प्रदेश म कंाग्रेस सरकार के कार्यकाल के आज दू बछर पूरा होगे हे। ए मउका म आने आने विभाग के मंत्री, जनप्रतिनिधि अउ कंाग्रेस के प्रमुख नेता मन ह अलग-अलग जगा म आयोजित कारीकरम के माध्यम ले राज्य सरकार के योजना अउ उपलब्धि उपर प्रकास डालीन।
इही कड़ी म प्रदेस के कांग्रेस अध्यक्ष अउ विधायक मोहन मरकाम ह कोंडागांव म प्रेसवार्ता ल संबोधित करत किहीन कि कांग्रेस सरकार ह अपन छत्तीस घोषणा म ले चैबीस घोषणा ल पूरा कर चुके हे। ओमन किहीन कि पाछु दू बछर के दउरान राज्य सरकार गांव, गरीब अउ सजाज के हर तबका बर संवेदनशीलता के संग काम करत हे।
उहें, बस्तर विकास प्राधिकरण के अध्यक्ष अउ विधायक लखेश्वर बघेल ह घलो जगदलपुर म मीडियाकर्मी मन ले चरचा करत राज्य सरकार के उपलब्धि मन ल गिनाईन।
इही बीच, महासमुंद के टाउनहाॅल म आज ले दू दिवसीय विकास प्रदर्शनी लगाय गेहे। एमा राज्य सरकार के योजना अउ उपलब्धि के जानकारी चित्र के माध्यम ले दे जात हे। एखर समापन काली होही।
ओति, भाजपा के प्रदेश अध्यक्ष विष्णुदेव साय ह कांग्रेस सरकार के दू बछर के कार्यकाल म होय काम लेके सवाल उठाईन हे। श्री साय ह आरोप लगाय हे कि कांग्रेस ह बेरोजगार भत्ता, आधा बिजली बिल, यूनिवर्सल हेल्थ स्कीम, पीडीएस अउ महिला सुरक्षा ल लेके करे गे कोन्हों भी वादा ल पूरा करे हे।
उहें, भाजपा के प्रदेश प्रवक्ता अउ पूर्व मंत्री केदार कश्यप ह घलो राज्य सरकार उपर वादाखिलाफी के आरोप लगाय हे। ओमन कहिन कि राज्य सरकार हर मोर्चा म विफल रिहीन।कैबिनेट निर्णय
राज्य कैबिनेट के आज होय बइठका म छत्तीसगढ़ कृषक कल्याण परिषद के पुनर्गठन के प्रस्ताव ल अनुमोदित करे के संग कतकोन महत्वपूर्ण निर्णय ले गीस।
ए बइठका मुख्यमंत्री भूपेश बघेल के अध्यक्षता म रईपुर स्थित मुख्यमंत्री निवास म आयोजित करे गीस। एमा राज्य सरकार के सबो सासकीय विभाग डहार ले प्रदेस के प्रदायक ले ही सामान खरीदे के फइसला ले गेहे। एखर बर छत्तीसगढ़ शासन भंडार क्रय नियम म संसोधन के प्रस्ताव के अनुमोदन करे गीस। उहें, गोधन न्याय योजना के तहत उत्पादित वर्मी कम्पोस्ट के बिक्री दर आठ रूपिया प्रति किलोग्राम ले बढ़ाके दस रूपिया प्रति किलोग्राम करे के निर्णय ल मंत्री परिषद डहार ले अनुसमर्थन करे गीस।
मंत्रिमंडल के ए बइठका म राजकोषीय उत्तरदायित्व अउ बजट प्रबंध संशोधन विधेयक अउ विधानसभा म द्वितीय अनुपूरक बजट पेस करे बर छत्तीसगढ़ विनियोग विधेयक के प्रारूप के घलो अनुमोदन करे गीस। एखर अलावा राज्य के जिला मुख्यालय अउ प्रमुख सहर म बने जर्जर भवन ल पुर्नविकसित करे के फइसला घला ले गीस।
उहें, राज्य के निर्माण काम के ठेका मन म एकीकृत पंजीयन व्यवस्था के तहत ई-श्रेणी के मापदंड म संसोधन के फइसला ले गीस।
केंद्र धान खरीदी
केंद्र सरकार ह कीहिन हे कि चालू खरीफ विपणन मौसम म पाछू बछर के तुलना म धान के खरीदी म बाईस दशमलव एक चार के बढ़ोत्तरी होय हे। कृषि मंत्रालय ह कीहिन हे कि अब तक तीन सौ नब्बे लाख जादा धान के खरीदी करे जा चुके हे।
मंत्रालय ह यहू कीहिन कि न्यूनतम समर्थन मूल्य के आधार म खरीफ के फसल के खरीदी करे जात हे। छत्तीसगढ़ संग आने राज्य म धान के खरीदी बने ढंग ले चालू हे।
राज्य म अब तक पच्चीस लाख मीट्रिक टन ले जादा के धान के खरीदी हो चुके हे। प्रदेश के करीबन सात लाख किसान समर्थन मूल्य म अपन धान ल बेच डरे हे।
किसान सम्मान निधि
प्रधानमंत्री किसान सम्मान निधि योजना के तहत किसान मन के बैंक खाता म सलाना छह हजार रूपिया जमा करे जात हे। ए रासि दू-दू हजार रूपिया के तीन किश्त म दे जाथे। योजना के पहली किश्त अप्रैल ले जुलाई, दूसरा किश्त अगस्त ले नवंबर अउ तीसरा किश्त दिसंबर ले मार्च महीना के बीच म दे जात हे। जउन किसान ए योजना के लाभ लेवत हे, ओमन आधिकारित वेबसाइट ‘‘पीएम किसान डाॅट जीओवी डाॅट इन‘‘ म जानकारी ले सकथे।
