आज दिनभर के खबर ल अपन गुरतुर छत्तीसगढ़ी भाखा म पढ़व

कोरोना टीकाकरण-01
केन्द्र सरकार ह देसभर म अवइया हफ्ता ले कोरोना टीकाकरण सुरू करे के तैयारी तेज कर देहे। सरकार ह कहिन कि कोविड वैक्सीन बर पूर्वाभ्यास के प्रतिक्रिया के आधार म सरकार एखर आपात उपयोग के तारीख ल दस दिन के भीतर वैक्सीन उपलध कराय बर तैयार हे।
केन्द्रीय स्वास्थ्य सचिव राजेश भूषण ह कहिन कि टीकाकरण के बारे म आखरी फइसला सरकार करही।
स्वास्थ्य सचिव ह किहीन कि भारत म कोन्हों भी टीकाकरण कारीकरम बर दवा निर्माता मन ह पहिली देसभर के चार प्राथमिक वैक्सीन भंडार मन बर टीका उपलब्ध कराय हे, जिहां ले बड़का संख्या म एला सैंतीस राज्य के टीका स्टोर अउ फेर जिला मन म, आखरी म सार्वजनिक स्वास्थ्य केन्द्र मन तक पहुंचाय गेहे।कोरोना टीकाकरण-02
ऐति, छत्तीसगढ़ के इक्कीस जिला मन म काली सात अउ परन दिन आठ जनवरी के माॅकड्रिल करे जाही। एखर उद्देश्य कोरोना टीकाकरण के तैयारी के परीक्षण करना हे। एखर बाद संझा पांच बजे तक जिला टाॅस्क फोर्स डहार ले एखर समीक्षा करे जाही, जेखर रिपोर्ट नौ जनवरी के राज्य सरकार ल भेजे जाही।
राष्ट्रीय स्वास्थ्य मिशन के संचालक डाॅक्टर प्रियंका शुक्ला ह बतईन कि माॅकड्रिल के दउरान को-विन ऐप म एंट्री ले लेके वैक्सीन लगाय तक कतका समय लगथे, यहू देखे जाही। डाॅक्टर शुक्ला ह बतईन कि ए माॅकड्रिल हर जिला के एक ठिन सहरी अउ ग्रामीण क्षेत्र म करे जाना हे, एखर बर को-विन लिंक के इस्तेमाल करे जाही। काली सात जनवरी के बलरामपुर, बीजापुर, दंतेवाड़ा, जशपुर, कांकेर, कोंडागांव, कोरिया, नारायणपुर, सुकमा अउ सूरजपुर जिला म माॅकड्रिल करे जाही। उहें, आठ जनवरी के बालोद, बलौदाबाजार, बेमेतरा, धमतरी, गरियाबंद, जांजगीर-चांपा, कवर्धा, कोरबा, महासमुंद, मुंगेली अउ रायगढ़ जिला म कोरोना टीकाकरण के तैयारी के परीक्षण करे जाही।बर्ड फ्लू-चेतावनी
केन्द्र सरकार ह देस के कुछेक राज्य म बर्ड फ्लू ल देखत राज्य सरकार के उपाय के निगरानी बर नई दिल्ली म नियंत्रण कक्ष स्थापित करे हे। राजस्थान, मध्यप्रदेश, हिमाचल प्रदेश अउ केरल के बारह आने-आने स्थान मन म बर्ड फ्लू के फइले के खबर हे। केन्द्र सरकार के पशुपालन अउ डेयरी विभाग ह प्रभावित राज्य मन ल सुझाव देहे कि ओमन ए बीमारी के फैलाव ल रोके बर कार्ययोजना बनावय। ओमन ले यहू केहे गेहे कि बर्ड फ्लू के पुष्टि बर नमूना के जांच करय अउ निगरानी राखय।
इही बीच, छत्तीसगढ़ सरकार ह घलो बर्ड फ्लू ल लेके अलर्ट जारी कर देहे। राज्य सरकार ह जिला पशुपालन अधिकारी मन ल सतर्कता राखे के निरदेस दीन हे। राज्य के कृषि अउ पशुपालन मंत्री रविन्द्र चैबे ह कहिन कि अधिकारी मन ल बर्ड फ्लू ल लेके दिसा-निरदेस दे गेहे। पोल्ट्री फार्म अउ पक्षी मनके मउत ल लेके सत्त निगरानी राखे बर केहे गेहे। ओमन कहिन कि प्रदेस म अभी तक कोन्हों भी पोल्ट्री फाॅर्म म बर्ड फ्लू के कोन्हों लक्षण नइ मिले हे अउ ए रोग के मनुष्य म फइले के घलो कोन्हों सूचना नइ हे।रेलवे-यात्री किराया/स्पष्टीकरण
भारतीय रेलवे ह यात्री किराया बढ़ाय जाय के संभावना के बारे म मीडिया म आय खबर ल निराधार बताय हे। रेलवे ह स्पष्ट करे हे कि ए खबर मनके कोनों आधार नइ हे अउ किराया बढ़ाय के कोनों भी प्रस्ताव म फिलहाल विचार प्रकासित अउ प्रसारित करे ले बचे।

