कोरोना टीकाकरण
केन्द्रीय स्वास्थ्य मंत्रालय ह केहे हे कि पच्चीस राज्य अउ केन्द्रसासित प्रदेस म कोरोना टीकाकरण के कुल सात हजार सात सौ चार सत्र आयोजित करे गेहे। टीकाकरण के तीसरइया दिन काली एक लाख अड़तालीस हजार ले जादा लोगन ल टीका लगाय गीस। नई दिल्ली म अपर स्वास्थ्य सचिव डाॅक्टर मनोहर अगनानी ह कहिन कि तीन दिन म कुल तीन लाख इक्यासी हजार ले जादा लोगन ल अब तक टीका लगाय जा चुके हे। इही बीच, अखिल भारतीय आयुर्विज्ञान संस्थान-एम्स के मेडिसीन विभाग के प्रोफेसर डाॅक्टर पीयूष रंजन ह आकाशवाणी ले बातचीत म बतईन कि कोरोना के टीका लगे के बाद भी लोगन ल मास्क पहिनना हे। सुरक्षित दूरी बनाय रखना हे अउ व्यक्तिगत साफ-सफाई जइसे सुरक्षा अउ सावधानी रखना जरूरी हे।
कोरोना टीकाकरण-वेबिनार
केन्द्रीय सूचना अउ प्रसारण मंत्रालय के पत्र सूचना कार्यालय अउ प्रादेशिक लोक संपर्क कार्यालय डहार ले आज रईपुर म कोरोना टीकाकरण बर लोगन ल जागरूक करे के उद्देश्य ले वेबिनार के आयोजन करे गीस। ए बेरा छत्तीसगढ़ यूनिसेफ के प्रमुख जाॅब जकारिया, छत्तीसगढ़ टीकाकरण अभियान के राज्य मीडिया समन्वयक हर्षा पौराणिक, छत्तीसगढ़ यूनिसेफ के स्वास्थ्य विशेषज्ञ डाॅक्टर श्रीधर प्रहलाद अउ पत्र सूचना कार्यालय अउ रीजनल आउटरीच ब्यूरो के रायपुर के अपर महानिदेशक अभिषेक दयाल अउ बिसेसज्ञ मन कोरोना टीकाकरण के महत्व अउ सुरक्षा के बारे म मीडिया, युवा, लोगन अउ विद्यार्थी मन ल जानकारी दीन।
मुख्यमंत्री-कार्यक्रम
मुख्यमंत्री भूपेश बघेल काली बीस जनवरी के राजधानी रईपुर के संघरा बालोद अउ राजनांदगांव जिला म होवइया कतकोन कारीकरम म सामिल होही। ए बेरा श्री बघेल कृषि महाविद्यालय, कृषि विज्ञान केन्द्र अउ नवा कृषि महाविद्यालय म करीबन एक सौ दस करोड़ रूपिया के विकास कार्य के लोकार्पण अउ सिलान्यास करही।
लोकवाणी
मुख्यमंत्री भूपेश बघेल ह ‘‘लोकवाणी‘‘ म ए दारी ‘‘उपयोगी निर्माण, जनहितैषी अधोसंरचानाएं, आपकी अपेक्षाएं‘‘ बिसय म प्रदेसवासी मन ले गोठबात करही। ए बारे म कोन्हों भी मनखे आकाशवाणी रईपुर के दूरभाष नंबर – 0 7 7 1-2 4 3 0 5 0 1 – 5 0 2 – 5 0 3 म 27, 28 अउ 29 जनवरी के मंझनिया तीन ले चार बजे के बीच फोन करके अपन सवाल रिकार्ड करा सकत हे। मुख्यमंत्री के मासिक रेडियो वार्ता लोकवाणी के पन्द्रहवीं कड़ी के प्रसारण चैदह फरवरी के होही। एला छत्तीसगढ़ आकाशवाणी के जम्मों केन्द्र, एफ.एम. रेडियो अउ क्षेत्रीय समााचार चैनल ले बिहनिया साढ़े दस बजे ले ग्यारह बजे तक प्रसारित होही।
गणतंत्र दिवस-कार्यक्रम
