कोरोना वैक्सीन
कोरोना वैक्सीन के दूसर खेप आज छत्तीसगढ़ पहुंचीस। ए बखत वैक्सीन के तेईस ठिन डिब्बा भेजे गेहे, जेमा दू लाख पैंसठ हजार खुराक हवय। एयरपोर्ट प्रबंधन अउ राज्य वैक्सीन भंडार के प्रभारी अधिकारी ह एखर पुष्टि करे हे। ओमन बतईन कि कोविशील्ड कोरोना वैक्सीन के दूसर खेप आज मंझनिया छत्तीसगढ़ पहुंचीस। उहें, पहिली पारी म पाछु तेरह जनवरी के प्रदेस ल कोविशील्ड वैक्सीन के तीन लाख तेईस हजार खुराक मिले रिहीस।
इही बीच, राज्य के जम्मों तय केन्द्र मन म मंगलवार, शुक्रवार अउ इतवार ल छोड़के बाकी सबो दिन बिहनिया नौ ले संझा पांच बजे तक टीकाकरण के काम चलत हे। राजधानी रईपुर के अंबेडकर स्मृति चिकित्सालय के बड़का डाॅक्टर ओ.पी. सुंदरानी अउ प्रमुख चिकित्सक डाॅक्टर आर.के. पांडा ह आज कोरोना टीका लगवाईन अउ दूनों अपन काम म आ गे। ए चिकित्सक मन ह स्वास्थ्य कमरचारी मन ले आग्रह करीन हे कि ओमन टीका जरूर लगवाय, काबर कि ए ह सुरक्षित हवय। उहें, टीकाकरण अभियान म अब तक दस हजार आठ सौ बहत्तर स्वास्थ्य कमरचारी मन ल कोरोना के टीका लगाय गेहे। एमा वरिष्ठ चिकित्सक, नर्स अउ सफाई करमचारी सामिल हे। राजधानी रईपुर म वरिष्ठ चिकित्सक पद्मश्री डाॅक्टर ए.टी. दाबके, राजनांदगांव के चिकित्सक पद्मश्री डाॅक्टर पुखराज बाफना के संग आने डाॅक्टर मन बतईन कि कोरोना टीका लगाय के बाद कोनों किसम के परेसानी नइ होईस।
प्रधानमंत्री आवास योजना
प्रधानमंत्री नरेन्द्र मोदी ह किहीन कि प्रधानमंत्री आवास योजना आत्मनिर्भर भारत के प्रतीक हवय। ओमन किहीन कि प्रधानमंत्री ग्रामीण आवास योजना लोगन ल भरोसा देवाथे कि उंखर भी अपन घर हो सकत हे अउ ओमन जिनगी म कोनों किसम के समस्या के सामना करत हे। प्रधानमंत्री ह आज वीडियो कान्फ्रेंसिंग ले उत्तरप्रदेश म छह लाख दस हजार लाभार्थी मन ल करीबन दू हजार छह सौ इंक्यानवे करोड़ रूपिया के सहायता रासि जारी करीन। घर ल महिला ससक्तिकरण के उदाहरण बतावत श्री मोदी ह किहीन कि ए योजना गांव-गंवई म माईलोगिन मन ल मजबूत करत हे। काबर कि एमा अधिकतर मकान माईलोगिन मनके नाव म हवय।
बीएसएफ डीजी जवान-मुलाकात
सीमा सुरक्षा बल-बीएसएफ के महानिदेशक राकेश अस्थाना ह प्रदेस के माओवाद प्रभावित क्षेत्र म तैनात जवान मन ल आदिवासी मनके सुरक्षा के ध्यान राखे के निरदेस दीन हे। श्री अस्थाना काली छत्तीसगढ़ दउरा म रिहीन। ए बेरा म ओमन कांकेर जिला के माओवाद प्रभावित क्षेत्र के दउरा करीन अउ माओवादी मनके खिलाफ चलाय जात अभियान म तैनात बीएसएफ के अधिकारी अउ जवान मन ले भेंट करके गोठबात करीन। संगेसंग सीओबी महला