कोरोना संक्रमण ले बचाव बर अवइया सोलह जनवरी ले विश्व के सबले बड़का टीकाकरण अभियान सुरू होवत हे। केन्द्रीय स्वास्थ्य मंत्रालय ह केहे हे कि सरकार ए अभियान बर राज्य अउ केन्द्रसासित प्रदेस के संग सरलग संपर्क म हे। केन्द्रीय स्वास्थ्य सचिव राजेश भूषण ह केहे हे कि राज्य मन ले अपेक्षा करे जात हे कि वैक्सीन के परिहवन बर तैयार रेहे अउ सीर्ष स्तर म जम्मों प्रक्रिया के लगातार निगरानी के अभ्यास करें। ओमन बतईन कि कोरोना के दू ठिन टीका ल आपातकाल म इस्तेमाल करे के अधिकार दे गेहे। एमा कोविशिल्ड अउ कोवैक्सीन सामिल हे।
केन्द्रीय स्वास्थ्य सचिव ह यहू बात केहे हे कि कोरोना के चार ठिन अउ दूसर टीका घलो देस म ही तैयार होवत हे। एला जल्दी उपलब्ध कराय जाही। स्वास्थ्य सचिव ह बतईन कि भारत सरकार ह सीरम इंस्टीट्यूट आॅफ इंडिया ले कोविशिल्ड टीका के एक करोड़ दस लाख खुराक दू सौ रूपिया प्रति खुराक के दर ले खरीदे के समझौता करे हे।कोरोना टीकाकरण-02
इही बीच, छत्तीसगढ़ म घलो कोरोना टीकाकरण के जम्मों तैयारी पूरा कर ले गेहे। कोविशिल्ड के तीन लाख बाईस हजार वैक्सीन आज रईपुर पहुंचीस। ए बेरा रईपुर महापौर एजाज ढेबर, विधायक कुलदीप जूनेजा, जिला के मुख्य चिकित्सा अउ स्वास्थ्य अधिकारी डाॅक्टर मीरा बघेल अउ स्वास्थ्य विभाग के वरिष्ठ अधिकारी मौजूद रिहीन।
ऐति, स्वास्थ्य मंत्री टी.एस. सिंहदेव ह केहे हे कि केन्द्र सरकार डहार ले छत्तीसगढ़ ल कोविशिल्ड वैक्सीन उपलब्ध कराय गेहे। श्री सिंहदेव ह किहीन कि कोरोना के टीका लगे के बाद घलो लोगन ल ए महामारी ले बचाव बर पहिली जइसे ही मास्क पहिने अउ दू गज दूरी बनाय राखे के सावधानी के पालन करना आवश्यक होही।
श्री सिंहदेव ह केहे हे कि टीकाकरण बर जे लोगन ल चुने गेहे ओमन ल को-विन मोबाइल ऐप म अपन पंजीयन कराना अनिवार्य होही।
ऐति, प्रदेस के अलग-अलग जिला म घलो कोरोना टीकाकरण के तैयारी आखिरी चरण म पहुंच गेहे। सरगुजा जिला म टीकाकरण बर जम्मों तैयारी पूरा कर ले गेहे। जिला के मुख्य चिकित्सा अउ स्वास्थ्य अधिकारी डाॅक्टर पी.एस. सिसोदिया ह बतईन कि ए टीका ह पूरा तरीका ले सुरक्षित हे अउ जिला म ग्यारह हजार लोगन ल टीका लगाय जाही।
प्रधानमंत्री फसल बीमा योजना
प्रधानमंत्री नरेन्द्र मोदी ह केहे हे कि प्रधानमंत्री फसल बीमा योजना मेहनती किसान मन बर एक ठिन महत्वपूर्ण पहल हे। योजना के पांच साल पूरा होय म जम्मों लाभार्थी मन ल बधाई देवत ओमन कहिन कि ए योजना म कवरेज म बढ़ोतरी करे जाय के संघरा जोखिम ल घलो कम करे गेहे, जेखर ले देस के करोड़ों किसान ल फायदा मिले हे। केन्द्र सरकार ह किसान मन ले प्रधानमंत्री फसल बीमा योजना के लाभ उठाय के अपील घलो करे हे। किसान मन ल आत्मनिर्भर बनाय बर ए योजना ह काली पांच साल पूरा करीस।
