कोरोना टीकाकरण के तैयारी के परीक्षण करे बर छत्तीसगढ़ के दस ठिन जिला म आज माॅकड्रिल करे गीस। एमा बलरामपुर, बीजापुर, दंतेवाड़ा, जशपुर, कांकेर, कोंडागांव, कोरिया, नारायणपुर, सुकमा अउ सूरजपुर जिला सामिल हे। ए जिला मन म ए माॅकड्रिल बिहनिया दस बजे ले मंझनिया दू बजे तक होईस। राष्ट्रीय स्वास्थ्य मिशन के संचालक डाॅक्टर प्रियंका शुक्ला ह बतईन कि माॅकड्रिल के बेरा म को-विन ऐप म एंट्री ले लेके वैक्सीन लगाय तक कतना बेरा लगही, एला देखे गीस। ए माॅकड्रिल हर जिला के एक सहरी अउ एक ग्रामीण क्षेत्र म करे गीस।
उहें, काली आठ जनवरी के बालोद, बलौदाबाजार, बेमेतरा, धमतरी, गरियाबंद, जांजगीर-चांपा, कवर्धा, कोरबा, महासमुंद, मुंगेली अउ रायगढ़ जिला म कोरोना टीकाकरण के तैयारी के परीक्षण करे जाही।
ऐति, केन्द्रीय स्वास्थ्य अउ परिवार कल्याण मंत्री डाॅक्टर हर्षवर्धन ह कहिन हे कि देस म विकसित कोविशील्ड अउ कोवैक्सीन दवाई टीकाकरण जल्दी होवइया हे। ओमन ह कहिन कि सरकार ह पूरा देस म एखर तेजी ले आपूर्ति करे के प्रयास करत हे। डाॅक्टर हर्षवर्धन ह कहिन हे कि भारत के औषधि महानियंत्रक ह एखर आपात इस्तेमाल के मंजूरी दे देहे।
ओमन यहू किहीन कि देस ह पाछु एक बछर के बेरा म कोरोना महामारी के मजबूती ले मुकाबला करे हे, जेखर सेती देसभर म अब कोरोना के मामला म कमी होवत हे।
कोविड वैक्सीन के देसव्यापी टीकाकरण ले पहिली राज्य अउ केन्द्रसासित प्रदेस के तैयारी के समीक्षा करत हुए डाॅक्टर हर्षवर्धन ह कहिन कि देस के तैंतीस ठिन राज्य अउ केन्द्रसासित प्रदेस म काली टीकाकरण के पूर्वाभ्यास करे जाही।स्वास्थ्य मंत्री-कोरोना समीक्षा-02
उहें, कोरोना टीकाकरण ल लेके केन्द्रीय स्वास्थ्य मंत्री डाॅक्टर हर्षवर्धन ह छत्तीसगढ़ समेत आने-आने राज्य के स्वास्थ्य मंत्री मनके संग वीडियो कान्फ्रेंसिंग के माध्यम ले गोठबात करीन। ओमन कहिन कि देस म पाछु दिन सक्रिय मरीज मनके संख्या भले ही बढ़े होही। फेर, कोरोना ले होवइया मृत्यु के दर डेढ़ प्रतिसत ले कम हवय। एखर संगेसंग कोरोना ले ठीक होय मरीज मनके दर छियानवे प्रतिसत ले जादा होगे हे, जउन ह विश्व के आने देस के तुलना म बहुत अच्छा हवय।
वीडियो कान्फ्रेंसिंग म प्रदेस के स्वास्थ्य मंत्री टी.एस. सिंहदेव ह कहिन कि राज्य म कोरोना टीकाकरण बर फ्रंट लाइन वर्कस के पंजीयन करे जात हे। स्वास्थ्य मंत्री ह कहिन कि वैक्सीनेटर अउ प्रतिभागी मन ल लेके तैयारी पूरा कर ले गेहे।
मुख्यमंत्री-प्रवास
