कोरोना टीकाकरण-01
प्रधानमंत्री नरेंद्र मोदी काली बीहनिया वीडियो कॅान्फं्रेसिंग के जरिया विश्व के सबले बड़े कोविड नाइंटिन टीकाकरण के शुरूआत करहीं। टीकाकरण के ये अभियान पूरा देश म चलाये जाही। शुरूआत म सबो राज्य अउ केंद्रशासित प्रदेश के तीन हजार छै सौ केंद्र वीडियो कॅान्फं्रसिंग के जरिया आपस म जुड़ही। शुरू म सबो टीकाकरण केंद्र मन म करीबन एक सौ लाभार्थी मन ल टीका लगाये जाही। टीकाकरण के ये कार्यक्रम जरूरतमंद लोगन मनके प्राथमिकता देके आधार म चलाये जाही। पहिली चरण म स्वास्थ्यकर्मी सरकारी अउ निजी क्षेत्र के कर्मचारी अउ समेकित बाल विकास सेवा से संबंधित कर्मी मन ल टीका लगाये जाही।
एति छत्तीसगढ़ म घलो काली ले कोरोना टीकाकरण के शुरूआत होही। एखर बर प्रदेश म पूरा तियारी कर ले गेहे। प्रभारी मुख्य सचिव सुब्रत साहू ह बइठका लेके तियारी के समीक्षा करीन। ओमन बताइन कि प्रदेश म टीकाकरण लांच बर निन्यानबे वैक्सीनेशन साइट निर्धारित करे गेहे। काली केंद्र सरकार के संगेसंग टू-वे-इंटरेक्शन बर मेडिकल कालेज रायपुर अउ महारानी अस्पताल बस्तर ल चिन्हित करे गेहे । श्री साहू ह बताइन कि प्रदेश ल कोविशील्ड वैक्सीन के तीन लाख तेईस हजार डोज मिले हे। एमा ले पहिली डोज बर वैक्सीन प्रदेश के सबो जिला म भेज दे गेहे। प्रभारी मुख्य सचिव ह कीहिन हे कि कोरोना टीकाकरण के दूसरइया डोज ल जिला मन म अठाईस दिन के बाद भेज दे जाही।
कोरोना टीकाकरण-02
इही बीच, दुरूग जिला म काली ले सुरू होने वाला कोरोना टीकाकरण के सबो तैयारी पूरा कर ले गेहे। टीकाकरण बर पांच केन्द्र बनाय गेहे, जेमा जिला चिकित्सालय दुर्ग, श्री शंकराचार्य मेडिकल काॅलेज जुनवानी, सामुदायिक स्वास्थ्य केन्द्र पाटन, प्राथमिक स्वास्थ्य केन्द्र नगपुरा अउ सहारी प्राथमिक स्वास्थ्य केन्द्र बैकुंठधाम सामिल हे। जिला कलेक्टर सर्वेश्वर नरेन्द्र भूरे ह बतईन कि अट्ठारह जनवरी ले तीस जनवरी तक कोरोना वारियर्स मन ल वैक्सीन लगाय बर तेरह केन्द्र चयनित करे गेहे। ए केन्द्र मन म मंगलवार, शुक्रवार अउ सासकीय अवकाश ल छोड़के बाकी दिन म टीकाकरण करे जाही।
ऐति, धमतरी जिला म कोरोना वैक्सीन के तीन हजार चार सौ डोज पहुंच गेहे। काली जिला म चिन्हांकित स्वास्थ्य कर्मी, मितानिन अउ आंगनबाड़ी कार्यकर्ता मन ल ए टीका लगाय जाही। एखर बर सूची तैयार करे ले गेहे। एखर ले जिला के साठ प्रतिसत कोरोना वारियर्स मन ल टीका लग जही।
उहें, सरगुजा जिला म घलो कोरोना वैक्सीन के तेरह हजार आठ सौ डोज पहुंच गेहे। जिला मुख्यालय अंबिकापुर म काली पहिली दिन चार सौ स्वास्थ्य कर्मी मन ल टीका लगाय जाही।
