आज दिनभर के खबर ल अपन गुरतुर छत्तीसगढ़ी भाखा म पढ़व

कोरोना टीकाकरण-पूर्वाभ्यास
कोरोना टीका लगाय के अभ्यास काली ले पूरा देस म सुरू होही। केन्द्र सरकार ह जम्मों राज्य सरकार अउ केन्द्रसासित प्रदेश ले टीकाकरण बर पूरा तैयारी करे बर केहे हे। जम्मों राज्य के राजधानी मन म कम ले कम तीन जगह म पूर्वा अभ्यास करे जाही। एखर उद्देश्य सही टीका लगाय के बेरा म अवइया चुनौती के पता लगाना अउ एखर ले जुड़े लोगन मन ल प्रसिक्षित करना हे।
उहें, केन्द्रीय स्वास्थ्य अउ परिवार कल्याण मंत्री डाॅक्टर हर्षवर्धन ह आज नई दिल्ली म कोरोना टीकाकरण के अभ्यास बर करे गे तैयारी के समीक्षा करीन।
ऐति, छत्तीसगढ़ म कोरोना वैक्सीन के टीकाकरण के तैयारी जोरदरहा चलत हे। प्रदेस के सात जिला मन म काली दू जनवरी के टीकाकरण बर अभ्यास करे जाही। ए जिला हे – रईपुर, सरगुजा, दुरूग, बिलासपुर, राजनांदगांव, बस्तर अउ गौरेला-पेण्ड्रा-मरवाही। ए जिला मन म बिहनिया दस बजे ले मंझनिया दू बजे तक अभ्यास करे जाही।
राष्ट्रीय स्वास्थ्य मिशन के संचालक डाॅक्टर प्रियंका शुक्ला ह वीडियो कान्फ्रेंसिंग के माध्यम ले पूर्वा अभ्यास वाले जम्मों सातों जिला म टीकाकरण बर बनाय गे प्रभारी अधिकारी मन ले तैयारी के जानबा लीन।
उहें, राज्य टीकाकरण अधिकारी डाॅक्टर अमर सिंह ठाकुर ह बतईन कि पहिली चरण म दू लाख चैंतीस हजार स्वास्थ्य कर्मी मन ल टीका लगाय जाही।कोरोना-टीकाकरण सिरिंज
ऐति, केन्द्र सरकार ह देस म कोविड-नाइंटीन के टीकाकरण बर तिरासी करोड़ सिरिंज राखे के आदेस देहे। केन्द्रीय स्वास्थ्य मंत्रालय के मुताबिक पैंतीस करोड़ उपरहा सिरिंज बर घलो निविदा मंगाय गेहे। सरकार ह कोरोना के वैक्सीन बर तीस करोड़ लोगन मनके प्राथमिकता सूची तैयार करे हे, जेमा स्वास्थ्य कर्मी, अग्रणी कार्यकर्ता अउ सफाई कर्मी सामिल हे।
कोरोना के वैक्सीन ल एकदम कम तापमान म रखना जरूरी होथे। ए वैक्सीन ल राखे बर देस के करीबन अट्ठाईस हजार नौ सौ सैंतालीस कोल्ड चेन पाइंट्स के प्रयोग करे जाही।प्रधानमंत्री-लाइट हाउस परियोजना
प्रधानमंत्री नरेन्द्र मोदी ह जम्मों लोगन मन बर घर बनाय के बात काहत किहीन कि गरीब मनके परेसानी ह अब खतम होही। नवा बछर के पहिली दिन आज वर्चुअल माध्यम ले देस के छह राज्य म वैश्विक आवासीय प्रौद्योगिकी चुनौती-जी.एच.टी.सी.-इंडिया के तहत लाइट हाउस परियोजना के आधारसिला राखत प्रधानमंत्री ह ए बात किहीन।

