विधानसभा सत्र
छत्तीसगढ़ विधानसभा के सीतकालीन सत्र काली इक्कीस दिसंबर ले सुरू होही। ए सत्र तीस दिसंबर तक चलही। ए दउरान कुल सात बइठका होही। अधिसूचना के मुताबिक ए सत्र म वित्तीय अउ सासकीय काम संपादित करे जाही। राज्य म कोरोना संक्रमण ल देखत हुए सीतकालीन सत्र के दउरान कोरोना ले बचाव संबंधी दिसा-निरदेस के घलो पालन करे जाही।
महात्मा गांधी-शताब्दी वर्ष
मुख्यमंत्री भूपेश बघेल ह किहीन कि देस के स्वतंत्रता आंदोलन के अलावा हर युग म छत्तीसगढ़ अउ इहां के महापुरूष मनके महत्वपूर्ण योगदान रिहीन। आज राष्ट्रपिता महात्मा गांधी के पहिली बार रायपुर आय के शताब्दी वर्ष समारोह ले वीडियो कान्फ्रेंसिंग के माध्यम ले संबोधित करत मुख्यमंत्री ह किहीन कि राष्ट्रपिता डहार ले सुरू करे गे सविनज्ञ अवज्ञा आंदोलन के सबले अच्छा उदाहरण प्रदेस के किसान मनके कंडेल नहर सत्याग्रह हवय। ओमन ह किहीन कि प्रदेस के आदिवासी मन ह बापू ले प्रेरणा लेके जंगल सत्याग्रह सुरू करीन ए आंदोलन म हजारों नौ-जवान अपन नौकरी छोड़ के सामिल होईन। हजारों लोगन मन ह जेल यात्रा घलो करीन। श्री बघेल ह किहीन कि अछूतोंद्धार के लड़ाई छत्तीसगढ़ ले सुरू होईस।
मुख्यमंत्री ह किहीन हे कि आज छत्तीसगढ़ गांधीजी के दिखाय रद्दा म चल पड़े हे। ओमन ह किहीन कि राष्ट्रपिता के परिकल्पना ल साकार करे बर राज्य सरकार ह सुराजी गांव योजना चालू करे हे, जेमा किसान अउ गांव आत्मनिर्भरता के ओर बढ़त हे। ओमन ह किहीन कि छत्तीसगढ़ ह दुनिया ल देखा देहे कि गोबर ले भी पइसा कमाय जा सकत हे। मुख्यमंत्री ह किहीन कि गोबर के बिक्री अउ वर्मी कम्पोस्ट ले लोगन मनके आय बाढ़े हे। संगेसंग प्रदेस, जैविक खेती डहार आगू बढ़े हे। श्री बघेल ह किहीन कि छत्तीसगढ़ के महापुरूष मनके योगदान ले नवा पीढ़ी ल जानकारी देके जरूरत हे।
कारीकरम म कुष्ठ सेवा कर्मी मन ल कुष्ठ उन्मूलन सेवा सम्मान अउ सफाईकर्मी मन ल स्वच्छता योद्धा सम्मान ले सम्मानित करे गीस।
अवैध धान-कार्रवाई
प्रदेस म समर्थन मूल्य म धान खरीदी सुरू हो के संग ही सीमावर्ती जिला मन म अवैध धान के परिवहन के मामला भी सामने आवत हे। ए मामला म कबीरधाम जिला के चिल्फी क्षेत्र म जांच के दउरान पुलिसकर्मी मन ह जबलपुर ले आवत एक ट्रक ले छह सौ एक बोरी कुल दो सौ चालीस क्विंटल अवैध धान बरामर करीन। धान के अनुमानित कीमत करीब तीन लाख रूपिया बताय जावत हे।
खबर के मुताबिक एखर ले पहिली चिल्फी थाना के पुलिसकर्मी मन ह अवैध धान के परिवहन करे के मामला म तीन ट्रक ले साढ़े दस लाख रूपिया कीमत के करीब सात सौ पैंतालीस क्विंटल धान जब्त करे रिहीन।
ऐति, महासमुंद जिला के भोरिंग अउ अछोली गांव म अवैध रूप ले धान के भंडारण करइया तीन झिन लोगन मन उपर कार्रवाई करे गेहे। एमा दू झिन लोगन मन ले उनचास कट्टा धान बरामद करे गेहे। उहें, तरेकेला गांव म सत्तर बोरा धान जब्त करे गेहे। खबर के मुताबिक पिथौरा तहसील के अंतर्गत अवैध धान भंडारण के अब तक ग्यारह मामला आगू आय हे। एमा करीबन दू सौ तीस क्विंट ल धान जब्त करे गेहे।
कोरोना समाचार
