प्रधानमंत्री नरेन्द्र मोदी ह किहीन हे कि देस म सोलह जनवरी ले सुरू होवइया कोरोना टीकाकरण के पहिली चरण म तीन करोड़ लोगन मन ल टीका लगाय जाही। सबले पहिली कोरोना वाॅरियर्स मन ल टीका लगाय जाही। पहिली चरण के टीकाकरण म होवइया खरचा ल केन्द्र सरकार ह दीहीं।
प्रधानमंत्री ह आज छत्तीसगढ़ के संगेसंग जम्मों राज्य के मुख्यमंत्री मनके संग वीडियो कान्फ्रेंसिंग के माध्यम ले गोठबात करीन। ओमन किहीन कि राज्य मन ले बढ़िया सुझाव मिलत हे। देस के वैज्ञानिक मन ह दू ठिन वैक्सीन तैयार करे हे, जउन ह दुनिया के सबले सस्ता वैक्सीन हरय। प्रधानमंत्री ह किहीन कि वैक्सीन लगाय म सबले पहिली स्वास्थ्य कर्मी, पुलिस जवान, सफाई कर्मी मन ल प्राथमिकता दे जाही। दूसर चरण म पचास साल ले जादा उमर के लोगन मनके संगेसंग अइसन मनखे मन ल घलो टीका लगाय जाही, जउन मन ल कोरोना संक्रमण होय के सबले जादा आसंका हे। प्रधानमंत्री ह कोरोना टीकाकरण ल लेके भरम फइलइया मन ले अपील करीन कि अउ किहीन कि अफवाह ल हमन जम्मों झन ल मिलके खतम करना हेे।
प्रधानमंत्री ह किहीन कि टीकाकरण के दउरान टीका लगवइया मनके पूरा जानबा डिजिटल रइही। एखर बर कोविन ऐप बनाय गेहे। प्रधानमंत्री ह बतईन कि देस म चार अउ नवा वैक्सीन उपर काम चलत हे।
ऐति, छत्तीसगढ़ के स्वास्थ्य मंत्री टी.एस. सिंहदेव ह किहीन हे कि प्रदेस ह कोरोना टीकाकरण अभियान बर तैयार हे। पहिली चरण म स्वास्थ्य कर्मी मन ल टीका लगाय जाही। एखर बाद सफाई कर्मी, स्वास्थ्य विभाग के अधिकारी कर्मचारी अउ अर्द्धसैनिक बल मन ल मउका दे जाही।कोरोना टीका
देस म सोलह जनवरी ले कोरोना टीका लगाय जाही। छत्तीसगढ़ म सबले पहिली दू लाख सड़सठ हजार कर्मचारी मन ल टीका लगाय जाही। एखर बर निन्यानवे जगह म टीकाकरण केन्द्र बनाय गेहे। ए काम म सात हजार ले जादा करमचारी मनके ड्यूटी लगाय गेहे। ए बारे म मीडिया ल जानबा देवत रईपुर म स्टेट लेवल मीडिया कन्सलटेसन के आयोजन करे गीस।
ए मउका म राज्य टीकाकरण अधिकारी अमर सिंह ठाकुर ह बतईन कि टीकाकरण बर जिला स्तर म समिति बनाय गेहे, जउन ह पोर्टल म पंजीकृत मेडिकल क्षेत्र ले जुड़े लोगन, डाॅक्टर, स्वास्थ्य कर्मचारी मन ल पहिली टीका लगाय जाही।
उहें, राष्ट्रीय स्वास्थ्य मिशन के संचालक डाॅक्टर प्रियंका शुक्ला ह बतईन कि टीकाकरण बर होवइया संसो ल दूर करे बर अइसन आयोजन करे जात हे। कलेक्टर अउ जिला नोडल अधिकारी ह ए कामकाज के निगरानी करही। टीका लगाय के बाद कोनों आपातकालीन स्थित आही त तुरते चिकित्सा सुविधा दे जाही।मुख्यमंत्री-बातचीत
मुख्यमंत्री ह किहीन हे कि गिरदावरी के बाद किसान मनके संख्या अउ रकबा बाढ़े हे। एसो साढ़े इक्कीस लाख हेक्टेयर क्षेत्र के पंजीयन होय हे। केन्द्र सरकार ह साठ लाख मीटरिक टन चाउर उठाय के सहमति दे हवय। फेर, चैबीस लाख मीटरिक टन के मंजूरी मिले हे।
मुख्यमंत्री ह आज बस्तर संभाग के तीन दिन के दउरा ले लहुटे के बाद रईपुर म पत्रकार मन ले गोठबात करत रिहीन। ओमन पूर्व मुख्यमंत्री डाॅक्टर रमन सिंह के बोरा के कमी के आरोप के जवाब म किहीन कि कोनों भी राज्य सरकार ह केन्द्र सरकार के संग मिलके काम करथे। मुख्यमंत्री ह माओवाद प्रभातिव जगह के सुरक्षा बेवस्था के सवाल के जवाब म किहीन कि राज्य सरकार के योजना हे कि लोगन मन ल विश्वास म लेके ही कोनों भी काम करे जाय।
मुख्यमंत्री ह आज संझा प्रधानमंत्री के संग टीकाकरण ल लेके होय वीडियो कान्फ्रेंसिंग म सामिल होईस।
मुख्यमंत्री-प्रवास