छत्तीसगढ़-पुरस्कार
प्रधानमंत्री आवास योजना-शहरी के तहत छत्तीसगढ़ म चलाय जात        ‘‘मोर जमीन-मोर मकान‘‘ माॅडल ल केन्द्र सरकार ह सम्मानित करे हे। प्रधानमंत्री नरेन्द्र मोदी के उपस्थिति म केन्द्रीय आवास अउ सहरी कार्यमंत्री हरदीप सिंह पुरी ह वीडियो कान्फ्रेंसिंग के माध्यम ले विजेता मन ल इनाम दीन। छत्तीसगढ़ कोति ले नगरीय प्रसासन मंत्री डाॅक्टर शिवकुमार डहरिया ह ए पुरस्कार ल लीन।
उहें, डोंगरगढ़ के नगर पालिका परिषद ल जादा ले जादा घर बनाय के सेती ‘‘बेस्ट परफाॅर्मिंग म्यूनिसिपल काउंसिल‘‘ के श्रेणी म पुरस्कार मिले हे। एखर अलावा धमतरी जिला के मंजू साहू, मुमताज बेगम अउ कबीरधाम जिला के ममता वर्मा के घर मन ल देस के बेस्ट हाउस कंस्ट्रक्शन श्रेणी म इनाम मिले हे।

ई-समाधान वेबसाइट
राज्यपाल अनुसुईया उइके ह आज राजभवन म ई-समाधान वेबसाइट के लोकार्पण करीन। ए वेबसाइट के माध्यम ले राज्यपाल ल आम लोगन डहार ले भेजे गे अरजी ल जुड़े विभाग ल भेजे जाही। ए मउका म राज्यपाल ह किहीन कि ई-समाधान प्रणाली ले जनता मनके समस्या ह जल्दी सुलझही।
जानबा के मुताबिक ई-समाधान वेबसाइट ले राज्य के करीबन बत्तीस सौ सरकारी आॅफिस ल जोड़े गेहे।

नववर्ष-स्वागत
दुनिया के संगेसंग प्रदेस म नवा बछर खुसी अउ उछाह के संग मनाय जात हे। लोगन मन ह बछर दू हजार इक्कीस के स्वागत जोस के संग करीन। कोरोना ले जुड़े दिसा-निरदेस के पालन करत लोगन मन ह नवा साल के स्वागत एक-दूसर ल बधाई देके करत हवय। नवा बछर के पहिली दिन आज मंदिर-देवाला मन म श्रद्धालु मनके भीड़ बाढ़ गेहे।
राष्ट्रपति, उपराष्ट्रपति अउ प्रधानमंत्री ह देस के लोगन मन ल नवा बछर के सुभकामना दे हवय। छत्तीसगढ़ के राज्यपाल अउ मुख्यमंत्री ह घलो प्रदेस के लोगन मन ल नवा बछर के बधाई अउ सुभकामना देहे।

परीक्षा-तैयारी
दसवीं अउ बारहवीं बोर्ड के परीक्षा म अवइया परेसानी ल दूर करे बर राजनांदगांव जिला म सिक्षा कार्ययोजना बनाय गेहे। ए कार्ययोजना म हर हफ्ता छात्र मन ले पाठ्यक्रम के आने-आने प्रश्न ल बनवाय जाही। ए दउरान अवइया कठिनाई ल दूर करे बर छात्र मनके मदद करे जाही। बिसेसज्ञ मनके मानना हे कि अइसन करे ले छात्र मनके मानसिक तनाव कम होही अउ संगेसंग बोर्ड परीक्षा के तैयारी बढ़िया ढंग ले हो सकही।