देस म कोरोना संक्रमण ले स्वस्थ होवइया मनके दर बढ़के पंचानवे दशमलव पांच-एक प्रतिसत होगे हे। पिछलइया चैबीस घंटा म उनतीस हजार ले जादा मरीज मन ठीक होय हे।
केन्द्रीय स्वास्थ्य मंत्रालय के मुताबिक स्वस्थ होवइया मनके कुल संख्या बाढ़के पंचानवे लाख अस्सी हजार होगे हे। वर्तमान म देस म संक्रमण के तीन लाख पांच हजार सक्रिय मामला हे।
ऐति, छत्तीसगढ़ म काली एक हजार तीन सौ अड़सठ नवा कोरोना संक्रमित मरीज मनके पहिचान करे गीस। एमा सबले जादा एक सौ चैसठ मरीज रईपुर जिला म मिले हे। उहें, बिलासपुर म एक सौ तेईस, दुर्ग जिला म एक सौ बीस, अउ रायगढ़ म एक सौ पांच मरीज मिले हे। जबकि सबले कम सुकमा जिला म एक पाॅजिटिव मरीज पाय गेहे। प्रदेस म कोरोना संक्रमित मरीज मनके कुल संख्या दो लाख छैसठ हजार ल पार कर गेहे। वर्तमान म सत्रह हजार ले ज्यादा कोरोना पाॅजिटिव मरीज मनके आने-आने अस्पताल अउ होम आइसोलेशन म इलाज चलत हे। जबकि, दो लाख छियालीस हजार ले जादा मरीज कोरोना संक्रमण ले मुक्त हो चुके हे।
विकास उपाध्याय-नियुक्ति
अखिल भारतीय कांग्रेस कमेटी ह संसदीय सचिव अउ रईपुर पश्चिम ले विधायक विकास उपाध्याय ल राष्ट्रीय सचिव नियुक्त करे हे। एखरे संग असम के प्रभारी सचिव के दायित्व घलो सौंपे गेहे।
जानकारी के मुताबिक एखर ले पहिली विकास उपाध्याय ह एनएसयूआई अउ युवक कांग्रेस म घलो बड़े जिम्मेदारी निभा चुके हे।
हादसा
धमतरी जिला म होय सड़क हादसा म दू झिन लोगन के मउत होगे। जानकारी के मुताबिक रायपुर अउ महासमुंद के कारोबारी कार म सवार होके जगदलपुर जावत रिहीस। इही दउरान कुरूद थाना के डांडेसरा के तीर उंखर कार विपरीत दिसा म आवत ट्रक ले टकरा गीस। ए हादसा म दू झिन के मउका म ही मउत होगे। दूनों मृतक चाय कारोबारी बताय जावत हे।
उहें, रायपुर के सरोरा स्थित एक निजी कंपनी म होय हादसा म झुलसे दू श्रमिक मन ले एक श्रमिक के उपचार के दउरान मउत होगे। जबकि, एक आने श्रमिक गंभीर हवय। बताय जावत हे कि पाछु पन्द्रह दिसंबर के काम के दउरान होय सिलेंडर पाइप
म विस्फोट होय ले दू श्रमिक गंभीर रूप ले झुलस गे रिहीन।
मौसम
प्रदेस के उत्तरी भाग म ए समय कड़ाका के जाड़ पड़त हे। जानकारी के मुताबिक अंबिकापुर के न्यूनतम तापमान तीन डिग्री सेल्सियस गिरके छह दशमलव पांच डिग्री सेल्सियस म पहुंच गेहे। उहें, मैनपाट के न्यूनतम तापमान चार डिग्री सेल्सियस दर्ज करे गेहे। बिहनिया आने-आने जगह मन पाला पड़े के खबर घलो हे। उहें, जांजगीर-चांपा जिला म सीतलहर चले के खबर मिले हे।
मौसम विभाग के अनुसार उत्तरी दिसा ले आवत ठंडा हवा के सेती अवइया दू-तीन तक सरगुजा संभाग म तापमान म अउ गिरावट आय के संभावना हे। विभाग के अनुसार प्रदेस के उपर छाय बादल छंट गेहे। दिन म तेज धूप पड़े ले मौसम सुष्क बने हुए हे, जेखर कारण प्रदेस के मौसम तेजी ले बदलत हे। पाछु चैबीस घंटा के दउरान न्यूनतम तापमान म करीब पांच डिग्री सेल्सियस के गिरावट आय हे। तापमान गिरे के संग ठंड घलो बढ़ गेहे।
इही बीच, कड़ाके के ठंड ले बचे बर लोगन मन गर्म कपड़ा अउ अलाव के सहारा लेवत हे।