राजधानी रईपुर के संघरा प्रदेस के जम्मों जिला मुख्यालय म गणतंत्र दिवस के तैयारी सुरू होगे हे। इही बीच, राज्य सासन के सामान्य प्रशासन विभाग ह जिला मुख्यालय म ध्वजारोहण करइया मुख्य अतिथि मनके सूची घलो जारी कर देहे। ए दारी ध्वजारोहण बर मंत्री मनके संघरा संसदीय सचिव मन ल घलो मुख्य अतिथि बनाय गेहे।
एखर अनुसार मुख्यमंत्री भूपेश बघेल जगदलपुर म तिरंगा फहराही। उहें, गृह अउ लोक निर्माण मंत्री ताम्रध्वज साहू महासमुंद म, पंचायत अउ ग्रामीण विकास मंत्री टी.एस. सिंहदेव बलौदाबाजार-भाटपारा म, कृषि अउ जल संसाधन मंत्री रविन्द्र चैबे दुरूग म, स्कूल सिक्षा मंत्री डाॅक्टर प्रेमसाय सिंह टेकाम कोरबा म, वन मंत्री मोहम्मद अकबर राजनांदगांव म, उद्योग मंत्री कवासी लखमा कांकेर, नगरीय प्रशासन मंत्री डाॅक्टर शिवकुमार डहरिया सरगुजा, महिला अउ बाल विकास मंत्री अनिला भंेडिया रायगढ़, लोक स्वास्थ्य यांत्रिकी अउ ग्रामोउद्योग मंत्री गुरू रूद्रकुमार नारायणपुर म, राजस्व मंत्री जय सिंह अग्रवाल गौरेला-पेण्ड्रा-मरवाही म, उच्च सिक्षा मंत्री उमेश पटेल बिलासपुर, खाद्य नागरिक आपूर्ति मंत्री अमरजीत भगत बालोद म ध्वजारोहण करके परेड के सलामी लीही।
उहें, संसदीय सचिव यू.डी. मिंज बलरामपुर म, विकास उपाध्याय बेमेतरा, रेखचंद जैन बीजापुर, इंद्रशाह मंडावी दंतेवाड़ा, चन्द्रदेव प्रसाद राय धमतरी, विनोद सेवन लाल चंद्राकर गरियाबंद, चिंतामणि महराज जशपुर, द्वारिकाधीश यादव कबीरधाम, कुंवर सिंह निषाद कोंडागांव, गुरूदयाल सिंह बंजारे कोरिया, शंकुतला साहू मुंगेली, शिशुपाल सोरी सुकमा, डाॅक्टर रश्मि आशीष सिंह सूरजपुर जिला मुख्यालय म होवइया गणतंत्र दिवस मुख्य समारोह म तिरंगा फहरा के परेड के सलामी लीहीं।
धान खरीदी/भाजपा आरोप
प्रदेस म अभी समर्थन मूल्य म धान के खरीदी करे जावत हे। काली अट्ठारह जनवरी तक साढ़े अठहत्तर लाख मीटरिक टन ले जादा धान के खरीदी करे जा चुके हे। ए बेरा राज्य के अट्ठारह लाख ससत्तर हजार ले जादा किसान मन ह अपन धान बेचे हे। उहें, राईस मिलर मन ले अब तक तेईस लाख इक्यासी हजार मीटरिक टन धान के उठाव कर ले गेहे।
इही बीच, भारतीय जनता पार्टी के राष्ट्रीय उपाध्यक्ष अउ प्रदेश के पूर्व मुख्यमंत्री डाॅक्टर रमन सिंह ह धान खरीदी के तारीख एक महीना अउ बढ़ाय के मांग करे हे, जेखर ले प्रदेस के कोन्हों भी किसान अपन फसल बेचे ले वंचित न रइ जाय। राजनांदगांव म पत्रकार मन ले चर्चा करत डाॅक्टर सिंह आरोप लगाईन कि राज्य सरकार धान खरीदी के बेवस्था ठीक ढंग ले नइ कर पात हे। ए मुद्दा ल लेके प्रदेस भाजपा डहार ले अवइया बाईस जनवरी के प्रदेसव्यापी जेल भरो आंदोलन करे जाही। ओमन बतईन कि पाछु दू बछर के बेरा प्रदेस म ढाई सौ ले जादा किसान मन आत्महत्या कर चुके हे। ओमन दिवंगत किसान मनके परिजन मन ल मुआवजा देके मांग घलो करीन।
