प्रधानमंत्री नरेन्द्र मोदी ह केहे हे कि न्यूनतम समर्थन मूल्य ल लेके किसान मन ल गुमराह करे जावत हे। फेर सरकार ह एला बढ़ावा देवत हे। ओमन किहीन कि सरकार ह न सिरिफ न्यूनतम समर्थन मूल्य म वृद्धि करे हे, बल्कि जादा मात्रा म किसान मन ले उपज खरीदे हे।
प्रधानमंत्री ह आज मध्यप्रदेश सरकार के किसान कल्याण कारीकरम म वीडियो कान्फ्रेंसिंग के माध्यम ले राज्य के किसान मन ल संबोधित करीन। प्रधानमंत्री ह केहे हे कि अभी के सरकार ह पाछु छै बछर म किसान मनके कल्याण बर कतकोन उपाय करे हे। किसान मनके सहायता बर उंखर खाता म कतकोन रासि अंतरित करे गेहे। प्रधानमंत्री ह केहे हे कि किसान मन ल किसान क्रेडिट कार्ड के सुविधा दे जावत हे। भंडारण सुविधा बढ़ाय बर कतकोन काम होवत हे। संगेसंग किसान मनके प्रगति बर ओमन ल कई ठिन आधुनिक सुविधा दे जावत हे।
प्रधानमंत्री ह केहे हे कि नवा कृषि कानून ल लेके किसान मन ल गुमराह करे जात हे। ओमन बतईन कि देस के किसान मन, किसान संगठन, कृषि विशेषज्ञ, कृषि अर्थशास्त्री, कृषि वैज्ञानिक अउ प्रगतिसील किसान मन घलो खेती के क्षेत्र म सुधार के मांग करत हे। ओमन यहू किहीन कि ए कृषि सुधार कानून रातों-रात नइ आय हे।किसान महापंचायत
भारतीय जनता पार्टी के प्रदेस इकाई ह कृषि सुधार कानून के समर्थन म आज कबीरधाम के गांधी मैदान म किसान महापंचायत के आयोजन करे गीस। कारीकरम ल संबोधित करत भाजपा नेता मन केन्द्र सरकार के कृषि सुधार कानून ल किसान हित म बताय हे। ओमन कहिन कि ए अधिनियम परिवहन सुल्क करे अउ पारदर्सिता बढ़ाय के अलावा किसान मनके आय बढ़ा के ओमन ल उपज के बेहतर मूल्य दिलाही।
ए कारीकरम म भाजपा के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह, प्रदेश अध्यक्ष विष्णुदेव साय, नेता प्रतिपक्ष धरमलाल कौशिक, राजनांदगांव सांसद संतोष पांडेय के संघरा कतकोन जनप्रतिनिधि, कार्यकर्ता अउ हजारों किसान सामिल होईन।
एक भारत-श्रेष्ठ भारत
केन्द्र सरकार के ‘एक भारत-श्रेष्ठ भारत‘ योजना म आज ले छत्तीसगढ़ म घरेलू पर्यटन उपर एक ठिन रोड-शो सुरू होय हे। ए रोड-सो के आयोजन केन्द्रीय पर्यटन मंत्रालय के संग छत्तीसगढ़ अउ गुजरात पर्यटन बोर्ड मिलके करत हे। एखर सुभारंभ आज रईपुर म केन्द्रीय पर्यटन मंत्री प्रहलाद पटेल ह करीन। ए बेरा म छत्तीसगढ़ के पर्यटन मंत्री ताम्रध्वज साहू घलो उपस्थित रिहीन।
कारीकरम ल संबोधित करत केन्द्रीय मंत्री प्रहलाद पटेल ह किहीन कि छत्तीसगढ़ के संघरा देस के कतकोन राज्य म प्राकृतिक, सांस्कृतिक अउ धार्मिक के संगेसंग कई तरह के पर्यटन के असीम संभावना हे। ओमन कहिन कि कोरोना संकट ल देखत पर्यटन ल बढ़ावा दे बर अब होटल संचालक अउ टूर आॅपरेटर मन ल स्वच्छता संबंधी मापदंड के बिसेस ध्यान रखना चाही।
खबर हे कि कोरोना संकट सुरू होय के बाद एक भारत-श्रेष्ठ भारत अभियान म छत्तीसगढ़ म होवइया घरेलू पर्यटन रोड-शो देस म अपन तरह के पहला कारीकरम हे। एमा छत्तीसगढ़ अउ गुजरात के टूर आॅपरेटर मन ह एक जगह मिलजुल के विचार-विमर्स करत हे। संगेसंग ओमन ल छत्तीसगढ़ के प्रमुख पर्यटन स्थल भ्रमण घलो कराय जात हे। ए कारीकरम म गुजरात के पन्द्रह टूर आॅपरेटर सामिल होवत हे। एक भारत-श्रेष्ठ भारत अभियान के उद्देश्य पर्यटन अउ सांस्कृतिक आदान-प्रदान ल बढ़ावा देके संघरा लोगन ल देस के कतकोन राज्य के समृद्ध सांस्कृतिक विरासत ले परिचित कराना घलो हे।
केन्द्रीय मंत्री-दौरा
केन्द्रीय इस्पात राज्यमंत्री फग्गन सिंह कुलस्ते छत्तीसगढ़ प्रवास म आज दंतेवाड़ा पहुंचीन। ए बेरा श्री कुलस्ते ह मां दंतेश्वरी देवी के दर्सन करीन अउ देस अउ प्रदेस के खुसहाली के कामना करीन।
