प्रधानमंत्री नरेन्द्र मोदी ह किहीन हे कि गुणवत्ता अउ विश्वसनीयता ब्रांड इंडिया के आधार स्तंभ होना चाही। वीडियो कान्फ्रेंस के माध्यम ले राष्ट्रीय मापिकी सम्मेलन के उद्घाटन सत्र ल संबोधित करत ओमन ए बात किहीन। भारतीय वैज्ञानिक अउ तकनीकी विशेषज्ञ मन डहार ले हासिल करे गे सफलता के सराहना करत श्री मोदी ह बिसेस रूप से देस म तैयार करे गे दू ठिन कोरोना टीका के उल्लेख करीन। प्रधानमंत्री ह किहीन कि देस म जल्दी ही विश्व के सबले बड़का टीकाकरण अभियान सुरू करे जाही।केन्द्रीय पूल-चावल
केन्द्र सरकार ह केन्द्रीय पूल के अंतर्गत भारतीय खाद्य निगम ल चैबीस लाख मीटरिक टन चाउर देके अनुमति देहे, जउन ह पाछु बछर म दे गे अनुमति के बराबर हे।
बतादन कि केन्द्रीय पुल के तहत किसान मन ले धान के खरीदी बर डी.सी.पी. अउ गैर डी.सी.पी. दूनों राज्य मन ले केन्द्र सरकार, राज्य सरकार अउ भारतीय खाद्य निगम के बीच एक समझौता ज्ञापन उपर हस्ताक्षर करे गेहे। ए समझौता के तहत जब कोनों राज्य एम.एस.पी. ले जादा प्रत्यक्ष या अप्रत्यक्ष रूप ले कोनों बोनस या वित्तीय प्रोत्साहन देथे अउ राज्य के कुल खरीद टी.पी.डी.एस. के तहत केन्द्र सरकार डहार ले राज्य ल जारी आवंटन ले जादा हे त अइसन जादा मात्रा केन्द्रीय पुल ले जादा माने जाथे। छत्तीसगढ़ सरकार किसान मन ल प्रोत्साहन रासि देवत हे, एखरे बर केन्द्रीय सरकारी खरीदी ल ओ मात्रा तक सीमित कर देहे, जेला पहिली बिना प्रोत्साहन के खरीदी करे गे रिहीस। केन्द्र सरकार एक समान नीति के अनुसरण करत हे अउ देस के जम्मों किसान मन के सहायता करत हे। छत्तीसगढ़ में अइसने खरीदी के अनुसरण करे जात हे।मुख्यमंत्री-प्रवास
मुख्यमंत्री भूपेश बघेल ह आज कोरबा जिला म आठ सौ छत्तीस करोड़ रूपिया के लागत वाला आठ सौ तिरासी विकास कार्य मनके लोकार्पण अउ सिलान्यास करीन। जिला के ओपन थियेटर घंटाघर म राखे गे कारीकरम म मुख्यमंत्री ह कतकोन योजना म छह सौ छियासी हितग्राही मन ल साढ़े सात करोड़ रूपिया के सामान बांटीन।
एखर पहिली, मुख्यमंत्री ह बिलासपुर जिला के बिल्हा विकासखंड के ग्राम सेलर म बने गौठान के निरीक्षण करीन। ए मउका म ओमन किहीन कि गौठान के माध्यम ले ग्राम स्वावलंबन के सपना साकार होवत हे। गौठान मनके कारण सत्तर एकड़ जमीन सुरक्षित होगे हे। ए जमीन ले ग्रामीण मन ल स्थानीय स्तर म रोजगार मिल हे। चैपाल म मुख्यमंत्री के आगू सेलर के जागृति महिला स्व-सहायता समूह अउ दीपांगी एग्रो ग्रुप के बीच मशरूम क्रय विक्रय बर एमओयू घलो होईस।