भाजपा-प्रदर्शन
प्रदेश म धान खरीदी के संघरा किसान मनके दूसर मुद्दा ल लेके भारतीय जनता पार्टी ह आज राज्य के जम्मों विधानसभा क्षेत्र म प्रदेसव्यापी धरना-प्रदर्शन करीन। प्रदेस भाजपा अध्यक्ष विष्णुदेव साय ह जशपुर म, पूर्व मुख्यमंत्री डाॅक्टर रमन सिंह ह राजनांदगांव, राज्यसभा संासद सरोज पांडेय ह दुरूग म अउ नेता प्रतिपक्ष धरमलाल कौशिक ह बिल्हा म होय प्रदर्सन म सामिल होईन। ए जम्मों नेता मन किहीन कि अब जब वादा निभाय के बेरा आय ह तब राज्य सरकार ह बहाना करत हे।
प्रदेस के दूसर विधानसभा क्षेत्र के प्रदर्सन म घलो भाजपा के वरिष्ठ पदाधिकारी मन सामिल होईन।
प्रसार भारती-स्पष्टीकरण
प्रसार भारती ह स्पष्ट करे गेहे कि देस म आकाशवाणी के कोनों भी केन्द्र बंद नइ करे जावत हे। ए संबंध म भ्रामक खबर ल गंभीरता म लेवत प्रसार भारती ह केहे हे कि ए खबर आधारहीन अउ गलत हे। प्रसार भारती ह ए घलो स्पष्ट करे गेहे कि कोन्हों भी आकाशवाणी केन्द्र के स्तर कम नइ करे जावत हे अउ न ही ओला बदले जात हे। आकाशवाणी के जम्मों केन्द्र स्थानीय प्रतिभा ल बढ़ावा दे बर भाषाई, सामाजिक, सांस्कृतिक अउ आबादी के विविधता के अनुसार स्थानीय कारीकरम के प्रसारण जारी रखही। प्रसार भारती ह ए बात घलो केहे हे कि बछर दू हजार इक्कीस-बाईस म आकाशवाणी नेटवर्क ल मजबूत करे के योजना म देसभर म सौ ले जादा नवा एफ.एम. रेडियो ट्रांसमीटर लगाय जाही।
निशंक-नई शिक्षा नीति
देसभर के स्कूल काॅलेज मन म नवा सिक्षा नीति ल लागू करे के तैयारी सुरू कर दे गेहे। केन्द्रीय सिक्षा मंत्री रमेश पोखरियाल निशंक ह मंत्रालय के बड़का अधिकारी मनके संग नवा सिक्षा नीति के काम के समीक्षा करीन। बइठका म सिक्षा मंत्रालय के उच्च सिक्षा अउ स्कूली सिक्षा विभाग के बीच नवा सिक्षा नीति ल लागू करे बर एक ठिन कार्यदल के गठन के सुझाव दे गेहे। ए कार्यदल पढ़ईया मन ल स्कूल सिक्षा ले उच्च सिक्षा डहार जाय के सुविधा प्रदान करही। श्री निशंक ह नवा सिक्षा नीति ल जल्दी लागू करे बर उच्च सिक्षा विभाग के सचिव के नेतृत्व म एक ठिन समीक्षा समिति अउ क्रियान्वयन समिति के गठन के सुझाव दे गेहे। श्री पोखरियाल ह केहे हे कि राष्ट्रीय शिक्षा प्रौद्योगिकी मंच अउ राष्ट्रीय अनुसंधान फाउंडेशन ह ए सिक्षा नीति के सफलता बर महत्वपूर्ण इकाई हे। ओमन चालू बछर म ही ए दूनों संस्था के स्थापना बर अधिकारी मन ल निरदेस देहे।