अइसने, बालोद म घलो कोरोना वैक्सीन के तीन हजार आठ सौ चालीस डोज पहुंचे हे। एला जिला के देवरी अउ अर्जुंदा सामुदायिक स्वास्थ्य केन्द्र के संगेसंग जिला अस्पताल बालोद के स्वास्थ्य कर्मी मन ल लगाय जाही।
ओति, कोंडागांव जिला म घलो वैक्सीन पहुंच गेहे। वैक्सीन ल कोल्ड चेन स्टोर म सुरक्षित राखे गेहे। जिला के तीन स्वास्थ्य केन्द्र कोंडागांव, केशकाल अउ फरसगांव म टीकाकरण करे जाही।
प्रधानमंत्री कौशल विकास योजना
प्रधानमंत्री कौशल विकास योजना के तीसरा चरण आज देश के छह सौ जिला मन म शुरू होइस। कौशल विकास अउ उद्यमिता मंत्रालय के नेतृत्व म चलाये जात ये चरण म नवा जमाना के कौशल के संगेसंग कोविड से संबंधित कौशल मन उपर घलो धियान केंद्रित करे जात हे। कौशल विकास मंत्र डॅाक्टर महेन्द्रनाथ पांडे ह कौशल विकास केंद्र के कई झन प्रशिक्षणार्थी मन संग वीडियो कॅान्फे्रंस के जरिया बातचीत करीन। स्कील इंडिया मिशन के चैथा चरण म बछर दू हजार बीस-इक्कीस के दउरान नौ सौ उनचास करोड़ रूपिया के लागत ले आठ लाख उम्मीदवार मन ल प्रशिक्षत करे के लक्ष्य राखे गेहे।
संसद सत्र
संसद के बजट सत्र ये महीना के उनतीस तारीख ले शुरू हो जाही। राष्ट्रपति रामनाथ कोविंद द्वारा दूनो सदन मनके संयुक्त बैठक के संबोधन के संग बजट सत्र के शुरूआत होही। एक फरवरी के केंद्रीय बजट पेश करे जाही। मंत्रालय अउ विभाग मनके अनुदान मांग उपर विचार करइया संबंधी स्थायी समिति मन डहार ले उखर रिपोर्ट के तियारी ल देखत संसद के कार्यवाही पंद्रह फरवरी के स्थगित हो जाही। बजट सत्र के दूसरा भाग आठ मार्च ले शुरू होही।
स्लोगन प्रतियोगिता परिणाम
मुख्यमंत्री भूपेश बघेल ह आज रायपुर स्थित अपन निवास कार्यालय ले गढ़बो नवा छत्तीसगढ़ अउ छत्तीसगढ़ युवा विषय म जनसंपर्क विभाग द्वारा आयोजित स्लोगन प्रतियोगिता के विजेता मनके सूची आॅनलाईन जारी करीन। चयनित सर्वश्रेष्ठ सौ विजेता मन ल एक-एक हजार रूपिया नकद पुरस्कार दे जाही।
स्वामी विवेकानंद के जयंती राष्ट्रीय युवा दिवस के उपलक्ष्य म आयोजित होय ये आॅनलाईन प्रतियोगिता म चैदा हजार से जादा प्रतिभागी मन ह भाग ले रीहिन। जेमा ले सौ स्लोगन निर्णायक समिति ले चुने गेहे। विजेता मन ल राशि जल्दी भेजे जाही। उंहें प्रतियोगिता के सबो प्रतिभागी मन ल डिजीटल सर्टिफिकेट घलो दे जाही।
मुख्य सचिव समीक्षा