मुख्यमंत्री भूपेश बघेल ह कहिन हे कि धर्म नगरी राजिम सिर्फ एक सहर नइ हे, बल्कि ए ह पूरा छत्तीसगढ़ के संस्कृति के प्रतीक हरय। ओमन ह कहिन हे कि इहां सिर्फ तीन नदी के ही संगम नइ होवय, बल्कि सांस्कृतिक संगम घलो होथे। ए बात मुख्यमंत्री ह आज राजिम म साहू समाज डहार ले आयोजित करे गे भक्तिन महतारी राजिम दाई के जयंती महोत्सव म कहिन।
श्री बघेल ह बतईन कि राजिम मेला ल व्यवस्थित रूप ले आयोजित करे बर जिला प्रसासन डहार ले नवा मेला स्थल बर चैव्वन एकड़ भूईंया के चिन्हांकन कर ले गेहे। ए मउका म मुख्यमंत्री ह फिंगेश्वर म नव-निर्मित सामुदायिक स्वास्थ्य केन्द्र के नाम ल भक्तिन महतारी राजिम दाई के नाव म करे के घोसना करीन। ओमन ह राजिम म निर्माणाधीन धर्मसाला बर पचास लाख रूपिया के स्वीकृति दे अउ राजिम माता सोध संस्थान बर पांच एकड़ भूईंया दे जाय के घलो ऐलान करीन।
उहें, मुख्यमंत्री ह कोरबा जिला के जटगा म महाविद्यालय बर नवा भवन बनाय अउ रामपुर म नवा महाविद्यालय सुरू करे के घोसना करीन हे। जानबा के मुताबिक मुख्यमंत्री के पाछु दिन कोरबा प्रवास के पाली तानाखार के विधायक मोहित केरकेट्टा ह ए संबंध म ए मांग करे रिहीन। उहें, मुख्यमंत्री ह पाली विकासखंड के नोनबिर्रा म प्राथमिक स्वास्थ्य केन्द्र घलो खोले के घोसना करीन।
एरियर्स भुगतान
प्रदेस के सासकीय अधिकारी अउ करमचारी मन ल इही महीना ले वार्षिक वेतनवृद्धि अउ एरियर्स के भुगतान करे जाही। वित्त विभाग डहार ले ए स्पष्ट करे गेहे कि राज्य सासन डहार ले सासकीय करमचारी मनके वार्षित वेतन वृद्धि नइ रोके गेहे अउ एखर भुगतान जनवरी महीना ले सुरू हो जही।
विभाग डहार ले सासकीय अधिकारी अउ करमचारी मन ल एक जुलाई दू हजार बीस ले ही वार्षिक वेतन वृद्धि स्वीकृत करत हुए एखर भुगतान जनवरी दू हजार इक्कीस के नियमित वेतन ले करे जाय के निरदेस दे गेहे। संगेसंग पाछु एक जुलाई ले इकतीस दिसंबर दू हजार बीस तक देय एरियर्स रासि के भुगतान घलो इही महीना ले करे जाही।
धान खरीदी
प्रदेस म चालू खरीफ विपणन बछर म समर्थन मूल्य म धान खरीदी के काम सरलग जारी हे। अभू तक उनसठ लाख उनयासी हजार मीटरिक टन ले जादा धान के खरीदी करे गेहे। इही बेरा म प्रदेस के लगभग पन्द्रह लाख ले जादा किसनहा मन ह धान बेचे हे। उहें, मिलर मन डहार ले पन्द्रह लाख चवालीस हजार मीटरिक टन ले जादा धान के उठाव कर ले गेहे। धान खरीदी के काम इकतीस जनवरी तक चलही।
इही बीच, प्रदेश के खाद्य सचिव डाॅक्टर कमलप्रीत सिंह ह रईपुर जिला के धरसीवां, कूंरा, पंडरभट्टा, खैरखूंट, अउ देवरी म संचालित धान खरीदी केन्द्र के औचक निरीक्षक करीन। ए बेरा म ओमन ह किसान मन ले गोठबात करत हुए धान खरीदी के जानकारी लीन।
