सुभाषचंद्र बोस-जयंती
देसभर म आज महान स्वाधीनता सेनानी नेताजी सुभाषचंद्र बोस के जयंती ल पराक्रम दिवस के रूप म मनाय जावत हे। सुभाष चंद्र बोस के जन्म आज के दिन बछर अट्ठारह सौ संतानवे म ओड़िसा के कटक म होय रिहीस।
प्रधानमंत्री नरेन्द्र मोदी ह आज नेताजी बोस के एक सौ पच्चीसवां जयंती के मउका म पश्चिम बंगाल के कोलकाता म पराक्रम दिवस के सुभारंभ करीन। विक्टोरिया मेमोरियल म राखे गे पराक्रम दिवस समारोह ल संबोधित करत प्रधानमंत्री ह किहीन कि नेतीजी के व्यक्तित्व ले युवा मन ले बहुत कुछ सीखना हे। नेताजी के ऊर्जा देस के युवा मन बर प्रेरणा हरय। प्रधानमंत्री ह नेताजी ल नमन करत किहीन कि देस अपन आजादी के पचहत्तरवां बछर म प्रवेस करत हे, तब नेताजी के हर काम, उंखर फइसला हम सब बर प्रेरणादायक आय।
ऐति, छत्तीसगढ़ म घलो नेताजी के जयंती के मउका म जगह-जगह कारीकरम आयोजित करे जात हे।
मुख्यमंत्री-कृषि विवि
मुख्यमंत्री भूपेश बघेल ह आज नेताजी सुभाषचंद्र बोस के जयंती के मउका म इंदिरा गांधी कृषि विश्वविद्यालय रईपुर के बायोटेक इन्क्यूबेशन सेंटर अउ एग्री बिजनेस इन्क्यूबेशन अउ उत्पादन केन्द्र के सुभारंभ करीन। मुख्यमंत्री ह ए इन्क्यूबेशन सेंटर के नाव ल स्वतंत्रता संग्राम सेनानी सुभाषचन्द्र बोस के नाव म करे के घोसना करीन।
मुख्यमंत्री ह अपन निवास कार्यालय म राखे गे वर्चुअल कारीकरम म तीस करोड़ रूपिया के लागत ले बनत बायोटेक इन्क्यूबेशन सेंटर भवन के सिलान्यास करीन। इंदिरा गांधी कृषि विश्वविद्यालय परिसर म तीस करोड़ रूपिया के लागत ले ए सेंटर स्थापित होही। श्री बघेल ह राज्य योजना आयोग के कक्ष के नामकरण अउ आइडिया कैफे के लोकर्पण घलो करीन।
मुख्यमंत्री ह अपन निवास कार्यालय म राखे गे समारोह म चंदखुरी स्थित राज्य पुलिस प्रशिक्षण अकादमी के नाव स्वतंत्रता संग्राम सेनानी नेताजी सुभाषचन्द्र बोस के नाव म करे के घोसना करीन। कारीकरम म मुख्यमंत्री ह किहीन कि आज नेताजी के जयंती के एक सौ चैबीसवीं वर्षगांठ के मउका म पूरा देस ओमन सुरत करत नमन करत हे।
बोर्ड परीक्षा
छत्तीसगढ़ माध्यमिक शिक्षा मंडल डहार ले दसवीं अउ बारहवीं बोर्ड परीक्षा के टाईम-टेबल घोसित कर दे गेहे। मंडल ले मिले जानकारी के मुताबिक कक्षा दसवीं के परीक्षा पन्द्रह अप्रैल ले सुरू होही, जउन एक मई तक चलही। उहें, कक्षा बारहवीं के मुख्य परीक्षा तीन मई ले सुरू होके चैबीस मई तक सिराही।
