सुप्रीम कोर्ट-कृषि कानून
उच्चतम न्यायालय ह तीन ठन नवा कृषि कानून के अमल म अवइया आदेस तक रोक लगा देहे। अदालत ह किसान संगठन अउ सरकार के बीच बने गतिरोध ल सुलझाय खातिर गोठबात के रद्दा निकाले बर बिसेसज्ञ मनके एक समिति के गठन करे गेहे। मुख्य न्यायाधीश एस.ए. बोबड़े के अगुवई वाले पीठ ह किहीन कि जउन मन ए गतिरोध ल दुरिहा करे बर इच्छुक हवय ओमन समिति के आगू जरूर मौजूद होही।
उच्चतम न्यायालय के ए पीठ संसद कोति ले पारित तीन ठिन नवा कृषि कानून के संवैधानिक वैधता ल चुनौती देवइया याचिका के सुनवाई करत रिहीस।
मुख्य न्यायाधीश ह किहीन कि गठित करे गे समिति कोनों किसम के आदेस पारित नइ करही अउ न ही दंड दीहीं। ओहर अपन रिपोर्ट उच्चतम न्यायालय ल प्रस्तुत करही।
कोेरोना टीकाकरण-01
केन्द्र सरकार ह देस के आने-आने भाग म वैक्सीन अमराय के काम सुरू कर देहे। केन्द्रीय नागरिक उड्डयन मंत्री हरदीप सिंह पुरी ह किहीन कि आज नागरिक उड्डयन क्षेत्र म एक अउ बड़े अभियान सुरू होय हे। ओमन बतईन कि कोरोना टीका ल लेगे बर पहिली दू खेप स्पाईसजेट अउ गो-एयर कोति ले पुणे ले दिल्ली अउ चेन्नई बर रवाना करे गीस।
केन्द्रीय सूचना अउ प्रसारण मंत्री प्रकाश जावड़ेकर ह किहीन कि पुणे ले कोलकाता अउ देस के आने भाग म कोरोना के टीका भेजे जात हे अउ विश्व के सबले बड़े टीकाकरण अभियान सुरू होवत हे।
ऐति, छत्तीसगढ़ म घलो कोरोना टीकाकरण के जम्मों तैयारी पूरा कर ले गेहे। पहिली पारी म दू लाख सड़सठ हजार स्वास्थ्य करमचारी मन ल टीका लगाय जाही। एखर बर राज्य म निन्यानवे ठन टीकाकरण केन्द्र बनाय गेहे। ए जानकारी देवत राष्ट्रीय स्वास्थ्य मिशन के संचालक डाॅक्टर प्रियंका शुक्ला ह बतईन कि मेडिकल काॅलेज, जिला अस्पताल, प्राथमिक अउ सामुदायिक स्वास्थ्य केन्द्र के संगेसंग प्राईवेट अस्पताल म टीकाकरण केन्द्र बनाय गेहे। डाॅक्टर शुक्ला ह किहीन कि चुने गे लाभार्थी मन ल उंखर पंजीकृत मोबाइल नंबर म टीकाकरण के जगह, समय अउ तारीख भेजे जाही। एक वैक्सीनेटर एक दिन म सौ झन ल टीका लगाही। वैक्सीन के पहिली खुराक ले के बाद अट्ठाईस दिन के भीतरी दूसर खुराक लेना जरूरी हवय।
कोेरोना टीकाकरण-02
जांजगीर-चांपा जिला म करीबन दस हजार स्वास्थ्य करमचारी अउ आंगनबाड़ी कार्यकर्ता मन ल कोरोना के टीका लगाय जाही। एखर बर स्वास्थ्य विभाग के करीबन सौ अधिकारी अउ करमचारी मनके ड्यूटी लगाय गेहे।
उहें, राजनांदगांव म घलो सोलह जनवरी ले सुरू होवइया कोरोना टीकाकरण बर चैदह हजार ले जादा स्वास्थ्य कर्मी मन अपन पंजीयन कराय हे। एखर बर चैसठ ठिन केन्द्र बनाय गेहे। टीकाकरण के पहिली पारी म सिरिफ चार बूथ ले टीका लगाय जाही। जिला के मुख्य चिकित्सा अउ स्वास्थ्य अधिकारी मिथिलेश चैधरी ह बतईन कि वैक्सीन ल सुरक्षित राखे बर जिला म चैव्वन कोल्ड स्टोरेज चेन के बेवस्था करे गेहे।