अपन बिलासपुर प्रवास के दूसर दिन मुख्यमंत्री ह आज जिला अउ विकासखंड अधिकारी मन ले मुलाकात करीन अउ ओमन मन ल टीम भावना काम करे बर प्रेरित करीन। ओमन किहीन कि अब विकासखंड स्तर म घलो सासकीय अंग्रेजी माध्यम स्कूल खोले जाही, जेखर ले ग्रामीण इलाका म पदस्थ अधिकारी अउ करमचारी मनके लइका मन ल लाभ होही। उहें, मुख्यमंत्री ह बिलासपुर म नवा विश्रामभवन अउ डिजिटल सेंट्रल लाइब्रेरी के लोकार्पण करीन। ओमन तारबहार म स्वामी आत्मानंद अंग्रेजी माध्यम उत्कृष्ट उच्चतर माध्यमिक विद्यालय के घलो सुभारंभ करीन।
कोरोना समाचार
प्रदेस म कोरोना संक्रमित मरीज मनके संख्या दू लाख बयासी हजार ले जादा होगे हे। काली सात सौ चैदह नवा कोरोना पाॅजिटिव मरीज मनके पहिचान करे गीस। प्रदेस म अभी नौ हजार नौ सौ अस्सी मरीज मनके इलाज कतकोन अस्पताल अउ होम आइसोलेशन म चलत हे। उहें, काली ग्यारह मनखे मनके मउत कोरोना संक्रमण ले होईस।
इही बीच, पुलिस मुख्यालय रईपुर म पदस्थ उप पुलिस अधीक्षक सुनील शर्मा के कोरोना संक्रमण ले मउत होगे हे। उहें, महासमुंद जनपद पंचायत अध्यक्ष भागीरथी चंद्राकर के घलो कोरोना संक्रमण ले मउत होगे हे। ए दूनों के इलाज रायपुर एम्स म चलत रिहीस।
उहें, प्रदेस के मुख्य सचिव अमिताभ जैन अउ प्रधान मुख्य वन संरक्षक राकेश चतुर्वेदी के कोरोना जांच रिपोर्ट पाॅजिटिव आय हे। दूनों अधिकारी होम आइसोलेशन म हवय।
भाजपा-बैठक
भारतीय जनता पार्टी के राष्ट्रीय महामंत्री अउ प्रदेस प्रभारी डी. पुरंदेश्वरी ह किहीन हे कि भाजपा कार्यकर्ता मन ‘‘विजय दो हजार तेईस‘‘ बर अभी ले जुट गेहे। कार्यकर्ता मनके परिश्रम के लाभ अवइया समय म भाजपा ल मिलही।
डी. पुरंदेश्वरी ह आज बलौदाबाजार-भाटापारा जिला भाजपा के पदाधिकारी मनके बइठका लीन। ओमन किहीन कि प्रधानमंत्री नरेन्द्र मोदी के अगुवई वाला सरकार के उपलब्धि ल जन-जन तक पहुंचाना पार्टी के लक्ष्य हे। एखर पहिली, बलौदाबाजार पहुंचे म डी. पुरंदेश्वरी के भाजपा कार्यकर्ता मन मोटर साइकिल रैली निकाल के स्वागत करीन।
उहें, भाजपा के सह प्रभारी नितिन नवीन ह आज मुंगेली जिला म पार्टी पदाधिकारी मनके बइठका लीन। बाद म पत्रकार मन ले चर्चा करत ओमन किहीन कि प्रदेस के कांग्रेस सरकार ह केन्द्र सरकार डहार ले दे गे नौ हजार करोड़ रूपिया के हिसाब नइ देहे। उहें, अट्ठाईस लाख मीटरिक टन चाउर जमा करना रिहीस, जेला अब तक नइ कर पाय हे।
भाजपा के प्रदेस प्रभारी डी. पुरंदेश्वरी अउ प्रदेश अध्यक्ष विष्णुदेव साय काली महासमुंद म पार्टी कार्यकर्ता मनके बइठका लीहीं।
इही बीच, पूर्व मुख्यमंत्री डाॅक्टर रमन सिंह ह आरोप लगाईन कि कांग्रेस के घोसना पत्र अनुसार किसान मन ल धान खरीदी के पूरा पइसा नइ मिलत हे। अंतर के रासि ल जल्दी देके वादा करे गे रिहीस, जउन ह अब तक किसान मन ल नइ मिल पाय हे।
कांग्रेस-बैठक