अउ कटगांव म बनाय गे नवा कैम्प के दउरा घलो करीन। ए बेरा म बीएसएफ के महानिदेशक ल अधिकारी मन ह कोयलीबेड़ा म सैनिक सम्मेलन राख के माओवादी समस्या ल खतम करे बर चलाय जात अभियान के जानकारी दीन। अपन दउरा के बेरा श्री अस्थाना ह काली राजधानी रईपुर म राज्यपाल अनुसुईया उइके ले भेंट करीन अउ राज्यपाल ल माओवाद प्रभावित क्षेत्र म सुरक्षा के संबंध म जानकारी दीन।
माओवादी-मुठभेड़
बीजापुर जिला म सुरक्षा बल संग होय मुठभेड़ म एक माओवादी मारे गीस। मउका ले माओवादी के सव के संग हथियार घलो बरामद करे गेहे। ए मुठभेड़ म एक जवान घायल होगे हे। जिला के पुलिस अधीक्षक कमलोचन कश्यप ह बतईन कि तर्रेंम थाना क्षेत्र म होय ए मुठभेड़ के बाद घटना के जगह म बड़ मात्रा म माओवादी जिनीस अउ साहित्य बरामद करे गेहे। ओमन ए मुठभेड़ म दू झिन अउ माओवादी के मारे जाय अउ आने माओवादी के घायल होय के दावा करीन हे। उहें, दंतेवाड़ा जिला म सुरक्षा बल ह माओवादी मन कोति ले लगाय गे बम बरामद करे हे। माओवादी मन ह सुरक्षा बल ल निसाना बनाय बर अरनपुर-नीलवाया रद्दा म करीबन तीस किलो के विस्फोटक लगाय रिहीन। फेर सुरक्षा बल ह ए विस्फोटक ल बरामद कर लेहे।
खाद्य प्रौद्योगिकी/उद्यानिकी महाविद्यालय-शुभारंभ
राजधानी रईपुर म खाद्य प्रौद्योगिकी महाविद्यालय के संगेसंग प्रदेस म पांच ठिन उद्यानिकी महाविद्यालय खोले गेहे। मुख्यमंत्री भूपेश बघेल ह रईपुर के अपन निवास कार्यालय ले ए महाविद्यालय मनके ई-सुभारंभ करीन। ए नवा उद्यानिकी महाविद्यालय साजा, अर्जुंदा, धमतरी, जशपुर अउ लोरमी म खोले गेहे। एखर संगेसंग मुख्यमंत्री ह कोंडागांव म नवा कृषि विज्ञान केन्द्र के घलो ई-सुभारंभ करीन। ए नवा कृषि महाविद्यालय अउ कृषि विज्ञान केन्द्र ल करीबन एक सौ पन्द्रह करोड़ रूपिया के लागत ले बनाय गेहे। कारीकरम म मुख्यमंत्री ह रईपुर के इंदिरा गांधी कृषि विश्वविद्यालय म अध्ययन केन्द्र के सुभारंभ घलो करीन। कारीकरम म बोलत मुख्यमंत्री ह किहीन कि ए महाविद्यालय ले प्रदेस म कृषि सिक्षा अनुसंधान अउ बने होही।
मुख्यमंत्री-सीजी मार्ट
मुख्यमंत्री भूपेश बघेल ह महिला समूह कोति ले बनाय गे आने-आने उत्पाद ल बने बाजार देवाय खातिर सीजी मार्ट सुरू करे के घोसना करीन हे। ए बात मुख्यमंत्री ह अपन रईपुर के निवास कार्यालय म गोधन न्याय योजना के हितग्राही मन ल ग्यारहवां-बारहवां किश्त के रकम जारी करत के बेरा किहीन। ओमन गोबर बेचइया मन बर करीबन साढ़े सात करोड़ रूपिया के रासि जारी करीन। ए बेरा म मुख्यमंत्री ह किहीन कि गौठान म महिला समूह अउ वन क्षेत्र म आने-आने समूह कोति ले तैयार करे गे सहरी क्षेत्र म एके छत के नीचे बेचे खातिर ‘‘सीजी-मार्ट‘‘ सुरू करे जाही। सबले पहिली राजधानी रईपुर म सुरू करे जाही। सीजी मार्ट म तेलघानी ले सरसों, अलसी के तेल बेचे बर राखे जाही।
