नया संसद भवन
प्रधानमंत्री नरेन्द्र मोदी ह आज नई दिल्ली म संसद मार्ग म नवा संसद भवन के आधारसिला राखीन। आने-आने धर्म गुरू मन ह सर्वधर्म के प्रार्थना करीन। ए मउका म श्री मोदी ह किहीन कि नवा संसद भवन एक ठिन अइसे जगह होही, जउन इक्कीसवीं सदी के भारत के आकांक्षा ल पूरा करही। ओमन ह कहिन कि ए आत्मनिर्भर भारत निर्माण के साक्षी होही। उहें, प्रधानमंत्री ह आधारसिला ल रखे जाय के मउका ल भारत के लोकतांत्रिक इतिहास म मील के पत्थर बतईन।
इही कड़ी म छत्तीसगढ़ के राज्यपाल अनुसुईया उइके नवा संसद भवन के सिलान्यास समारोह म राजभवन ले वर्चुअल रूप म सामिल होईन।
पीएम-वाणी योजना
प्रधानमंत्री नरेन्द्र मोदी ह कहिन हे कि ऐतिहासिक पीएम-वाणी योजना ले तकनीक के दुनिया म बदलाव आही अउ देसभर म वाई-फाई के उपलब्धता म सुधार होही। श्री मोदी ह कहिन कि एखर ले व्यापार करना अउ जादा आसान होही। ए योजना ले छोटे दुकानदार मन वाई-फाई सुविधा के इस्तेमाल कर सकही, जेखर ले आय बाढ़ही अउ जवान लइका मन ल अच्छा इंटरनेट कनेक्टिविटी मिलही अउ डिजिटल इंडिया मिशन ल मजबूती मिलही।
वीरनारायण शहादत दिवस
राज्य के पहिली स्वतंत्रता संग्राम सेनानी शहीद वीरनारायण सिंह के आज सहादत दिवस हरय। ए मउका म राज्यपाल अनुसुईया उइके ह आज राजधानी रईपुर के जयस्तंभ चउक म सहीद वीरनारायण सिंह ल श्रद्धांजलि अर्पित करीन। राज्यपाल ह सहीद वीरनारायण सिंह के परिवार ल दू लाख रूपिया के आर्थिक मदद देके घोसना करीन।
उहें, मुख्यमंत्री भूपेश बघेल ह आज सोनाखान म वीरनारायण सिंह के सहादत दिवस म आयोजित कारीकरम म सामिल होईन। ए बेरा म ओमन किहीन कि स्वतंत्रता आंदोलन के गौरवसाली इतिहास म सहीद वीरनारायण सिंह के बलिदान हमेसा सुरता राखे जाही।
ऐति, बालोद जिला के गुरूर विकासखंड म आदिवासी समाज डहार ले ‘‘वीर मेला‘‘ कारीकरम के आयोजन करे गीस, जेमा महिला अउ बाल विकास मंत्री अनिला भंेडिया घलो मौजूद रिहीन। ए मउका म आदिवासी समाज के प्रतिभावान विद्यार्थी मन ल सम्मानित करे गीस।
उहें, कोंडागांव म कांग्रेस जिला मुख्यालय म श्रद्धांजलि कारीकरम के आयोजन करे गीस। ए मउका म प्रदेस कांग्रेस अध्यक्ष मोहन मरकाम ह सहर के चैपाटी मैदान म सहीद वीरनारायण के प्रतिमा के अनावरण करीन।
शहरी गवर्नेंस-सूची
सहरी गवर्नेंस के मामला म छत्तीसगढ़ ल एक ठिन अउ उपलब्धि मिले हे। दिल्ली के प्रज्ञा फाउंडेशन डहार ले सहरी गवर्नेंस इंडेक्स के सूची म छत्तीसगढ़ ल पूरा देस म तीसर जगह मिले हे। ए रैंकिंग म ओड़िसा पहिली अउ महाराष्ट्र दूसर जगह म हवय।
मुख्यमंत्री भूपेश बघेल अउ नगरीय प्रसासन मंत्री डाॅक्टर शिवकुमार डहरिया ह ए उपलब्धि बर सहरवासी अउ विभागीय अधिकारी के संगेसंग करमचारी मन ल बधाई दीन हे।
जानबा के मुताबिक स्थानीय निकाय के ससक्तीकरण, जमीनी स्तर म लोकतंत्र के स्थिति, सहरी नियोजन, भू-उपयोग के नियमन अउ आर्थिक, सामाजिक विकास योजना के संगेसंग आने-आने बिन्दु के आधार म ए सूची जारी करे गेहे।
माओवादी-आत्मसमर्पण
दंतेवाड़ा जिला म घर वापसी अभियान के चलत तीन झिन इनामी सहित दस झिन माओवादी मन ह आत्मसमर्पण करीन। ए माओवादी मन ह पुलिस अधीक्षक अउ जिला कलेक्टर के आगू आत्मसमर्पण करीन। आत्मसमर्पित माओवादी मन म गंगालूर एरिया समिति के सदस्य बामन सोढ़ी घलो सामिल हे, जेखर उपर पुलिस ह पांच लाख रूपिया के इनाम घोसित करे रिहीस। ए जम्मों माओवादी मन उपर जवान मन उपर हमला समेत कई आने-आने गंभीर वारदात म सामिल रेहे के आरोप हे।