इही बीच, प्रदेस म अब तक कोरोना संक्रमण के आंकड़ा दू लाख नब्बे हजार के पार होगे हे। अभी करीबन साढ़े आठ हजार मामला सक्रिय हवय।
हज आवेदन-आमंत्रित
केन्द्रीय अल्पसंख्यक कार्य मंत्रालय ह हज यात्रा दू हजार इक्कीस बर भारत ले जवइया हज यात्री मनके चिकित्सा सेवा बर प्रतिनियुक्ति म सासकीय मुस्लिम चिकित्सक अउ पैरामेडिकल स्टाॅफ ले अरजी मंगाय हे। राज्य हज कमेटी के अध्यक्ष मोहम्मद असलम खान ह बतईन कि छत्तीसगढ़ म काम करत शासकीय मुस्लिम चिकित्सक अउ पैरामेडिकल स्टाॅफ अवइया पांच फरवरी तक आॅनलाईन अरजी जमा कर सकत हे।
प्रधानमंत्री-राष्ट्रीय युवा संसद
प्रधानमंत्री नरेन्द्र मोदी ह किहीन हे कि नौ-जवान मन ल देस के भाग्य लिखे खातिर आगू आना चाही। हमर युवा मनके कंधा म देस के भविष्य के निर्माण के काम के अगुवई करे के जिम्मेवारी हवय। आज दूसर राष्ट्रीय युवा संसद महोत्सव के समापन समारोह ल वीडियो कान्फ्रेंसिंग ले संबोधित करत श्री मोदी किहीन कि पहिली लोगन के ए धारणा बन गे रिहीस कि कहूं कोनों नौ-जवान राजनीति के क्षेत्र म आथे त ओ ह बर्बाद हो जही। फेर, आज ए स्थिति म बदलाव आय हे अउ इमानदार लोगन ल राजनीति म जगह मिलत हवय। इमानदारी अउ बने काम करना आज के राजनीति बर पहिली जरूरी सरत बन गेहे।
प्रधानमंत्री ह किहीन कि नवा राष्ट्रीय सिक्षा नीति ले युवा मन ल बने नागरिक बनाके सुघ्घर राष्ट्र बनाना हे।
विवेकानंद-जयंती
राष्ट्र आज स्वामी विवेकानंद के जयंती मनावत हे। विश्व ल भारतीय अध्यात्म वेदांत अउ योग ले परिचित करवइया स्वामी विवेकानंद के जयंती देस म राष्ट्रीय युवा दिवस के रूप म मनाय जावत हे।
राष्ट्रपति रामनाथ कोविंद, उप राष्ट्रपति एम. वेकैंया नायडू अउ प्रधानमंत्री नरेन्द्र मोदी ह स्वामी विवेकानंद के जयंती म श्रद्धांजलि दीन हे। राष्ट्रपति ह किहीन कि स्वामीजी मानवता अउ युवा मन बर प्रेरणा स्त्रोत हवय। उपराष्ट्रपति ह किहीन कि स्वामीजी विद्वान के संगेसंग बने वक्ता अउ राष्ट्रवादी रिहीन। उंखर उद्देश्य हम सबो झन ल रद्दा देखावत हे। उहें, प्रधानमंत्री ह किहीन कि स्वामी विवेकानंद अपन विचार अउ काम ले भारत के संस्कृति अउ चेतना के मूर्तिमान रूप रिहीन।
विवेकानंद जयंती के मउका म आज छत्तीसगढ़ म कतकोन कारीकरम होवत हे। छत्तीसगढ़ विधानसभा परिसर म राखे गे एक ठिन कारीकरम म राज्यपाल अनुसुईया उइके अउ विधानसभा अध्यक्ष डाॅक्टर चरणदास महंत समेत आने जनप्रतिनिधि मन ह स्वामी विवेकानंद के प्रतिमा म फूलमाला चढ़ाईन। ए बेरा म राज्यपाल ह किहीन कि स्वामी विवेकानंद ह देसभर ल ए संदेस दीन कि देस के युवा पीढ़ी ही देस ल सक्तिसाली बना सकत हे।
धान खरीदी
