कोरोना टीका-मंजूरी-01
भारत के औषध महानियंत्रक ह आपात स्थिति म कोरोना ले बांचे के दू ठिन टीका – भारतीय सीरम संस्थान के कोविशील्ड अउ भारत बायोटेक के को-वैक्सीन के सीमित उपयोग के परमिसन दे देहे। भारत के औषध महानियंत्रक वी.जी. सोमानी ह आज ए दूनों टीका के परमिसन के घोसना करीन। ओमन बतईन कि दूनों टीका के आपात उपयोग के बिसेसज्ञ समिति के सिफारिस बाद केन्द्रीय औषध मानक नियंत्रण संगठन ह मंजूरी दीस हे।
औषध महानियंत्रक ह यहू बतईन कि भारत बायोटेक ह भारतीय आयुर्विज्ञान अनुसंधान परिषद अउ राष्ट्रीय विषाणु संस्थान पुणे के सहयोग ले को-वैक्सीन टीका तैयार करे हे। उहें, को-वैक्सीन के तीसरा चरण के परीक्षण भारत म पच्चीस हजार आठ सौ स्वयंसेवी मन उपर करे गे रिहीस अउ अब तक देस म करीबन बाईस हजार पांच सौ लोगन ल टीका लगाय जा चुके हे, जेमा अब तक मिले आंकड़ा मुताबिक ए वैक्सीन ल सुरक्षित पाय गेहे।
उहें, भारतीय सीरम संस्थान के मुख्य कार्यकारी अधिकारी एडर पूनावाला ह किहीन हे कि कुछेक सप्ताह म कोविशील्ड वैक्सीन के प्रयोग सुरू हो जही।
कोरोना टीका-मंजूरी-02
इही बीच, प्रधानमंत्री नरेन्द्र मोदी ह किहीन हे कि भारतीय सीरम संस्थान अउ भारत बायोटेक के वैक्सीन ल मंजूरी मिले ले देस ल तेजी ले कोरोना मुक्त बनाय म मदद मिलही। ट्वीट संदेस म ओमन देसवासी अउ वैज्ञानिक मन ल बधाई देवत किहीन कि कोरोना के विरूद्ध संघर्ष म ए ह एक ठिन निर्णायक मोड़ हरय।
प्रधानमंत्री ह किहीन कि भारत म बने दू ठिन वैक्सीन के आपातकालीन उपयोग के अनुमति हरेक भारतीय पर गर्व के बिसय हे। एखर ले आत्मनिर्भर भारत के सपना साकार करे म हमर वैज्ञानिक मनके योगदान के पता चलथे। कोरोना योद्धा मन बर अपन कृतज्ञता जाहिर करत ओमन किहीन कि कोरोना योद्धा मन विपरीत परिस्थित के बावजूद अनेकों मनखे के जीवन बचईन।
स्वास्थ्य मंत्री-टीकाकरण अभियान
केन्द्रीय स्वास्थ्य मंत्री डाॅक्टर हर्षवर्धन ह किहीन हे कि टीकाकरण अभियान बूथ स्तर म चलाय जाही। आज बिहनिया ओमन ट्वीट संदेश म किहीन कि एखर बर कुशल कर्मी मनके संख्या बढ़ाय बर प्रयास चलत हे अउ एखर बर टीका लगइया मन ल ट्रेनिंग दे गेहे। डाॅक्टर हर्षवर्धन ह किहीन कि टीकाकरण केन्द्र मन म अलग से प्रतीक्षा कक्ष, टीकाकरण अउ निरीक्षण कक्ष बनाय गेहे। उहें, टीका के एक सौ लाभार्थी मन बर पांच सदस्य वाले दल तैयार करे गेहे। संगे कहूं टीका लगे के तुरते बाद विपरीत प्रभाव के स्थिति म आपात किट घलो दे जाही।
स्वास्थ्य मंत्री ह बतईन कि लाभार्थी मनके पंजीयन अउ उंखर जांच बर को-विन पोर्टल के उपयोग करे जाही। फेर इही पोर्टल ले टीकाकरण कारीकरम बारे म एसएमएस अउ खुराक संबंधी जानकारी दे जाही। टीकाकरण के बाद एखर प्रतिकूल प्रभाव अउ ई-प्रमाण पत्र जारी होय के सूचना घलो इही म दे जाही।
ऐति, छत्तीसगढ़ म कोरोना टीकाकरण के तैयारी ल लेके अभ्यास करे जात हे। इही कड़ी म राजनांदगांव जिला म पहिली चरण म करीबन चैदह हजार लोगन मन ल टीका लगाय जाही। एखर बर सहर म चार केन्द्र बनाय गेहे। ए जगह मन म पहिली चरण म स्वास्थ्य कर्मचारी, आंगनबाड़ी कार्यकर्ता अउ मितानिन, दूसर चरण म पुलिस, नगर निगम अउ होमगार्ड अउ तीसर चरण म साठ बछर ले जादा के बुजुर्ग, ब्लड प्रेसर अउ डायबिटीज के रोगी मन ल प्राथमिकता दे जाही। ए टीकाकरण बर को-विन वेबसाइट म पंजीकरण कराना जरूरी होही।
प्रधानमंत्री-विद्यार्थी आह्वान