जांजगीर-भाजपा-प्रेस कान्फ्रेंस
प्रदेस म किसनहा मनके मुद्दा ल लेके भारतीय जनता पार्टी ह अवइया तेरह जनवरी के प्रदेस के सबो विधानसभा क्षेत्र म प्रदर्सन करही। उहें, बाईस जनवरी के जिला स्तर म प्रदर्सन करे जाही। जांजगीर म पत्रकार मन ले गोठबात करत हुए भाजपा के प्रदेस महामंत्री अउ विधायक नारायण चंदेल ह कहिन कि राज्य सरकार के दू बछर पूरा होय जाय के बाद घलो कई ठिन मुद्दा म कोनों ठोस निर्णय नइ ले जा सकय हे। ए अवसर म पार्टी के जिला प्रभारी विधायक रजनेश सिंह अउ सांसद गुहाराम अजगले घलो मौजूूद रिहीन।
बर्ड फ्लू-अलर्ट
प्रदेस म बर्ड फ्लू के अभू तक कोन्हों भी मामला आगू नइ आय हे। केरल, राजस्थान, मध्यप्रदेश अउ हिमाचल प्रदेश म बर्ड फ्लू के पुष्टि होय के बाद छत्तीसगढ़ राज्य म घलो एला लेके अलर्ट जारी कर दे गेहे। पुशधन विकास विभाग डहार ले राज्य म बर्ड फ्लू के प्रवेश ल रोके बर सबो जिला के कलेक्टर अउ पुलिस अधीक्षक सहित पशु चिकित्सा विभाग के जिला स्तरीय अधिकारी मन ल सीमावर्ती प्रदेस ले पक्षी मनके परिवहन मन उपर कड़ा निगरानी राखे बर केहे हे। संगेसंग सबो सासकीय अउ असासकीय कुक्कुट पालन प्रक्षेत्र अउ पोल्ट्री व्यवसाय केन्द्र के निरीक्षण करे के निरदेस घलो दे गेहे। पशुधन विकास विभाग डहार ले राज्य के सात ठिन जिला म स्थित सासकीय पोल्ट्री फार्म ले जमा करे गे नमूना के जांच म बर्ड फ्लू के कोनों भी लक्षण नइ पाय गेहे।
ऐति, कृषि उत्पादन आयुक्त डाॅक्टर एम. गीता ह बतईन कि राज्य म बर्ड फ्लू ल रोके के बिसय म सबो जिला ल दिसा-निरदेस जारी करे गेहे। पक्षी मनके असामान्य बीमारी अउ उंखर मनके मउत होय के स्थिति म अधिकारी मन ल सतर्कता बरते बर घलो केहे गेहे। संगेसंग बतख पालन वाले क्षेत्र अउ जंगली प्रवासी पक्षी मनके इलाका म खासतौर म निगरानी राखे अउ वन विभाग ले समन्वय स्थापित करके राष्ट्रीय अभ्यारण्य, पोखर, झील ल चिन्हांकित करके ओ सबो इलाका के आसपास निगरानी करे खातिर बिसेस कार्ययोजना तैयार करे गे निरदेस दे गेहे।
टीबी रोगी-खोज अभियान
छत्तीसगढ़ ल टीबी मुक्त बनाय खातिर प्रदेस म आने-आने कारीकरम चलाय जात हे। कोरिया जिला म एक जनवरी ले टीबी रोगी खोज अभियान सुरू करे गेहे। इही कड़ी म आज ले जिला के केवराबहरा अउ सोनहत म आईसीएमआर के टीम डहार ले लोगन मनके जांच करे जात हे। आईसीएमआर के टीम मोबाइन वैन के माध्यम ले दूरदराज वाला जगह म टीबी के संभावित मरीज मनके पता लगाही अउ उंखर मनके जांच करही।