मुख्यमंत्री-प्रवास
मुख्यमंत्री भूपेश बघेल ह आज प्रदेस के नव-गठित गौरेला-पेण्ड्रा-मरवाही जिला के प्रवास के दउरान मरवाही विकासखंड के ग्राम दानीकुंडी म आयोजित समारोह म आठ करोड़ चैव्वन लाख रूपिया के लागत ले आने-आने विकास कारज के लोकार्पण अउ भूमिपूजन करीन। ए मउका मुख्यमंत्री ह कोटमी उप तहसील ल तहसील बनाय के घोसना करीन। श्री बघेल ह कारीकरम म सासन के आने-आने कल्याणकारी योजना मनके तहत तीन सौ सैंतीस हितग्राही मन ल साढ़े तेरह लाख रूपिया के सामान अउ दू सौ सैंतीस हितग्राही मन ल चार करोड़ इकसठ लाख रूपिया के सहायता अउ अनुदान रासि के चेक बांटीन।
समारोह ल संबोधित करत मुख्यमंत्री ह कहिन कि विकास कारज ल लेके मरवाही के एक ठिन अलग पहिचान बनही। श्री बघेल ह जिला म ब्लड बैंक स्थापित करे के घोसना घलो करीन।
एखर पहिली, मुख्यमंत्री ह जांजगीर-चांपा जिला के ग्राम पेण्ड्री म राज्य के पांचवां बहुदिव्यांग स्कूल भवन के उद्घाटन करीन। ए स्कूल के खुले ले अब जिला के पहली ले पांचवीं तक के दिव्यांग लइका मन ल आने-आने विधा म सिक्षा मिल सकही। एखर अलावा मुख्यमंत्री ह सासकीय जिला ग्रंथालय के लोकार्पण करीन। करीबन डेढ़ करोड़ रूपिया के लागत ले बने ए लायब्रेरी ले विद्यार्थी यूपीएससी, पीएससी, नीट, जेईई, बैंक अउ व्यापमं जइसन आने-आने प्रतियोगी परीक्षा मनके तैयारी कर सकही। ए सासकीय लाइब्रेरी म छह हजार ले जादा पुस्तक के संग आने-आने पत्र-पत्रिका, महापुरूष के जीवनी उपर आधारित पुस्तक अउ डिजिटल लाइब्रेरी के सुविधा उपलब्ध हे।

भाजपा-प्रदर्शन
भारतीय जनता पार्टी धान खरीदी अउ किसान मनके आने-आने मांग ल लेके प्रदेसभर म प्रदर्सन करही। पार्टी ह अवइया तेरह जनवरी के हर विधानसभा अउ बाईस जनवरी के जिला मुख्यालय मन म प्रदर्सन करे के निर्णय लेहे।
ए जानकारी आज पत्रकार मन ले गोठबात करत पार्टी के प्रदेस अध्यक्ष विष्णुदेव साय अउ नेता प्रतिपक्ष धरमलाल कौशिक ह दीन। श्री साय ह बतईन कि किसान मन ल धान बेचे म बारदाना संग आने परेसानी के सामाना करे बर पड़त हे। एखर बर प्रदेस के कांग्रेस सरकार जिम्मेदार हे।
उहें, श्री कौशिक ह राज्य सरकार उपर आरोप लगाय हे कि धान खरीदी के मामला म सरकार ह जानबूझ के देरी करीन। पाछु साल अट्ठाईस लाख मीटरिक टन चाउर राज्य सरकार ह एफ.सी.आई. म जमा ही नइ कर पाईस। ओमन किहीन कि किसान आत्महत्या करत हे अउ सरकार राजनीति करत हे। श्री कौशिक ह किहीन कि राजीव गांधी किसान न्याय योजना के चैथा किश्त के रासि किसान मन ल अभी तक नइ मिल पाय हे।लोकवाणी
मुख्यमंत्री भूपेश बघेल के मासिक रेडियावार्ता ‘‘लोकवाणी‘‘ के चैदहवां कड़ी के प्रसारण इतवार दस जनवरी के होही। मुख्यमंत्री लोकवाणी म ए बखत युवा मन ले गोठबात करही। ए कारीकरम के प्रसारण छत्तीसगढ़ स्थित आकाशवाणी के सबो केन्द्र अउ एफ.एम. रेडियो के अलावा क्षेत्रीय समाचार चैनल मन म बिहनिया साढ़े दस बजे ले ग्यारह बजे तक करे जाही।स्लोगन-प्रतियोगिता
स्वामी विवेकानंद के जयंती राष्ट्रीय युवा दिवस के मउका म जनसंपर्क विभाग डहार ले ‘‘गढ़बो नवा छत्तीसगढ़ अउ छत्तीसगढ़ युवा‘‘ बिसय उपर स्लोगन प्रतियोगिता के आयोजन करे जात हे। अब तक लगभग छह हजार सात सौ लोगन मन ह आॅनलाईन पंजीयन करा लेहे। स्लोगन स्व-लिखित होना चाही। भासा – छत्तीसगढ़ी, हिन्दी, अउ अंग्रेजी होही। ए प्रतियोगिता के माध्यम ले चयनित स्लोगन के उपयोग प्रचार-प्रसार बर करे जा सकही। सबो प्रतिभागी मन ल डिजिटल प्रमाण पत्र अउ सौ सर्वश्रेष्ठ स्लोगन ल जनसंपर्क विभाग डहार ले एक-एक हजार रूपिया के पुरस्कार दे जाही।
ए प्रतियोगिता म भाग लेवइया इच्छुक प्रतिभागी अवइया दस जनवरी तक जनसंपर्क विभाग के वेबसाइट म आॅनलाइन पंजीयन करा सकथे।कृषि विकास रफ्तार योजना
राष्ट्रीय कृषि विकास रफ्तार योजना बछर दू हजार इक्कीस-बाईस म चलाय बर संचालक उद्यानिकी अउ प्रक्षेत्र वानिकी छत्तीसगढ़ ह फल, साग-भाजी, मसाला अउ फूल के फसल मन ल योजना म सामिल करे बर प्रस्ताव मंगाय हे। ए संबंध म उद्यानिकी कृषक मन ले कोन-कोन से फसल ल योजना म सामिल करे जाय, एखर बर सुझाव मांगे गेहे। कृषक अपन सुझाव बारह जनवरी तक भेज सकत हे।