प्रधानमंत्री नरेन्द्र मोदी ह विद्यार्थी मन ले आह्वान करीन हे कि ओमन लोकल प्रोडक्ट ल ग्लोबल यानि वैश्विक बनाय बर नवा समाधान लावय। ओड़िसा म आई.आई.एम. संबलपुर म पढ़ईया लइका अउ सिक्षक मन ल संबोधित करत ओमन किहीन कि भारतीय प्रबंधन संस्थान ह आत्मनिर्भर भारत बर स्थानीय उत्पाद अउ अंतर्राष्ट्रीय सहयोग के बीच ब्रिज के काम कर सकत हे।
प्रधानमंत्री ह किहीन कि भारत ह कोरोना संकट बेरा चुनौती ल अवसर म बदलत अब्बड़ अकन क्षेत्र म सहराय के लइक काम करे हे।
मुख्यमंत्री-प्रवास
मुख्यमंत्री भूपेश बघेल ह बिलासपुर के चकरभाटा स्थित विमानतल के नाव बिलासा बाई केवटीन के नाव म अउ अंग्रेजी स्कूल तारबहार के नाव स्वर्गीय शेख गफ्फार के नाव म राखे के घोसना करीन हे। आज अपन बिलासपुर दउरा बेरा मुख्यमंत्री ह लाल बहादुर शास्त्री स्कूल म राखे गे आमसभा ल संबोधित करीन। ए दउरान ओमन कई ठिन योजना के लोकार्पण अउ भूमिपूजन करे के संगे सेंट्रल लाइबेरी के नाव ल पूर्व विधायक डाॅक्टर शिव दुलारे मिश्र के नाव म करे के घोसना घलो करीन।
एखर पहिली, मुख्यमंत्री ह आज रायगढ़ के भेलवाटिकरा गांव स्थित बगुंरसिया धान खरीदी केन्द्र पहुंच के उहां के बेवस्था के जायजा लीन। ए मउका म कृषि मंत्री रविन्द्र चैबे, उच्च सिक्षा मंत्री उमेश पटेल अउ स्थानीय विधायक उपस्थित रिहीन।
उहें, मुख्यमंत्री ह काली रायगढ़ जिला के सुपोषण अभियान कारीकरम म सामिल होके जिला म चलत ए अभियान ल सहराईन। तहां फेर मुख्यमंत्री ह लैलूंगा विकासखंड के गांव कुंजारा म स्व-रोजगार ले जुड़े युवा उद्यमी मन ले गोठबात करके उंखर हौसला बढ़ाईन। मुख्यमंत्री ह संबलपुरी म शहरी गौठान के शुभारंभ घलो करीन अउ उहां के स्व-सहायता समूह के माईलोगिन मन ले भेंट करीन।
काली चार जनवरी के मुख्यमंत्री ह बिल्हा विकासखंड के गांव सोलर म राखे गे कई ठिन कारीकरम म सामिल होही। श्री बघेल सतरंगा पर्यटन स्थल घलो जाही, जिहां मछुआ समूह मन ल सामग्री बांटहीं।
भाजपा/कांग्रेस-बैठक
भारतीय जनता पार्टी के प्रदेश प्रभारी डी. पुरंदेश्वरी अउ सह प्रभारी नबीन नितिन तीन दिन के दउरा म आज छत्तीसगढ़ पहुंचीन। ए दउरान ओमन रईपुर स्थित प्रदेस कार्यालय म पार्टी पदाधिकारी मनके बइठका लीन। तहां बाद म पत्रकार मन ले चरचा करत डी. पुरंदेश्वरी ह किहीन कि भाजपा ह किसान मनके समस्या ल लेके प्रदेस म धरना-प्रदर्शन करही।
दूसर डहार, प्रदेश कांग्रेस अध्यक्ष मोहन मरकाम के उपस्थिति म आज राजधानी स्थित कांग्रेस मुख्यालय म प्रदेस कार्यकारिणी अउ सबो जिला अध्यक्ष मनके बइठका होईस।
विस्फोटक बरामद
बीजापुर जिला म सुरक्षा बल मन ढाई किलो वजनी विस्फोटक बरामद करे हे। जिला के पुलिस अधीक्षक कमलोचन कश्यप ह बतईन कि केन्द्रीय रिजर्व पुलिस बल-सीआरपीएफ, जिला पुलिस बल अउ डिस्ट्रिक्ट रिजर्व गार्ड-डीआरजी के संघरा टीम ह सर्चिंग बर निकले रिहीस, तभे तर्रेम थाना क्षेत्र के तर्रेम-सिलगेर रद्दा म सुरक्षा बल मन ढाई किलो के विस्फोटक बमराद करीन।
खाद्य लाइसेंस-आॅनलाइन फीस
प्रदेस म अब खाद्य कारोबारी मन ल लाइसेंस ले बर आॅनलाइन फीस जमा करे बर पड़ही। लाइसेंस बनाय के नियम म हाले म परिवर्तन करे गेहे। खाद्य सुरक्षा अउ मानक अधिनियम-दू हजार छह अउ दू हजार ग्यारह के चलत सबो खाद्य व्यापारी मन तीर वैध लाइसेंस अउ पंजीयन होना जरूरी हे। अइसन नइ होय म उंखर मनके खिलाफ पांच लाख रूपिया के जुर्माना अउ छह महीना के जेल के प्रावधान हे।