प्रभारी मुख्य सचिव सुब्रत साहू ह काली मुख्यमंत्री के प्राथमिकता वाले योजना अउ कार्यक्रम मनके समीक्षा करीन। ये दउरान ओमन ह विभागीय अधिकारी मन ल ये योजना अउ कार्यक्रम मन म तेजी लाये के निर्देश दीन। श्री साहू ह ये संबंध म अलग अलग विभाग मनके आगामी इकतीस जनवरी तक विस्तृत जानकारी देके निर्देश देहे।
माओवादी हत्या गिरफ्तार
राजनंादगंाव जिला म मानपुर क्षेत्र के गा्रम परदोनी म माओवादी मन ह काली रतिहा सरपंच के पति के हत्या कर दीन। मिले जानकारी के अनुसार सरपंच के पति मैनूराम घर म रात के सोये के तियारी करत रीहिस, उही बेरा करीब आठ ले दस माओवादी मन ह ओला घर ले उठाके जंगल डहार लेगे। जिहंा लाठी, डंडा से पीटके ओखर हत्या कर दीस। मउका म माओवादी मन पर्चा घलो छोड़े हे।
उंहें बीजापुर जिला म सुरक्षा बलके टीम ह एक इनामी माओवादी ल गिरप्तार करे हे । हमर संवाददाता ले मिले जानकारी के मुताबिक नेलसनार थाना क्षेत्र ले जिला पुलिस बल के टीम ह तलाशी अभियान बर निकले रीहिस, इही दउरान पुण्डरी के जंगल ले ये माओवादी पकड़े गीस। ओखर उपर दंतेवाड़ा जेल बे्रक के घटना के अलावा हत्या सहित आने आने वारदात मन म शामिल रेहे के आरोप हे।
ओति सुकमा जिला म कोबरा बटालियन के एक जवान ह खुद ल गोली मारके आत्महत्या कर लीस। ये जवान चिंतागुफा थाना क्षेत्र ले तलाशी अभियान बर निकले टीम म शामिल रहिस। आत्महत्या के कारण के पता लगाये जात हे। मृतक जवान लुधियाना पंजाब के रहइया रीहिस।
सेना दिवस
आज तिहत्तरवंा सेना दिवस मनाये जावत हे। दिल्ली के कैंट के करियप्पा मैदान म आज सेना दिवस के आयोजन करे गीस। एखर पहिली सेना प्रमुख मनोज मुकुंद नरवणे ह करियप्पा मैदान म परेड के निरीक्षण करीन। सेना ह ये मउका म कई ठिन किसम के टेंक अउ मिसाइल प्रणाली मनके प्रदर्शन करीन। भारतीय सेना ह पहिली बार परेड म लड़ाकू स्वार्म ड्रोन के प्रदर्शन करीन। दस पैरा बल विशेष बल इकाई के नायक संदीप ल जम्मू कश्मीर म अपन स्क्वाड कमंाडर के जान बचाये अउ दू आंतकी मन ल मार गिराये बर मरणोपरांत सेना मैडल ले सम्मानित करे गीस।
राष्ट्रपति रामनाथ कोविंद अउ प्रधानमंत्री नरेंद्र मोदी ह सेना दिवस के मउका म भारतीय सेना मनके जवान मन ल बधाई दीन।
ट्री मैन-निधन
प्रदेस म पर्यावरण संरक्षण के अलख जगाने वाला ट्री-मैन के नाव ले प्रसिद्ध पर्यावरण प्रेमी गैंदलाल देशमुख के पाछु रतिहा निधन होगे। ओमन चैरानवे बछर के रिहीन। श्री देशमुख ह पांच एकड़ बंजर जमीन ल जंगल बनाके अउ अपन गांव कोड़िया ले लेके महाराजा चैक दुर्ग तक सड़क के दूनों किनारे बरगद, पीपल अउ नीम के पौधा लगाके पर्यावरण संरक्षण के दिसा म एक मिसाल कायम करे रिहीन।