असिस्टेंट प्रोफेसर परिणाम
राज्य म असिस्टेंट प्रोफेसर के लिखित परीक्षा के नतीजा घोषित कर दे गेहे। ए पद बर दू हजार आठ सौ छियानवे सफल उम्मीदवार मनके लिस्ट जारी करे गेहे। एमा कामर्स विषय बर सबले जादा एक सौ चैरासी पद म भर्ती होना हे, जेमा तीन सौ अठहत्तर उम्मीदवार लिखित परीक्षा म पास होय हे। ए पद बर इंटरव्यू के बाद चयन सूची जारी करे जाही।
खुड़मुड़ा-हत्याकांड
दुरूग जिला के अमलेश्वर थाना क्षेत्र म करीबन महीनाभर पहिली होय खुड़मुड़ा हत्याकांड के जांच खातिर पुलिस ह नवा टीम बनाय हे। दुरूग रेंज के आईजी विवेकानंद सिन्हा ह ए बारह सदस्यीय जांच टीम ल मामला के जांच करके आरोपी मन ल गिरफ्तार करे के निरदेस दीन। भिलाई नगर के सीएसपी राकेश कुमार जोशी ए टीम के प्रभारी हवय।
बीजापुर-चक्काजाम
बीजापुर जिला के भैरमगढ़ राष्ट्रीय राजमार्ग म आज गांव के लोगन मन आने-आने मांग ल लेके चक्काजाम करीन। एमन गांव म स्कूल अउ आंगनबाड़ी केन्द्र खोले के मांग करत हे। संगेसंग माओवादी मनके नाव म कथित रूप ले गांव के लोगन के फर्जी गिरफ्तारी, फर्जी एनकाउंटर ल रोके के मांग करीन। सुरक्षा ल देखत मउका म बड़ संख्या म सुरक्षा बल ल तैनात करे गे रिहीस।
लूट गिरोह/नशीला दवाएं
रईपुर अउ महासमुंद जिला म आज लूटपाट करइया दू अंतर्राज्यीय गिरोह के पता चले हे। रईपुर रेंज के आईजी आनंद छाबड़ा अउ वरिष्ठ पुलिस अधीक्षक अजय यादव ह रईपुर म पत्रकार मन ले गोठबात करत बतईन कि पाछु दिन उरला, सरोरा क्षेत्र म एक कैशियर संग होय इकतीस लाख रूपिया के लूट के मामला के पता चल गेहे। ओमन बतईन कि पुलिस ह ए गिरोह के नौ झिन ल गिरफ्तार करे हे अउ इंखर तीर ले लूट के पच्चीस लाख रूपिया बरामद होय हे। ए घटना के मुख्य आरोपी एक स्टील कंपनी म काम करइया करमचारी हवय। उहें, महासमुंद म पुलिस ह लूटपाट करइया गिरोह के छह झिन ल गिरफ्तार करे हे। गिरफ्तार आरोपी ओड़िसा के रहवइया हरय। उंखर तीर ले एक नग देसी कट्टा, दू जिंदा कारतूस अउ धारदार हथियार समेत नगद रकम बरामद करे गेहे। अभी कुछेक दिन पहिली ए आरोपी मन ह कोमाखान क्षेत्र म एक किसान ले करीबन पच्चीस हजार रूपिया लूटे रिहीन। ओति, राजनांदगांव जिला के तुमड़ीबोड़ पुलिस ह नसीला दवा बेचे के आरोप म एक मनखे ह गिरफ्तार करे हे। ओ ह ए दवई ल महाराष्ट्र ल लाके तुमड़ीबोड़ म बेचे के प्रयास करत रिहीस।