उहें, बीजापुर जिला म सुरक्षा बल मन ह एक झिन माओवादी ल गिरफ्तार करे हे। जिला पुलिस बल अउ छत्तीसगढ़ ससस्त्र बल-सीएएफ के जवान मन ल फरसेगढ़ थाना क्षेत्र ले ए मिलिसिया डिप्टी कमांडर ल गिरफ्तार करीन।
धान खरीदी-01
प्रदेस म अभू तक समर्थन मूल्य म तेरह लाख इक्कीस हजार मीटरिक टन ले जादा धान के खरीदी हो चुके हे। अभू तक तीन लाख उनहत्तर हजार ले जादा किसनहा मन ह समर्थन मूल्य म अपन धान बेचे हे। एखर एवज म किसनहा मन ल एक हजार पांच सौ करोड़ रूपिया के रासि के आॅनलाईन भुगतान करे गेहे।
ऐति, बिलासपुर के संभाग आयुक्त डाॅक्टर संजय अलंग बिलासपुर, जांजगीर-चांपा अउ मुंगेली म धान खरीदी अउ बारदाना के बेवस्था के समीक्षा करीन। एखर बर संभाग आयुक्त ह मार्कफेड के प्रबंध संचालक अंकित आनंद अउ तीन ठिन जिला के कलेक्टर मनके बइठका लीन।
मार्कफेड के प्रबंध संचालक ह जिला कलेक्टर मन ल निरदेस देहे कि छोटे किसनहा मन ले धान के खरीदी प्राथमिकता के आधार म करे जाय।
उहें, राजनांदगांव जिला म समर्थन मूल्य म धान बेचे म परेसानी अउ एखर ले जुड़े समस्या के निराकरण खातिर सिविर लगाय के फइसला ले गेहे। जिला कलेक्टर टोपेश्वर वर्मा ह समय-सीमा के बइठका म राजस्व अधिकारी मन ल निरदेस देवत किहीन कि रकबा सुधार बर प्राप्त किसनहा मनके आवेदन के तुरते निराकरण करे बर सिविर लगाय जाही। संगेसंग किसान पंजीयन रकबा के एंट्री, रकबा के कमी, गिरदावरी म त्रुटि अउ धान बेचे म कोन्हों भी परकार के जानकारी डायल-112 म दे सकत हे।
धान खरीदी-02
इही बीच, राजनांदगांव जिला के घुमका धान खरीदी केन्द्र म काली होय एक झिन किसनहा के मउत ल लेके अनुविभागीय दंडाधिकारी ह प्राथमिक जांच प्रतिवेदन देहे। एखर अनुसार गिधवा गांव के किसान करण साहू के तबीयत ठीक नइ रिहीस। एखरे सेती धान बेचे के बेरा उंखर मउत होगे। प्राथमिक जांच प्रतिवेदन म बताय गेहे कि मृतक के बेटा अउ सहायक समिति प्रबंधक सहित आने-आने लोगन मन ए बात के पुष्टि करीन हे।
वर्चुअल मैराथन
छत्तीसगढ़ म पहिली घांव तेरह दिसंबर के वर्चुअल मैराथन दउड़ के आयोजन करे जाही। ए दउड़ म सामिल होय बर छियालीस हजार प्रतिभागी मन ह आॅनलाईन पंजीयन कराय हे, जेखर आज आखिरी तारीख रिहीस।
राज्य म हर जिला म पहिली तीन सौ ले पांच सौ तक पंजीयन कराय वाले प्रतिभागी मन ल टी-सर्ट देके ओमन ल प्रोत्साहित करे जाही। ए बेरा म कोरोना संक्रमण के दिसा-निरदेस के पालन करत हुए प्रतिभागी मन कोन्हों भी जगह म एक संघरा इकट्ठा नइ होही। प्रतिभागी मन अपन घर, पार्क, मैदान, रद्दा या फेर कोन्हों आने सुरक्षित जगह म सोसल डिस्टेंसिंग के पालन करत बीस से तीस सेकेंड के अपन दउड़त हुए वीडियो या फेर फोटू खींचही। एखर बाद हैश टैग करके फेसबुक, ट्वीटर अउ इंस्टाग्राम जइसन सोसल मीडिया म तेरह दिसंबर के बिहनिया छह ले ग्यारह बजे तक अपलोड कर सकत हे।
संक्षिप्त समाचार
अउ अब थोरकुन समाचार सार म-
– रईपुर ले ड्रग्स तस्करी के मामला म पुलिस ह दू लोगन मन ल गिरफ्तार करे हे। पुलिस अउ साइबर सेल के टीम ह आरोपी मन करा ले कोकीन अउ ड्रग्स घलो बरामद करे गेहे।
अउ
– गरियाबंद जिला म पाछु दिन एक ठिन सादी समारोह म होय गोलीकांड मामला म एक झिन आरोपी सहित तीन लोगन मन ल गिरफ्तार करे हे।