ई-नाम पोर्टल
केन्द्रीय सूचना अउ प्रसारण मंत्री प्रकाश जावड़ेकर ह केहे हे कि देसभर के एक हजार मंडी मन ल ई-नाम पोर्टल म जोड़े गेहे। ओमन ट्वीट करके केहे हे कि किसान मन ल उंखर फसल के लाभकारी मूल्य दे बर सरकार प्रतिबद्ध हे। श्री जावड़ेकर ह कहिन कि केन्द्र सरकार ह ‘‘एक राष्ट्र-एक बाजार‘‘ के लक्ष्य ल पूरा करे बर ई-नाम पोर्टल के घोसना करे रिहीस।
माओवादी-मुठभेड़/गिरफ्तार
दंतेवाड़ा जिला म सुरक्षा बल अउ माओवादी मनके बीच मुठभेड़ होय के खबर हे। जिला पुलिस अधीक्षक अभिषेक पल्लव ह बतईन कि बोलागुंडा के पहाड़ी म माओवादी मनके लुकाय के सूचना मिले रिहीस। एखर बाद डिस्ट्रिक्ट रिजर्व गार्ड-डीआरजी, स्पेशल टास्क फोर्स-एसटीएफ अउ जिला पुलिस बल के संयुक्त दल ल सर्चिंग बर भेजे गीस। अचानक फायरिंग होईस। दूनों डहार ले होय गोलाबारी के बाद माओवादी मन पहाड़ म छूपत भाग गे।
ओति, सुकमा जिला के केरलापार इलाका म गश्त के बेरा सीआरपीएफ अउ डीआरजी के टीम ह एक झिन स्थाई वारंटी माओवादी ल गिरफ्तार करे हे।
महिला सुरक्षा पैनिक बटन
प्रदेश के जम्मों जिला म यात्री वाहन, टैक्सी, बस अउ आॅटो रिक्सा म महिला सुरक्षा के दृष्टि ले अब पैनिक बटन लगाय जाही। जेखर ले यात्री वाहन म महिला मन ल सुरक्षा संबंधी दिक्कत होय म पैनिक बटन दबा सकही। एखर मैसेज तत्काल एकीकृत कमांड सेंटर म जाही, जेखर ले पुलिस ह तुरते कार्रवाई करही।
जेईई-नीट
केन्द्रीय शिक्षा मंत्रालय ह केहे हे कि बछर दू हजार इक्कीस बर संयुक्त प्रवेश परीक्षा-जेईई अउ राष्ट्रीय पात्रता प्रवेश परीक्षा-नीट के पाठ्यक्रम म कोनो बदलाव नइ होय हे। हालांकि ए बछर उम्मीदवार मनके पास जेईई अउ नीट परीक्षा म सवाल के जवाब दे बर विकल्प होही। मंत्रालय ह केहे हे कि जेईई मुख्य परीक्षा के पाठ्यक्रम पाछु बछर के जइसे ही रइही।
मौसम
प्रदेस म काली ले ठंडी अउ सुष्क हवा आय के संभावना हे, जेखर सेती न्यूनतम तापमान म अउ गिरावट आय के आसार हे।
मौसम विभाग ले मिले खबर के मुताबिक अवइया बाईस जनवरी तक प्रदेस म मौसम सुष्क अउ आसमान साफ रेहे के संभावना हे। उहें, तापमान म घलो दू ले तीन डिग्री सेल्सियस के कमी आ सकत हे। सरगुजा संभाग के एक-दू जिला म सीतलहर के स्थिति घलो बन सकत हे।