मुख्यमंत्री भूपेश बघेल ह काली बीजापुर जिला के दउरा म बीजापुर नगर पालिका डहार ले चलाय जात गौठान गीन अउ रोजगार वाले कामकाज म लगे माईलोगिन मन ले गोठबात करीन। ए मउका म मुख्यमंत्री ह मां दंतेश्वरी महिला स्व-सहायता समूह के माईलोगिन मन ले मिलके गाय अउ भईस पाले ले दूध उत्पादन अउ गोबर बेचे ले होय इनकम के बारे म जानबा लीन। एखर अलावा मुख्यमंत्री ह बीजापुर जिला म साॅफ्टबाॅल तीरंदाजी, कबड्डी, बैंडमिंटन के संगेसंग बाॅलीबाॅल खेल के मजा लीन। ओमन इहां लोहा पहाड़ी के सौंदर्यीकरण के बाद खेल अउ मनोरंजन ले जुड़े गतिविधि के सुभारंभ करीन।
छत्तीसगढ़-निवेशक
वैश्विक महामारी अउ आर्थिक मंदी के दउर म घलो छत्तीसगढ़ ह देस के सबले जादा प्राईवेट निवेश करइया राज्य म सामिल होगे हे। प्रोजेक्ट टुडे डहार ले जारी रिपोर्ट के मुताबिक वित्तीय बछर दू हजार बीस-इक्कीस के तीसर तिमाही म अक्टूबर ले दिसंबर के बीच प्रदेस ल दस हजार दू सौ अट्ठाईस करोड़ रूपिया के निजी निवेस के प्रस्ताव मिले हे। उहें, छत्तीसगढ़ म पाछू दू साल म एक सौ चार एम.ओ.यू. होय हे।
सेना भर्ती-प्रशिक्षण
कोंडागांव जिला म सेना, अर्द्धसैनिक बल अउ पुलिस म भर्ती होय बर युवा मन ल विश्रामपुरी कैम्प म प्रसिक्षण दे जाही। एखर बर काली बिसेस सिविर के आयोजन करे गीस। जिला के पुलिस अधीक्षक सिद्धार्थ तिवारी के अध्यक्षता म विश्रामपुरी म बिसेस सिविर म थाना विश्रामपुरी, चैकी बासकोट क्षेत्र अउ बड़ेराजपुर के अब्बड़ अकन युवा मन सामिल होईन। सिविर म आने-आने सशस्त्र बल म भर्ती बर आम भर्ती के प्रक्रिया के जइसन सारीरिक प्रसिक्षण अउ लिखित परीक्षा के बारे म जानबा दे बर जिला पुलिस अउ सीआरपीएफ के मास्टर ट्रेनर्स के बेवस्था करे गीस।
उहें, जिला म भूतपूर्व सैनिक सेवा परिषद डहार ले थल अउ जल सेना के संगेसंग सीआरपीएफ म भर्ती बर मुफत म प्रसिक्षण दे जात हे।
भेंडिया-प्रशिक्षण सत्र
समाज कल्याण मंत्री अनिला भेंडिया ह आज रईपुर के माना कैम्प स्थित राज्य संसाधन अउ पुनर्वास केन्द्र म विभागीय त्रैमासिक प्रशिक्षण सत्र के सुभारंभ करीन। ए मउका म ओमन किहीन कि समाज कल्याण विभाग ह कोरोना महामारी म लाॅकडाउन के दउरान जरूरतमंद मनके सेवा करीन।
मुख्य सचिव-प्रभार
मुख्य सचिव अमिताभ जैन के स्वास्थ्य ठीक नइ होय के सेती उंखर परभार ल अपर मुख्य सचिव सुब्रत साहू ह संपादित करही। ए बारे म सामान्य प्रसासन विभाग ह आदेस जारी कर देहे।
जानबा के मुताबिक मुख्य सचिव अमिताभ जैन ह कोरोना पाॅजिटिव पाय गेहे।
संक्षिप्त समाचार
अउ अब थोरकुन समाचार सार म-
– खाद्य नागरिक आपूर्ति मंत्री अमरजीत भगत ह काली जशपुर विकासखंड के टिकैतगंज म स्वर्गीय भीमराव भगत के जयंती कारीकरम म सामिल होईन। ए मउका म ओमन सामाजिक पत्रिका ‘‘कुडूख पड़हा पुंप‘‘ के विमोचन करीन।
– राजनांदगांव जिला म ब्लाॅक स्तरीय आयुष स्वास्थ्य सिविर के आयोजन करे जात हे। काली सहर के नंदई चैक म राखे गे सिविर म जाके लोगन मन ल कोरोना ले बचाव बर काढ़ा अउ मास्क बांटे गीस।
– जगदलपुर कलेक्टर रजत बंसल ह ‘दू पईडिल सुपोषण बर‘ अभियान ल जन भागीदारी ले कराय बर मितानिन, आंगनबाड़ी कार्यकर्ता, सरपंच, अनुविभागीय अधिकारी अउ जनपद पंचायत के मुख्य कार्यपालन अधिकारी मन ल चिट्ठी के माध्यम ले ए अभियान ल सफल बनाय म साथ दे बर केहे हे।
– बलौदाबाजार जिला म मुख्यमंत्री कन्या विवाह योजना म बिहाव करइया युवक-युवती मन ह बीस जनवरी तक अर्जी कर सकथे।
– महासमुंद जिला के पटेवा थाना क्षेत्र म पाछु रतिहा राष्ट्रीय राजमार्ग म एक ठिन सड़क दुर्घटना म दू झिन लोगन के मउत होगे अउ दस झिन मनखे मन घायल होगे।
– जांजगीर-चांपा जिला म पामगढ़ थाना क्षेत्र के गांव कोसला म आज होय एक ठिन सड़क दुर्घटना म फटफटी म बइठे एक झिन मनखे के मउकाच म परान छूट गे।
अउ
– कोंडागांव जिला म अवैध रेती निकाले के मामला म डिप्टी कलेक्टर ह रेती के अवैध परिहवन करत चार ठिन ट्रैक्टर ल जब्त करे हे।