एखर बाद ओमन बचेली के किरंदुल एनएमडीसी के माइंनिग प्लांट के अवलोकन करत उत्पादन के जानकारी लीन। ए बेरा ओमन पत्रकार मन ले चर्चा करत कहिन कि अवइया समय म डी.एम.एफ. मद के रासि के उपयोग बस्तर के अउ बने विकास म करे जाही।
घासीदास जयंती
समाज ल एकता, भाईचारा, समरसता अउ मिलजुल के रेहे के संदेस देवइया बाबा संत गुरू घासीदास के जयंती आज प्रदेसभर म श्रद्धा अउ उछाह के संग मनाय जावत हे। ए बेरा म कतकोन जगह म पवित्र जैतखांभ के पूजा-अर्चना करके सफेद ध्वजा फहराय गीस। उहें, राजधानी रईपुर के खमतराई सतनाम भवन म जोड़ा जैतखांभ के पूजा करे के बाद दू सौ चैसठ दीया जलाय गीस। अइसने, न्यू राजेन्द्र नगर सांस्कृतिक भवर परिसर म सार्वजनिक जयंती समारोह के आयोजन करे जात हे। राष्ट्रीय साहित्य संगोष्ठी के घलो आयोजन करे गीस। प्रभात फेरी निकाले के संघर सुघ्घर पंथी नृत्य के प्रस्तुति घलो होईस।
ए डहार बिलासपुर के महंत बाड़ा म बिहनिया जैतखांभ म ध्वजा अर्पित करे गीस। भजन अउ भंडारा के संघरा गणेश नगर म सोभा यात्रा घलो निकाले गीस।
ओति, बलौदाबाजार के गिरौदपुरी म गुरू घासीदास के जन्म स्थान अउ कर्मभूमि म कोरोना संक्रमण के दिसा-निरदेस के पालन करत कारीकरम आयोजन करे गीस अउ ए बेरा म कुतुब मीनार ले ऊंचा जैतखांभ म सफेद ध्वज चढ़ाय गीस।
विशेष कार्यक्रम
कर संबंधी विवादित मामला के निपटारा करे बर आयकर विभाग डहार ले चलाय जावत योजना ‘‘विवाद से विश्वास‘‘ के तहत आवेदन करे के आखिरी तारीख अवइया तीस दिसंबर हरय। ए योजना के तहत विवादित रासि उपर कर भुगतान अवइया साल इक्कीस मार्च तक करे जा सकथे। ‘विवाद से विश्वास‘‘ योजना के उद्देश्य अउ आने-आने पहलु के बारे म विस्तार ले जानकारी हासिल करे बर आकाशवाणी समाचार ह छत्तीसगढ़ के प्रधान आयकर आयुक्त अमरेन्द्र कुमार ले बिसेस गोठबात करे हे। ए बिसेस भेंटवार्ता के प्रसारण काली उन्नीस दिसंबर के बिहनिया ग्यारह बजे आकाशवाणी रईपुर केन्द्र डहार ले करे जाही। एला छत्तीसगढ़ के जम्मों आकाशवाणी केन्द्र रिले करही।
मुस्कान-अभियान
गंवाय लइका मन ल खोजे बर प्रदेस के पुलिस ह ‘मुस्कान अभियान‘ चलावत हे। ए कड़ी म रायगढ़ पुलिस ह पाछु पन्द्रह दिन म ए अभियान म तेरह झिन नाबालिग लइका मन ल खोजके वापस घर भेजीन। ए लइका मन ल प्रदेस के रईपुर, महासमुंद, जशपुर, जांजगीर-चांपा के संघरा दिल्ली, आगरा, बैंगलोर, हावड़ा अउ सम्बलपुर ले बरामद करे गीस।
संक्षिप्त समाचार
अउ अब थोरकुन समाचार सार म–
– बस्तर के मुर्धन्य साहित्यकार लाल जगदलपुरी के जनम दिवस के बेरा म काली जगदलपुर म तीन दिवसीय साहित्य महोत्सव के सुभारंभ करे गीस। ए बेरा म नवा बने टाउनहाॅल भवन के लोकार्पण घलो करे गीस।
– राज्य सरकार के दू बछर पूरा होय म राजनांदगांव जिला म कांग्रेस कार्यकर्ता मन ह सरकार के योजना ले लाभान्वित होवइया हितग्राही मनके सम्मान करीन।
– बीजापुर जिला के पामेड़ थाना क्षेत्र म माओवादी मन ह एक ठिन गाड़ी ल आगी लगा दीस।
– रायगढ़ के भगवानपुर म घर बनाय के बेरा करेंट के चपेट म आय हे दू झिन मजदूर के मउत होगे।
– राजनांदगांव जिला के मोहला थाना म पदस्थ सहायक आरक्षक के चिल्हाटी गांव म फांसी लगाके आत्महत्या करे के मामला सामने आए हे।
– गोवा म फंसे कोंडागांव जिला के कोंदकेरा अउ छोटेमाल गांव के रहवइया दू झिन मजदूर ल पुलिस के सहायता ले वापस उंखर गांव लाय गीस।
– जांजगीर-चांपा जिला के अकलतरा के एक ठिन मंदिर भगवान के तीन ठिन मूर्ति, चांदी के छत्र अउ दू लाख रूपिया नगद चोरी होय के मामला सामने आये हे।
– कबीरधाम जिला म अवैध खनिज परिवहन के मामला म छै ठिन गाड़ी ल जब्त करे गीस। उहें, गाड़ी मालिक मनके उपर डेढ़ लाख रूपिया के जुर्माना लगाय गेहे।
अउ
– कोंडागांव जिला म पोस्ट मैट्रिक छात्रवृत्ति बर आॅनलाईन आवेदन करे के समय-सीमा तीस दिसंबर तक बढ़ा दे गेहे।