प्रदेस कांग्रेस अध्यक्ष मोहन मरकाम ह किहीन हे कि राज्य सरकार गोधन न्याय योजना के तहत किसान मनके मदद करत हे, जेला बोनस माने नइ जा सकय। आज रईपुर म राखे गे एक पत्रकारवार्ता म ओमन किहीन कि केन्द्र सरकार डहार ले धान के उठाव नइ करे जाय के मामला अउ केन्द्रीय कृषि बिल बर प्रदेसव्यापी आंदोलन करे जाही।
माओवादी-गिरफ्तार
बीजापुर जिला म सुरक्षा बल मन ह एक झिन माओवादी ल गिरफ्तार करे हे। एखर उपर एक लाख रूपिया के इनाम घोषित रिहीस।
मिले जानकारी के अनुसार केन्द्रीय रिजर्व पुलिस बल-सीआरपीएफ अउ जिला पुलिस बल के संयुक्त दल तलाशी अभियान म निकले रिहीस। इही दउरान उसूर थाना क्षेत्र ले एक माओवादी ल गिरफ्तार करे गीस। एखर उपर हत्या, अपहरण, विस्फोट, आम्र्स एक्ट, लूटपाट समेत कई ठिन माओवादी गतिविधि म सामिल रेहे के आरोप हे।
विश्व ब्रेल दिवस
आज विश्व बे्रल दिवस हवय। आजे ब्रेल लिपि के आविष्कारक लुई ब्रेल के जयंती घलोक हे, जउन ह दृष्टिबाधित लोगन मन बर ब्रेल लिपि तैयार करे रिहीस। लुई ब्रेल के जन्म चार जनवरी अट्ठारह सौ नौ के उत्तरी फ्रांस म होय रिहीस। केवल तीन साल के उमर म एक दुर्घटना म अपन दूनों आंख गंवा दीन। मगर अपन हौसला बनाय राखत ओमन छह बिन्दी वाला लिपि के आविष्कार करीन, जेला ब्रेल लिपि के नाम से जाने जाथे।
विश्व ब्रेल दिवस के मउका म आज छत्तीसगढ़ म कतकोन कारीकरम राखे गेहे।
औषधि पादप बोर्ड
छत्तीसगढ़ राज्य औषधि पादप बोर्ड अब ले छत्तीसगढ़ आदिवासी स्थानीय स्वास्थ्य परंपरा अउ औषधि पादप बोर्ड के नाम ले जाने जाही। प्रदेस के आदिवासी समुदाय के पारंपरिक अउ प्रचलित स्वास्थ्य पंरपरा मन ल अउ परंपरागत उपचारकर्ता मनके ज्ञान ल सहेजे अउ संवर्धित करे के उद्देश्य ले बोर्ड के नाम म परिवर्तन करे गेहे।
औषधि पादप बोर्ड के मुख्य कार्यपालन अधिकारी ह बतईन कि संस्था के कार्य म वनौषधि के विकास बर सोध अउ अनुसंधान करना, औषधि भंडारण, प्रसंस्करण अउ विपणन के योजना बनाय के संगेसंग औषधि पौधा के पहिचान अउ सर्वेक्षण काम सामिल हे। बोर्ड डहार ले जनजातीय अउ स्थानीय स्वास्थ्य पंरपरागत ज्ञान ल लोगन तक पहुंचाय बर जागरूकता अभियान घलो चलाय जाही।
राजनांदगांव-हेल्पलाइन नंबर
राजनांदगांव शहर के लोगन मन ल अब अपन समस्या के समाधान बर नगर निगम कार्यालय के चक्कर नइ लगाय बर पड़ही। लोगन मनके समस्या के निदान बर महापौर हेमा सुदेश देशमुख ह हेल्पलाइन नंबर – शून्य सात सात चार चार दो दो दो दो एक चार जारी करे हे। ए नंबर म फोन करके लोगन बिजली, पानी, सफाई, पेंसन अउ अतिक्रमण जइसन समस्या ल निगम प्रसासन ल बता सकत हे। महापौर ह बतईन कि नगर निगम सीमा क्षेत्र के इंक्यावन वार्ड के नागरिक मन ए हेल्पलाइन नंबर ले पेंसन, रासन कार्ड, जन्म अउ मृत्यु प्रमाण पत्र जइसन कतकोन समस्या के निदान पा सकत हे।