राष्ट्रपति रामनाथ कोविंद ह किहीन हे कि वोट देके अधिकार कोनों छोटे-मोटे अधिकार नइ हरय। ओमन देस के लोगन मन ल ए अधिकार के सम्मान करे के बिनती करीन। राष्ट्रीय मतदाता दिवस के मउका म आज नई दिल्ली म एक ठिन कारीकरम म राष्ट्रपति ह वीडियो कान्फ्रेंसिंग के माध्यम ले संबोधित करत रिहीन। ओमन किहीन कि लोगन मन ल बिना कोनों धरम, जाति अउ सम्प्रदाय के भेदभाव के मताधिकार मिले हे, जेमा गरीब अउ अमीर के कोनों अंतर नइ हे।
उहें, प्रधानमंत्री नरेन्द्र मोदी ह किहीन कि आज के दिन मतदाता मनके पंजीकरण बिसेस रूप ले युवा मतदाता मनके बीच जागरूकता बढ़ाय के बहुते जरूरत हे। ए मउका म केन्द्रीय कानून मंत्री रविशंकर प्रसाद ह ई-एपिक कारीकरम के सुभारंभ करीन। ई-एपिक ह मतदाता पहचान पत्र के डिजिटल रूप हरय।
ऐति, प्रदेस म राष्ट्रीय मतदाता दिवस के मउका म कतकोन कारीकरम होवत हे। राजधानी रईपुर के इंदिरा गांधी कृषि महाविद्यालय म राखे गे कारीकरम म छत्तीसगढ़ लोक आयोग के प्रमुख लोकायुक्त न्यायमूर्ति टी.पी. शर्मा ह राष्ट्रीय मतदाता दिवस के सुभारंभ करीन। ओमन नवा मतदाता मन ल मतदाता पहिचान पत्र ईपिक कार्ड घलो बांटीन अउ संगेसंग निर्वाचन ले जुड़े अधिकारी अउ करमचारी मन ल बढ़िया कामकाज बर राज्य स्तरीय पुरस्कार दीन। एमा राज्य के हरेक संभाग ले एक-एक ई.आर.ओ. अउ ए.ई.आर.ओ. मन ल साढ़े सात-सात हजार अउ हरेक संभाग ले एक-एक झिन सहायक प्रोग्रामर मन ल छह-छह हजार रूपिया के इनाम दे गीस।
ओति, बिलासपुर म संभाग आयुक्त ह अधिकारी अउ करमचारी मन ल निष्पक्ष, भय रहित अउ बिना लालच के मतदान करे बर लोकतंत्र ल मजबूत करे के सपथ देवाईन।
उहें, मुख्यमंत्री ह राष्ट्रीय मतदाता दिवस के मउका म प्रदेस के लोगन मन ल बधाई अउ सुभकामना दे हवय।पदक घोषणा
केन्द्र सरकार ह गणतंत्र दिवस के मउका म विशिष्ट सेवा, सराहनीय सेवा अउ वीरता पदक बर छत्तीसगढ़ ले उन्नीस झिन पुलिस अधिकारी अउ करमचारी मनके नाव के घोसना करे हे। जेमा विशिष्ट सेवा बर एक, सराहनीय सेवा बर दस अउ वीरता पदक बर आठ झिन पुलिस अधिकारी अउ करमचारी सामिल हे।
विशिष्ट सेवा बर पुलिस पदक भारतीय पुलिस सेवा के अधिकारी प्रदीप गुप्ता के नाव चुने गेहे। त उहें, सराहनीय सेवा बर पुलिस पदक सोहन लाल, मनीषा सिंह, वर्षा शर्मा, कमलेश कुमार सोनबोईर, पीडी अशोक कुमार, तुलाराम बाघ, अरूण बहादुर, केशव कुमार धु्रव, अश्वनी कुमार सिंह अउ रविन्द्र कुमार भूआर्य ल दे जाही। अइसने, वीरता पदक अजय सोनकर, अब्दुल समीर, रमन उसेंडी, लीलाधर राठौर, ओमप्रकाश सेन, संतोष हेमला, रमेश कुमार सोरी अउ टीपी दिलीप ल दे जाही।