माओवादी-मुठभेड़/गिरफ्तार
दंतेवाड़ा जिला म आज सुरक्षा बल अउ माओवादी मनके बीच होय मुठभेड़ म पांच लाख रूपिया के इनामी माओवादी मारे गीस। पुलिस अधीक्षक अभिषेक पल्लव ह घटना के पुष्टि करत बतईन कि जिला के कटेकल्याण थाना क्षेत्र म आज बिहनिया डिस्ट्रिक्ट रिजर्व गार्ड-डीआरजी अउ छत्तीसगढ़ सशस्त्र बल-सीएएफ के संयुक्त दल ह तलाशी अभियान म निकले रिहीन। इही बेरा चिकपाल अउ मारजूम के जंगल म सुरक्षा बल उपर फायरिंग सुरू होगीस। तहान जवान मन डहार ले करे गे जवाबी कार्रवाई म एक झिन इनामी माओवादी मारे गीस। संगेसंग कुछ माओवादी मन घायल घलो होगे। घटनास्थल के तलाशी के बेरा जवान मन मारे गे माओवादी के सव के संघरा नौ एम.एम. के एक ठिन पिस्टल घलो बरामद करीन हे।
ऐति, सुकमा जिला के मरईगुड़ा इलाका ले सुरक्षा बल ह एक झिन माओवादी ल गिरफ्तार करे हे। एखर उपर पुलिस दल म हमला करे अउ बारूदी विस्फोट करे के संघरा कतकोन माओवादी घटना म सामिल होय के आरोप हे।
एम्स रायपुर-कायाकल्प पुरस्कार
अखिल भारतीय आयुर्विज्ञान संस्थान एम्म रायपुर ह देसभर के चिकित्सा संस्थान म उत्कृष्ट प्रदर्सन बर दे जाने वाला कायाकल्प पुरस्कार म राष्ट्रीय स्तर म तीसरा स्थान हासिल करे हे। ए पुरस्कार अस्पताल परिसर म सफाई राखे अउ संक्रमण रोके के बने बेवस्था बर दे जाथे। केन्द्रीय स्वास्थ्य मंत्री डाॅक्टर हर्षवर्धन ह वीडियो कान्फ्रेंसिंग के माध्यम ले ए पुरस्कार प्रदान करीन।
एम्स रईपुर के निदेशक डाॅक्टर नितिन एम. नागरकर ह बतईन कि ए पुरस्कार म पचास लाख रूपिया के रासि दे गेहे।
ऋचा जोगी-जाति मामला
जनता कांग्रेस छत्तीसगढ़ के अध्यक्ष अमित जोगी के पत्नी ऋचा जोगी डहार ले दायर करे गे याचिका म छत्तीसगढ़ उच्च न्यायालय ह राज्य ल चार हफ्ता के भीतर जबाव पेस करे के निरदेस देहे। खबर हे कि जाति विवाद के सेती ऋचा जोगी ल मरवाही उपचुनाव म उम्मीदवार के रूप म अपात्र घोषित कर दे गे रिहीस।
रेलवे खेल कोटा-आवेदन
दक्षिण पूर्व मध्य रेलवे डहार ले खेल कोटा म छब्बीस ठिन पद म भर्ती बर तेईस जनवरी ले आवेदन मंगाय गेहे। एमा तीरंदाजी, एथलेटिक्स, बास्केटबाॅल, बाॅक्सिंग, क्राॅस कंट्री, फुटबाॅल, गोल्फ, हैंडबाॅल, खो-खो अउ पावर लिफ्टिंग जइसे खेल म भाग लेवइया खिलाड़ी मन आवेदन करत सकत हे। आवेदन करे के आखिरी तारीख तेईस फरवरी हे।