मंडल के सचिव ह बतईन कि मुख्य परीक्षा आॅफलाइन मोड म आयोजित करे जाही। एखर बर विद्यार्थी मन ल उंखर स्कूल मन म परीक्षा केन्द्र बनाके परीक्षा देके बेवस्था करे जाही। परीक्षा केन्द्र म केन्द्र अउ राज्य सरकार डहर ले बेरा-बेरा म जारी करे गे कोरोना संक्रमण ले बचाव बर जम्मों दिसा-निरदेस के पालन करना जरूरी होही। मुख्य परीक्षा के समय सारिणी मंडल के वेबसाइट म हवय। मंडल के सचिव ह बतईन कि ए बछर परियोजना काम अउ प्रायोगिक परीक्षा दस फरवरी ले सुरू होही। ए परीक्षा म सामाजिक दूरी के पालन करत एक बिसय के प्रैक्टिकल परीक्षा एक दिन म दू ले तीन सिफ्ट म राखे जाही।
एखर संगेसंग कक्षा नवमीं अउ ग्यारहवीं के परीक्षा स्थानीय स्तर म आयोजित करे जाही यानि पढ़ईया लइका मन ह जउन स्कूल म पढ़त हे उहे परीक्षा दीही। संबंधित स्कूल डहार ले परीक्षा के प्रश्न पत्र तैयार करे जाही। संगेसंग टाईम-टेबल तैयार अउ उत्तर पुस्तिका के जांच करा के रिजल्ट घोसित करे जाही।
अइसने, छत्तीसगढ़ राज्य ओपन स्कूल डहार ले राखे गे मुख्य अउ अवसर परीक्षा के समय-सारिणी घलो घोषित कर दे गेहे। एखर मुताबिक ओपन स्कूल के मुख्य अउ अवसर परीक्षा चैबीस मई ले सुरू होही, जउन पन्द्रह जून तक चलही। मुख्य परीक्षा आॅनलाइन मोड म राखे जाही। ए परीक्षा म घलो कोरोना संक्रमण ले बचाव खातिर जारी दिसा-निरदेस के पालन करना जरूरी होही।
मतदाता दिवस-ई-इपिक
भारत निर्वाचन आयोग डहार ले राष्ट्रीय मतदाता दिवस पच्चीस जनवरी के इलेक्ट्राॅनिक मतदाता फोटो पहचान पत्र ई-इपिक लांच करे जाही। एखर ले लोगन मन ल आसानी ले घर बइठे इपिक कार्ड मिल सकही। एला मतदाता अपन मोबाइल म स्टोर कर सकत हे।
ए ह एक ठिन डिजिटल पीडीएफ फाॅर्मेट म होही, जउन ल मतदाता मन अपन जरूरत के हिसाब ले कभू भी डाउनलोड करके प्रिंट लेके बउर कर सकत हे। पच्चीस जनवरी ले एन.वी.एस.पी. डाॅट इन या फेर वोटर पोर्टल डाॅट ई.सी.आई. डाॅट जीओवी डाॅट इन या वोटर हेल्पलाइन मोबाइल एप्लीकेशन के माध्यम ले डाउनलोड करे जा सकत हे। एखर बर मतदाता मन ल अपन रजिस्ट्रेसन, पोर्टल म करना होही। इपिक नंबर एंट्री करना होही। पंजीकृत मोबाइल नंबर म एक ओटीपी मिलही। ओटीपी के माध्यम ले ई-एपिक डाउनलोड करे जा सकथे।
शिशु संरक्षण सप्ताह
प्रदेस म काली ले सिसु संरक्षण माह मनाय जावत हे, जउन ह छब्बीस जनवरी तक चलही। ए अभियान के दउरान छह महीना ले पांच बछर तक के लइका मन ल विटामिन पियाय जाही।
ए अभियान के वर्चुअल उद्घाटन प्रदेस के स्वास्थ्य मंत्री टी.एस. सिंहदेव ह करीन। स्वास्थ्य विभााग के अधिकारी मन ह बतईन कि ए अभियान के दउरान कुपोसित लइका मनके चिन्हारी करे बर वजन मसीन के माध्यम ले वजन करे जाथे। लइका मनके वजन कम होय म ओमन ल सुपोषित करे के कोसिस करे जाही। एखर संगेसंग गंभीर कुपोषित लइका मन ल पोषण पुनर्वास केन्द्र म भर्ती कराय जाही।
