आज दिनभर के खबर ल अपन गुरतुर छत्तीसगढ़ी भाखा म पढ़व

धान खरीदी बर बनाये गे मंत्रिमंडलीय उप समिति ह आज रायपुर म एफ.सी.आई. डहार ले चांउर जमा नइ करे अउ बोरा के कमी के सेती धान बिसाय म आवत परेसानी के बारे म प्रदेश के किसान संगठन मनले गोठबात करीन। बइठका म कृषि मंत्री रविंद्र चैबे ह कीहिन कि सरकार डहार ले आजतक एफसीआई म चांउर लेके मंजूरी नइ देके सेती धान खरीदी अउ कस्टम मिलिंग के पूरा काम प्रभावित होत हे। ओमन कीहिन कि मुख्यमंत्री ह प्रधानमंत्री अउ केंद्रीय कृषि मंत्री ले एफसीआई म धान जमा कराय के मंजूरी देके बारे म गोठबात करे हे। कृषि मंत्री ह बताइन कि राज्य सरकार ह अपन स्तर म बोरा के बेवस्था करके धान बिसावत हे। बइठका म प्रदेश के जम्मों जिला ले करीबन तीन सौ किसान शामिल होइन। किसान मन ह सरकार ल पूरा सहयोग करे के भरोसा देवाइन।