प्रधानमंत्री-राष्ट्रीय बाल पुरस्कार
प्रधानमंत्री नरेन्द्र मोदी ह राष्ट्रीय बाल पुरस्कार पवइया लइका मनके प्रसंसा करत किहीन कि ए पुरस्कार सिरिफ एक ठिन उदाहरण हरय कि छोटे-छोटे विचार के सही दिसा म काम करे ले कइसन बड़का परिणाम आथे। प्रधानमंत्री ह किहीन कि इनाम पवइया लइका मनके सफलता ले कतकोन लोगन मन आगू आही। एसो बत्तीस झिन किशोर मन ल नवाचार, सिक्षा, खेल, कला अउ संस्कृति, सामाजिक सेवा अउ बहादुरी के क्षेत्र म असाधारण योग्यता अउ बढ़िया काम बर प्रधानमंत्री राष्ट्रीय बाल पुरस्कार कोति ले बाल शक्ति पुरस्कार दे गीस।
बाल वैज्ञानिक चयन
छत्तीसगढ़ विज्ञान अउ प्रौद्योगिकी परिषद डहार ले राज्य स्तरीय बाल विज्ञान कांग्रेस के वर्चुअल आयोजन पंडित रविशंकर शुक्ल विश्वविद्यालय रइ्र्रपुर म होईस। ए मउका म राज्य सैक्षणिक समन्वयक, राष्ट्रीय बाल विज्ञान कांग्रेस डहार ले राज्य स्तर म चुने गे बाल वैज्ञानिक मनके नाव के घोसना करे गीस। चुने गे बाल वैज्ञानिक मन म गनिका कुंभकार, अर्यान हरलालका, सृष्टि सोरी, संजना यादव, श्रृति सोम, मुस्कान पांडेय, धर्मेश, लीन यादव, अनिश सुरी, सर्वज्ञा सिंह, सविता, आयुष साहू, आकांक्षा साहू, विजय कुमार धु्रव अउ निर्मला यादव के नाव सामिल हे।
राष्ट्रपति/राज्यपाल-संदेश
गणतंत्र दिवस के पूर्व संध्या म आज राष्ट्रपति रामनाथ कोविंद ह देस के जनता के नाव अपन संदेस दीहीं। एखर सोझे प्रसारण संझा सात बजे ले आकाशवाणी नई दिल्ली ले करे जाही। उहें, छत्तीसगढ़ के राज्यपाल अनुसुईया उइके ह घलो प्रदेश के जनता के नाव अपन संदेस दीहीं, जेखर प्रसारण रतिहा नौ बजे ले करे जाही।
ए दूनों बिसेस कारीकरम के सेती आकाशवाणी रईपुर ले प्रसारित होवइया हिन्दी के प्रादेशिक समाचार बुलेटिन संझा सात बजके पांच मिनट के जघा म रतिहा नौ बजके बीस मिनट म प्रसारित होही।
गणतंत्र दिवस-ध्वजारोहण
काली बहत्तरवां गणतंत्र दिवस मनाय जाही। राज्यपाल अनुसुईया उइके ह रईपुर के पुलिस परेड मैदान म राखे गे मुख्य समारोह म बिहनिया नौ बजे झंडा फहराय के बाद परेड के सलामी लीहीं। ए मउका म राज्यपाल ह जनता के नाव अपन संदेस देके संगेसंग राज्य के कोरोना वारियर्स मन ल सम्मानित करही। त उहें, मुख्यमंत्री भूपेश बघेल ह बस्तर जिला मुख्यालय जगदलपुर म झंडा फहराही। त ऐति, विधानसभा अध्यक्ष डाॅक्टर चरणदास महंत ह जांजगीर-चांपा म झंडा फहरा के परेड के सलामी लीहीं।