सड़क सुरक्षा माह
प्रदेस म सड़क दुर्घटना मन ल रोके बर यातायात पुलिस डहार ले ए दिन राष्ट्रीय सड़क सुरक्षा माह के बिसेस अभियान चलाय जावत हे। ए अभियान के तहत गाड़ी चालक मन ल चउक-चउराहा म लाउड स्पीकर यातायात नियम के पालन करे के हिदायत दे जावत हे। एखरे संगेसंग यातायात नियम ले जुड़े बैनर, पोस्टर, पाॅम्पलेट के माध्यम ले घलो लोगन मन ल जागरूक करे जावत हे। सड़क सुरक्षा माह अवइया सत्रह फरवरी तक चलही।
परिवहन समीक्षा
परिवहन मंत्री मोहम्मद अकबर ह नवा रईपुर के तेंदुआ म सत्रह करोड़ रूपिया के लागत ले बनत इंस्टीट्यूट आॅफ ड्राइविंग एंड ट्रैफिक रिसर्च सेंटर ल अवइया मार्च महीना तक पूरा करे के निरदेस अधिकारी मन ल दीन। ए सेंटर के बने ले गाड़ी चालक तैयार करे बर प्रसिक्षण के सुघ्घर सुविधा मिलही। संगेसंग ए सेंटर म हर बछर करीबन बीस हजार लोगन मन ल प्रसिक्षण दे जा सकही।
समीक्षा बइठका म परिवहन मंत्री ह विभागीय अधिकारी मन ल नवीन मेक अउ माॅडल के अनुमोद अउ वाहन डीलर्स मनके निलंबित व्यवसाय प्रमाण पत्र के अपील के तुरते निपटाय के घलो निरदेस दीन।
पोषण अभियान
पोषण अभियान के तहत आंगनबाड़ी केन्द्र मन म मिलइया पूरक पोषण आहार के गुणवत्ता के अब पूरा ध्यान राखे जाही। केन्द्रीय महिला अउ बाल विकास मंत्रालय ह ए संबंध म जम्मों राज्य के मुख्य सचिव मन ल चिट्ठी लिखके जरूरी दिसा-निरदेस देहे। एमा केहे गेहे कि अब लाभार्थी मन ल देवइया पूरक पोषण आहार, खाद्य सुरक्षा अउ मानक अधिनियम के मापदंड के पालन करत पौष्टिक खाना बांटे जाय।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह काली रतिहा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म राज्य सासन के नीति, योजना अउ कारीकरम के बारे म जानकारी दीहीं। ए कारीकरम ल मीडियम वेव नौ सौ इक्यासी किलोहटर््ज म सुने जा सकत हे। ए कारीकरम ल प्रदेस स्थित आकाशवाणी के जम्मों केन्द्र एके संघरा रिले करही।
सहायक प्राध्यापक-साक्षात्कार
छत्तीसगढ़ लोक सेवा आयोग डहार ले उच्च सिक्षा विभाग के तहत सहायक प्राध्यापक पद बर चयनित तिरानवे अभ्यर्थी के साक्षात्कार नौ अउ दस फरवरी के आयोजित करे जाही। साक्षात्कार बर चुने गे अभ्यर्थी मनके दस्तावेज सत्यापन साक्षात्कार होय के एक दिन पहिली दू पारी म बिहनिया नौ बजे ले मंझनिया बारह बजे तक अउ मंझनिया एक बजे ले संझा पांच बजे तक करे जाही। दस्तावेज मनके सत्यापन म जउन नइ आही ओमन ल साक्षात्कर म सामिल होय के मंजूरी नइ दे जाही।