विस्फोटक-बरामद
कोंडागांव जिला म सुरक्षा बल मन ह सात किलो वजनी विस्फोट बरामद करे हे। हमर संवाददाता ले मिले जानबा के मुताबिक जिला पुलिस बल अउ भारत तिब्बत सीमा पुलिस-आईटीबीपी के संयुक्त दल ह मर्दापाल थाना क्षेत्र म तलाशी अभियान म निकले रिहीन। इही दउरान एरंडवाल अउ एहकली रद्दा उपर सुरक्षा बल मन ह सात किलो वजनी विस्फोटक अउ वायर के संग डेटोनेटर बरामद करीन। बाद म एला निष्क्रिय कर दे गीस।

टोल प्लाजा-फास्टैग
केन्द्रीय सड़क परिवहन अउ राजमार्ग मंत्रालय ह राष्ट्रीय राजमार्ग नेटवर्क उपर टोल प्रभार ल पूरा तरीका ले फास्टैग के माध्यम ले लेके तारीख ल पन्द्रह फरवरी तक बढ़ा दे गेहे। एखर पहिली, भारतीय राष्ट्रीय राजमार्ग प्राधिकरण ह आज एक जनवरी के आखिरी तारीख राखे रिहीस। ए बेरा फास्टैग ले टोल के भुगतान करीबन अस्सी प्रतिशत तक होवत हे।

मुख्यमंत्री-रिसाली
मुख्यमंत्री भूपेश बघेल ह आज नवा बछर के पहिली दिन दुरूग जिला के रिसाली म कामगार मनके संग बितईन। ए मउका म ओमन किहीन कि किसान अउ मजूर मनके भागीदार ले ही विकास के नींव खड़े होथे। ओमन किहीन कि कामगार मनके हित ल ध्यान म रखना अउ उंखर आर्थिक सुधार बर नवा मउका तलासना राज्य सरकार के पहिली प्राथमिकता हरय। ए दउरान मुख्यमंत्री ह जम्मों कामगार मन ल मिठई खवा के साॅल दीन।
उहें, मुख्यमंत्री ह आज रईपुर के पुलिस परेड ग्राउंड म घलो पुलिस जवान मन बर राखे गे नववर्ष कारीकरम म सामिल होईन। ए मउका म मुख्यमंत्री ह कोरोना संक्रमण के दउरान पुलिस कर्मी अउ अर्द्धसैनिक बल मनके जवान डहार ले करे के काम के सराहना करत किहीन कि पुलिस ह ‘‘परित्राणाय साधुनाम‘‘ के सूत्र ल चरितार्थ करके देखाय हे।

संक्षिप्त समाचार
अउ अब थोरकुन समाचार सार म-
– महासमुंद जिला के डुमरडीह, खेड़ीगांव अउ बेमचागांव ले राजस्व अउ खाद्य विभाग ह एक सौ बयालीस बोरा धान जब्त करे गेहे। ए मामला म चार झिन लोगन मन उपर कार्रवाई करे गेहे।

– पूर्व केन्द्रीय मंत्री अउ सांसद चंदूलाल चंद्राकर के आज जयंती हरय- ए मउका म मुख्यमंत्री ह ओमन ल श्रद्धांजलि दे हवय।

– प्रधानमंत्री ग्राम सड़क योजना के तहत छत्तीसगढ़ ग्रामीण सड़क विकास अभिकरण डहार ले राज्य गुणवत्ता समीक्षक बर अरजी मंगाय गेहे। अरजी जमा करे के आखिरी तारीख आठ जनवरी हे।

– रतनलाल डांगी ह आज बिलासपुर रेंज के पुलिस महानिरीक्षक के पदभार ग्रहण करीन।

– बिलासपुर शहर के पल्लव भवन के तीर स्थित पंजाब नेशनल बैंक के जोनल आॅफिस म आगी लगे ले लाखों रूपिया के जिनीस जर गे।
अउ

– गरियाबंद जिले के मैनपुर परिक्षेत्र म चीतल के सिकार मामला म वन विभाग ह एक झिन अउ आरोपी ल गिरफ्तार करे हे। एला मिलाके अब तक आठ झिन आरोपी के गिरफ्तारी हो चुके हे।