ऐति, राज्य सासन के सामान्य प्रसासन विभाग ह जिला मुख्यालय मन म ध्वजारोहण करइया मुख्य अतिथि के सूची जारी कर देहे। गृहमंत्री ताम्रध्वज साहू ह महासमुंद म, पंचायत अउ ग्रामीण विकास मंत्री टी.एस. सिंहदेव ह बलौदाबाजार-भाटापारा म कृषि मंत्री रविन्द्र चैबे ह दुरूग म अउ स्कूल सिक्षा मंत्री डाॅक्टर प्रेमसाय सिंह टेकाम ह कोरबा म झंडा फहरा के परेड के सलामी लीहीं।
छब्बीस जनवरी के पूर्व संध्या म राज्यपाल अनुसुईया उइके, मुख्यमंत्री भूपेश बघेल अउ विधानसभा अध्यक्ष डाॅक्टर चरणदास महंत ह प्रदेस के लोगन मन ल बधाई अउ सुभकामना दे हवय।
मुख्यमंत्री-बस्तर
मुख्यमंत्री भूपेश बघेल ह अपन बस्तर दउरा म आज बस्तानार म एक सौ छप्पन करोड़ रूपिया ले जादा के इंक्यावन ठिन विकास काम के लोकार्पण अउ सिलान्यास करीन। ए मउका म मुख्यमंत्री ह बस्तर विकासखंड के कुकानार म मिनी स्टेडियम, किलेपाल म नवा हाई स्कूल भवन, तामड़ाघुमर अउ मेन्द्रीघुमर म पर्यटन ल बढ़ावा दे बर एक करोड़ रूपिया के मंजूरी दीन। एखर अलावा ओमन उसरीबेड़ा म नवा इंडोर स्टेडियम, चित्रकोट म विश्रामगृह अउ गांव गड़िया म प्री-मैट्रिक बालक-बालिका छात्रावास बनाय के घलो घोसना करीन।
सैनिक स्कूल-कार्यक्रम
पंचायत अउ ग्रामीण विकास मंत्री टी.एस. सिंहदेव ह काली अंबिकापुर के मेड्राकला स्थित सैनिक स्कूल के बारहवां वार्षिक उत्सव कारीकरम म सामिल होईन। ए मउका म ओमन किहीन कि सैनिक स्कूल जइसन राष्ट्रीय महत्व के संस्थान इहां होना सरगुजा के संगेसंग पूरा प्रदेस बर गौरव के बात हरय। कारीकरम म बढ़िया प्रदर्सन करइया कैटेड, सिक्षक अउ करमचारी मन ल चेक अउ ट्राॅफी देके पुरस्कृत करे गीस।
संक्षिप्त समाचार
अउ अब थोरकुन समाचार सार म-
– केन्द्र सरकार ह मीडिया के ओ खबर के खंडन करे हे, जेमा केहे गेहे कि रिजर्व बैंक ह एसो मार्च के बाद पांच, दस अउ सौ रूपिया के नोट उपर प्रतिबंध लगाय के फइसला करे हे। पत्र सूचना कार्यालय ह ए खबर ल फर्जी बताय हे।
– पत्र सूचना कार्यालय पीआईबी अउ प्रादेशिक लोक संपर्क कार्यालय आरओबी रईपुर के कोति ले आज ‘‘बेटी बचाओ-बेटी पढ़ाओ‘‘ अउ महिला सशक्तिकरण उपर एक ठिन वेबिनार राखे गीस।
– गणतंत्र दिवस समारोह म काली प्रदेस के उनचास सरकारी अउ नौ ठिन प्राईवेट अस्पताल मन ल आयुष्मान भारत प्रधानमंत्री जन आरोग्य योजना प्रमाण पत्र दे जाही। राजनांदगांव जिला के तीन ठिन सरकारी अस्पताल मन ल घलो प्रससस्ति पत्र दे जाही।
– बीजापुर जिला म एक झिन गोपनीय सैनिक के हत्या कर दे गीस। मृतक नैमेड़ थाना क्षेत्र के रहइया हरय।
– जगदलपुर म काली दलपत सागर म संभाग स्तरीय नौकायन प्रतियोगिता होही।
– भारत स्काउट्स-गाईड्स रईपुर जिला डहार ले वन ग्राम देवपुर म दू दिन के फीट इंडिया-हिट इंडिया कारीकरम राखे गीस।