जेईई-मुख्य परीक्षा
केंद्रीय शिक्षा मंत्री रमेश पोखरियाल निशंक ह घोषणा करे हे कि दू हजार इक्कीस ले जेईई मुख्य परीक्षा साल म चार बार आयोजित करे जाही। शिक्षा मंत्री ह कीहिन कि एखर ले विद्यार्थी मन ल अपन अंक सुधारे के अच्छा मउका मिलही।
ओमन कीहिन कि उंखर मंत्रालय ह आने आने छात्र संगठन ले मिले सुझाव के आधार म हर बछर फरवरी मार्च अप्रैल अउ मई म ये परीक्षा आयोजित करे के निर्णय लेहे। ओमन बताइन कि पहिली चरण म फरवरी म तेईस ले छब्बीस तारीख के बीच परीक्षा के आयोजन करे जाही। ओमन यहू घलो कीहिन कि विद्यार्थी मन ल नब्बे सवाल ले कोनो पचहत्तर सवाल के जवाब देना होही। उंहें पंद्रह वैकल्पिक सवाल के नकारात्मक मार्किंग नइ करे जाही।
चिराग परियोजना
बस्तर अंचल के आदिवासी किसान मनके आय म बढ़ोत्तरी बर एक हजार छत्तीस करोड़ रूपिया के चिराग परियोजना ल विश्व बैंक ह अपन मंजूरी दे देहे। अधिकारिक जानकारी के अनुसार छः बछर के ए परियोजना के तहत बस्तर संभाग म सात जिला के तेरा विकासखंड ल फायदा मिलही। योजना के उद्देश जलवायु परिवर्तन के अनुसार उन्नत कृषि उत्तम स्वास्थ्य बर पोषण आहार कृषि अउ आने उत्पाद के मूल्य संवर्धन करके किसान मन ल जादा ले जादा लाभ दिलाना हे। ए परियोजना के तहत गौठान मन ल केंद्र म राखके आने आने काम करे जाही।
गुरू घासीदास-जयंती
सतनाम पंथ के प्रवर्तक बाबा गुरू घासीदास के जयंती काली मनाय जाही। ए मउका म अपन संदेस म मुख्यमंत्री भूपेश बघेल ह प्रदेसवासी मन ल सुभकामना दीन। ओमन कहिन कि बाबा गुरू घासीदास ह दुनिया ल सामाजिक सद्भाव के रद्दा दिखाईन।
घासीदास जयंती के मउका म काली राजधानी रईपुर के घासीदास काॅलोनी के संगेसंग मुंगेली के लालपुर धाम अउ भिलाई के सतनाम भवन म आयोजित कारीकरम म मुख्यमंत्री सामिल होही।
शिक्षा कार्यक्रम
राज्य के सरकारी स्कूल मन म पढ़ईया पहिली ले आठवीं कक्षा तक के विद्यार्थी मन म हिन्दी अउ गणित विषय के बुनियादी दक्षता ल सौ दिन म विकसित करे जाही। एखर बर – ‘‘इतना तो मेरे बच्चे कर ही सकते हैं‘‘ – कार्यक्रम के संचालन करे जात हे।
स्कूल शिक्षा विभाग के प्रमुख सचिव डॅाक्टर आलोक शुक्ला ह ए कार्यक्रम ल सुचारू रूप ले संचालित करे बर जिला कलेक्टर मन ल दिशा निर्देश जारी करे हे। ओमन कीहिन कि जिला कलेक्टर कार्यक्रम के निगरानी करय, जेखर ले हरएक विद्यार्थी हिंदी अउ गणित विषय के अच्छा शिक्षा ले सकय। ए कार्यक्रम के बाद लईका के शिक्षा के स्तर देखे बर बीस दिसंबर ले अवइया बछर मार्च महीना तक आकलन प्रक्रिया चलाय जाही।
हाथी आतंक
बालोद जिला के डौंडी ब्लाॅक के लिमउडीह गांव म हाथी मनके हमला ले एक झिन ग्रामीण के मउत होगे। बताय जात हे कि ए इलाका म जंगली हाथी मनके दल ह विचरण करत हे। एखर बचाव बर पाछू रतिहा जब ग्रामीण मन अलाव जलाके रतजगा करत रीहिन, तभे हाथी मन ह हमला कर दीन।
उंहें गौरेला-पेण्ड्रा-मरवाही जिला के पसान रेंज म घलो जंगली हाथी मनके दल ह उत्पात मचात हे। ए क्षेत्र म पाछू करीबन डेढ़ महीना के दउरान होय हाथी के हमला म तीन लोगन के मउत होगे हे। वन विभाग ह सरलग हाथी मनके गतिविधि म नजर राखे हे। संगेसंग हाथी मनके ए दल ल खदेड़े बर पश्चिम बंगाल ले हुल्ला पार्टी ल बलाय गेहे। मरवाही क्षेत्र वनमंडल ले सटे क्षेत्र मन म रहइया ग्रामीण मन दहशत म हे।
कमार जनजाति-अध्यक्ष
राज्य म बिसेस रूप ले कमजोर जनजाति समूह बर गठित कमार विकास अभिकरण अउ प्रकोष्ठ म अध्यक्ष अउ सदस्य मनके मनोयन कर दे गेहे।
आदिम जाति अउ अनुसूचित जाति विकास विभाग डहार ले आदेस के अनुसार कमार विकास अभिकरण गरियाबंद के अध्यक्ष सुखचंद कमार ल बनाय गेहे। उहें, कमार विकास प्रकोष्ठ महासमुंद के अध्यक्ष मोतीराम कमार अउ भानुप्रतापपुर प्रकोष्ठ के अध्यक्ष मनराखन ल मनोनीत करे गेहे।