्तीसगढ़ म लाख के खेती ल कृषि के दर्जा मिल गे हवय। एखर तहत राज्य सरकार लाख उत्पादन अउ प्राथमिक प्रसंस्करण खातिर किसान अउ किसान मनके समूह मन ल अल्पकालीन कृषि ऋण प्रदान करही। एमा कुसुम, पलाश, बेर आदि वृक्ष अउ सेमियालता जइसन फसल ल सामिल कर ए संबंध म आदेस जारी कर दे गे हवय। लाख के खेेती ल कृषि के दर्जा मिले ले प्रदेस के लगभग 50 हजार किसान मन ल लाभ मिलही। राज्य म अभी 4500 टन लाख के उत्पादन होथे अउ एखर खेती करे खातिर बड़ पैमाना म आदिवासी अउ वनवासी कृषक मन जुड़े हवय।
माओवादी-गिरफ्तार/ग्रामीण हत्या
दंतेवाड़ा जिला म आज 24 माओवादी मन ह पुलिस के समक्ष आत्मसमर्पण कर दीन। एमा तीन इनामी माओवादी घलो समिल हे। ए माओवादी मन लोन वर्राटू अभियान ले प्रेरित होके पुलिस अधीक्षक के सामने आत्मसमर्पण करीन।
ऐति, राजनांदगांव जिला म बीते रतिहा मााओवादी मन ह दू झिन ग्रामीण मनके हत्या कर दीन हे। जानबा के मुताबिक पहिली घटना जिला के कोहका थाना क्षेत्र के हवय, जिहां बीते रतिहा माओवादी मन ह एक झिन ग्रामीण ल अगुवा कर लीन अउ एखर बाद ओखर हत्या कर दीन। उहें, दूसर घटना कामाखेड़ा गांव के हवय, जिहां माओवादी मन ह एक झिन ग्रामीण ल मौत के घाट के उतार दीन।
पीएससी-मुख्य परीक्षा
छत्तीसगढ़ लोक सेवा आयोग ह पीएससी अउ सिविल जज के मुख्य परीक्षा के तारीख घोसित कर देहे। ए परीक्षा अवइया मार्च महीना म आयोजित करे जाही। पीएससी के मुख्य परीक्षा पन्द्रह ले अट्ठारह मार्च तक अउ सिविल जज के मुख्य परीक्षा बाईस मार्च के होही। पीएससी के मुख्य परीक्षा 247 अउ सिविल जज के मुख्य परीक्षा 32 पद बर आयोजित करे जाही।