प्रदेस म काली ग्यारह जनवरी तक छियासठ लाख पचहत्तर हजार मीटरिक टन धान बिसाय गेहे। उहें, राज्य सरकार कोति ले जारी एक बयान म केहे गेहे के प्रदेस म समर्थन कीमत म धान बिसाय खातिर बारदाना के व्यवस्था सुनिश्चित करे गेहे। राज्य म एसो नवासी लाख टन धान बिसाय के लक्ष्य राखे गेहे। अब तक सड़सठ लाख मीटरिक टन ले जादा धान के उपार्जन करे गेहे।
इही बीच, बिलासपुर कलेक्टर सारांश मित्तर ह आज समय-सीमा के बइठका म धान बिसाय के समीक्षा करत अधिकारी मन ल धान के सामान्य ले जादा आवक होय म निगरानी के निरदेस दीन। ओमन किहीन कि सत्यापित रकबा के आधार म ही धान बिसाय जाय।
भाजपा-प्रदर्शन
भारतीय जनता पार्टी कोति ले किसान मनके आने-आने समस्या ल लेके काली तेरह जनवरी के राज्यभर म प्रदर्सन करे जाही। उहें, बाईस जनवरी के जिला मुख्यालय मन म प्रदर्सन करे के कारीकरम हवय।
भाजपा कोति ले जारी एक बयान के मुताबिक धान बिसाय म किसान मन ल होवत परेसानी, बोनस अउ पाछु बछर के पूरा भुगतान नइ होय, बारदाना अउ गिरदावरी म कमी के संगेसंग किसान मनके आत्महत्या के विरोध म ए प्रदर्सन होही। रईपुर सहर के संतोषी नगर रद्दा म भाजपा के बड़का नेता अउ पदाधिकारी ए प्रदर्सन म सामिल होही।
डायलिसिस केन्द्र
स्वास्थ्य मंत्री टी.एस. सिंहदेव ह कोरबा म बनाय गे नवा डायलिसिस केन्द्र के आज वर्चुअल सुभारंभ करीन। दुरूग, कांकेर, बिलासपुर, महासमुंद अउ बीजापुर के बाद कोरबा छठवां अइसन जिला हवय, जिहां डायलिसिस केन्द्र बनाय गेहे। ए बेरा म श्री सिंहदेव ह किहीन कि ए केन्द्र के बने ले अब मरीज मन ल डायलिसिस के सुभीता आसानी ले मिलही अउ जादा रकम खरच करे बर नइ पड़ही।
मुंगेली अस्पताल-अवार्ड
मुंगेली जिला अस्पताल अउ लोरमी के सामुदायिक स्वास्थ्य केन्द्र ल राष्ट्रीय स्तर के तीन ठिन अवाॅर्ड मिले हे। केन्द्र सरकार ह जिला अस्पताल अउ सामुदायिक स्वास्थ्य केन्द्र के स्थिति सुधारे खातिर बछर दू हजार पन्द्रह ले कायाकल्प स्वच्छ अस्पताल योजना के सुरूवात करे हे। योजना म लोक स्वास्थ्य योजना मन म गुणवत्ता ल बढ़ावा दे अउ बने सेवा देवइया अस्पताल ल राज्य अउ राष्ट्रीय स्तर म गुणवत्ता प्रमाण पत्र दे जाथे। एमा मुंगेली के जिला अस्पताल अउ लोरमी के सामुदायिक स्वास्थ्य केन्द्र ल पहिली रैंक मिले हे।
मुख्यमंत्री-दौरा
मुख्यमंत्री भूपेश बघेल ह आज दुरूग जिला के रिसाली नगर निगम क्षेत्र बर चैदह करोड़ रूपिया ले जादा के विकास काम के लोकार्पण अउ भूईंया पूजन करीन। ओमन रिसाली नगर निगम म तुरते तीस बिस्तर वाला अस्पताल सुरू करे के निरदेस दीन।
कारीकरम म वन मंत्री मोहम्मद अकबर, गृह मंत्री ताम्रध्वज साहू अउ नगरीय प्रसासन मंत्री डाॅक्टर शिवकुमार डहरिया के संग कतकोन जनप्रतिनिधि मौजूद रिहीन।